Mwanda wa 102
Yesu basanguka
OUKU uno mukashi na bano balume babidi be pano su? Uno mukashi nyi Madiya a ku Mangadala, baadi mwina’ye na Yesu. Kadi bano balume bafwale bilamba bitooka nyi miikeyilu. Kano kashibo kapeela mukwete kutala Madiya nyi mbalo yabekeele batuule mbidi ya Yesu kunyima kwa lufu lwaye. Ayitaminwa bu mashaama. Kadi binobino mbidi tayimwanka dingi nya! Nanyi mwiyate? Tubande kutala.
Kunyima kwa lufu lwa Yesu, batshiite-mwakwidi abalungwile Pilato shi: ‘Pabaadi kyatala bambile shi kunyima kwa mafuku asatu akyebe kusanguka. Byabya tuma eyi bwashi bakalame mashaama, tala balondji baaye bafika mu kumwiba na bamba shi basanguka!’ Pilato balungwile batshiite-mwakwidi bwashi batume basalayi bwa nkalama mashaama.
Kadi ku nakashikashika mwifuku dya kasatu kunyima kwa lufu lwa Yesu mwikeyilu a Yehowa bafikile. Babungulwishe ebwe edikasha ku mashaama. Basalayi babaadi na moo ukile, tababaadi abobesha sunga kusaana. Akupu, pababatadile munda mwa mashaama, mbidi ya Yesu tayibaadi mwanka nya! Bangi basalayi abayile mu lupata mu kulungula batshiite-mwakwidi. Ouku kibakitshine baba batshiite-mwakwidi bebubi? Babapeele basalayi makuta bwashi badimbe. Babalungwile basalayi shi: ‘Ambayi shi balondji baaye bafikile bufuku, bamwiba, atwe balale.’
Yaaya nsaa, bangi bakashi babaadi beena’ye na Yesu abafikile mu kutala mashaama. Babakemene ngofu pa kumona mashaama ebisumanga! Musango umune miikeyilu ibidi ibaadi na bilamba bitooka ibatukile. Ayo nkwipusha bakashi shi: ‘Bwakinyi anukimbi Yesu pano? Mmusangukye. Ndaayi bukidibukidi, nukalungule balondji baaye.’ Bakashi babayile lubilo lwi kashaa! Kadi mwishinda mulume umune bebayimikile. Ouku yawa mulume su? Nyi Yesu. Bebalungwile shi: ‘Endayi nukalungule balondji bande.’
Pababebalungwile kwi bakashi shi Yesu e na muwa, balondji ba Yesu tababaadi bakumine nya. Mpyeele na Yowano abayile lubilo ku mashaama mu kutala, kadi mashaama abaadi bisumanga! Pabakatukile Mpyeele na Yowano, Madiya a ku Mangadala bashadile kumongo. Yaaya ndjo nsaa ibaadi mutale mu mashaama aye nkumona miikeyilu ibidi.
Ouku kibaadi kikitshikile mbidi ya Yesu? Efile Mukulu baadi mwiyishimishe. Efile Mukulu tabaadi mubuushe Yesu ku bafwe na mbidi ya bu muntu ibaadi nayo pabafwile nya. Baadi mumupe ingi mbidi ya mu kikudi, bu miikeyilu ya mwiyilu. Kadi bwa kulesha balondji baaye shi e na muwa, Yesu baadi mwate mbidi yabadi bakumbeene kumona kwi bantu, bu byatukebilongo.
Mateo 27:62-66; 28:1-15; Luuka 24:1-12; Yowano 20:1-12.