We kupeta butaale sunga kuekala ngoshi
Gary baadi musalayi amba’shi, “kumpala kua kulonga Bible tshi naadi nauku buakinyi bu ntomboshi, kukutua kua kululama, na kafutakanyi bi pa nsenga.” Anka binobino ne na butaale. Nauku’shi Efile Mukulu akekasha butaale pa nsenga.
Gary te bupenka nya. Tutale bukuashi bupete bangi kukiila ku Bible.
BIBLE AMBA’SHI: “Obe Yehowa we buwa, sha lusa.”—Misambo 86:5, EEM.
BIMUKUASHE KINO KIFUNDUE: “Kino kifundue akinshikamiisha’shi Yehowa sha lusa. Nauku’shi anfuila lusa ku bioso bi naadi mukite pa naadi mu ngoshi.”—Wilmar a mu Colombie.
BIBLE AMBA’SHI: “Naakapanga eyilu dipya na nsenga ipya; byaabya bantu taabatentekyesha dimo myanda ya kala, taayiibafwila dimo ku mashimba nya.”—Yeshaya 65:17, BB.
BIMUKUASHE KINO KIFUNDUE: “Naadi mupete lukalakashi lua mu binangu muanda wa bi naadi namono mu busalayi. Kino kifundue akintentekiesha’shi binobino, Yehowa akatusha mianda i bubi i mu binangu biande. T’abikashala dingi mu binangu biande sunga muishimba diande. Uno nyi muanda wi buwa bukile!”—Zafirah a mu États-Unis.
BIBLE AMBA’SHI: “[Mu] mafuku a Bufumu bwaye, mululame atangale, kwiyikeela kutame nyaaa na ku mpwilw’a myeeshi.”—Misambo 72:7, BB.
BIMUKUASHE KINO KIFUNDUE: “Ke bungi na nangushenaa pabitale ano mayi. Binobino, ngoshi na bukitshishi buayo bui bubi, t’abikala dingi kuanka nya, na tatuikala atutshinyi’shi bakuetu be mu masaku.”—Oleksandra a mu Ukraine.
BIBLE AMBA’SHI: “Bafwe boobe abapete dimo muuwa. . . . Buukayi nwele misaase ya muloo, anwe balaale mu nsenga!”—Yeshaya 26:19, BB.
BIMUKUASHE KINO KIFUNDUE: “Kifuko kiande kioso abaadi bekipee kui kisamba kibaadi akikiebe kuipaa ba Tutsi boso. Anka kino kifundue akinshinkamisha’shi nakebamono dingi. Natengiela n’eshimba kuiyilu nkapusha mayi aabo nsaa y’abakasanguka!”—Marie a mu Rwanda.
BIBLE AMBA’SHI: “Kapindji n’aka, taakuikala mubi dimo; . . . Beyishe namu, abapyana nsenga, abasangeela mu butaale bw’eyendo.”—Misambo 37:10, 11, BB.
BIMUKUASHE KINO KIFUNDUE: “Sunga biabidi’shi ngoshi ngipue kupua, kukutua kululama na bantu babi bakinka kuanka. Kino kifundue akimpaa bukome. Yehowa amonaa na kupusha mianda yoso yandi nayo. Mulee’shi ino mianda yoso ayipu na tatuiyitentekiesha dingi.”—Daler a mu Tajikistan.
Bantu boso batudi batemune mu kino Kitenta kia Mulami, be munkatshi mua Tumonyi tua Yehowa tuabadi bakuashe kui Bible bua kupeta butaale. Mbalongie bia kukambila mushikua w’ekomba, kifulo kikishekishe ki’eumbo, kisamba, na bantu be bubi. (Bena Efeso 4:31, 32) Tumonyi tua Yehowa t’atutuelakanaa mu mianda ya politike sunga kukila lupese kampanda mu ngoshi.—Yowano 18:36.
Dingi, Tumonyi tua Yehowa atuikuashenaa mu kifuko kiabo kia kifulo ki mu nsenga ishima. (Yowano 13:35) Bu kileshesho, Oleksandra, atudi batemune kunuundu, na taata aaye, abaadi basuukie mu dingi eumbo pa muanda wa ngoshi. Amba’shi: “Nkatue baki’abasambuka mikalo, tubamuene Tumonyi tua Yehowa tubaadi paapa bua kuitukukila. Abaadi betukuashe bua kuubiila muiumbo dipia muatudi bu bantu basuukie ngoshi.”
Tumonyi tua Yehowa atukuitamina na muloo oso bua kutuela ku bisangilo bietu, mokalongo mukandu wa butaale wa mu Bible na bia kuiutumikila. Tuela mu jw.org bua kupeta mbalo ayikitshikaa bisangilo bietu i pepi na mbalo yodi sunga kuteka bua kulonga Bible buntu na Tumonyi tua Yehowa, pa kufubisha mukanda wa We kuikala na muloo bua loso!