Ba Temwe ba Yehowa nkipwilo kya bantu bashimine su?

Nya, ba Temwe ba Yehowa ta nkipwilo kya bantu bashimine. Anka twi beena Kidishitu atukitaa mwetu mooso bwa kulonda kileshesho kyabadi betulekyele kwi Yesu kya kwikala na nshaleelo mwipushene na malongyesha aaye.

Kipwilo kya bantu bashimine akilesha kinyi?

Mwaku “kipwilo kya bantu bashimine” aulesha kingi kintu kwi bangi bantu. Byabya, banda kutala ino mweneno ibidi pabitale kipwilo kya bantu bashimine na bwakinyi bino ta mbitutale.

• Bangi abapwandikisha shi kipwilo kya bantu bashimine nkino kya bantu bakite kipwilo kipya. Ba Temwe ba Yehowa ta mbakite kipwilo kipya nya. Mu kwilekena na byabya, mu lulangwilo lwetu atulondaa kileshesho kya beena Kidishitu ba mu siekele a kumpala, abo abaadi abatuushila malongyesha aabo mu Bible. (2 Timotee 3:16, 17) Atukumiina shi Bifundwe bi Selele ndjo abikunkusha myanda ya mu lulangwilo.

• Bangi abapwandikisha shi kipwilo kya bantu bashimine nkasaka ke bubi ka kipwilo kya bantu abalondo binangu bya muntu kampanda. Ba Temwe ba Yehowa ta be na muntu kampanda e ku mutwe kwabo nya. Anka, atulondaa binangu bibaadi Yesu mupe balondji baaye shi: “Nwina Mukunkushi penda umune Kidishitu.”​—Mateo 23:10.

Pa mutwe pa kwikala bu kipwilo ki bubi, ba Temwe ba Yehowa be mu kipwilo kimune akibakwasha na bangi bantu be pepi nabo. Bu kileshesho, mudimo wetu ngukwashe bantu bebungi bwabadya kukambila biubishi bi bubi, bu kutoma kwa bintu abikolanaa bi bu kabangi na kukolwa kwa malofu. Na dingi, atukwasha bantu binunu mu nsenga ishima bwabadya kuuka kubadika na kufunda. Na atwipanaa bwa kukwasha bantu be mu masaku. Atukitaa mwetu mooso bwa kwikala na binangu bi buwa kwi mbangi, nka bu bibaadi Yesu mulungule balongi baaye bwashi bekale abakitshi.​—Mateo 5:13-16.