Mwanda wa 23

Bilotwa bya Faraone

BIPWA bibidi bibakidi, na Yoosefe kii nka mu lukano. Mwedi mukata a malofu ta mumutentekyeshe nya. Dingi efuku Faraone baloto bilotwa bibidi bibukopo, na eyipusha kipatulwilo kyabyo. Okwete kumumona kwadi mulale su? Butookye ku nakashika bayitanyina basha binangu na bebalungula myanda yaadi mulote. Kadi tambobeshe kumupatulwila bilotwa byaaye nya.

Yaya nsaa mwedi mukata a malofu batentekyesha Yoosefe. Balungula Faraone shi: ‘Panaadi mu lukano kubaadi muntu baadi mobeshe kupatuula bilotwa.’ Faraone batushisha Yoosefe mu lukano.

Faraone balungula Yoosefe bilotwa byaaye shi: ‘Mmwene ngombe musambobidi itame ngofu dingi ina lukyebukilo lwibuwa. Akupu namono ngombe musambobidi inyaane i bubi ku lukyebukilo. Na ino inyaane nkudya ino itame.

‘Mu kilotwa kya kabidi mmwene mitombo musambobidi ibaamenanga ku kilembe kimunenka yuule na dingi i malaka. Akupu ami nkumona mitombo musambobidi yumishibwe, inyane dingi itaate. Akupu mitombo inyane nkumina ibuuwa musambobidi.’

Yoosefe nkulungula Faraone shi: ‘Bilotwa bibidi bii nkapenda kilotwa kimune. Ngombe ikashi ibuuwa musambobidi na mitombo ibuuwa musambobidi nyi mbipwa musambobidi, na ngombe ikashi musambobidi inyanunukye na mitombo inyanunukye musambobidi ayilesha bipwa musambobidi. Akukekala bipwa musambobidi amukekela bya kudya bibungi mu Ejiipitu. Akupu akukafiki bipwa musambobidi bya kipupa kya nsala.’

Ndjo Yoosefe nkulungula Faraone shi: ‘Sangula muntu e na binangu na omutuule mu matalwa a kuungwisha bya kudya munda mwa bipwa musambobidi bibuwa. Byabya kipupa kya nsala takipu bantu munda mwa bipwa musambobidi bya nsala nya.’

Faraone bakumina bibamulungula Yoosefe. Na dingi basangula Yoosefe bwa kukongola bya kudya, na kwibilama. Yoosefe bafiki muntu mukata mu Ejiipitu kunyima kwa Faraone.

Kunyima kwa bipwa mwanda, mu mafuku a nsala, Yoosefe bamono bangi bantu abafiki. Ouku shi bantu kinyi? Tala, nyi mbatuutu baaye 10! Nshabo Yaakobo bebatumu mu Ejiipitu mwanda bya kudya bibaapu kwabo ku Kanaana. Yoosefe batundula batuutu baaye, kadi abo ta mbamutundule nya. Ouku shi mbwakinyi? Mwanda Yoosefe baapu kukula, na dingi mufwale bilamba bya ungi mushindo.

Yoosefe batentekyesha shi pabadi ki mwana mukinga balotele batuutu baaye abafiki mu kumukunamina. Otentekyesha dingi shi boodi mubadikye pabitale wawa mwanda su? Byabya Yoosefe mukumbeene kumona shi nyi Efile Mukulu baadi mumutume mu Ejiipitu, na baadi na kibamutumiine mwanka. Opwandikisha shi Yoosefe akyebe kukita kinyi? Tubande kutala.

Kibangilo 41:1-57; 42:1-8; 50:20.