Mwanda wa 103
Yesu atuukila balondji baaye
KUNYIMA kwa Mpyeele na Yowano kukatuka ku nyembo kubaadi mbidi ya Yesu, Madiya bashadile aye nabeene. Babangile kudila. Akupu bayinamine aye kutala munda mwa nyembo, bu byomono mu kifwatulo ky’esaki di kumpala. Mwamwa bamono miikeyilu ibidi! Ibamwipusha shi: ‘Odidi bwakinyi?’
Madiya balulwile shi: ‘Babatentuula Mfumwami, ntanguku kwinyi kwabadi bamutuule.’ Ndjo Madiya nkwiyalula aye nkumona mulume umune. Uno mulume bamwipwishe shi: ‘Nnanyi okimbi?’
Madiya apwandikisha shi yawa mulume nyi muntu adimaa kwakwa na shi pangi nnaye mwate mbidi ya Yesu. Byabya bamwipwishe shi: ‘Su nnoobe mumutentuule, ndungule koodi mumutuule.’ Kadi, uno muntu nyi Yesu. Baadi mufwale mbidi ishibaadi Madiya mumushinguule. Kadi pabamwitanyine mwishina dyaye, Madiya baukile shi nyi Yesu. Bayile lubilo mu kulungula balondji shi: ‘Namono Mwanana!’
Ku kyolwa nka mu dyadya efuku, pabaadi balondji abende ku kibundji kya Emause, mulume umune bebabangile. Balondji abaadi na kinyongwa kikata mwanda abayipa Yesu. Kadi pababadi abatambuka mwishinda, yawa mulume bebapatulwile myanda ibungi i mu Bible abo nkupusha bibuwa. Kunyima, pababayimene bwa kudya, balondji babashingulwile shi yawa mulume nyi Yesu. Akupu Yesu bashimiine, na bano balondji babidi babalukiile bukidi ku Yeelusaleme mu kulungula batumibwa wawa mwanda.
Pabaadi apakitshika yaaya myanda, Yesu batukiile Mpyeele. Bangi batumibwa abasangeele ngofu pakupusha byabya. Paapa balondji babidi babafikile ku Yeelusaleme abo nkupeta batumibwa. Babebalungwile mushindo ubaadi Yesu mwibatuukile mwishinda. Na pababadi bakwete kwakula, ouku kintu kya kukanya kibakitshikile?
Tala mu kifwatulo. Yesu bebatukiile mu nshibo, aku namu kiibi kibaadi kishite. Balondji be na muloo ukata! Tomono shi dyadya dibaadi efuku dikata su? We kubadika misango ibaadi Yesu mutukile balondji baaye mpa na binobino? Nyi misango itano?
Tomase mutumibwa tabaadi nabo pabebatukiile Yesu nya. Nyi balondji nkumulungula shi: ‘Tubamono Mwanana!’ Kadi Tomase bambile shi abitungu amone Yesu na meso aye bwadya kukumiina. Byabya, kunyima kwa mafuku mwanda balondji babaadi dingi beshitshile mu nshibo, kadi wawa musango Tomase baadi naabo. Ndjo Yesu nkwibatukile mwamwa mu nshibo. Paapa Tomase baadi mukumine.
Yowano 20:11-29; Luuka 24:13-43.