MYALUULO KU NKONKO YA MU BIBLE

Efile Mukulu mmuntu a mushindo kinyi?

Efile Mukulu muntu a mu kikudi sh’amwekaa. Bapangile eyilu, nsenga, na bintu byoso bi na muwa. Takwi muntu bapangile Efile Mukulu—aye te na mbangilo. (Misambo 90:2) Efile Mukulu akumina shi bantu bamukimbe na baukye bya binyibinyi pa bimutale.​—Badika Bikitshino 17:24-27.

Efile Mukulu mmuntu atudi balombeene kuuka eshina dyaaye. Twi balombeene kuka ingi ngikashi yaaye p’atutala bintu byadi mupangye. (Beena-Looma 1:20) Anka bwa kuuka Efile Mukulu kalolo, abitungu tulongye Bible, Eyi dyaaye. Aditukwasha bwa kwiubidishena n’eyikashi dya kifulo dy’Efile Mukulu.​—Badika Misambo 103:7-10.

Efile Mukulu apushaa naminyi pabitale kukutwa kwa kululama?

Yehowa Mupangi etu, mmushikwe kukutwa kwa kululama. Na mmupangye bantu kwifwanyiko dyaaye. (Miiya Ikituulwe 25:16) Nyi bwakinyi bebungi ba kwatudi mbashikwe kukutwa kwa kululama. Efile Mukulu ta naaye nsulo ya kukutwa kwa kululama kwatumono. Efile Mukulu mmupe muntu bulungantu bwa kwisangwila. Bi malwa mwanda, bantu bebungi abafubu bi bubi na bulungantu bwabo bwa kwisangwila na abakitshi myanda ya kukutwa kululama. Yehowa kwete kwinyongola.—Badika Kibangilo 6:5, 6; Miiya Ikituulwe 32:4, 5.

Yehowa mmufule kululama, na t’akatadiila kukutwa kwa kululama bwa looso nya. (Misambo 37:28, 29) Bible etulaa shi kubashala mafuku apeela bwashi Efile Mukulu afudiishe myanda yooso ya kukutwa kwa kululama.​—Badika 2 Mpyeele 3:7-9, 13.