Ba manseele babaafiki bakwetu ba mu kikudi

Felisa: Ne mukudile mu kifuko kishaadile mu Espagne. Tubaadi beena Katolike mu kifuko kyetu, na tubaadi atulangwila na katshintshi. Byabya, bakweetu 13 abaadi ba mumpeele sunga’shi abaadi abafubu mu kipwilo. Mwipu a mama baadi mumpeele akupu mulongyeshi mu kalasa ka beena Katolike. Kunyima kwa lufu lwaye, Pape Jean-Paul II baadi mumupe kineemo kikata na kumwelela myabi. Nshami baadi nsendwe, na mama baadi adimi mafuba. Tubaadi bana mwanda mu nshibo yetu, ami naadi mwana mbedi.

Panaadi na bipwa 12, ngoshi ya miilo ibatukile mu Espagne. Kunyima kwa ngoshi, abatumine nshami mu lukano mwanda mbulamatadi tabaadi mukumiine binangu byaye bya politike. Byatubaadi bana mwanda bibaadi bukopo kwi mama bwadya kwitudiisha. Byabya batumine beena bande basatu bakashi, Araceli, Lauri, na Ramoni, bwa kushaala na ba manseele ku couvent mu kibundji kya Bilbao. Beena bande babaadi balombeene kudya kalolo kwakwa.

Araceli: Panaadi na bipwa 14, mwin’ande Lauri baadi na bipwa 12 na Ramoni na bipwa 10. Tubaadi bakumiine kifuko kyetu bikile. Patubaadi mu couvent mudimo weetu ubaadi wa kusuula. Kunyima kwa bipwa bibidi, ba manseele abetutumine ku couvent mukata mu kibundji kya Zaragoza mbalo ibaabadi abalama bantu banunu. Tubaadi atufubu bikata bwa kusuula mu mpiishi na bibaadi abitukookyesha bikile.

Felisa: Nsaa ibayiile beena bande mu couvent a ku Zaragoza, nyinaami na masaba ande baadi mumpeele mu kyakya kibundji abatshile kitshibilo bwandja kwibalonda. Abaadi abakumiina kuntuma kula mwanda wa nsongwalume baadi munkumiine. Naadi mukumiine kushaala nsaa ibungi ku couvent mwanda naadi mukumiine Efile Mukulu. Naadi nende ku kipwilo efuku dyoso, na naadi nakumiina kufika misionere bu bibaadi mwipu ande mu Afrique.

Kadi kwakwa ku couvent, napushishe bu’mi shii mulombeene kukita bintu binaadi nakumiina kukita. Ba manseele tababaadi abakumiina bwandya kufubila Efile Mukulu mu dingi eumbo bu binaadi mukulupile. Byabya kunyima kwa kipwa naalukiile ku nshibo, akupu ami nkukimba masaba ande baadi mumpeele. Naadi namukwasha ku midimo yaye ya mu nshibo, tubaadi atusambila lunsaadi efuku dyoso ku kyolwa. Naadi nakumiina dingi kulumbuula bilongo mu kipwilo na kufwadika nkishi a Madiya na ya “bansantu.”

Araceli: Panaadi mu kibundji kya Zaragoza, neelele mutshipo wande wa kumpala bwandja kwikala manseele. Akupu ba manseele abaatshile kitshibilo bwa kwitwabuula na beena bande. Byabya abantumine ku couvent a mu kibundji kya Madrid na Lauri enda ku couvent a mu kibundji kya Valence. Kadi Ramoni bashadile ku Zaragoza. Mu kyakya kibundji kya Madrid, nakitshine mutshipo wande wakabidi bwa kwikala manseele. Bantu bebungi babaadi abafiki mu kushala ku couvent, bu balongi na bantu banunu. Byabya kubaadi mudimo wibungi wa kukita. Naadi nafubu mu lupitaalo lwa ku couvent.

Mu muwa wande naadi nakumiina kwikala manseele. Tubaadi atukisha nsaa ibungi mu kubala Bible na kumulonga. Kadi naadi mukaanye. Pa kumona’shi takwi muntu su ngumune baadi afubisha Bible sunga kwisambila pabitale Efile Mukulu sunga Yesu. Naadi mulongye ndambo ya Latin, nshaleelo a “bansantu” ba Katolike, na kulangwila Madiya. Kadi ingi nsaa yooso tubaadi atufubu mudimo wibukopo.

Nabangile kwinyongola na kukalakashwa. Namwene’shi abitungu nfube mudimo wa makuta pamutwe pa kufuba ku couvent bwa kupetesha bangi bupeta. Byabya nalungwile manseele e kunundu’shi naadi nakyebe kukatuka. Anka aye nkunfungila mu kadimbo kapeela. Beelele binangu’shi kukita kwa byabya nyi kubaadi kulombeene kunkutshishwa kukatuka.

Ba manseele nkuntuusha mu kaka kadimbo, kadi pabamwene’shi naadi nakyebe kukatuka ku couvent, abaadi banfungile dimo mu kaaka kadimbo. Kunyima kwa kunfungila misango isatu, abakwile’shi bwandja kukatuka abitungu nfunde’shi: “Nakatuka mwanda nakumiina kufubila Satana pamutwe p’Efile Mukulu.” Bibantapile kwishimba bikile. Naadi nakyebe kukatuka, anka ntshinaadi mulombeene kufunda yaya myaku nya. Akupu, nakwile’shi nakyebe kwimonena na mumpeele mmulungule, na naadi mumulungule byoso bibaadi bikidikye. Balugwile évêque bwadya kungalusha ku couvent a mu kibundji kya Zaragoza. Kunyima kwa myeshi ipeela, abaadi bampe matalwa a kukatuka. Akupu, Lauri na Ramoni abakatukile ku couvent kunyima kwa mafuku apeela.

MUKANDA UBAADI WITWABUULE

Felisa: Kunyima kwa mafuku apeela abaadi bangibakile, ami nkukashaala mu Espagne mu kibundji kya Cantabria. Naadi muyididiile na kulangwila pa kyubishi. Dingi efuku mu kipwilo, mumpeele belele musase’shi: “Talaayi uno mukanda!” Betulesheshe mukanda wa La vérité qui conduit à la vie éternelle. Aye nkwakula’shi: “Su muntu bakupa uno mukanda weuntwadile sunga kwiusumbula!”

Ntshinaadi na wawa mukanda nya kadi naadi neukimbi. Kunyima kwa mafuku apeela, bana bakashi babidi abafikile mu kuntembela kwande. Abaadi Batemwe ba Yehowa, na abampeele wawa mukanda. Naadi mwiubale nka bwabwa bufuku. Pabalukiile baaba bana bakashi mu kuntala, abangipwishe su naadi nakumiina kulonga Bible, ami nkukumiina.

Naadi nakumiina kusangasha Efile Mukulu. Akupu nalongyele bya binyibinyi pabitale Yehowa, na kifulo kyande bwa’ye nkubanga kutama. Naadi nakumiina kulungula muntu ooso pabimutale. Naadi mubatshishibwe mu kipwa kya 1973. Mbalo yooso inaadi, naadi nakumiina kulungula kifuko kyande bya binyibinyi pabitale Yehowa. Kadi kifuko kyetu, bikishekishe mwin’ande mukashi Araceli, baadi akula nka’shi naadi mu lulangwilo lwa madimi.

Araceli: Bu bibaabadi abankitshina myanda ibubi ku couvent, napushishe sungu na kukutwa muloo bwa lulangwilo lwande. Anka naadi muyididiile na kwenda mu kipwilo mu dyalubingo mooso, na naadi nasambila lunsaadi efuku dyoso. Naadi nakimbi bya kupusha Bible, na natekyele Efile Mukulu bwadya kunkwasha. Akupu Felisa bandungwile bibaadi mulongye. Baadi na kisukusuku pabitale myanda ibaadi mukumiine ami nkumona bu’ye bafunduluka. Ntshinaadi mukumiine ku bibaadi akula nya.

Kunyima kwa mafuku, naadi mwalukye ku Madrid bwa kufuba, abo nkungibakila kwakwa. Munda mwa bipwa nafikile mu kumona’shi bantu babaadi abende mu kipwilo pa kyubishi tababaadi na nshalelo mwipushene na malongyesha a Yesu. Nyi bwakinyi naadi mwimikye kwenda mu kipwilo. Ntshinaadi dingi nakumiina mwi “bansantu” sunga bw’eshiba dya kaalo, akupu tshinaadi nakumiina’shi mumpeele mulombeene kutoosha milwisho. Naadi mpa na mukatushe binfwanyi byooso bya mu kipwilo binaadi nabyo. Tshinaadi nauku su binaadi nakitshi bibuwa. Abyo nkunkalakasha kwishimba, ami nkuyididiila na kuteka Efile Mukulu’shi: “Nakumiina nkuuka. Nkwashe namu!” Naadi mutentekyeshe’shi Batemwe ba Yehowa babaadi bankookwele ku kiibi misango ibungi, kadi kushi’mi kwibafungwila. Tshinaadi nakulupila kipwilo su nkimune nya.

Mukwetu mukashi Lauri baadi mushale mu France, kadi Ramoni baadi mushale mu Espagne. Mu kipwa kya 1980, babaabangile kulonga Bible na Batemwe ba Yehowa. Naadi mushinkamishe’shi, nka bu Felisa, abo namu tababaadi bashinguule’shi abaadi abalongo myanda ya madimi. Kunyima kwa mafuku, naadi mufumankane na Angelines baadi umune a ku beena mutumba, atwe nkufika baloole. Aye naamu baadi Temwe a Yehowa. Angelines na mulum’aye abaadi abangipusha misango ibungi su ne kukumiina kulonga nabo Bible. Abamwene’shi, sunga binaadi nakula’shi ntakumiina kwenda mu kipwilo, naadi nakumiina kuuka myanda ya mu Bible. Kunyima nebalungwile’shi: “Byoso bibuwa. Nakumiina kulonga neenu anka su nafubisha ande Bible!” Naadi na Bible a Nácar-Colunga.

NFUDIILO A BYOOSO BIBLE BAADI MWITUBUNGYE

Felisa: Panaadi mubatshishibwe mu kipwa kya 1973, kubaadi Batemwe ba Yehowa 70 mu Santandar epata dya eumbo dya Cantabria. Tubaadi atutambuka kipindji kila bwa kulungula mukandu wibuwa kwi bantu booso be mu bibundji bi mu bilometre nkama. Tubaadi atwende na myotooka mu bibundji byoso.

Munda mwa bipwa, nalongyele Bible na bantu bebungi, bantu 11 ba ku banka babaadi batambule. Bebungi ba ku bantu banaadi mulongye nabo abaadi beena Katolike. Bibaadi abitungu kwikala na lwishinko kwabadi. Nka bu’mi, bibaadi abitungu mafuku bwabadya kuuka’shi abaadi bakumiine myanda ya madimi. Naadi nauku’shi nka penda bukwashi bwa Bible na bwa kikudi kiselele kya Yehowa nyi bilombeene kukwasha muntu bwadya kushintuula binangu byaye na kupusha bya binbyibinyi. (Beena-Ebelu 4:12) Mulum’ande Bienvenido baadi mpulushi, anka, baadi mubatshishiibwe mu kipwa kya 1979, akupu nyinaami babangile kulonga Bible mafuku apeela kumpala kwa lufu lwaye.

Araceli: Panabangile kulonga Bible na Batemwe ba Yehowa, namwene’shi tabibuwa kwibakulupila. Anka, mwenda mafuku tshinadi mupushe dingi byabya nya. Batemwe tababaadi abandongyesha penda Bible nya, anka abaadi abandongyesha dingi bwa kukookyela malongyesha aaye. Lukumiino lwande mwi Yehowa na mu Bible lubabangile kutama, abyo nkumpa muloo wibungi. Bangi ba ku beena mutumba naami abamwene binaadi mushintulukye abandungwile’shi: “Araceli, ididiila mu dyady’eshinda dibosangula!”

Natentekyesha panatekyele’shi: “Bofwambuka Yehowa, kushi penda byoshi mundekyeele na kumpa mishindo ibungi ya kupeta kinaadi nakimbi​—kiukilo kya bya binyibinyi bya mu Bible.” Natekyele dingi taata’nde Felisa bwa kunfwila lusa bwa binaadi mumwakule bibubi. Kubanga nka paapa, pamutwe pa kwitupankasheena, tukwete kusangeela kwisambila pabitale Bible. Naadi mubatshishibwe mu kipwa kya 1989, panaadi na bipwa 61.

Felisa: Binobino ne na bipwa 91. Mulum’ande mmupwe kufwa, na ntshi mulombeene dingi kukita bibungi bu binaadi nakitshi kumpala. Anka, nkwete kuyididiila na kubadika Bible efuku dyoso na kwenda mu bisangilo na mu bulunguludi pooso pandji na mushindo.

Araceli: Nakumiinaa kwisamba pabitale Yehowa kwi booso ba mumpeele na ba manseele banfumankana nabo, pangi mwanda naadi manseele. Ne mwisambe kalolo na bangi ba kwabadi na bebungi mbakumiine kwata mikanda sunga ma jurnale. Anka natentekyesha mumpeele umune. Kunyima kwa kwisamba naaye munda mwa kapindji kapeela, baadi mukumiine binaadi mumulungule. Akupu bandungwile’shi: “Ne kukita kinyi na buno bukulu bwande? Beena kulangwila naami na beena kifuko be kwakula naminyi?” Namulungwile’shi: “A Efile Mukulu namu e kwamba kinyi?” Bamwene’shi namulungula bya binyibinyi na naadi mumone’shi baadi mwinyongole. Anka bibaadi abimweneka’shi tabaadi n’eshimba dinyingye bwadya kushintuluka.

Ntshi mulombeene kwilwa efuku dibandungwile mulum’ande’shi baadi akumiina kwenda nami mu bisangilo. Baadi na bipwa bitabukye pa 80 pabatwelele bwa musango wa kumpala mu bisangilo, akupu tabaadi akisha dingi bisangilo nya. Balongyele Bible abanga na kulungula mukandu wibuwa. Nakumbuka myanda ibungi ibuwa patubaadi atufubu pamune. Bafwile myeshi ibidi kumpala kwa’ye kubatshishibwa.

Felisa: Panabangile kufubila Yehowa, beena bande basatu bakashi tababaadi abakumiina nya. Anka, kunyima babafikile booso mu kukumiina bya binyibinyi. Uno nyi ngumune wa ku myanda ibaadi impe muloo wibungi. Kunyima kwa byabya, tubaadi na muloo wa kukisha nsaa pamune na kwisambila pabitale Efile Mukulu eetu Yehowa n’Eyi dyaye Bible! Akupu, tubaadi booso atulangwila Yehowa.a