Korneye bapete kikudi kiselele

Kubaadi ungi mukata a basalayi ba bena Loma abetamina bu Korneye baadi mu kibundi kia Kezaree. Sunga biekala’shi tabaadi muina Yunda, bena Yunda abaadi abamunemeka. Baadi na kalolo ka kukuasha balanda na be mu lukalo. Korneye baadi mukumiine mui Yehowa na kumuteka kushii kukooka. Dingi efuku, muikeyilu baadi mumumuenekiele amulungula’shi: ‘Efile Mukulu bapusha nteko yoobe. Binobino, tuma bantu ku kibundi kia Yopee kui Mpiele bua’shi bamulungule afikie koodi.’ Korneye batumine bantu basatu musango umune ku Yopee mu bilometre bifikie ku 50 dia kuushi.

Mu yaaya nsaa ku Yopee, Mpiele bapetele kimonua. Bamuene nyema y’abadi bakandikie bena Yunda bua kudia, na bapushiishe eyi adimulungula buadia kuiyidia. Mpiele bapelele, aakula’shi: ‘Kasha Ntandiile nyema ibutete nya mu nshalelo ande.’ Eyi dibamulunguile’shi: ‘Leka kuitanyina yaya nyema bu ibutete. Efile Mukulu mmupue kuibitoosha.’ Abalunguile dingi Mpiele’shi: ‘Mbaaba bantu basatu be ku kibelo kiobe. Enda nabo.’ Mpiele nkutuuka ku kibelo bua kuipusha buakinyi baaba bantu abadi paapa. Abo nkumualuula’shi: ‘Abetutumu kui Korneye mukata a basalayi ba bena Loma. Abitungu wende ku nshibo yaaye ku Kezaree.’ Mpiele nkuteka baaba bantu buabadia kushala kuaye bufuku bushima bu benyi baaye. Efuku dibalondele, bayile nabo ku Kezaree pamune na bangi bakuabo ba mu Yopee.

Pabaadi Korneye mumone Mpiele, baadi mupone ku ngua yaaye. Anka Mpiele bamulunguile’shi: ‘Ebuee! Ami namu ne muntu nka biodi. Efile Mukulu bantumu mu nshibo yoobe, sunga biekala’shi bena Yunda t’abendaa kua bantu ba Ingi miilo. Binobino nakiebe kuuka buakinyi bongitamina.’

Korneye balunguile Mpiele’shi: ‘Natekanga Efile Mukulu takudi mafuku ananka, muikeyilu nkundungula’shi abikiebe nkuitamine. Etulongieshe namu mayi a Yehowa.’ Mpiele nkuakula’shi: ‘Nashinkamisha binyibinyi’shi Efile Mukulu te na ntondo. Apokieela muntu ooso akumiina kumulanguila.’ Mpiele nkuibalongiesha bintu bibungi pabitale Yesu. Akupu, kikudi kiselele kibayikile kui Korneye na boso babaadi naye, abo nkubatshishibua.