4 Lusa

ALULESHA KINYI

Kufwila muntu lusa akulesha kutadiila mwanda ubi ubakukitshina na nsungu yoodi mukumbeene kwikala mulame mwishimba. Kufwila muntu lusa takulesha shi obepuula bubi bubakitshi sunga kumona shi ta mbukitshikye nya.

EYI DYA KULONDA DYA MU BIBLE: “nwetwalenanga bushito na kwifwilena lusa munt una mukwabo, su mungi e na mwanda wadiila mukwabo.”​—Bena-Kolose 3:13, Kilombeno kipya 2014.

“Poodi mufule muntu, okisha kumongo bilema bya yawa muntu na kumona shi kwete kwitatshisha bwa kwikala ungi muntu.”​—Aaron.

BWAKINYI LWI NA MUULO

Su bolama nsungu, we mulombeene kwilwishisha obe nabeene ku mbidi na mu binangu​—we mulombeene dingi kulwisha dibaka dyoobe.

“Dingi efuku mulume ande baadi munekye lusa bwa mwanda ubakitshine ubaadi untape kwishimba ngofu. Bibaadi bukopo bwashi mmufwile lusa. Kunyima naadi mumufwile lusa, kadi naadi mwikalashene bu byanshi naadi mwibikite pa nsaa. Bibaadi bilwishe kipwano kyetu munda mwa mafuku.”​—Julia.

KYODY’A KUKITA

ETALUULE OBE NABEENE

Musango aufiki aukyebe mulunda oobe kukita sunga kwakula mwanda aukutapa kwishimba, eyipushe bino:

• ‘Naami bakishakisha su?’

• ‘Uno mwanda ubakitshi ngukile bubi bwandi na lukalo washi antekye lusa, su ne mulombeene penda kwiuluba?’

ESAMBE NA MWINA DIBAKA NOOBE

• Atwataa nsaa bungi kinyi bwa kwifwilena lusa?

• Nkinyi kyatudi balombeene kukita bwashi tobeshe kwifwilena lusa bukidi?

BINANGU

• Su abakufitshisha munda, tokumanga kwelela mwina dibaka nobe binangu bibubi.

• Etatshishe bwa kufwila mwina dibaka noobe lusa, ­otentekyeshe shi “atwe booso atuponaa nsaa na nsaa.”​—Shake 3:2.

“Mbibofule kwifwilena lusa su bubi abufiki kwi ooso a kwanudi, anka bi bukopo su bubi abufiki nka lupese lumune. Bwa kukumina lusa lwabakutekye na kufwila muntu lwanka abitungu kwikala na kwiyisha.”​—Kimberly.

EYI DYA KULONDA DYA MU BIBLE: “Ikala bukidibukidi mu kipwno na mukwenu.”​—Mateo 5:25, Kilombeno kipya 2014.