Nsaa ayifu muntu atudi bafule

“Nadi bu mukutwe kya kukita pabafwile tutu ande lufu lwa kibatu. Kunyima kwa myeshi nadi nka namutentekyesha na napusha kinyongwa nka bu kapete akantungu mwishimba. Ingi nsaa nadi nafiitshi munda. Bwakinyi tutu ande baafu? Nadi dingi netopeka mwanda wa kukutwa kwa kukisha naaye nsaa ibungi.” —Vanessa, Australie.

SU WE mufwishe muntu kampanda odi mufule, noobe namu pangi we mupushe nkalakashi ilekene ayitukila ku kenyongoshi, kwipusha bushiye na kukutwa kya kukita. Pangi we mupushe mpa na nsungu, kwitopeka, na moo. Pangi we mpa na mwiyipushe su kwikala na muwa kwi na muulo.

Shinkamisha’shi kwinyongola ta nkubofula nya. Abilesha bi bukata bwa kifulo kyodi nakyo bwa yawa mufwe. Byabya kwi mushindo odya kupeta kusambibwa kulombane ku kenyongoshi kodi nako?

BYABADI BAKITE KWI BANGI BWA KOOBESHA

Nsaa yopusha’shi kenyongoshi koobe taakapu, we mulombeene kunyingishibwa na bino binangu bi pano:

LESHA KENYONGOSHI KOOBE

Bantu boso t’abenyongolaa mu mushindo umune sunga nsaa imune nya. Anka, kudila nkulombene nkukwasha bwa kupudisha kinyongwa kyobe. Vanessa atudi besambile kumpala amba’shi: “Nadi nadidi; bwa kufukamisha kinyongwa kyande.” Sofía badi mufwishe mwinaye mukashi amba’shi: “Kunangushena ku wawa mwanda akunginyongoshaa ngofu. Bi nka bu kufungula na kusuula elonda di twishi. Busungu mbukile bukopo, kadi abikwasha bwa’shi elonda dipande.”

LUNGULA BANGI BYONANGUSHENA NA BYOPUSHA

Eyendo’shi, kwi nsaa yodi mulombene kwikala na lukalo lwa kushaala pa bupenka. Anka kinyongwa nyi mbushito bodi mutwale bupenka bobe. Jared e na bipwa ekumi na musambo, badi mufwishe nshaaye atentekyesha’shi: “Nadi mulungule bangi bantu byampusha. Nadi namba’shi ntshinadya kwibalungula, anka napushishe muloo kunyima kwa kwibalungula.” Janice atwisambilanga mu mwisambo wa kumpala, alesha dingi bungi bukwashi bubapetele’shi: “Kwisamba na bangi kwi na bukwashi bukile bungi. Napushishe’shi abanteemesha, na ntshinadi nepusha bu’mi e bupenka.”

KUMIINA BUKWASHI

Mungi doktere amba’shi: “Muntu e na maalo akumina’shi bamukwashe kwi bakuuku na bena kifuko ku mbangilo kwa kenyongsohi kaaye, abikala bibofule bwashi anyingiile kyakya kinyongwa.” Lungula bakuuku bobe kyabadi balombene kukita bwa nkukwasha; be na lukalo lwa nkukwasha anka pangi tabauku mushindo wabadya nkukwasha nya.—Nkindji 17:17.

EFUBWILE PEPI N’EFILE MUKULU

Tina amba’shi: “Panadi mufwishe mulume ande na mukumbo wa cancer, ntshinadi dingi na a kulungula myanda yande, kadi, nadi nalungula Efile Mukulu myanda yande yooso! Nadi namutekye efuku dyooso bwashi ankwashe ngobeshe. Efile Mukulu mmunkwashe mu mishindo ikele bungi.” Tarsha badi na bipwa 22 pabafwile nyinaaye amba’shi: “Kubadikanga Bible efuku dyooso, kubadi bu nsulo ya kunyingishibwa kwande. Kubadi akumpa myanda yandi mulombene kwelela binangu.”

NANGUSHENA NSAA AYIKASANGUKA MUNTU OODI MUFULE

Tina amba dingi’shi: “Kya kumpala, lukulupilo lwa lusangukilo talubadi lunyingishe mwanda nadi na lukalo lwa mulume ande—na bana bande balume basatu babadi na lukalo lwa nshabo. Kadi, binobino takudi bipwa binanka, ne mulamate ku luno lukulupilo. Nyi kwandji mukwatshiile. Napwandikisha nsaa yankamumono dingi, na abimpa kufukama na muloo!”

Pangi tokapusha biya musango umune nya. Sunga mbyabya, myanda imone Vanessa ngilombene nkunyingisha. Amba’shi: “Opwandikisha’shi twe mulombene kupusha biya, anka wende na kupusha biya kapela kapela.”

Tentekyesha, poyikala omono bantu kushii kukooka, bi na muulo kwikala na muuwa. Ku bukwashi bwa kalolo k’Efile Mukulu, we mulombeene kutungunuka na kwikala na muloo na bakuuku bebuwa na muwa wi na kepatshila. Na, kubashala mafuku apeela Efile Mukulu akasangula bafwe. Akumina’shi wekale na mushindo wa kwibakukila dingi. Yaaya nsaa kinyongwa ki mwishimba dyobe akipu bwa looso!

Verse ya mu Bible ilombene nkukwasha

Efile Mukulu kwete kumona kenyongoshi na kudila kobe.

Mungi mufundji a Bible balungwile Efile Mukulu’shi: “We mubadikye misûsa yoso yandji mudile mpolo. We mwiifunde mu mukanda ôbe.”—Misambo 56:8, EEM.

Lungula Efile Mukulu byopusha.

“Nele [Yehowaa] musâse wa kumwidila . . . Natala akun’aku kushi kumona muntu ankwâsha.”—Misambo 142:2, 5, EEM.

We kwikala na lukulupilo.

“Akwikala kusanguka.”—Bikitshino 24:15.

Efile Mukulu mmulee kusangula bantu midiyo bwa’shi bekale na muwa, akumiina binyibinyi kukita byabya.b—Yoobo 14:14, 15.

a Yehowa nyi eshina dy’Efile Mukulu bu byadidi mu Bible.

b Bwa kuuka ingi myanda pabitale kusanguka, tala shapitre 7 a mukanda wa A nkinyi akitulongyesha Bible? Wabadi batushe kwi ba Temwe ba Yehowa na odya kwata mu www.jw.org.