Kilombene nkukuasha bodia kuikala welongiela efuku dioso
OPETAA lukalakashi lua kuilongiela Bible ku lubingo looso na muloo su? Abitufikilaa namu n’atue ingi nsaa. Anka, banda kunangushena ku mianda y’atukita nsaa yooso bu kuitumpa meema. Kuitumpa meema, akutungu nsaa na kuikitshisha, anka nsaa y’opu kuitumpa opusha mbidi ayitaala. Mu mushindo umune, kuilongiela Bible kui nka bu “kuitumpa meema ku bukuashi bu’eyi.” (Ef. 5:26) Tutaluleyi angi mayele alombene kuitukuasha:
Kita programe. Kuilongiela kua Bible pa bupenka, ngumune wa ku mianda i na muulo ukata ayitungu’shi muina Nkidishitu ooso alombashe. (Fid. 1:10) Bua’shi programe oobe a kuibadikila Bible akukuashe, we mulombene kumulamika pa mbalo ayimueneka bu ku mudimba wa nshibo, sunga ku kibelo kia kaabatshi. Programe oobe a kuilongiela mmulombene nkukuasha, nsaa yuele alarme mu kaamo koobe bua’shi kakutentekieshe kapindi kapeela kumpala kua nsaa yobe ya kuilongela.
Nangushena pabitale kilombene nkukuasha bodia kutuula binangu mu kuilongiela. Abikubofuilaa bodia kutuula binangu pamune munda mua kipindi kampanda sunga bua kipindi ki bula kia nsaa bodia kuibadikila su? Obe nabene ngi mulombene kuata nsaa kampanda i buwa y’okumiina yodia kutuula binangu ku biobadika. Eubidishene na bungi bua nsaa y’okumiina kuilongiela. Su nsaa ya kuilongiela ibalombana kadi t’opusha biinyi bia kulonga, buakinyi tue kuata kitshibilo kia kuilongiela sunga penda munda mua minite ekumi? Nsaa yuelongiela sunga munda mua kapindi kapeela, bokitshi muanda wi na muulo ukata pa mutue pa kushaala bisumanga. Pangi p’obanga nka musuusa umune, tuekala’nyi na lukalo lua kuleka kuilongiela.—Fid. 2:13.
Sangula mitue ya mianda y’okumiina kulonga kumpala. Su nsaa ya kubanga kuilongiela bobanga kukimba bia kusangula mutue wa muanda odia kuilongiela, “t’ofubisha nsaa yobe kalolo” nya. (Ef. 5:16) Biabia, ikala n’epuupua diodi mufunde mulongo wa mitue ya mianda y’okumiina kuilongiela. Yaya nsaa, su lukonko lubakufikila mu binangu, elufunde. Pangi ku nfudiilo kua kulongiela koobe okekala na lukalo lua kufunda ungi mulongo wa mitue ya mianda ipia yodia kuilongiela.
Ikala mudimukie. Nsaa y’okitshi programe oobe ikala mudimukie, bu pabitale bungi bua nsaa y’okumiina kukisha bua kuilongiela sunga mitue ya mianda y’okumiina kuilongiela. Ki na muulo ta nsaa na bungi bua nsaa sunga ki’okiebe kulonga nya. Kadi nkuikala olongo nsaa yooso.
Su tubekala atuilongiela Bible efuku dioso, kuilongiela kuetu akuitukuasha. Akuitukuasha buatudia kuifubuila peepi na Yehowa, akuitukuasha bua kukita mianda na binangu, na akuitukuasha buatudia kupusha butaale.—Yos. 1:8.