Nsaa ayikitshika masaku aatukila ku bupangi

“Kya kumpala tubadi bakutwe lukulupilo. Bintu byetu byoso bibadi bilwishibwe na mema a mpeshi.”—Andrew, Sierra Leone.

“Kunyima kwa kipapi kikata, tubalukiile mu nshibo yetu. Takubadi kushale kintu. Tatubadi na kya kwakula. Mwan’ande mukashi bakunamine abanga kudila.” —David, a mu îles Vierges.

SU BODI mupande ku masaku kampanda, we mukumbene kupusha abipushaa bangi boso bapande: Kutapika ku mashimba, kwimona bisumanga, kukutwa kya kukita, kinyongwa na kwibapasukilanga. Bangi bantu bapande, abepushaa babofule ku mashimba na bakookye kushi na lukalo dingi lwa kwikala na muwa.

Su bodi mushimishe bintu pa mwanda wa masaku kampanda, noobe namu we mukumbene kupusha bu shii mukumbeene kobesha kunyingiila. We kubanga kupusha bu muwa obe ushi na muulo dingi. Byabya, Bible apatuula’shi muwa oobe wi na muulo, na shi we na kabingilo ka kukulupila nshalelo ebuwa mu mafuku e kumpala.

BYA BINYIBINYI BYA MU BIBLE ABITUPA LUKULUPILO

Mukanda wa Mulungudi 7:8 awamba’shi: ‘Nfudiilw’a kintu mmukile mbangilo aakyo muulo.’ Obe bakatuka mu kupeta masaku, we mukumbene kukutwa lukulupilo. Anka nsaa yokwete kwibushula mu nshalelo obe, myanda ngilombene kulumbuluka.

Bible mmutemukye nsaa ayikala bantu ‘taabapusha dimo mawunga a mâlo, sunga misâse ya kwidila.’ (Yeeshaya 65:19, EEM) Bino abikalombana nsaa ayikaluluka nsenga bu mpaladiiso mu Bufumu bw’Efile Mukulu. (Misambo 37:11, 29) Masaku taakatuku dimo nya. Myanda yooso na mikumbo yooso ya mu binangu abebikatusha bwa looso, mwanda Efile Mukulu Sha bukome boso mmulee’shi: “Bantu taabatentekyesha dingi myanda ya-kala, taayiibafwila dimo ku mashimba nya.”—Yeeshaya 65:17.

Banda kwela binangu: Mupangi mmwate mpàngo ya ‘nkwikasha na mulô na lukulupilo mwanda wa mafuku aakafiki’—nshalelo a kufukama mu bukunkushi bupwidikye bw’Efile Mukulu. (Yeelemiya 29:11) Kuuka bino bya binyibinyi, nkulombene nkukwasha bwa kumona’shi muwa wi na muulo su? Sally, atudi batemune ku mbangilo kwa mwisambo amba’shi: “Kunangushena ku myanda ibuwa yoso yabaketukitshina kwi Bufumu bw’Efile Mukulu mu mafuku e kumpala, nkulombene nkukwasha bwa kuluba myanda ya kala na kutuula binangu ku myanda ya binobino.”

Twe mulombene namu kulonga myanda yabakakitshina bantu kwi Bufumu bw’Efile Mukulu binobino su? Kukita kwa byabya nkulombene nkukwasha bwa kushinkamisha’shi sunga apakukwata masaku kampanda, bi na muulo bwa’shi wekale na muwa nsaa yokwete kutengyela kukatushibwa kwa masaku ooso. Anka bwa binobino, Bible atusha malango ebuwa alombene nkukwasha bwa kumona bya kukila na myanda ayitukila ku masaku odi mupete. Banda kutala bileshesho bipela.

Verse ya mu Bible ilombene nkukwasha

Ikala olaala.

“Mbikile buwa kwikala na kipindji kya kwikisha, sunga na bintu bipêla, pe kwikôkyesha na mifubo ibungi ako nkubinga kwa lupapi!” —Mulungudi 4:6, EEM.

Bantu abakimbulaa myanda mbasangane’shi: “Nsaa ibantu abapete mikumbo ya mu binangu, abapusha bubi bukile na nkalakashi ya mu binangu ikile bungi su tabakwete kumona tulo.” Byabya, bibuwa kulala ngofu.

Lungula bangi byopusha.

“Lukalakashi mwishimba dya muntu alumwinyongoshaa, anka eyi dya kalolo adimusangasha.”—Nkindji 12:25.

Esambe na mwina kifuko sunga kuuku oobe a p’eshimba. Kukatusha kukuteemesha pabitale byopusha, bena kifuko sunga bakuuku ba p’eshimba mbalombene nkunyingisha na nkupa bukwashi bodi nabo lukalo.a

Nangushena mafuku aafiki apakalumbuluka myanda.

“Twi batengyele eyilu dipya na nsenga ipya, mwamwa amukabikala bululame.”—2 Mpyeele 3:13.

a Muntu mukalakashwe mu binangu munda mwa nsaa ibungi sunga e na kenyongoshi kakile, mmukumbene kukimba bwanga bwa kwa munganga.