Kukuasha bantu mu nsenga ishima buabadia kulonga kubadika na kufunda

Agostinho mushalele mu Brésile amba’shi: “Ne mukudile mu kibundi kishadile, tubadi na bulanda bukile. Nadi mulekie kuendanga ku kalasa bua kumona bia kufuba midimo ya kukuasha kifuko kiande.” Agostinho balongiele bia kubadika na kufunda nka pabaadi na bipua 33. Amba’shi: “Kulonga kubadika na kufunda nkumpe kinemo.”

Agostinho ngumune a ku bantu bakile pa kipindi kia mudiyo babadi balongieshe kui ba Temue ba Yehowa bia kubadika na kufunda munda mua bipua 70 bishaale. Buakinyi ba Temue ba Yehowa bakuete kukunkusha tuno tulasa? Ano malongiesha ngakuashe bantu naminyi?

Bi bukopo bua’shi muntu alongie mianda su tauku kubadika na kufunda

Munkatshi mua bipua 1930, ba Temue ba Yehowa babaadi abalungula mukandu wibuwa mu maumbo 115. Bua kulambukisha bantu abakula ndimi ilekene, ba misionere babaadi abele miisambo yabo yabadi bakobole mu ma kasete, na ingi nsaa babaadi abaabila mikanda mu ndimi ya muiumbo. Bantu bebungi babaadi na lukalo lua kulonga Bible, anka bibaadi bukopo muanda tababaadi abauku kubadika na kufunda nya.

Pa muanda baaba bantu tababaadi abauku kubadika Bible abo banabene, tababaadi abauku bia kufubila malango abemupete nya. (Yooshwa 1:8; Misambo 1:2, 3) Bibaadi bukopo bua’shi balombashe mashito aabo a buina Kidishitu. Bu kileshesho, su baledi tabauku kubadika, abikala bukopo buabadia kulongiesha bana baabo mianda y’abalongiesha mu Bible. (Miiya Ikituulwe 6:6, 7) Ba Temue bapia bashibaadi abauku kubadika, tababaadi abafubisha Bible nsaa ibaabadi abakimbi bia kulongiesha bangi nya.

Kampanye ka kulongiesha bantu bia kubadika na kufunda

Mu bipua bia 1940 na bia 1950, Nathan H. Knorr na Milton G. Henschel, babidi ba munkatshi mua bano babaadi abakunkusha mudimo wa ba Temue ba Yehowa, abayile mu maumbo elekene, bua kulumbuula mudimo wa bulungudi. Mu maumbo mubaadi bantu bashabauku bia kubadika, babaadi batekie biro bia filiale buashi bakite tulasa tua kulongiesha bantu mu tukongie.

Biro bia filiale bibaadi bitume mayi a kulonda mu tukongie na mushindo wa kukunkusha tuatua tulasa. Mu angi maumbo, mbulamatadi baadi mukite programe na mikanda ibaabadi abafubisha kui ba Temue. Kileshesho, mu Brésil, mbulamatadi badi mutumine biro bia filiale bina mudimo na mikanda, biro bia filiale namu biatumina tukongie. Mu angi maumbo abo banabene nyi babaadi balombene kulumbuula programe a kulongiesha bantu.

Balume na bakashi, na ba nsongua babaadi balombene kutuela mu tuno tulasa. Mpángo y’ato ibaadi ya kulesha abalongiesha balongi bia kubadika ludimi luabo, sunga biekala’shi kakongie kamune kabaadi kakumbene kulongiesha mu ndimi ibungi.

Programe mukuashe bantu

Uno programe a kulongiesha bantu kubadika na kufunda mmuibakuashe naminyi? Ungi Temue a mu Mexique amba’shi: “Binobino ne mulombene kuuka kalolo mianda yabadi bakule mu Bible na ayinkumu kuishimba. Kuuka kubadika nkunkuashe buashi mmone bia kuisamba na bakuuku bande mpa na bankungishanyi nami kushii kutshina, ne mulungule bantu bebungi mukandu wa mu Bible.”

Programe akulongiesha bantu kubadika na kufunda, tabaadi muimene penda pa kukuasha bantu bia kubadika Bible kalolo nya. Isaac mushalele mu Burundi amba’shi: “Kulonga kubadika na kufunda nkunkuashe bua kuuka mudimo wa kuibaka. Kuibaka nyi kutakudi bu mudimo wande, na binobino nkuete kukunkusha midimo ikata ya kuibaka.”

Jesusa mushalele mu Pérou baadi na bipua 49 pababangile kutuela mu kalasa ka kubadika na kufunda. Amba’shi: “bu biandi nyina bana e ku nshibo, bibaadi abitungu’shi mmone muulo mpa na mashina a bintu bi mu kisalue. Kumpala bibaadi abingielela bukopo. Anka binobino ku bukuashi bua kalasa ka kulonga kubadika na kufunda, nendaa mu kisalue kushii kutshina bua kuudila ba mu kifuko kiande bintu.”

Munda mua bipua bibungi, bakata ba mu maumbo elekene, mbatumbule ba Temue ba Yehowa bua mudimo wabo wabadi bakite wa kulongiesha bantu kubadika na kufunda. Lelo uno ba Temue ba Yehowa bakuete kutungunuka na kulongiesha bantu kubadika na kufunda ku bukuashi bua bi na mudimo biabadi balumbuule ngofu munda mua bipua. Mbafunde na kutuusha tukanda pepi na midiyo 224 mu ndimi 720 bua kukuasha bantu bashi balongie ngofu.a