Yesu basanguka

Kunyima kua Yesu kufua, ungi muntu sha nfualanga abetanyina bu Yosefe batekiele Pilato bua kuyisha mbidi ya Yesu ku mutshi. Yosefe baadi muanyine mbidi yaaye na kilamba kibuwa kipia kishingie malaashi, aye nkuiyituula mu mashama apia. Abaadi na ebue dikata dishikie ku kibelo. Bakata ba ba tshiite muakuidi nkulungula Pilato’shi: ‘Atutshinyi’shi tala bangi ba ku balongi ba Yesu bakaata kitanda kiaye na kuakula’shi basanguka.’ Pilato nkuibalungula’shi: ‘Shitayi mashama nuikutuule ba nsaamo.’

Kunyima kua mafuku asatu, bangi bana bakashi abayile ku mashama ku nkielo abo nkusangana ebue ndikatukie kuanka. Abapetele muikeyilu mu mashama bebalunguile’shi: ‘Lekayi kupusha moo. Yesu mmupue kusanguka. Endaayi nukalungule balongi baye’shi bakamupete ku Ngalileya.’

Mariya a ku Mangadala bayile lubilo akamona Mpiele na Yowano. Aye nkuibalungula’shi: ‘Kui muntu bakatusha kitanda kia Yesu!’ Mpiele na Yowano nkuenda lubilo ku mashama. Pababasangene’shi mui bisumanga, abaadi balukiile ku mashibo kuabo.

Pabaadi Mariya mualukile ku mashama, bamuene ba mikeyilu babidi munda ebalungula’shi: ‘Ntanguku kubabatulu Nfumuami.’ Akupu bamuene muntu, aye nkunangushena’shi baadi mulami a ku mashama, Mariya nkuamba’shi: ‘Muanana, ndungule namu su nnobe mumukatushe.’ Kadi pabakuile yawa muntu’shi: “Mariya!” baukile musango umune’shi baadi Yesu. Aye nkuela musaase’shi: “Mulongieshi!” na nkumukuata kiipa. Yesu nkumulungula’shi: ‘Enda okalungule bakuetu balume’shi bommono.’ Mariya, bayile lubilo kui balongi baye ebalungula’shi bakamono Yesu.

Kunyima mu diadia efuku, kubaadi balongi babidi abaadi abakatuka ku Yelusalema abende ku Emause. Ungi muntu baadi muibabangie muishinda aye nkuibepusha kibaabadi abesamba. Abo nkumualuula’shi: ‘Tue mupushe?’ Takudi mafuku asatu n’abo kuipaa Yesu kui bakata ba batshite muakuidi. Binobino bangi bana bakashi abakula’shi basanguka!’ Yawa muntu nkuipusha’shi: ‘Tanukuminaa mayi a batemuki? Abo nkuamba’shi, Nkidishitu baadi na kia kufua na kusanguka.’ Baadi atungunuka na kuibapatuluila Bifundue. Pababafikile ku Emause, balongi abatekiele bua’shi yawa muntu ende nabo. P’abelele luteko bua mikate nsaa ya kidibua kia kiolua, abaadi bashinguule’shi nyi Yesu. Akupu aye nkuibashimina.

Bano balongi babidi nkuenda lubilo mu nshibo ya mu Yelusalema, kubaadi kuibungie batumibua bua nkebalungula bibaadi bikitshikie. Pabaabadi kuakua munda mua nshibo, Yesu baadi muibamuenekiele boso. Ku mbangilo, batumibua tababaadi bakumine’shi baadi Yesu nya. Akupu bebalunguile’shi: ‘Talayi mu maasa muande; nkumeyi. Bibaadi bifundibue’shi Nkidishitu akasanguka ku lufu.’