Mwanda wa 34

Bya kudya bya ungi mushindo

WE MULOMBEENE kundungula kintu kikwete kusangula bantu mu nsenga su? Mbya kudya. Tabi bushito nya, mbipelepele.

Kasha beena Isaleele baakatuka mu Ejiipitu takudi mweshi ushima. Be mu kabaaka. Bya kudya bibungi tabikambaa kutuuka muno mu kabaaka nya; bantu bakwete kwidila, abamba shi: ‘Yehowa baadya kwitwipaa mu Ejiipitu. Mwamwa atwikalanga na bya kudya byooso byatubaadi nabyo lukalo.’

Yehowa bakwile shi: ‘Naakenunokyesha mikate.’ Na Yehowa banokyeshe mikate. Pabubatokyele ku namashika, nsaa ibamwene beena Isaleele byabya bintu bitooka bibaadi abipono, abayipwishe shi: ‘Kino nkinyi?’

Moyiise bebalungwile shi: ‘Uno mmukate awinupa Yehowa bwa kudya.’ Bantu abaadi abebitamina shi MAANA. Bibaadi mwenyi bu mikate yababaadi bakite na buuki.

Moyiise balungwile bantu shi: ‘Sangulaayi bungi bulombeene ooso muntu kudya.’ Nyi bibabadi abakitshi efuku dyooso ku namashika. Kadi su kanya kabatuuku, maana aabanga kusunguluka.

Moyiise bambile dingi shi: ‘Muntu su ngumune talamanga maana mpa na ku namashika.’ Kadi bangi bantu tababaadi abapusha nya. Ouku kibaadi kikitshikye su? Pabubatokyele, maana ababaadi balame abaadi atwele bifinyo na ababangile kununka!

Byabya kubaadi efuku dimune dya ku lubingo, dibaadi Yehowa mulungule bantu bwashi basangule bya kudya bikile by’efuku dyooso misusa ibidi. Dyadya dibaadi efuku dya kasamombo. Na Yehowa bebalungwile bwashi balame bingi bya kudya bya dyadya efuku mpa na by’efuku adilondo, mwanda mwifuku dya musambobidi takanokyesha bya kudya nya. Nsaa ibaabalamine bya kudya mpa na ku efuku dya musambobidi, tabibaadi bitwele bifinyo sunga kununka nya! Kino kibaadi bu kingi kipaso kibakitshine Yehowa!

Mu bipwa byooso bibaadi beena Isaleele mu kabaaka Yehowa baadi mwibadiishe maana.

Efilu 16:1-36; Mbadiko 11:7-9; Yooshwa 5:10-12.