Nsaa ayinukwata malwa

Sunga mbyanukitaa mwenu mooso bwa kwikala na muloo mu dibaka na mu kifuko, kâ na kabi akafwilaa bantu nkalombeene kwinukalakasha bwa kukutwa kulama muloo wenu. (Mulungudi 9:11) Efile Mukulu etukwasha na kalolo kooso nsaa yatudi mu nkalakasho. Su otumikila ano mayi a kulonda a mu Bible aalondo, obe na kifuko kyoobe anwikala na mushindo wa kukila kalolo na malwa, sunga munkatshi a myanda ibukopo naminyi.

1 KULUPILAYI MWI YEHOWA

AKYAMBA BIBLE: “Mulubwileeyi mpombo yenu yooso mwanda aye kwete kwinulama.” (1 Mpyeele 5:7) Misango yooso tentekyeshaayi shi Efile Mukulu ta naye e ku nsulo ya nkalakasho yeetu nya. (Jaake 1:13) Bu byokwete kwifubwila peepi naaye, akyebe nkukwasha mu mushindo wibuwa. (Yeeshaya 41:10) “Kulupila mwadi ngub’ooso.”​—Misambo 62:9.

Okyebe kupeta dingi bukwashi nsaa y’obadika Bible efuku dyooso. Bu masanka, okyebe kumona mushindo wi Yehowa “etusamba mu malwa eetu ooso.” (2 Beena-Kodinto 1:3, 4; Beena-Looma 15:4) Alaa bwa nkupa “butaale bw’Efile Mukulu abo butabukile binangu byooso.”​—Beena-Fidipe 4:6, 7, 13.

KYODI MULOMBEENE KUKITA:

• Teka bukwashi bwa Yehowa bwa kushaala muumiine na kunangusheena kalolo

• Taluula mishindo yooso na osangule umune ukubofwile

2 EKALWILE OBE NABEENE MPA NA KIFUKO KYOOBE KYOOSO

AKYAMBA BIBLE: “Muntu sha lushingulwilo apetâ kiukilo. Sha binangu namu akyebâ kupusha myanda ya kiukilo.” (Myeele 18:15, EEM) Shinguula myanda yooso ikata. Uuka bi lukalo lwa muntu ooso a mu kifuko. Esambe nabo na webateemeshe.​—Myeele 20:5.

Nkinyi akitungu kukita su muntu anudi bafule baafu? Tanukumanga kutshiina kuleesha bi kinyongwa kyeenu. Tentekyeshaayi shi sunga Yesu “badiile.” (Yowano 11:35; Mulungudi 3:4) Kwikisha kapindji na kulaala tulo kwi na muulo. (Mulungudi 4:6) Bino abikyebe nkukwasha bwa kukila kalolo na luno lukalakasho lwi bukopo.

KYODI MULOMBEENE KUKITA:

• Kumpala kwashi nkalakasho ikufwile, ikala na kyubishi kya kwisamba na kifuko kyoobe. Nsaa ayituuku mwanda, abekala na mushindo wa kwisamba noobe

• Esambe na bangi bantu bafumankane na nkalakasho i ­mumune

3 TEKA BUKWASHI BWANUDI NABO LUKALO

AKYAMBA BIBLE: “Kuuku a binyibinyi alêsha kifulo mafuku ooso na mmukwabo na muntu mutandjikwe mu bipungo bya makyenga.” (Myeele 17:17, NW) Bakuuku boobe abakumiina nkukwasha, kadi tabauku akitungu kukita. Tokokanga kwibalungula kyoodi nakyo lukalo. (Myeele 12:25) Na dingi, kimba bukwashi bwa mu kikudi kwi baaba abashinguula Bible kalolo. Bukunkushi bwabadi balombeene nkupa abutuukila mu Bible mbulombeene nkukwasha.​—Jaake 5:14.

Okyebe kupeta bukwashi boodi nabo lukalo nsaa ywebungu na bantu be na lukulupilo lwa binyibinyi mwi Efile Mukulu na abakulupila mu milayilo yaaye. Nsaa yokwasha bantu be na lukalo lwa kunyingishibwa abikyebe nkukankamika ngofu. Kulupila mwi Yehowa na mu milayilo yaaye. Kisha nsaa ibungi mu kukwasha kwa bangi bantu be na lukalo lwa bukwashi, na ikala peepi na baaba bakufule na abakutabaleela.​—Myeele 18:1; 1 Beena-Kodinto 15:58.

KYODI MULOMBEENE KUKITA:

• Esambe na kuuku oobe a p’eshimba na omutadiile bwashi akukwashe

• Mulungule patooka myanda ayikukalakasha