Lama lukulupilo loobe lua buina Kidishitu lunyingie

1. Yehowa muitupe lukulupilo kinyi?

YEHOWA muitupe lukulupilo lui buwa bukile lua muwa wa ikalayika. Bangi abakulupila nkashaala muiyilu bua looso, bu bipangua bia mu kikudi bishabifu. (1 Kod. 15:50, 53) Be bungi naamu abakulupila nkashaala pa nsenga bua looso na mbidi ipuidikie na muloo. (Kibaf. 21:3, 4) Sunga tua tengiela muwa wa looso muiyilu, sunga pa nsenga lukulupilo luetu lui buwa bukile.

2. Lukulupilo luetu nduimeene pa kinyi, na buakinyi tui balombene kuakula biabia?

² Kishima “lukulupilo” kiabadi bafubishe mu Bible nkilombene kulesha, “kutengiela kua bintu bi buwa abikakitshika.” Tui balombene kushinkamisha’shi lukulupilo luetu lua mafuku aafiki alukalombana muanda alufiki kui Yehowa. (Lom. 15:13) Atuuku kiadi muitule, na atuuku dingi’shi alombashaa misuusa yooso milayilo yaaye. (Mb. 23:19) Tui bashinkamishe’shi Yehowa e na bintu bioso bibidi, lukalo na bukome bua kulombasha kintu kioso kiadi muakule bua kukita. Biabia lukulupilo luetu ta ndua kupuandikisha nya, sunga lua kiakia kuatukumiina’shi kikitshikie, anka lukulupilo luetu nduimeene ku kiatuuku’shi kia binyibinyi.

3. Nkinyi ki’atukesambila mu uno muisambo? (Misambo 27:14)

³ Nshetu e muiyilu muitufule na akumiina’shi tukulupile muadi. (Badika Misambo 27:14.) Nsaa ainyingi lukulupilo luetu mui Yehowa, atuikala na ngobesha ya kunyingiila nkalakashi yeetu ya kano kabidi na ya mu mafuku aafiki n’eshimba dinyingie na muloo. Tubandeyi kutala mushindo awitukaluila lukulupilo luetu. Bua kufudiisha atukataluula mushindo wi lukulupilo luetu, bu bino bintu bibidi, bu nyindo na bu kifulu. Na dingi, atukesambila mushindo watudia kunyingisha lukulupilo luetu.

LUKULUPILO LUETU LUI NKA BU NYINDO

4. Mushindo kinyi wi lukulupilo bu nyindo? (Bena-Ebelu 6:19)

⁴ Mu mukanda waye kui bena Ebelu, Mpoolo mutumibua baadi mupuandikishe lukulupilo luetu na nyindo. (Badika Bena-Ebelu 6:19.) Bu bibaadi ende nyendo ya mu meema, Mpoolo baadi auku’shi nyindo babaadi abamufubisha bua kulama buato tala bualaala. Ungi musuusa, Mpoolo baadi mu buato nsaa ibapukile kipapi ki bukopo. Pabaadi apapuku kiakia kipapi, Mpoolo bamuene baaba abatambusha buato, abayisha nyindo mu meema bua kupela’shi tala buato bualaala buakekupila ku mabue buatuusha masaku. (Bik. 27:29, 39-41) Anka bu nyindo ayimikaa buato pepoo, lukulupilo luetu aluitutshimatshisha kui Yehowa, biatusha kumuleka sunga nsaa y’atufumankana na nkalakashi i bu kipapi kikata. Lukulupilo luetu lunyingie, ndulombene kuitukuasha bua kunyingiila nkalakashi i bu kipapi, muanda tui bashinkamishe’shi mu kingi kipungo ayikakidi. Tutentekieshe’shi Yesu baadi muitudimushe’shi abaketubingabinga. (Yo. 15:20) Biabia nsaa y’atunangushena pa mulayilo wetu wa mafuku aafiki witupe Yehowa, abitukuasha bua kutungunuka na kumufubila.

5. Lukulupilo lubaadi lunyingishe Yesu naminyi nsaa ibaadi mufumankane na lufu?

⁵ Tutaluleyi lukulupilo bibaaludi lukuashe Yesu bua kushaala na lulamato sunga mbibaadi muukie’shi akafu lufu lua makienga. Muifuku dia Pantekote 33 bino bipungo bietu (B.B.,) Mpiele mutumibua baadi muteemune butemuki bui mu mukanda wa Misambo, abuleesha butaale na kishinkamiisho kibaadi naakio Yesu, bambile’shi: ‘Nakashaala mu lukulupilo mwanda tokantadiila mu kalunga-nyembo nya, dingi tokalekiela muntu oobe shaa lulamato bwa’shi anyangye. . . . Okamubuusha na muloo mu kuikala koobe naamu.’ (Bik. 2:25-28; Mis. 16:8-11) Sunga Yesu baadi mukie’shi mulombene kufua, baadi na lukulupilo lui bukopo lua’shi Efile Mukulu mulombene kumubuusha, na’shi mulombene kuikala na muloo bua kuikala mu buumune na Nshaye e muiyilu.​—Eb. 12:2, 3.

6. Mungi mukuetu mulume baadi muakule kinyi pabitale lukulupilo?

⁶ Lukulupilo luetu lua bena Kidishitu ndukuashe bakuetu balume na bakashi be bungi bua kunyingiila. Tubandeyi kutala kileshesho kia mukuetu mulume sha lulamato, Leonard Chinn baadi mushaale mu Angleterre. Mu Ngoshi ya Kumpala wa Nsenga ishima, babaadi bamuele mu lukano muanda baadi mupele kutuela mu busalayi, munda a mieshi ibidi babaadi bamuele mu lukano mubaadi penda bupenka. Na kunyima kua paapa babaadi abamukitshisha pa bukopo bua kukita mudimo wi bukopo wa ku mbidi. Kunyima bafundile’shi, “Mianda yandi mumone, ngi nkanyishe na nginkuashe bua kumona’shi tui na lukalo na lukulupilo bua kunyingiila. Tui na bileshesho bu, kia Yesu, kia batumibua, na kia batemuki mpa na milayilo i buwa ya mu Bible. Bino bioso abitupa lukulupilo lukata bua mafuku aafiki, na kuitunyingisha bua kunyingiila.” Lukulupilo lubaadi bu nyindo kui Leonard, na ndulombene kuikala bu nyindo kuatudi naamu.

7. Bitompuanga bietu abinyigisha lukulupilo luetu naminyi? (Bena-Looma 5:3-5; Shake 1:12)

⁷ Patunyingiila bitompuanga na kumona mushindo awitukuasha Yehowa, abitushinkamisha’shi tui bakuminyibue n’aye, na bino abinyingisha lukulupilo luetu. (Badika Bena-Looma 5:3-5; Shake 1:12.) Lukulupilo luetu ndunyingie binobino, kukila nsaa ibatudi bakumiine mukandu wi buwa bua musuusa wa kumpala. Satana akumiina’shi bitompuanga bietu bitukambile, anka ku bukuashi bua Yehowa tui balombene koobesha kunyingiila kitompuanga kioso kiakia.

LUKULUPILO LUETU LUI NKA BU KIFULU

8. Lukulupilo lui bu kifulu mushindo kinyi? (1 Bena-Tesalonika 5:8)

⁸ Bible apuandikisha dingi lukulupilo luetu na kifulu. (Badika 1 Bena-Tesalonika 5:8.) Musaluayi baadi afuala kifulu, bua kukaluila mutue waye ku mikietue ya beshikuanyi ibaadi ilombene kumutapa. Mu ngoshi yetu ya mu kikudi, abitungu tukaluile binangu bietu ku buluishi bua Satana. Kuete kuitutumina bitompuanga na binangu bi bubi, bua kuluisha binangu bietu. Anka bibaadi kifulu akilama mutue wa musalayi, lukulupilo luetu lukuete kulama binangu bietu, buatudia kushaala na lulamato kui Yehowa.

9. Nkinyi akikitshikaa su bantu ta be na lukulupilo?

⁹ Lukulupilo luetu bua muwa wa ikalayika, aluitukuasha bua kukita mianda na binangu na lushinguluilo. Ku lungi lupese, su lukulupilo luetu luabofula, tui kubanga kunangushena nka penda pabitale nkalo yetu, na tui kuiluankana kepatshila keetu ka muwa wa ikalayika. Tubandeyi kutala ungi muanda pabitale bangi bena Kidishitu, babaadi bashaale mu kibundi kia mu Kodinda. Babaadi bashimishe lukumiino luabo, lubaadi na muulo mu milayilo y’Efile Mukulu, lukulupilo lua lusangukilo. (1 Kod. 15:12) Mpoolo baadi mufunde’shi baaba booso bashina lukulupilo mu lusangukilo, be na nshalelo a penda kusankisha nkalo yabo. (1 Kod. 15:32) Lelo uno, bantu be bungi bashina lukulupilo mu milayilo y’Efile Mukulu, nshalelo aabo e nka ku kiakia kiabamono na meeso, na abakisha nsaa i bungi nka ku bisepeelua. Anka atue tui belekeene naabo, muanda tui batuule lukulupilo luetu mu milayilo y’Efile Mukulu bua mafuku aafiki. Bikitshino bia lukulupilo luetu bi nka bu kifulu kia mu kinfuanyi akikaluila binangu bietu, na kuitukuasha bua kupela kunangushena penda ku atue banabeene, bilombene kutuusha masaku akutshiba kipuano kietu na Yehowa.​—1 Kod. 15:33, 34.

10. Lukulupilo ndulombene kuitukaluila ku binangu bi bubi mushindo kinyi?

¹⁰ Kifulu kietu kia lukulupilo nkilombene kui tukaluila, ku binangu bishi bilombene kuitupa mushindo wa kusankisha Yehowa. Bu kileshesho, bangi mbalombene kunangushena’shi: ‘Ntshimulombene kuikala munkatshi mua baaba abakapete muwa wa looso. Ami ntshi muntu e buwa. Ntankekala na ngobesha ya kukita akintekie Efile Mukulu’shi nkite.’ Tentekiesha’shi kuuku a madimi a Yoobo Elifaze baadi mufubishe bino binangu bimune kui Yoobo. Elifaze bambile’shi: “Byaabya muntu afwiyaa naamu nnaanyi bwa kwileesha buu mululame?” Bino nyi bibaadi mwakule pabitale Efile Mukulu’shi: “Sunga kwi beeselele baaye, Efile tee nakwo lukulupilo, na diiny’eyilu ta ndilongame ku meeso aaye.” (Yob. 15:14, 15) Ano nyi madimi akata! Tentekiesha’shi, e kunyima kua bino binangu Satana. Auku’shi su botungunuka na kunangushena mu uno mushindo, okabanga kushimisha lukulupilo loobe. Pa mutue a biabia pela ano madimi na otuule binangu biobe ku milayilo ya Yehowa. Kushi mpaka Yehowa akumiina’shi opete muwa wa looso, na akakukuasha bua kulombasha kano kepatshila.​—1 Tim. 2:3, 4.

LAMA LUKULUPILO LOOBE LUNYINGIE

11. Buakinyi abitungu tuikale na luishinko bu biatukiatutengiela’shi lukulupilo luetu, lulombane?

¹¹ Ta mbibofole misuusa yooso bua kulama lukulupilo luetu lunyingie nya. Tui kukutua luishinko nsaa y’atutengiela’shi milayilo y’Efile Mukulu ilombane. Biabia Yehowa nga ikalayika, na kipungo ki’atumono tue bu kila, aye ekimono bu kiipi. (2 Mp. 3:8, 9) Yehowa akalombasha milayilo yaaye mu mushindo wi buwa, anka ta mulombene kuibikita nsaa y’atutengiela’shi ebikite nya. Nkinyi kilombene kuitukuasha bua kulama lukulupilo lunyingie, bu biatutengiela na luishinko looso’shi Efile Mukulu alombashe milayilo yaaye?​—Shak. 5:7, 8.

12. Muyile Bena-Ebelu 11:1, 6, mushindo kinyi wipushene lukulupilo na lukumiino?

¹² Atulama lukulupilo luetu lunyingie su tubashaala mu kipuano na Yehowa, muanda aaye nyi akakitshi bia’shi lukulupilo luetu lulombane. Biabia Bible aleesha kuipusheena kui pankatshi pa lukulupilo na lukumiino’shi Yehowa e kuanka na’shi, “apeeyaa abamukimbi bwedi.” (Badika Bena-Ebelu 11:1, 6.) P’atunyinsha kumona Yehowa bu muntu a binyibinyi kuatudi, atunyinsha kushinkamisha’shi akalombasha milayilo yaaye yooso. Tutaluleyi mishindo i buwa yatudi balombene kutamisha kipuano kietu na Yehowa na kulama lukulupilo luetu lunyingie.

13. Mushindo kinyi watudi balombene kuifubuila kui Efile Mukulu?

¹³ Teka Yehowa na obadikie Eyi diaye. Sunga biatushi balombene kumona Yehowa, tui balombene kuifubuila peepi naaye. Tui balombene kuakula naaye mu luteko, bakulupile’shi etuteemesha. (Yel. 29:11, 12) Tui balombene kuteemesha Efile Mukulu, pa kubadika Eyi diaye na kunangusheena ku dianka. Patubadika pabitale mushindo ubaadi Yehowa mupasukile baaba babaadi na lulamato kuadi mu mafuku a kala, lukulupilo luetu alunyisha kunyinga. Bintu bioso bi Muiyi d’Efile Mukulu, “babebifundjile bwa kwitulambukisha, bwa’shi, ku lwishinko na ku kusambiibwa kwa bifundwe, tupete lukulupilo.”​—Lom. 15:4, Kilombeeno Kipya 2014.

14. Buakinyi abitungu tunangusheene ku mianda, yabadi bapue kukitshina bangi kui Yehowa?

¹⁴ Kunangusheena ku mushindo ubaadi Yehowa mulombashe milayilo yaaye. Tutaluleyi mushindo ubaadi Efile Mukulu mukitshine Abrahame na Sara. Babaadi bapue kukula ngofu, kadi tabatandile muana. Anka, babaadi bapete muana nka bibaadi Efile Mukulu muibalee. (Kib. 18:10) Abrahame bakitshine kinyi? Bible amba’shi: “Bakuminyine na lukulupilo, bwa kwikala nshaye na miilo yi bungi.” (Lom. 4:18, Kilombeeno Kipya 2014) Sunga bibaabidi abimueka ku meeso a bantu’shi uno muanda ta ngulombene kukitshika, Abrahame baadi mushinkamishe’shi Yehowa alombasha mulayilo waye. Uno muntu sha lukumiino ta baadi mutshobolokie. (Lom. 4:19-21) Ino mianda ayitulongiesha’shi abitungu tukulupile mui Yehowa efuku dioso’shi alombasha milayilo yaaye, sunga tuapeta muanda aumueka bu wi bukopo kumpala kuetu.

15. Buakinyi abitungu kunangushena ku mianda yabadi bapue kuitukishina kui Efile Mukulu?

¹⁵ Taluula mianda yabadi bapue kukukitshina kui Yehowa. Nangusheena pabitale mushindo oodi mupete miabi obe nabeene ayifiki mu kulombana kua milayilo i Muiyi d’Efile Mukulu. Bu kileshesho, Yesu balayile’shi Nshaye akakupa bioso biodi nabio lukalo mu nshalelo. (Mat. 6:32, 33) Yesu mukushinkamishe dingi’shi, Yehowa akakupa kikudi ki selele, nsaa y’omutekie kianka. (Luk. 11:13) Yehowa mulombashe ino milayilo yooso. Mu mushindo umune, we kunangusheena pabitale ingi milayilo yadi mupue nkulombesha mu muwa oobe. Bu kileshesho, mukulee buadia nkufuila lusa, nkusamba, na nkudiisha bidibua bia mu kikudi. (Mat. 6:14; 24:45; 2 Kod. 1:3) Nsaa y’onangusheena pabitale mianda ipue kukukitshina Efile Mukulu, onyingisha lukulupilo loobe mu mianda yakakukitshina mu mafuku aafiki.

IKALAAYI NA MULOO MU LUKULUPILO

16. Buakinyi lukulupilo nyi nkiabuntu ki buwa?

¹⁶ Lukulupilo luetu bua muwa wa ikalayika nyi kiabuntu ki buwa akifiki kui Efile Mukulu. Tukuete kutengiela mafuku e buwa kumpala, atudi bashinkamishe’shi aakalombana. Lukulupilo luetu lui nka bu nyindo, aluituimika pepoo, bua kunyingila bitompuanga, kubinguabingua, mpa na lufu. Lukulupilo luetu lui nka bu kufulu, alukaluila binangu bietu buatudia kuleka kukita mianda i bubi anka tukite mianda i buwa. Lukulupilo luetu luimeene mu Bible aluitukaka kui Efile Mukulu, na kuitulesha bukata bua kifulo kiaye kuatudi. Su tubalama lukulupilo luetu lunyingie atupete miabi i bungi.

17. Buakinyi lukulupilo luetu alutuala ku muloo?

¹⁷ Mu mukanda waye ubafundiile bena Looma, Mpoolo mutumibua baadi muibanyingishe’shi, “ikalaayi na muloo mu lukulupilo.” (Lom. 12:12) Mpoolo baadi na muloo muanda baadi mushinkamishe’shi su bashaala na lulumato mulombene nkapeta muwa wa ikalayika muiyilu. Natue naamu tui balombene kuikala ma muloo mu kululupilo muanda, tui bashinkamishe’shi Yehowa akalombasha milayilo yaaye. Anka bu bibafundile kayimba ka misambo’shi: “Sha muloo ngiawa . . . akulupila mui Yehowa Efile Mukulu aaye, . . . Yawa ekalaa na lulamato misuusa yooso.”​—Mis. 146:5, 6, NWT.