Yesu adiisha binunu bia bantu

Kumpala kua Pasaka a mu kipua kia 32 B.B., batumibua abaadi balukiile mu bulungudi. Abaadi bakookie, Yesu nkuibatuala ku Betsaida mu buato buabadia nkekisha. Kadi pabafikile buato pepi na kiese, Yesu bamuene binunu bia bantu abebalondo. Sunga biekala’shi Yesu baadi akimbi kuikala pa bupenka na batumibua baaye, baadi mukuukile baaba bantu boso na kalolo. Baadi mupaashe mikumbo yabo, aye nkubanga kuibalongiesha. Yesu baadi muibalongieshe efuku dishima pabitale Bufumu bu’Efile Mukulu. Nguba pabafikile ku kiolua, batumibua baaye abafikile kuadi bamulungula’shi: ‘Abimueneka’shi bantu abapusha nsala. Ebalushe bakakimbe kuabadia kuiudila bia kudia.’

Yesu bebalunguile’shi: ‘Ta be na kia kuenda; anue, ebapeyi bia kudia.’ Batumibua nkumuipusha’shi: ‘Okumina’shi atue tuende tukebaudile bia kudia?’ Fidipe, umune a ku batumibua bakuile’shi: ‘Su biekala’shi atuikalanga na makuta ebungi, ta tui balombene kuudila kino kibumbu bia kudia bilombane.’

Yesu baadi muipushe’shi: ‘Nui na bidiibua kinyi paapa?’ Andele bambile’shi: ‘Pano tuinka penda na mikate itano na mishipa ibidi. Tambikumbane su nkapeela.’ Yesu nkuamba’shi: ‘Ntuadileyi yaya mikate na mishipa.’ Aye nkulungula bantu buabadia kushaala mu lubishi mu bisaka bia bantu 50 na 100. Yesu nkuata mikate na mishipa, nkubuusha meso muiyilu aye nkuela luteko. Akupu, aye nkutambika batumibua abo nkuabila bantu boso. Bantu 5 000 kukatusha bakashi na bana abadiile abo nkuikuta. Kunyima kua biabia, batumibua abakongiele bibasheele bua kupela kuibiluisha. Abakongiele biseele 12 biule! Kibaadi kilengieleshi kia kukaanya, nta nabio su?

Bantu abaadi bakaanye bikata abo nkukimba kutuula Yesu bu nfumu aabo. Anka Yesu baadi auku’shi yaaya tayibaadi nsaa ikumiine Yehowa bua’shi ayikale Nfumu nya. Baadi mutume kibumbu kungi, aye nkulungula batumibua bua kuenda ku dingi eshiya dia Kalunga ka Ngalileya. Abatuelele mu buato abo nkuenda, Yesu namu nkukamina ku muengie aye nabene. Buakinyi? Muanda baadi akimbi nsaa ya kuela nteko kui Nshaye. Sunga biekala’shi Yesu baadi na mianda ibungi, tabaadi akutua nsaa ya kuela nteko nya.