Mwanda wa 109

Mpyeele kwa Korneye

UNO nyi Mpyeele mutumibwa mwimane pano, na bano, mbangi ba ku bakuuku baaye. Kadi bwakinyi uno muntu kwete kukunamina Mpyeele? Mulombeene kumukunamina? Ouku uno muntu su?

Uno muntu nyi Korneye. Nyi mmukata a kisaka kya basalayi ba beena Looma. Korneye tauku Mpyeele nya, kadi babaadi bamulungule bwashi ayitanyishe Mpyeele ku nshibo yaaye. Tubande kutala bibabikitshikile.

Balondji ba kumpala ba Yesu babaadi beena Yuuda, kadi Korneye tabaadi mwina Yuuda nya. Anka baadi mufule Efile Mukulu, baadi eele nteko kwadi, na baadi akitshina bantu myanda na bu muntu booso. Byabya, dingi efuku kunyima kwa midi mwikeyilu bamumwekyele aye nkumulungula shi: ‘Efile Mukulu basangala pa mwanda obe, na nteko yoobe akyebe kwiyalula. Tuma bantu bwa kwitanyina Simone kampanda abayitanyinaa bu Mpyeele. Ee ku Yopee kwa Simone, mushaale mu nshibo ii ku bukunkula bwa mbuu.’

Mususa umune, Korneye batumine bantu bwabadya nkayitamina Mpyeele. Efuku dibalondele, bantu pababefubwile pepi na Yopee, Mpyeele baadi ku kitenta kya kunundu kwa nshibo ya Simone. Kwakwa Efile Mukulu balesheshe Mpyeele kilamba kikata akiyiki mwiyilu. Mu kyakya kilamba mubaadi nyema ya mishindo ilekene. Muyiile miiya y’Efile Mukulu, yaya nyema yibaadi butete bwa kudya, kadi eyi dibatuukile adyamba shi: ‘Mpyeele ebwe! Ipa, odye.’

Mpyeele balulwile shi: ‘Nya, kasha ntandjile kintu kibi sunga ki butete.’ Kadi eyi dibalungwile Mpyeele shi: ‘Kitooshiibwe n’Efile Mukulu twekyambanga shi nkibi.’ Bino bibaadi bikitshikye misusa isatu. Nsaa ikwete kwela Mpyeele binangu pabitale wawa mwanda, bantu bababadi batume kwi Korneye babafikile mu nshibo abo nkwipusha mbalo i Mpyeele.

Mpyeele bayikile mu nshibo ya kuushi na aye nkwamba shi: ‘Nnaami uno, winyi aanukimbi. Mmwanda kinyi ubenufwisha?’ Baaba bantu pababalungwile Mpyeele shi mwikeyilu balungula Korneye bwashi amwitanyishe ku nshibo yaaye, Mpyeele bakuminyine kwenda nabo. Efuku dibalondele, Mpyeele na beena’ye babayile kwa Korneye ku Kezaree.

Korneye babungile kifuko kyaye kishima na beena’ye ba p’eshimba booso. Pabafikile Mpyeele, Korneye bamutundayishe. Bakunamine ku ngwa ya Mpyeele, bu byokwete kumona pano. Kadi Mpyeele bamulungwile shi: ‘Ami naamu ne nka muntu bu’be.’ Eyendo, mu Bible abalesha shi tabibuwa kukunama sunga kulangwila muntu. Abitungu tulangwile penda Yehowa.

Binobino Mpyeele babangile kulongyeshe booso abaadi bebungye. Bebalungwile shi: ‘Namono shi Efile Mukulu mukumine muntu ooso akyebe kumufubila.’ Na nsaa ibaadi kwete kwakula, Efile Mukulu batumine kikudi kiselele, na bantu nkubanga kwakula mu ndimi ilekeene. Uno mwanda ubaadi ukanyishe balondji beena Yuuda babafikile na Mpyeele, mwanda babaadi abapwandikisha shi Efile Mukulu mmukumine penda beena Yuuda. Bino bibebalongyeshe shi, Efile Mukulu tatalaa bantu b’ekoba kampanda bu bakile bangi bantu nya. Wawa ta mmwanda wa muulo autungu shi twikale atutentekyesha su?

Bikitshino 10:1-48; 11:1-18; Bifumbulwe 19:10.