Kipindji kya 2

Kubanga pa Mpeshi a kabutu mpa na pa kutuuka kwa mu Ejiipitu

Anka penda bantu mwanda ndyo abapandile ku Mpeshi a kabutu, kadi kunyima abayile na kufiima ku bungi bwa binunu na binunu. Akupu, bipwa 352 kunyima kwa Mpeshi a kabutu, Abraame batandikile. Atukyebe kulonga mushindo ubaadi Efile Mukulu mulombashe mulayilo waye nsaa ibapeele Abraame mwana mulume abetanyina bu Isaake. Kunyima, Efile Mukulu baadi musangule Yaakobo mwana mulume a Isaake.

Yaakobo baadi na kifuko kikata kya baana balume 12 na bangi baana bakashi. Baana balume 10 ba Yaakobo abaadi bashikwe mwinaabo Yoosefe, abo nkumupana ku bupika mu Ejiipitu. Kunyima kwa mafuku, Yoosefe bafikile bu nfumu mukata mu Ejiipitu. Pabatwelele nsala ibukopo, Yoosefe batompele bakwabo balume bwa kumona su babaadi bapwe kwalula mashimba. Ku nfudiilo, Yaakobo na kifuko kyaaye kyooso, beena Isaleele, abapamine benda mu kushala mu Ejiipitu. Bino bibaadi bikitshikye mu bipwa 290 kunyima kwa kutandikwa kwa Abraame.

Beena Isaleele abaadi bashaale mu Ejiipitu munda mwa bipwa 215. Kunyima kwa lufu lwa Yoosefe, abekeele bu bapika mu Ejiipitu. Akupu, Moyiise batandikile, Efile Mukulu baadi mutumikye naaye bwa kutuusha beena Isaleele mu Ejiipitu. Kipindji kya KABIDI akisambila myanda ikitshikye munda mwa bipwa 857.