Kia kukita nsaa yatumono mianda ya kukutua kululama

1-2. Bantu be bungi abakitaa kinyi pabitale mianda ya kukutua kululama, na kinyi kiatutaluula?

TUI MU nsenga i bantu bakutue kululama. Bakuete kukiengiesha bantu pa muanda mbalada, pa muanda wa kuabatukila, biabamueneka sunga bua tungi tubingilo. Abakiengie muanda bantu ba sha makuta sunga bakata ba mbulamatadi abekalakashaa nka penda muanda’shi bapete makuta e bungi. Ino mianda ya kukutua kululama ngilombene kuikala na bukitshishi bui bubi kuatudi sunga kui muntu atuuku.

² Bantu be bungi be na nsungu muanda mbebakitshine mianda ya kukutua kululama sunga kumona kuabeyikitshina bangi. Atue boso tui na lukalo lua kushala mbalo yatuipusha mu kukaluilua na yabetukitshina mianda na kululama. Bangi bantu bakuete kukieba kupudisha mianda y’abamono mu nsenga sunga muiumbo diabo. Bakuete kutombokiela mbulamatadi na miiya, sunga kuelela muntu mulee’shi akiebe kupudisha mianda ya kukutua kululama mikanda. Anka, atue bena Nkidishitu, mbetulongieshe bua kupela kutuelakana mu mianda ya “pa nsenga,” kadi bua kutengiela Bufumu bu’Efile Mukulu abukapudisha mianda yoso yakukutua kululama. (Yo. 17:16) Anka, bino abituinyongoshaa na ingi nsaa atufitaa munda nsaa yatumono bantu abakitshina bangi mianda ya kukutua kululama. Tui kuiyipusha’shi: ‘Ne kukita kinyi? Nekukita muanda kampanda pabitale mianda ya kukutua kululama binobino su?’ Bua kualuula ku ino nkonko, tubande kutala mushindo aumonaa Yehowa na Yesu mianda ya kukutua kululama.

YEHOWA NA YESU MBASHIKUE MIANDA YA KUKUTUA KULULAMA

3. Buakinyi tui kufiita munda pabitale mianda ya kukuta kululama? (Yeeshaya 5:7)

³ Bible alesha buakinyi t’atukuminaa betukitshina mianda ya kukutua kululama sunga kumona kuabeyikitshina bangi. Apatuula’shi Yehowa muitupangie ku kifuanyi kiaye, na’shi “mmufule kululama na kutshiba kwa bîmu kalolo.” (Mis. 33:5; Kib. 1:26) T’akitaa mianda na kukutua kululama, na t’akumiina’shi ungi muntu eyikite. (Det. 32:3, 4; Mik. 6:8; Sek. 7:9) Bu kileshesho, mu mafuku a mutemuki Yeshaya, Yehowa baadi mupushe “kwidila” kua bena Isalele be bungi bababadi abakiengiesha kui bangi bena Isalele. (Badika Yeeshaya 5:7.) Yehowa baadi munyookie boso abaadi abapele kukookiela Miiya na abaadi abakitshina bangi mianda na kukutua kua kululama.​—Yesh. 5:5, 13.

4. Muanda kinyi wi mu ma Evanjile aulesha mueneno a Yesu pabitale mianda ya kukutua kululama? (Tala dingi kifuatulo.)

⁴ Nka bu Yehowa, Yesu mufule kululama na mushikue kukutua kua kululama. Pa baadi pa nsenga, bamuene dingi efuku muana mulume baadi n’eyasa difue. Yesu baadi mupushe uno muntu lusa, na aye nkumupaasha. Anka pabamuene bakata ba bipuilo bino, abaadi bafiite munda ngofu. Abaadi bambe’shi Yesu bayipa muiya wa Sabato. Ta babaadi basankie pa muanda wa’shi uno muntu taki’akiengie dingi nya. Yesu bapushishe naminyi pabitale uno muikeelo wabo? “Benyonguele ngofu pa muanda wa mashimba aabo apape.”​—Mak. 3:1-6.

5. Nkinyi akitungu’shi tutentekieshe pabitale nsungu yatupusha bua mianda ya kukutua kululama?

⁵ Yehowa na Yesu abafiita munda nsaa y’abamono abakitshina bantu mianda ya kukutua kululama, biabia natue namu ta bi bubi su tuafiita munda. (Ef. 4:26) Anka, abitungu tutentekieshe’shi, sunga tuafiita nsungu mu mushindo kinyi, t’ayipu mianda ya kukutua kululama. Dingi, su tualama nsungu munda mua mafuku e bungi, tui balombene mpa na kukumba. (Mis. 37:1, 8; Yak. 1:20) Biabia tuikukita kinyi nsaa yabetukitshina sunga kukitshina bangi mianda ya kukutua kululama? Kileshesho kia Yesu akitukuasha.

KIBAKITSHINE YESU PABAADI AMONO ABAKITSHINA BANGI MIANDA NA KUKUTUA KULULAMA

6. Mianda kinyi ya kukutua kululama ibaadi kuanka pabaadi Yesu pa nsenga? (Tala dingi kifuatulo.)

⁶ Pabaadi pa nsenga, Yesu bamuene mianda i bungi ya kukutua kululama. Bamuene bibaadi bakata ba bipuilo abakiengiesha bantu. (Mat. 23:2-4) Baadi dingi amono bibaadi bakata ba bena Loma abakiengiesha bantu. Bena Yunda be bungi abaadi abakiebe bulungantu kui bena Loma. Bangi abaadi mpa na bakite kisaka kiabetamina bu kia ba Zelote, bua kulua na bena Loma. Anka Yesu ta baadi mu kisaka su nkimune kibaadi akilu bua kushintula mbulamatadi. Nsaa ibaukile’shi abakiebe kumutuula bu nfumu, bakatukile yaya mbalo.​—Yo. 6:15.

7-8. Buakinyi Yesu ta baadi mutompe kukatusha mianda ya kukutua kululama pabaadi pa nsenga? (Yowano 18:36)

⁷ Pabaadi pa nsenga, Yesu ta baadi mufube pamune na bena politike bua kukatusha mianda ya kukutua kululama. Buakinyi? Baadi auku’shi bantu ta be na matalua sunga ngobesha ya kuikunkusha abo banabene. (Mis. 146:3; Yel. 10:23) Dingi, ta be na ngobesha ya kukatusha nsulo ya kukutua kua kululama. Satana diabulu nyi kuete kukunkusha uno ndumbuluilo. Nyi ntomboshi na bantu be bungi bakuete kumuambula. (Yo. 8:44; Ef. 2:2) Na kukutua kua kupuidika akukitshi bia’shi mpa na bantu be buwa abakutua mushindo wa kukita mianda ya kululama nsaa yoso.​—Mul. 7:20.

⁸ Yesu baadi auku’shi nka penda Bufumu bu’Efile Mukulu nyi abukakatusha nsulo ya mianda yoso ya kukutua kululama. Nyi buakinyi, baadi atuusha nsaa na bukome buaye bua “kulungula mukandu wi buwa wa Bufumu bu’Efile Mukulu.” (Luk. 8:1) Baadi mushinkamiishe “ba sha nsala na nyota ya kululama” shi makienga na mianda i bubi abifudiila binobino. (Mat. 5:6; Luk. 18:7, 8) Anka ta mbulamatadi ya bantu ayituesha kuno kushintuluka, nka penda Bufumu bu’Efile Mukulu, na buno Bufumu “ta mbua pano pa nsenga.”​—Badika Yowano 18:36.

AMBULA YESU NSAA YOMONO MIANDA YA KUKUTUA KULULAMA

9. Nkinyi akikushinkamiisha’shi nka penda Bufumu bu’Efile Mukulu nyi abukapu mianda ya kukutua kululama?

⁹ Lelo uno tukuete kumona mianda ya kukutua kululama i bungi kukila mpa na mafuku abaadi Yesu pa nsenga. Anka nsulo ya kukutua kululama mu ano “mafuku a nfudiilo” ki’nka Satana, na bantu bakutue kupuidika be ku bukitshishi buaye. (2 Ti. 3:1-5, 13; Kbf. 12:12) Nka bu Yesu, atuuku’shi nka penda Bufumu bu’Efile Mukulu nyi abukabutula nsulo ya kukutua kululama. Pa muanda tukuete kukuatshishena buno Bufumu, t’atutuele mu kisaka akikiebe kushintula mbulamatadi sunga kukulupila’shi mbulamatadi ya bantu ayikatusha mianda ya kukutua kululama. Tubande kutala kileshesho kia mukuetu mukashi abetamina bu Stacy.a Kumpala kua kulonga bia binyibinyi, Stacy baadi atuele mu bisaka bibaadi abikitshi marche bua’shi kuikale mianda ya kululama. Kunyima kua mafuku, babangile kuiyipusha su biabia bibabadi abakitshi bibadia kushintuula mianda. Amba’shi: “Nabangile kuiyipusha su nadi nalu bua kupeta bipeta bi buwa. Anka binobino, bu biankuatshishena Bufumu bu’Efile Mukulu, nemushinkamishe’shi abo nyi abupu nkalakashi yoso. Nauku’shi Yehowa akapu makienga oso, kintu kianshi mulombene kukita.”​—Mis. 72:1, 4.

10. Muyile Mateo 5:43-48, buakinyi t’abitungu tutompe kushintula miiya sunga mbulamatadi? (Tala dingi kifuatulo.)

¹⁰ Bantu be bungi lelo uno bakuete kutuela mu bisaka abikiebe kushintula mbulamatadi. Be bungi ba kuabadi bakuete kufiita nsungu i bukopo, t’abakookiela miiya na abakitshina bangi bi bubi. Bino mbikutuene na malongiesha a Yesu. (Ef. 4:31) Mukuetu mulume abetamina bu Jeffrey amba’shi: “Nauku’shi nsaa ayikitshi bantu marche mbalombene kutomboka musango umune, na kubanga kuluisha sunga kuiba bintu, mpa na kuitapena.” Anka Yesu muitulongieshe bua kukitshina bantu boso mianda na kifulo, mpa na baaba be na mueneno muilekene na eetu sunga abetubingabinga. (Badika Mateo 5:43-48.) Atue bena Nkidishitu, atukitshi muetu moso bua kukita mianda itulongieshe Yesu.

11. Buakinyi ingi nsaa bi kuikala bukopo bua kuambula Yesu?

¹¹ Sunga atuuku’shi Bufumu bu’Efile Mukulu abukapu mianda ya kukutua kululama bua loso, nsaa yabetukitshina ino mianda bi kuituelela bukopo bua kuambula Yesu. Bino nyi bibapushishe mukuetu mukashi abetamina bu Janiya, nsaa ibaadi bantu bamukitshine mianda i bubi pa muanda w’ekoba diaye. Amba’shi: “Nadi mufiite munda ngofu. Naadi muinyongole ngofu na nadi nakumiina’shi banyookie baaba bantu. Akupu namuene’shi bi buwa ntuele mu kisaka kia bantu abalu bua’shi takuikalanga ntondo y’ekoba. Namuene’shi uno nyi mushindo wi buwa wa kupua nsungu yande.” Anka muenda mafuku, Janiya bamuene’shi abitungu ashintuule mueneno aaye. Amba’shi: “Namuene’shi, pamutue pa kukulupila Yehowa, nabangile kukumiina bibaadi abiakula bantu na ami nkubanga kuibakulupila. Biabia natshile kitshibilo kia kukatuka mu bino bioso bisaka na kupela kukita dingi ino mianda.” Sunga tuapusha nsungu nsaa yabetukitshina mianda ya kukutua kululama sunga patumono abeyikitshina bangi, abitungu tupooshe nsungu yetu, na tatutuelakananga mu mianda ya pa nsenga nsaa su ngimune.​—Yo. 15:19.

12. Buakinyi bi na muulo tusangule mikanda, ma video na miisambo yatuteemesha?

¹² Nkinyi kilombene kuitukuasha bua kupoosha nsungu yetu nsaa yatumono mianda ya kukutua kululama? Bantu be bungi mbamone’shi bi buwa basangule mikanda yakubabadika, ngono yabateemesha, sunga ma video abatala. Ingi miisambo i mu Internete mbeyikite bua kutapa bantu ku mashimba sunga kuibatakula mu kutombokiela mbulamatadi. Ke bungi, mikandu ya ku bisaashi ayakulaa mianda yabapuandikisha, kushi biabia abikitshika. Sunga mukandu wekala wa binyi, ta tuibalombene kupua mianda pa kutungunuka na kubadika biabia bikitshikie. Su tuakisha nsaa i bungi mu kubadika mikandu, mbilombene kuituinyongosha na kuitufiitshisha munda. (Nki. 24:10) Na muanda wi bubi bukilekile, tui kuilua mpa na’shi nka penda Bufumu bu’Efile Mukulu nyi abupu mianda yoso ya kukutua kululama.

13. Kiubishi kia kubadika Bible ki kuitukuasha bua kulama mueneno e buwa pabitale mianda ya kukutua kululama naminyi?

¹³ Kiubishi ki buwa kia kubadika Bible na kunangushena, ki kuitukuasha bua kumona bia kukila na mianda ya kukutua kululama. Mukuetu mukashi abetamina bu Alia baadi mukalakashue ngofu pabaadi amono bibabadi abakitshina bantu mianda i bubi mbalo ibaadi mushale. Bibaadi abimueka’shi baaba bantu abaadi abakiengieshena, ta babaadi abebanyooko. Amba’shi: “Nadi neyipusha’shi, ‘Nashinkamisha’shi Yehowa apu ino yoso mianda su?’ Mu aa mafuku, nabadikile Yoobo 34:22-29. Ino verse ibaadi intentekieshe’shi ta kui muntu e kufuama Yehowa. Nka penda aye nyi mululame na nka penda aye nyi akalumbuula mianda.” Anka, patuki’atutengiela’shi Bufumu bu’Efile Mukulu butuale kululama kua binyibinyi, abitungu tunyingiile mianda ya kukutua kululama lelo uno. Mushindo kinyi?

KIATUDIA KUKITA LELO UNO

14. Tui kukita kinyi bua kupela kukuatshishena kukutua kua kululama kui pa nsenga? (Bena Kolose 3:10, 11)

¹⁴ Tatui kushintuula bantu bua’shi balekie kukitshina bangi mianda i bubi, anka atue tukitshine bantu mianda na kalolo. Nka bu bibatupu kuibilonga, atuambula Yesu pa kulesha kifulo. Kino kifulo akitutakula bua kukitshina bantu boso mianda na kalolo, mpa na baaba abetukiengiesha. (Mat. 7:12; Lom. 12:17) Yehowa e na muloo nsaa yetumono atukitshina bantu boso mianda na kalolo na kululama.​—Badika bena Kolose 3:10, 11.

15. Mbikunyi biatukuete kukuasha bantu pa kuibalongiesha Bible?

¹⁵ Muanda wi na muulo watudia kukita bua kulua na kukutua kua kululama nyi nkulungula bantu bia binyibinyi bi mu Bible. Buakinyi atuakula biabia? Muanda “kuuka Yehowa” kui kushintula muntu baadi ntomboshi afika muntu mutaale, sha kifulo. (Yesh. 11:6, 7, 9) Bu kileshesho, kumpala kua kulonga bia binyibinyi, ungi muana mulume abetamina bu Jemal baadi mutuele mu kisaka kibaadi akilu bua kushintula mbulamatadi, muanda baadi amono’shi yawa mbulamatadi ta baadi buwa. Amba’shi: “Tue kushintuula bantu pa bukopo. Ami ta babaadi bankitshishe bua kushintuluka, anka bia binyibinyi bia mu Bible biandi mulongie nyi binshintule.” Mianda ibaadi Jemal mulongie ibaadi imutakule bua kuleka kulua. Su atulongiesha bantu bia binyibinyi bia mu Bible, atuibakuasha bua kuleka kukiengiesha bangi.

16. Buakinyi tui na kisukusuku kia kulunga bangi lukulupilo lua Bufumu?

¹⁶ Nka bu Yesu, tui na kisukusuku kia kulungula bantu’shi nka penda Bufumu bu’Efile Mukulu nyi abukakatusha kukutua kua kululama. Luno lukulupilo lui kunyingisha baaba babadi bakitshine mianda ya kukutua kululama. (Yel. 29:11) Stacy atatupuile kutemuna amba’shi: “Kulonga bia binyibinyi kunkuashe bua kunyingiila mianda ya kukutua kululama yabaadi bankitshine na yankuete kumona.” Bua kulungula bantu mukandu aunyingisha wi mu Bible pabitale kupua kua kukutua kua kululama, abitungu wekale muilumbuule kalolo. Su tuauka kalolo abiakula Bible pabitale makienga, atunyisha kushinkamisha ano malongiesha. Paapa abitubofuila bua kulungula bangi, biabikala ku kalasa sunga ku mudimo buakinyi atukiengie, na akikitshi Yehowa bua kupua makienga.b

17. Yehowa kuete kuitukuasha bua kunyingiila mianda ya kukutua kululama lelo uno naminyi?

¹⁷ Bu biki Satana “nfumu a ino nsenga” kuanka, atuikala nka atumono mianda ya kukutua kululama. Tutengieleyi’shi mianda ayishintuluka, muanda Yehowa mulee’shi etukuasha na’shi akabutula Satana na bubi boso. (Yo. 12:31) Mu Bifundue, Yehowa t’alesha penda buakinyi kui mianda ya kukutua kululama i bungi, kadi alesha dingi’shi apasukilaa boso babakiengiesha. (Mis. 34:17-19) Ku bukuashi bua Muana aaye, Yehowa etulongiesha bua kunyingiila mianda ya kukutua kululama na mushindo wakakatusha ino mianda bua loso ku bukuashi bua Bufumu buaye. (2 Mp. 3:13) Tutungunukieyi na kulungula mukandu wa buno Bufumu na kisumi, na tutungunukieyi na kutengiela kipungo akikaulu “kululama” pa nsenga ishima.​—Yesh. 9:7.