Mpiele atunu Yesu

Yesu pabaadi na batumibua baye mu kadimbo ka kuiyilu, baadi muibalungule’shi: ‘Mu buno bufuku, anue boso anukandekie.’ Mpiele bamulunguile shi: ‘Ami nya! ‘Sunga boso bakuleka, Ami nta nkulekie sunga musango umune.’ Anka Yesu balunguile Mpiele shi: ‘Kumpala kua shi etombole disame, okiebe kuakula misango isatu shi tonguuku.’

Nsaa ibaadi basalayi batuale Yesu kua Kayifase, batumibua baye bebungi abasukile. Kadi babidi ba kuabadi abalondele muamua mu kisaka. Mpiele baadi umune a kuabadi. Bayile muibalasa dia nshibo ya Kayifase aye nkubanga koota kaalo. Mu diadia etaata, mufubi mukashi bamuene mpala ya Mpiele, aye nkuakula’shi: ‘Nankuuku! Boodi na Yesu!’

Mpiele nkuakula’shi: ‘Nya, Ntshinaadi naye’mi! Ntanguuku kiookiebe kuakula!’ Akupu aye nkuifubuila dia ku kiibi. Kadi ungi mufubi mukashi bamumuene aye nkulungula kisaka’shi: ‘Uno muntu baadi na Yesu!’ Mpiele nkuamba’shi: ‘Ntanguku Yesu nya!’ Ungi muntu nkuakula’shi: ‘Obe we umune a munkatshi muabo! Ne nkushinkamisha’shi ngakuilo oobe aleesha patooka’shi we muina Ngalileya nka bu Yesu.’ Kadi Mpiele nkutshipa’shi: ‘Ntamuuku nya!’

Anka yaaya nsaa, etombole dibasamine. Mpiele bamuene Yesu bealuula bua kumutala. Batentekieshe mayi a Yesu, aye nkutuuka pasha na nkudila bikata.

Mu yaaya nsaa, bena Tumiladi tukata tua bena Yunda abaadi bepushene bua kusambisha Yesu munda mua nshibo ya Kayifase. Abapuile kuata kitshibilo kia kuipaa Yesu, anka abaadi abakimbi kabingilo. Kadi tababaadi abapete kabingilo nya. Nfudiilo a bioso, Kayifase bayipuishe Yesu’shi: ‘We Muan’Efile Mukulu?’ Yesu nkualuula’shi: ‘Oolo.’ Kayifase nkuamba’shi: ‘Ta tui lukalo na tungi tubingilo nya. E na kapeesha kakile!’ Lupango loso nkukumina’shi: ‘Mupuandikile lufu.’ Abo nkukupila Yesu mapi, nkumufidila mata, nkumuanya kilamba ku meso, nkumukupila bikata na kuakula shi: ‘Su we mutemuki, etulungule bakukupila!’

Pabubatokiele, abayile na Yesu ku nshibo ya Tumiladi tukata tua bena Yunda abo nkumuipusha dingi’shi: ‘We Muan’Efile Mukulu su?’ Yesu nkuibaluula’shi: ‘Nukuete kuakula’shi Ne muana aye.’ Akupu, abo nkumutshibila kiimu kia kapeesha na nkuenda naye kua Ponse Pilato, mukata a bena Loma. Nkinyi kibaadi kikitshikie kunyima? Tulondesheyi.