Binangu abitukunkusha mu nshalelo eetu

1. Buakinyi atue booso tui na lukalo na binangu bi’Efile Mukulu? (Nkindji 4:7)

SU OKUMIINA kuata kitshibilo ki na muulo, kushi mpaka otekaa binangu muanda ouuku’shi we nabio lukalo. (Shak. 1:5) Mfumu Salomone bafundile’shi: “Binangu ngi kintu ki na muulo ukata.” (Badika Nkindji 4:7.) Biabia, Salomone ta baadi muakuile pabitale kinangu kioso kiakia nya. Baadi muakuile bua binangu abikatukila kui Yehowa Efile Mukulu. (Nki. 2:6) Biabia, binangu bi’Efile Mukulu mbilombene kuitukuasha bua kunyingiila mianda yatudi nayo mu binangu yatukuete kupeta lelo uno su? Oolo, bi kuitukuasha nka bu bi’atukebimono mu uno muisambo.

2. Mmushindo kinyi umune watudi balombene kupeta binangu bia binyibinyi?

² Umune wa ku mushindo watudi balombene kuikadika na binangu bia binyibinyi, mpatuilongiela na kutumikila malongiesha a bano bantu babidi babaabadi abaneemeka bua binangu biabo bi bungi. Kia kumpala, atutaluula pabitale Salomone. Bible amba’shi “Efile Mukulu bapeele Salomone binangu na lushinguluilo lua mianda lui bungi.” (1 Bf. 4:29, NWT) Kia kabidi, atutaluula pabitale Yesu, booso babaadi na binangu bishekeele nabio ungi muntu. (Mat. 12:42) Bua Yesu, butemuki bubambile’shi: “Kikudi kya Yehowa akiikala mwadi: Kikudi kya binangu na kya kapatupatu.”​—Yesh. 11:2.

3. Nkinyi ki’atutaluula mu uno muisambo?

³ Efile Mukulu baadi mupe Salomone na Yesu binangu bi bungi, bino bibaadi bibakuashe bua kuikadika na ngobesha, ya kutusha elango dibuwa pabitale mianda i na muulo bua’tue booso. Mu uno muisambo, atutaluula mianda isatu ya ku yanka: Pabitale kuikadika na nkatshinkatshi bua mueneno a makuta, a mudimo wa ku mbidi, na eetu’tue banabene.

NKATSHINKATSHI PABITALE MAKUTA

4. Nkuilekeena kinyi kubaadi pankatshi pa Salomone na Yesu pabitale bupeta?

⁴ Salomone baadi na bupeta bui bungi, na baadi na nshalelo e buwa bukile na nshibo i buwa. (1 Bf. 10:7, 14, 15) Yesu namu ku luaye lupese, baadi na tu bintu tupeela na ta baadi su na yaye nshibo ya kushaala. (Mat. 8:20) Biabia, bano booso bantu babidi babaadi na nkatshinkatshi pabitale bintu bia ku mbidi, ku muanda binangu biabo bibaadi na nsulo imune Yehowa Efile Mukulu.

5. Salomone baadi na nkatshinkatshi kinyi pabitale makuta?

⁵ Salomone baadi muukie’shi makuta ‘mbulami.’ (Mul. 7:12, EEM) Su tui na makuta, tui balombene kupeta bintu biatudi nabio lukalo, na kupeta bingi bintu bi’atukumiinaa. Biabia, sunga mbibaadi na bupeta bui bungi, Salomone baadi mushinkamishe’shi kui kintu ki na muulo kukila makuta. Bu kileshesho, bafundile’shi: “Nkumo iibuuwa ngikile bupeta ku muulo.” (Nki. 22:1) Salomone baadi dingi mumone’shi bantu be na kifulo na mfualanga, t’abakambaa kupeta muloo wabadi nao lukalo nya. (Mul. 5:10, 12) Na baadi mudimushe dingi’shi baaba booso batuule lukulupilo mu makuta, bauukie’shi makuta aashiminaa lubilolubilo.​—Nki. 23:4, 5.

6. Yesu baadi na nkatshinkatshi kinyi pabitale bintu bia ku mbidi? (Mateo 6:31-33)

⁶ Yesu baadi na nkatshinkatshi pabitale bintu bia ku mbidi. Aku namu baadi adi na kutoma. (Luk. 19:2, 6, 7) Dingi efuku, baadi mukite maalua a mfinyo e buwa bukile kilengieleshi kia kumpala kia ku bilengieleshi biaye. (Yo. 2:10, 11) Na efuku dibafuile, baadi mufuale kilamba kia muulo. (Yo. 19:23, 24) Anka Yesu ta baadi mutadiile’shi atume binangu ku bintu bia ku mbidi mu nshalelo aaye nya. Baadi mulungule balongi baye’shi: “Takwi muntu mulombeene kufubila ba-fumu babidi . . . Tanwibalombeene kufubila Efile Mukulu na mmono nya.” (Mat. 6:24, Kilombeeno Kipya 2014) Yesu balongieshe’shi su tuatuula Bufumu pa mbalo ya kumpala, Yehowa aketupa kiakia kiatudi nakio lukalo.​—Badika Mateo 6:31-33.

7. Mmushindo kinyi ubaadi ungi mukuetu mulume mukuashibue p’aye kuikadika na nkatshinkatshi pabitale makuta?

⁷ Bakuetu balume na bakashi be bungi, mbakuashibue ngofu p’abo kutumikila Elango dia Yehowa dia binangu pabitale makuta. Tubandeyi kutaluula kileshesho kia mukuetu nsongualume abetanyina bu Daniel. Bambile’shi: “Panaadi nki nsongua, natshile kitshibilo kia’shi ntuule mianda ya mu kikudi pa mbalo ya kumpala mu nshalelo ande.” Ku muanda baadi muikadikie na nshalelo mupeelepeele, Daniel bapetele mushindo wadia kufubisha nsaa yaye na mayele aaye mu midimo i bungi ya teokrasi. Amba dingi’shi: “Ne kuakula mu binyibinyi’shi ta nedilaa bua kitshibilo kiande kiandi muate nya. Mu binyibinyi, ne mulombene kupeta makuta e bungi su ne mutuule mianda ya ku mbidi pa mbalo ya kumpala mu nshalelo ande. Anka ntshinadia kuikadika na bakuuku be buwa bandi nabo nya. Su nadia kuikala mutuule binangu biande ku makuta, ntshinadia kuikadika na uno muloo wandi nao binobino, ku muanda ne mutuule binangu biande mu kukita nka mianda ya Yehowa, Yehowa mmumpe muloo wi bungi ushibadia kumpa makuta.” Mu kuakula kua kalolo, atukuashibua nsaa y’atutuulu binangu bietu kushi ku mianda ya makuta, anka mu kukita mianda ya Yehowa.

NKATSHINKATSHI PABITALE MUDIMO WA KU MBIDI

8. Atuuku naminyi’shi Salomone baadi na nkatshinkatshi pabitale mudimo? (Mulungudi 5:18, 19)

⁸ Salomone bambile’shi mudimo, ngulombene kutuadila muntu miloo i bungi, bayitanyine bino bu “kia buntu ki’Efile Mukulu.” (Badika Mulungudi 5:18, 19.) Bafundile’shi: “Mudimo ooso autuusha kipeta kiibuuwa.” (Nki. 14:23) Salomone baadi auuku’shi ano ooso mayi abaadi a binyibinyi. Baadi mufubi! Baadi muibakie bashibo, akuna mitshi ya mfinyo, adima mafuba, na bishiba bia meema a kuitumpa. Baadi dingi muibakie mpata. (1 Bf. 9:19; Mul. 2:4-6) Ino ibaadi midimo i bukopo, na kushi mpaka ibaadi imuikashe na muloo. Anka Salomone baadi muukie’shi tanka penda ino yoso midimo, ngi ilombene kumuikasha na muloo wa binyibinyi nya. Baadi dingi mukite mianda i bungi bua Yehowa. Bu kileshesho, baadi mukunkushe luibako lua ntempelo e buwa bukile bua lulanguilo lua Yehowa munda a bipua musambo bia kuibaka! (1 Bf. 6:38; 9:1) Kunyima kua Salomone kukita ino yoso midimo ilekeenelekeene, baadi mushinkamishe’shi kintu ki na muulo ukata kilombene muntu kukita, nyi nkufubila Yehowa. Bafundile’shi: ‘Pusha mfudîlo ya ino myanda yoso: ‘Tshîna Efile Mukulu a bînyibînyi na olame mîya yaye.’​—Mul. 12:13, EEM.

9. Mmushindo kinyi ubaadi Yesu mulame mudimo waye wa ku mbidi pa mbalo yawo?

⁹ Yesu baadi mufubi. Mu bipua biaye bia kumpala pano pa nsenga, Yesu baadi mufube bu nseeshi a mabaya. (Mak. 6:3) Kushi mpaka, baledi baye babaadi na lutumbu bua bukuashi buaye bubaadi ekitshisha bua kutusha, bua kupudisha nkalo ya kifuko kiabo kikata. Yesu baadi mupuidikie na mudimo ubaadi akitshi, ubaadi upuidikie! Biabia, bantu be bungi babaadi abakumiina bintu bibaadi akitshi. Yesu, baadi mukumiine mudimo waye ngofu, biabia sunga mbibaadi Yesu etumikila ku mudimo waye, baadi ekitshisha bua kupeta nsaa ya kufubila Yehowa. (Yo. 7:15) Kunyima, nsaa ibaabangile kulungula mukandu wi buwa nsaa yoso, baadi mulangie babaadi abamuteemesha’shi: “Tanufubanga’nka penda pa mwanda wa kwikala na bidibwa abilwilâ, ooo. Bi buwa nufube pa mwanda wa kwikala na bidibwa bishyabilwilâ, dingi, abipânâ mûwa wa ikalaika.” (Yo. 6:27, EEM) Na mu muisambo waye wa ku muengie, Yesu bambile’shi: “Anka ekongweleeyi bupeta mwiulu.”​—Mat. 6:20, Kilombeeno Kipya 2014.

10. Bangi mbalombene kupeta lukalashi kinyi ku midimo yabo ya ku mbidi?

¹⁰ Binangu bi’Efile Mukulu abitukuasha buatudia kuikadika na nkatshinkatshi, pabitale mudimo wetu wa ku mbidi. Bu biatudi bena Kidishitu, tuibalongie bia ‘kufuba . . . , na kukitanga kiakia kii buwa.’ (Ef. 4:28) Bakata ba mudimo mbalombene kumona kululama kuetu, na kisumi kietu ku mudimo na be kuitulungula’shi bakuete kusanka ngofu na mudimo w’atukitshi. Na kano kabingilo, tui balombene kubanga kufuba nsaa i bungi, bakulupile’shi mukata eetu a mudimo ekala etukaanyisha dingi ngofu, na ekadika na kinangu ki buwa pabitale ba Temue ba Yehowa. Anka su tubakitshi bino, ta tui balombene kuikadika na nsaa i bungi bua kuikadika pamune na kifuko kietu, sunga kukita midimo ya Yehowa nya. Abitungu tushintuule bua kupeta nkatshinkatshi.

11. Nkinyi kibaadi ungi mukuetu mulume mulongie pabitale kuikadika na nkatshinkatshi ya mudimo?

¹¹ Mukuetu mulume nsongua abetanyina bu William, mmumone muulo wa kulama mudimo wa ku mbidi pa mbalo yawo. Mukuetu William mmulongiele ku kileshesho kia ungi mukuetu mulume. William amba’shi: “Baadi muikashe mudimo waye pa mbalo yawo bua kuikadika na nkatshinkatshi. Baadi afubu ngofu na babaadi abamuamba nka mianda i buwa kui bakidiya baye ku muanda, baadi afubu kalolo ku mudimo waye. Anka ku mfudiilo ku’efuku, aye baapu kukita mudimo waye, baadi auuku nsaa ya kukatuka ku mudimo kumpala bua kutuula binangu biaye ku kifuko na ku lulanguilo luaye. Ouuku? Baadi umune a ku bantu be na miloo banguku!”b

KUIKALA NA NKATSHINKATSHI BUA’TUE BANABENE

12. Mmushindo kinyi aulesha’shi Salomone baadi na nkatshinkatshi pabitale aye nabene, kadi mbikunyi biadi muiyishimishe?

¹² Pabaadi Salomone bu mulanguidi a Yehowa sha lulamato, baadi na nkatshinkatshi pabimutale aye nabene. Pabaadi ki nsongualume, baadi muiwukie mikalo ya kiukilo kiaye na batekiele bua’shi Yehowa amukunkushe. (1 Bf. 3:7-9) Kumbangilo kua kumunana kuaye, Salomone baadi muiwukie dingi’shi bi masaku bua kuikadika na kuitatula. Bafundile’shi: “Kuitatula ngi akubadiila kumpala kua kupona, na kikudi kia kuilungula akibadiilaa kumpala kua kabutu.” (Nki. 16:18, NWT) Bi malua, muanda kunyima Salomone nabene babofuile bua kutumikila elango diaye’ye nabene. Ingi nsaa mu kumunana kuaye, tabaadi na kuitatula abanga kuluba ku kibaabadi abamutekie kui Efile Mukulu. Bu kileshesho, umune wa ku miya ubaadi awamba’shi Mfumu muina Ebelu “tee naa kya kwikala dimo na bungi bukile bwa bakashi, bwa kupela kupambul’eshimba dyaaye.” (Miy. 17:17) Salomone baadi mupele kukookiela uno muiya, na bayikeele na bakashi 700 na makupi 300 na be bungi ba ku bano bakashi, babaadi ba mpangaano! (1 Bf. 11:1-3) Pangi Salomone baadi amono’shi “tabia kuikala bu masaku kuadi.” Biabia, mu uno muanda, angi mafuku, Salomone tabaadi akiengie pa muanda wa bipeta bi bubi bibaadi abituku mu kuushi kookiela kuaye kua Yehowa.​—1 Bf. 11:9-13.

13. Nkinyi kiatudi balombene kulonga p’atunangushena ku eyikashi dia Yesu dia kuiyisha?

¹³ Yesu baadi mulame nkatshinkatshi na kuiyisha pabimutale aye nabene. Kumpala kua’shi afikie pano pa nsenga, Yesu bakitshiine bintu bi bungi bukile bi buwa, mu kufubila Yehowa. Mui Yesu, “ngi mubaapangiilwe byooso, bii mwiyilu na pa nsenga.” (Kol. 1:16) Ku lubatshisho luaye ngi kubaadi Yesu mutentekieshe mianda yoso ibaadi mukite, pa baadi na Nshaye. (Mat. 3:16; Yo. 17:5) Anka Yesu ta bayikeele na kuitatula nsaa ibaadi mutentekieshe yaya yoso mianda ibaadi mukite nya. Mu kuilekeena na biabia, Yesu ta baadi etumbisha bua muanda su ngumune. Balunguile balongi baye’shi, mmufikie pa nsenga “kushii bwa kufubilwa, anka bwa kufubila bantu, na kupaana muuwa waye bwa kukuula mwilo wa bantu.” (Mat. 20:28) Baadi dingi muukie mikalo yaye ya’shi ta mulombene kuikitshiina kintu mu mpango yaye’ye nabene. (Yo. 5:19) Yesu baadi muiyishe bikile! Yesu mmuitulekiele kileshesho ki buwa bukile kiatudia kulonda.

14. Nkinyi kiatudi balombene kulongiela kui Yesu pabitale kuikadika na mueneno e buwa buetu’tue banabene?

¹⁴ Yesu balongieshe balongi baye, buabadia kuikala na mueneno e buwa buabo’bo banabene. Dingi efuku, Yesu baadi muibashinkamiishe’shi: “Bwenu’nwe, mpaa na nyeene ya ku mitwe yeenu mbeeyibadikye yooso.” (Mat. 10:30) Kuno kuakula akuitunyingisha, bikishekishe su atuikalaa na mueneno e bubi pabitutale atue banabene. Bino abilesha’shi Nshetu e muiyilu ngi etupasukilaa ngofu​—na’shi tui na muulo ku meeso kuaye. Su Yehowa betutadiila bua’shi tumulanguile, na banangushena’shi tui balombene kupeta muwa wa ikalayika mu nsenga yaye ipia, ta tui balombene kunangushena’shi bakitshi bi bubi nya.

15. (a) Mmueneno kinyi e na nkatshinkatshi pabitutale atue banabene abetutekie bua kuikala naye mu Kitenta kia Mulami? (b) Nka bu biabalesha mu bifuatulo bi muisaki dia 24, su tuakamba kutuula nka binangu ku’tue banabene, mmiabi kinyi y’atukutua?

¹⁵ Kubaapu kukila bipua 15, Kitenta kia Mulami kibaadi akiamba’shi bi buwa kuikadika na nkatshinkatshi pabitale mueneno eetu’tue banabene: “Mu binyibinyi, t’abitungu tunangushene’shi tui na muulo ukilekile nya, tala tuekadika na kuitatula; sunga’shi t’abitungu tunangushene’shi tatui kintu, tala tuepusha bi bubi. Biabia, abitungu atue banabene tukimbe bia kuikadika na mueneno e buwa buetu’tue banabene, mushindo umune wa kuibikita mpatuiwuku bi bukome buetu na bi kubofula kuetu. Mukuetu mukashi mmuibipatuule mu uno mushindo: ‘Ami ntshi mukambe kuikala nka muntu e bubi ngofu bua bangi; na ngi bianshi mukambe kuikala’nyi muntu e buwa ngofu bua bangi. Nekalaa na ngikashi yoso ibidi, kui pandi na bukome, kui pandi namu mubofuile na bino ngi abikalaa muntu ooso.’”c Tui balombene kumona kalolo bua kinyi bi buwa tuikadikie na nkatshinkatshi pabitutale atue banabene.

16. Bua kinyi Yehowa mmuitupe binangu abitukunkusha?

¹⁶ Sunga mu ino nsenga, Yehowa mmuitupe binangu abitukunkusha. Mmuitufule na akumiina’shi tuikale na muloo. (Yesh. 48:17, 18) Kitshibilo ki buwa kiatudia kuata na akiketuikasha na muloo wa binyibinyi nyi nkia kutungunuka na kukita mianda ayikasha Yehowa na mfiedi buetu. Su tubebikitshi, atukakutua mianda i bungi ibabapetele kui baaba booso babaadi batuule binangu biabo ku makuta e bungi, ku midimo ya ku mbidi, sunga ku abo banabene. Abitungu ooso a kuatudi aate kitshibilo kia kuikala na binangu, na kukita mianda mu mushindo ausankisha eshimba dia Yehowa!​—Nki. 23:15.