MUSHINDO WA KUKAMBILA MUSHIKUA

3 | Katusha Mushikua Mu Binangu Biobe

Bible amba’shi:

“Ikalayi baalulukye pa kukimba binangu bipya, bwanudy’a kupatuula’shi nkinyi akikyebe Efile Mukulu: kyaakya kiibuwa, kyaakya kimulongamine, kyaakya kipwidikye.”—BENA-LOOMA 12:2.

Ki’abipatuula:

Mianda yatunangushena i na muulo ku meso ku’Efile Mukulu. (Yeelemiya 17:10) Tatukumanga kuimeena nka penda pa kupela kuakula sunga kukita mianda ayilesha mushikua. Mushikua aubangilaa mu binangu na mu mashimba eetu. Nyi buakinyi, abitungu tukatushe mushikua mu binangu na mu mashimba eetu. Anka su tubakitshi biabia nyi patudia “kualuluka” na kukambila mushikua.

Kiodia kukita:

Nangushena kalolo pabitale ngielelo oobe a binangu na bi muishimba diobe pabitale bangi, bikishekishe baaba ba dingi ekoba sunga dingi eumbo. Eyipushe’shi: ‘Nebamonaa naminyi? Mueneno ande mmuimeene nka penda pa bianguku buabo su? Su mmuimene pa ntondo?’ Shikua kubadika, kutala ma filme sunga kukisha kapapi na bintu abitakula bantu mu kuikala n’etombo na mushikua.

Eyi di’Efile Mukulu ndilombene kuitukuasha bua kukambila mushikua mu mashimba na mu binangu bietu

Ta mbibofule bodia kuitaluula obe nabene kalolo nya. Anka Eyi di’Efile Mukulu ndilombene kuitukuasha buatudia ‘kupatuula mpango na binangu bia muishimba.’ (Bena-Ebelu 4:12) Biabia tungunuka na kutaluula abiamba Bible. Puandikisha malongiesha e muanka na binangu biobe, na okite moobe mooso bua’shi binangu biobe bipushene na akilongiesha Bible. Eyi di’Efile Mukulu ndilombene kuitukuasha buatudia kukambila mushikua ‘ushimate ngofu’ mu binangu na mu mashimba eetu.—2 Bena-Kodinda 10:4, 5.

Muanda ukitshikie—STEPHEN

Mmushintuule ngielelo aaye a binangu

Stephen na ba mu kifuko kiaye abaadi bebakiengieshe ngofu kui basungu abaadi bebashikue. Pa muanda wa biabia, baadi mutuele mu kisaka kia politike kibaadi akilu bua bulungantu bua bantu. Kunyima, aye nkutuela mu bikitshino biabo bi’etombo dia mushikua. Stephen amba’shi: “Ingi misango tubaadi atuende na benami mu kutala ma filme aalesha bibaadi basungu abakiengiesha bapika ba mu Afrike mu États-Unis. Bua nsungu ya kuakua kukutua kua kululama, tubaadi atuipa ba nsongua basungu babaadi bashaale muamua muatubaadi atutala filme. Akupu tubaadi atuende mu kartie ka basungu atukimbi bantu be bungi batudia kukupila.”

Mueneno a Stephen baadi mushintulukie ngofu pabaadi mubangie kulonga Bible na Tumonyi tua Yehowa. Atentekiesha’shi: “Pamuanda naadi munkatshi mua bantu be na ntondo y’ekoba, namuene mianda ibaadi inkaanyishe kui Tumonyi tua Yehowa. Kileshesho, dingi efuku pabaadi musungu muikale Kamonyi ka Yehowa muende mu luendo, balekiele bana baaye mu kingi kifuko kia bantu bafiita. Na dingi, kifuko kia basungu kibaadi kiate bana ba bantu bafiita ku mashibo aabo abaadi bakutue mbalo ya kushaala.” Stephen babangile kushinkamisha’shi Tumonyi tua Yehowa nyi bantu be buwa kushaala nabo babaadi Yesu muambe’shi abekala munkatshi mua bena Kidishitu ba binyibinyi.—Yowano 13:35.

Nkinyi kibaadi kikuashe Stephen buadia kuleka mushikua n’etombo? Kifundue kia mu Bena-Looma 12:2 kibaadi kimukuashe. Amba’shi: “Nabangile kumona’shi abitungu nshintuule binangu biande. Nalekiele etombo na mushikua nalonga’shi kuikala na butaale nyi nshalelo e buwa.” Binobino Stephen e mu nshalelo a kukutua mushikua takudi bipua bikile pa 40.