Myaluulo Ku Nkonko Yenu

◼ Nkinyi akitungu kulongyesha baana bwashi bakule kalolo mu kikudi?

Baledi beena Kidishitu abakitaa mwabo mooso bwa kukusha baana baabo mu ‘kwibalongyesha na kwibanyôka muîle abikyebe Yehowa.’ (Ef. 6:4, EEM) Bu kileshesho, baledi mbamone shi bii na muulo wa kutaluula kifundwe kya kwifuku n’efuku na baana baabo ku namashika kooso. Nsaa yabakitshi lulangwilo lwa mu kifuko sunga ingi nsaa, bifuko mbilombeene kutala na kutentekyesha pamune myanda i mu video, kwisamba pabitale mwisambo wanudi basangule mu miisambo i mu Les Jeunes s’interrogent, kubunga myanda ya mu Bible, sunga bintu bya kwalula kwisaki. Anka, bwashi baana “bende ku meeso,” abitungu dingi kwibalongyesha ngofu bya binyibinyi bya mu Bible.​—Eb. 6:1.

Tutaluleeyi byatukwete kulongyesha bantu batukwete kufumankana nabo mu teritware eetu. Nsaa y’atwisamba bwa musango wa kupala na muntu sunga p’atumwalukiila dingi, misusa ibungi atwitatshishaa bwa kubanga kulonga naye Bible na mukanda wa A nkinyi akilongyesha namu Bible? Kunyima kwa kupudisha uno mukanda, atulongaa mukanda wa “Elameeyi mu kifulo ky’Efile Mukulu.” Bwakinyi? Kulonga mukanda wa Akilongyesha Bible akukwasha mulongi bwa dya kupeta kyukilo kya malongyesha a kitako a mu Bible. Mukanda wa “Kifulo ky’Efile Mukulu” namu awibalongyesha mushindo wa kutumikila mayi a kulonda a mu Bible mu nshalelo abo a kwifuku n’efuku. Kulonga kwa ino mikanda yooso ibidi akukwasha muntu mupya bwa “kumena mishi” mwi Yesu na “kunyinga mu lukumiino.” (Kol. 2:6, 7) Bwakinyi ino mikanda ta ngilombeene kukwasha baana beetu? Naabo naamu be na lukalo lwa kulonga pabitale nkuulo, Bufumu, na akifwilaa muntu su baafu. Dingi baana beena lukalo lwa kuuka bwakinyi Efile Mukulu mmutadiile makyenga na mushindo wa kutundula mafuku a nfudiilo a uno ndumbulwilo a myanda. Abitungu bashinkamishe shi Batemwe ba Yehowa be na bya binyibinyi. Bansongwalume na bansongwakashi be na dingi lukalo lwa kupusha kalolo mayi a kulonda a mu Bible na mushindo wabadya “kupeta kyuubishi kya kushinguula myanda ibuwa na ibubi.” (Eb. 5:14) Kadi, abitungu baledi batale bi bipwa na pafudiile mpushisho a bana baabo. Sunga mbyabya, bana bebungi be na kyubishi kya kubanga kulonga myada ikata ya binyibinyi bya mu Bible kubanga pabakii bakinga.​—Luk. 2:42, 46, 47.