MUSHINDO WA KUKAMBILA MUSHIKUA

1 | Tuekalanga Na Ntondo

Bible amba’shi:

“Efile Mukulu tee na ntondo na’shi mu kisamba kyooso, muntu ooso amutshinyi na akitshi myanda ya kululama apokyelwa kwadi.” —BIKITSHINO 10:34, 35.

Ki’abipatuula:

Yehowaa Efile Mukulu t’etutshibilaa kiimu muanda w’eumbo dietu, ekoba, elangi dia mbidi, sunga kipikua kietu nya. Anka, atulaa binangu ku biabia—biatudi munda muetu. Bible amba dingi’shi, ‘bantu abamonaa àkììleèsha ku meeso aabo, ank’Efile Mukulu atalaa eshimba.’—1 Samwele 16:7.

Kilombene nkukuasha:

Sunga biekala’shi ta tui balombene kumona bi mu mashimba a bantu, tui kuambula Efile Mukulu na kutala bangi kushii na ntondo. Tompa kumona muntu pa bupenka kushii bu kisaka kia bantu nya. Su bomono’shi we na mueneno e bubi bua bangi, pangi baaba ben’ekoba dilekene na diobe sunga ba mu dingi eumbo, teka Efile Mukulu bua’shi akukuashe okatushe yawa mueneno. (Misambo 139:23, 24) Su botekie Yehowa bua’shi akukuashe olekie kuikala na ntondo, shinkamisha’shi akuteemesha na nkukuasha.—1 Mpyeele 3:12.

a Yehowa nyi eshina di’Efile Mukulu.—Misambo 83:18.

“Kumpala ntshi naadi mu butaale na musungu su ngumune . . . Anka binobino ntandi mu kifuko kia mu nsenga ishima kia bakuetu balume na bakashi.”—TITUS

Muanda ukitshikie:—TITUS

Mmukambile mushikua

Titus baadi mu kisaka kia bantu abaadi batombokiele miiya ayikaluila bantu b’ekoba kampanda na kukiengiesha ba dingi ekoba. Amba’shi: “Tubaadi atuende mu lupata mbalo yabashibaadi abakumiina bantu bafiita, bu mu ma otele, ma bare penda bua ku kolomoshena.” Titus amba’shi baadi na mushikua wi bukopo, akumbasha’shi: “Su natontoola na muntu, biekala mulume sunga mukashi, naadi nka nabanga naaye looshi.”

Titus babangile kushintuluka pa babangile kulonga Bible na Tumonyi tua Yehowa. Pa babadikile Bible, bibamukuashile bua kuikala na ungi mmueneno. Baadi mukumiibue kuishimba na mulayilo wa mafuku e kumpala wa’shi: “Lufu taalwikala kwanka dimo. Taakwikala dimo maalo, sunga kwidila.”—Kibafumbwilwe 21:3, 4.

Ku mbangilo, Titus baadi muitatshishe ngofu buadia kukatusha mushikua muishimba diaye. Amba’shi: “Bibaadi bukopo buandia kushintuula ngielelo ande a binangu na bikitshino biande.” Kadi bibaadi mulongie mu mukanda wa Bikitshino 10:34, 35, bibaadi bimukuashe, muanka abalesha’shi Efile Mukulu te na ntondo.

Nkipeta kinyi kiadi mupete? Titus apatuula’shi: “Ne mufikie mu kushinkamisha’shi Tumonyi tua Yehowa tui mu kipuilo kia binyibinyi panamuene kifulo ki munkatshi muabo, sunga bekala b’ekoba sunga elangi kinyi. Sunga kumpala kuandia kubatshishibua bu Kamonyi, musungu a mu kakongie baadi mungitamine kuaye buatudia kudia kakudia. Bibaadi nka bu kilotua. Kasha ntshinaadi mushaale mu butaale na musungu, kadi paapa tubaadi bashaale atudi mu nshibo muaye. Binobino ne mu kifuko kia binyibinyi kia mu nsenga ishima.”