Mushindo kinyi oodi mukumbeene kwikala na muloo mu kifuko?

1. Bwakinyi bibuwa mukashi na mulume beyibakishene bwa kushaala na muloo mu kifuko?

Mukandu wibuwa aufiki kwi Yehowa, “Efile Mukulu sha muloo,” akyebe shi bifuko bikale na muloo. (1 Timotee 1:11, NW) Aye nyi baadi mutuushe dibaka. Kwiyibakishena muyile miiya ya mbulamatadi kwi na muulo ukata bwashi kifuko kikale na muloo mwanda nyi mbalo ibuwa bwa kukusha baana. Abitungu shi beena Kidishitu banemekye miiya ya mbulamatadi ya mwiumbo dyabadi bashaale pabitale kufundisha kwa dibaka mu mikanda ya mbulamatadi.​—Badika Luuka 2:1, 4, 5.

Efile Mukulu amonaa dibaka naminyi? Akyebe shi disangye mulume na mukashi bwa kwikala mu kipwano kishi na mpwilo. Yehowa akyebe shi mulume na mukashi bekale balulame mu bulunda bwabo. (Beena-Ebreeyi 13:4) Mmushikwe kwipa kwa dibaka. (Malakii 2:16) Kadi atadiila mwina Kidishitu bwa kwipa dibaka na kwibakila dingi su mulume sunga mukashi aye batambuka lusandji.​—Badika Mateo 19:3-6, 9.

2. Mushindo kinyi autungu mukashi na mulume bekale abeakushena na kwikitshishena myanda?

Yehowa bapangile balume na bakashi bwashi bekale abekwatshishena mu midimo yaabo. (Kibangilo 2:18) Mulume nyi nfumu a kifuko. Byabya myanda itale kupudisha kwa nkalo ya ku mbidi ya kifuko na kwibalongyesha myanda y’Efile Mukulu i pa mutwe paaye. E na kya kwisumina ingi myanda pa mwanda wa kifulo kyaaye bwa mukashi aaye. Mulume na mukashi be na kya kwifulena na kwileshena kanemo. Bu bi balume booso na bakashi mbantu bashi bapwidikye, bibuwa kuuka kwifwilena lusa bwa kwikala na muloo mu dibaka.​—Badika Beena-Efeeze 4:31, 32; 5:22-25, 33; 1 Mpyeele 3:7.

3. Su dibaka dyenu tadikusankisha dingi, abitungu kwilekena su?

Su nwi na nkalakasho mu dibaka dyobe, ooso a kwanudi e na kya kukita mwaye mooso bwa kwileshena kifulo mu myanda yanukwete kwikitshishena. (1 Beena-Kodinto 13:4, 5) Eyi dy’Efile Mukulu tadikumina shi bantu belekene bwa kupudisha nkalakasho ikwete kwibafwila mu dibaka nya.​—Badika 1 Beena-Kodinto 7:10-13.

4. Baana, Efile Mukulu akyebe kinyi bwenu?

Yehowa akyebe shi nwikale na muloo. Enupa malango akile buwa bwashi nwikale na muloo panukii bakinga. Akyebe shi binangu na kapatupatu ka baledi beenu kenukwashe. (Beena-Kolose 3:20) Yehowa akyebe dingi shi nwikale na muloo wa kukita myanda bwa Mupangi enu na bwa Mwana aaye.​—Badika Mulungudi 11:9–12:1; Mateo 19:13-15; 21:15, 16.

5. Banambutwile, mushindo kinyi ukumbeene baana benu kwikala na muloo?

Abitungu nukite mwenu mooso bwa kupa bana benu bya kudya, mbalo ya kulaala, na bilamba. (1 Timotee 5:8) Kadi bwashi baana benu bekale na muloo, abitungu dingi kwibalongyesha bwashi bafule Efile Mukulu na balongye myanda yaaye. (Beena-Efeeze 6:4) Kileshesho kyenu kya kulesha shi nwi bafule Efile Mukulu nkilombeene kukuma mwana kwishimba na kumutakuula bwa kumufubila. Malongyesha enu ngakumbeene kulongamisha ngyelelo a binangu a baana benu su aafiki mu Eyi dy’Efile Mukulu.​—Badika Miiya Ikituulwe 6:4-7; Myeele 22:6.

Mbikumbeene kukwasha baana su anwibanyingisha na kwibatumbula. Na dingi be na lukalo lwa kwibaludika na kwibanyoka. Kulongyesha baana wawa mushindo nkulombeene kwibalama bwashi tabekalanga na mwikeelo ukumbeene kuyiba muloo wabo. (Myeele 22:15) Kadi kunyoka kwa mwana takwikalanga kukile bukopo sunga kukumbeene kumusakula.​—Badika Beena-Kolose 3:21.

Batemwe ba Yehowa mbatuushe mikanda ibungi ikumbeene kukwasha banambutwile na baana. Myanda i mu ino mikanda ayifiki mu Bible.​—Badika Misambo 19:7, 11.