MUSHINDO WA KUKAMBILA MUSHIKUA

2 | Tokimbanga Kuiobuela

Bible amba’shi:

“Tanwaluishanga muntu bubi pa bubi. . . . Su mbya kukitshika, kimbayi bya kushaala mu butaale na bantu booso. Tanwiobwelanga anwe banabeene, . . . mwanda mbafunde’shi: ‘“Koobola nkwande; ami afutanaa,” ngi abyamba Yehowa.’”—BENA-LOOMA 12:17-19.

Ki’abipatuula:

Sunga biekala’shi kufiita munda takui bubi, Efile Mukulu ta mmukumiine kuiobuela nya. Anka, etunyigisha buatudia kuikala na luishinko muanda binobino akiebe kupudisha mianda yoso ya kukutua kua kululama.—Misambo 37:7, 10.

Kiodia kukita:

Muntu mukutue kupuidika nsaa y’eobuela, anyiisha kufuimisha mushikua. Biabia, su muntu bakuluishisha sunga nkukita bi bubi, tomualuishanga bianka. Tompa kukita mianda mu butaale na kuikanda. Ingi nsaa mushindo wi buwa, ngua kutadiila muanda. (Nkindji 19:11) Eyendo’shi, ingi nsaa su omono’shi bi na muulo, nui balombene kuisamba wawa muanda. Bu kileshesho, su mbakukitshine kibeshi kampanda, we kuata kitshibilo kia kutuala muanda ku ba mpulushi sunga kui bangi bakata.

Kukimba kuiobuela akunyishaa kufuimisha mianda

We kukita kinyi su omono’shi ta kui mushindo wa kupudisha muanda mu butaale? Sunga’shi bi kuikala naminyi su bopu kukita moobe mooso bua kupudisha muanda mu butaale? Tokumanga kuiobuela. Kukita biabia nkulombene kunyiisha kuluisha muanda. Kadi su opela kuiobuela, okambila mushikua. Olongo bia kukulupila mu mushindo aupuiyaa Efile Mukulu mianda. “Kulupila kwadi, byaabya akukitshiina byooso.”—Misambo 37:3-5.

Muanda ukitshikie—ADRIÁN

Mmukambile binangu bia kuiobuela

Pabaadi ki mu bipua ekumi na bungi, Adrián baadi alu ngoshi mu kilayi na mushikua ooso na lukalo lua kuiobuela. Amba’shi: “Naadi nepana mu ngoshi ya ma mputu, na misango i bungi naadi nashaala na mase tompoloshii mbandekie mu kilayi bu muntu baapu kufua.”

Adrián babangile kulonga Bible pabaadi mu bipua 16. Amba dingi’shi: “Panaadi nende na kulonga Bible, namuene’shi bi na muulo buandia kushintuula bu muntu buande.” Baadi na lukalo lua kukatusha mushikua na kuleka etombo. Atentekiesha bikishekishe bibalongiele mu mukanda wa Bena-Looma 12:17-19 pabitale kuiobuela. Amba’shi: “Nafikile mu kukumiina’shi Yehowa akakatusha kukutua kua kululama pa nsaa y’akumiina. Kapeelakapeela, nalekiele nshalelo ande a etombo.”

Dingi efuku ku kiolua, kingi kisaka kia ba nsongua abaadi abalu nabo kumpala kibafikile mu kulua na Adrián. Mukata aabo belele musaase’shi: “Fika tulue!” Adrián ashinkamisha’shi: “Naadi na lukalo lukata lua kulua ngoshi.” Anka pamutue wa kuiobuela, belele luteko kui Yehowa mu kikoso na aye nkukatuka.

Adrián akumbasha’shi: “Butookie, nafumankene na mukata a kiakia kisaka bupeka buaye. Napushiishe nsungu i bukopo na binangu bia kuiobuela, anka dingi ami nkuela luteko mundamunda nateka Yehowa buadia kunkuasha nekande. Naadi napuandikisha’shi ekala dingi na nsungu, anka naadi mukaanye pabaadi mundungule’shi: ‘Nfuile namu lusa bua bikidikile bufuku bushaale. Kia binyibinyi nkino, nakiebe kuikala biodi. Nakumiina kulonga Bible.’ Naadi na muloo ukata pa kumona’shi naadi mulame nsungu yande! Pa muanda wa biabia, tubabangile kulonga booso Bible.”