MUISAMBO WA KULONGA 23
LOONO 2 Eshina dyoobe mbu Yehowa
Eshina dia Yehowa di na muulo kinyi koodi?
“Yehowa amba’shi ‘Tumonyi twande’mi nnaanwe.’”—YESH. 43:10.
KI’ATUISAMBILA
Atulongo kiatudia kukita bua kulesha’shi Yehowa eselele na’shi mianda yoso ibaadi yakule Satana pabimutale ngia madimi.
1-2. Atuuku naminyi’shi eshina dia Yehowa di na muulo kui Yesu?
ESHINA dia Yehowa di na muulo ukata kui Yesu. Baadi muipaane ngofu bua kuidiukisha. Nka bu biatuibimuene mu muisambo ushale, Yesu baadi mukumiine kufua bu’eshina dia Nshaye, na bioso biadipushisha. (Mak. 14:36; Eb. 10:7-9) Na ku nfudiilo kua Bipua Kinunu bia Kumunana kuaye, akakumiina kualusha matalua oso kui Nshaye muanda akumiina’shi Yehowa ekale na ntumbo yoso. (1 Ko. 15:26-28) Kintu kioso kibaadi Yesu mukitshine Yehowa akilesha’shi mumufule ngofu.
2 Yesu baadi mufikie pa nsenga muishina dia Nshaye. (Yo. 5:43; 12:13) Baadi muukishe balongi baye eshina dia Nshaye. (Yo. 17:6, 26) Baadi mulongieshe bantu na kukita bilengieleshi mu diadia eshina. (Yo. 10:25) Dingi, Yesu baadi mutekie Nshaye buadia kulama balongi baye “pa muanda w’eshina [diaye].” (Yo. 17:11) Su Yesu baadi aata eshina dia Yehowa na muulo mu uno mushindo, mbikunyi bilombene muntu eamba bu mulongi a Nkidishitu kukutua kuuka sunga kufubisha eshina dia Nshaye?
3. Nkinyi ki’atuisambila mu uno muisambo?
3 Pa muanda tui bena Nkidishitu ba binyibinyi, atuambulaa Yesu pa kulesha kifulo na kanemo bu’eshina dia Nshaye. (1 Mp. 2:21) Mu uno muisambo, atumono mushindo wikale eshina dia Yehowa bu kitunduilo kia baaba boso abalungula “mukandu wibuwa wa Bufumu”. (Mat. 24:14) Atuisambila dingi muulo wi nao eshina dia Yehowa kui oso a kuatudi pa bupenka.
“MUILO BU’ESHINA DIAYE”
4. (a) Nkinyi kibaadi Yesu mulungule balongi baye kumpala kua’shi aluukie muiyilu? (b) Lukonko kinyi lu’atuisambila?
4 Kumpala kua’shi alukiile muiyilu, Yesu balunguile balongi baye’shi: “Anukapete bukome apakafiki kikudi kiselele kuanudi, na anukekala tumonyi tuande mu Yelusalema, mu Yudeya oso na Samadiya mpa na ku kipindi kii kula ngofu kia nsenga.” (Bik. 1:8) Biabia, balongi baye abakalungula mukandu wi buwa mbalo yoso, kushi penda mu Isalele. Muenda mafuku, bantu ba mu miilo yoso, abakekala na mushindo wa kufika balongi ba Yesu. (Mat. 28:19, 20) Anka Yesu bakuile’shi: “Anukekala tumonyi tuande.” Bano balongi bapia abakekala na lukalo lua kuuka eshina dia Yehowa, su abakekala penda tumonyi tua Yesu? Mianda y’abakuila mu Bikitshino shapitre 15 ayitukuahsa bua kualuula luno lukonko.
5. Mushindo kinyi ubaadi batumibua na bakulu ba mu Yelusalema baleshe’shi abitungu bantu ba mu miilo yoso bauukie eshina dia Yehowa? (Tala dingi kifuatulo.)
5 Mu 49 B.B., batumibua na bakulu ba mu Yelusalema abaadi bebungie bua kuisambila muanda wa kusadiibua kua bantu ba mu ingi miilo, bua’shi bakumiinyibue bu bena Nkidishitu. Ku nfudiilo kua kino kisangilo, Yakobo mukuabo na Yesu, bambile’shi: “[Mpiele] balondo kalolo bibaadi Efile Mukulu bua mususa wa kumpala mutuule binangu biaye kui miilo bua kusangula munkatshi muayo muilo bu’eshina diaye.” Eshina kinyi dibaadi Yakobo akuiila? P’atemuna mayi a mutemuki Amose, amba’shi: “Bua’shi bantu bashale bakimbe Yehowa n’eshimba dioso pamune na bantu ba ingi miilo yoso, bantu abetaminyibua muishina diande, nyi abiamba Yehowa.” (Bik. 15:14-18) Ta bibaadi abitungu’shi bano balongi bapia balongie penda pabitale Yehowa nya, anka bibaadi abitungu dingi ‘betaminyibue muishina diaye.’ Bino abipushisha’shi, bibaadi abitungu baukishe bangi eshina di’Efile Mukulu na bantu bebaukie mu dino eshina.
Mu kisangilo kia kasaka ka bakunkushi-bakulu ka mu siekele a kumpala, bano bantu ba sha lulamato abaadi batundule’shi abitungu bena Nkidishitu bekale muilo bu’eshina di’Efile Mukulu (Tala kikoso 5)
6-7. (a) Buakinyi Yesu bafikile pa nsenga? (b) Kangi kabingilo kinyi ke na muulo kabaadi kafikile Yesu pa nsenga?
6 Eshina dia Yesu adipushisha’shi, “Yehowa nyi nkipandilo,” na Yehowa mufubishe Yesu bua kupaasha bantu boso be na lukumiino muadi na mui Muana aaye. Yesu bafikile pa nsenga bua kutuusha muwa waye bua bantu. (Mat. 20:28) Pa kufuta nkuulo, mukite bia’shi bantu bapaashibue na bapete muwa wa loso.—Yo. 3:16.
7 Buakinyi bantu be na lukalo lua nkuulo? Pa muanda wa bibaadi bikitshikie muifuba dia Edene. Nka bu biatuibimuene mu muisambo ushale, Adama na Eva abaadi batombokiele Yehowa, na abo nkushimisha muwa wa ikalayika. (Kib. 3:6, 24) Anka Yesu bafikile pa nsenga bua kukita kintu ki na muulo kukila kupaasha bantu. Satana baadi muakule mianda ya madimi pabitale Yehowa. (Kib. 3:4, 5) Biabia bibaadi abitungu’shi bantu bauukie’shi Yehowa ta baadi mukite muanda wi bubi na’shi eshina diaye ndia kishila. Pa muanda Yesu baadi alesha mpala ya Yehowa na kutuala eshina diaye, baadi na mudimo ukata mu kuikasha eshina dia Yehowa dia kishila.
Mbikunyi bilombene muntu eamba bu mulongi a Nkidishitu kukutua kuuka sunga kufubisha eshina dia Nshaye?
8. Nkinyi akitungu’shi balongi boso ba Yesu bauukie?
8 Boso abakalesha lukumiino mui Yesu, biabekala bena Yunda sunga bantu ba mu ingi miilo, abitungu bauukie nsulo ya kupaashibua kuabo, kuamba’shi Nshaye na Yesu, Yehowa Efile Mukulu. (Yo. 17:3) Na dingi, nka bu Yesu, abaketaminyibua muishina dia Yehowa. Abikebatungu dingi kuuka muulo wa kuikasha diadia eshina dia kishila. Abitungu bakite bino bua kupaashibua. (Bik. 2:21, 22) Biabia, balongi boso ba sha lulamato ba Yesu, abitungu balongie pabitale Yehowa mpa na Yesu. Atumono buakinyi Yesu baadi mufudiishe luteko luaye lui mu Yowano shapitre 17 na ano mayi: “Ne muibaukishe eshina diobe, na nakaukisha dianka bua’shi kifulo kiodi munfule kikale muabadi na ami mu buumune nabo.”—Yo. 17:26.
“NWI TUMONYI TWANDE”
9. Mbikunyi biatudia kulesha’shi eshina dia Yehowa di na muulo kuatudi?
9 Bibamueka patooka’shi, abitungu balongi boso ba binyibinyi ba Nkidishitu bekashe eshina dia Yehowa dia kishila. (Mat. 6:9, 10) Abitungu baate eshina dia Yehowa na muulo kukila bintu bioso. Abitungu bebileshe mu bikitshino. Biabia, mushindo kinyi watudia kulesha’shi atuikasha eshina dia Yehowa dia kishila, na kulesha patooka’shi bibaadi Satana muakule pabitale Yehowa mbia madimi?
10. Nkilumbu kinyi kia mu kinfuanyi ki’abakuila mu Yeshaya 42-44? (Yeshaya 43:9; 44:7-9) (Tala dingi kifuatulo.)
10 Mu Yeshaya shapitre 42-44, mui mianda ayitungu’shi tukite bua kuikasha eshina dia Yehowa dia kishila. Mu ano ma shapitre, abalesha mu ngakuilo a mu kifuanyi bu kui kilumbu ku tumiladi. Na Yehowa alungula boso abeamba bu b’efile buabadia kulesha bu efile buabo. Akupu, nka bu ku tumiladi, epusha su kui tumonyi tua kuibishinkamisha. Anka ta nkutuukie muntu su ngumune!—Badika Yeshaya 43:9; 44:7-9.
Mu mishindo ibungi, tui tumonyi tua kilumbu kia mu kinfuanyi (Tala kikoso 10-11)
11. Muyile Yeshaya 43:10-12, Yehowa amba kinyi pabitale muilo waye?
11 Badika Yeshaya 43:10-12. Pabitale bafubi baye, Yehowa amba’shi: “Nwi tumonyi twande, . . . ami naamu nee Efile Mukulu.” Yehowa ebepusha bua kualuula luno lukonko: “Kwi ungi Efile kukaash’ami su?” (Yesh. 44:8) Biabia, atue tui na kinemo kia kualuula luno lukonko. Mu ngakuilo na bikitshino bietu, atulesha’shi Yehowa nyi Efile Mukulu umune a binyibinyi. Eshina diaye di na muulo kukila angi mashina oso. Mu nshalelo eetu atulesha’shi tuibafule Yehowa binyibinyi na tuibamulamate, sunga Satana etuikeesha mianda bukopo. Su tubakitshi bino, atupete mushindo wa kuikasha eshina dia Yehowa dia kishila.
12. Mushindo kinyi ubaadi ulombane butemuki bui mu Yeshaya 40:3, 5?
12 Nsaa y’atukaluila eshina dia Yehowa sunga nkumo yaye, atuambula Yesu Nkidishitu. Yeshaya baadi mutemukie’shi kui muntu a ‘lumbuula eshinda dia Yehowa.’ (Yesh. 40:3) Buno butemuki bubaadi bukumbane naminyi? Yowano mubatshishi baadi mulumbuluile Yesu eshinda, aye baadi mufikie muishina dia Yehowa na kuakula muishina diaye. (Mat. 3:3; Mak. 1:2-4; Luk. 3:3-6) Buno butemuki bumune abuamba’shi: ‘Ntumbo ya Yehowa ayikamueka.’ (Yesh. 40:5) Mu mushindo kinyi? Pabaadi Yesu mufikie pa nsenga, baadi muleshe mpala ya Yehowa mu mushindo upuidikie, mu kipaso kibabidi nka bu’shi Yehowa baadi mufikie aye nabene pa nsenga.—Yo. 12:45.
13. Tui kuambula Yesu naminyi?
13 Nka bu Yesu, natue namu tui Tumonyi tua Yehowa. Tui batuale eshina diaye na atulungula bantu boso pabitale bikitshino biaye bia kukaanya. Bua kuibikita kalolo, abitungu dingi tuukishe bantu pabitale mudimo ukata winao Yesu mu kuikasha eshina dia Yehowa dia kishila. (Bik. 1:8) Yesu nyi muikale Kamonyi ka kumpala ka Yehowa, biabia atulondo kileshesho kiaye. (Kbf. 1:5) Nkinyi kingi akitungu’shi tukite bua kulesha’shi eshina dia Yehowa di na muulo kuatudi?
INGI MISHINDO YATUDIA KULESHA’SHI ESHINA DIA YEHOWA DI NA MUULO KUATUDI
14. Muyile Misambo 105:3, atupusha naminyi pabitale eshina dia Yehowa?
14 Tui na nfiedi bu’eshina dia Yehowa. (Badika Misambo 105:3.) Yehowa ekalaa na muloo nsaa y’atuitumbisha bu’eshina diaye. (Yel. 9:23, 24; 1 Ko. 1:31; 2 Ko. 10:17). Tui na kinemo kia kulungula bangi’shi Yehowa eselele na’shi bioso bi’akitaa mbilulame. Tatukumanga efuku su ndimune kupusha buufu bua kulungula bena mudimo netu, bena kalasa netu, sunga bankungishanyi netu’shi, tui Tumonyi tua Yehowa! Diabulu akumina’shi tulekie kulungula bangi pabitale eshina dia Yehowa. (Yel. 11:21; Kbf. 12:17) Dingi, Satana na batemuki baye ba madimi abakumiina’shi bantu bayilue eshina dia Yehowa. (Yel. 23:26, 27) Anka, pa muanda wa kifulo kietu bu’eshina dia Yehowa, atutungunuka na kuikala na muloo bua dianka “efuku n’efuku.”—Mis. 5:11; 89:16.
15. Nkinyi akipushisha kuitamina eshina dia Yehowa?
15 Atutungunuka na kuitamina eshina dia Yehowa. (Lom. 10:13, 14) Kuitamina eshina dia Yehowa ta mpenda kuidiuka na kuidifubisha. Anka nyi nkumuuka bu muntu e kuanka, aatukulupila, kumuteka bukuashi na kukimba bukunkushi buaye. (Mis. 20:7; 99:6; 116:4; 145:18) Dingi, atulungula bangi eshina diaye na ngikashi yaye, atuibanyingisha bua kuilanga ku miluisho yabo na kukita mianda ayibakuasha bua kukumiinyibua na Yehowa.—Yesh. 12:4; Bik. 2:21, 38.
16. Tui kulesha naminyi’shi Satana sha madimi?
16 Atukumiina kukienga bu’eshina dia Yehowa. (Yak. 5:10, 11) Nsaa yatushala na lulamato kui Yehowa mu nkalakashi, atulesha patooka’shi Satana sha madimi. Mu mafuku a Yobo, Satana baadi muakule pabitale bafubi boso ba Yehowa’shi: “Kyooso kii nakyo muntu eekipaana bwa muuwa waye.” (Yob. 2:4) Satana amba’shi bantu mbalombene kufubila Yehowa nka penda pabadi biya. Na su bapeta nkalakashi, abapele Yehowa. Yobo muntu sha lulamato baadi muleshe patooka’shi bino mbia madimi. Lelo uno, sunga Satana akita muaye moso bua kuitubofusha, atulesha patooka’shi tatulekie kufubila Yehowa. Tushinkamisheyi’shi Yehowa atungunuka na kuitupasukila pa muanda w’eshina diaye.—Yo. 17:11.
17. Muyile 1 Mpiele 2:12, mu ungi mushindo kinyi muatudi balombene kutumbisha eshina dia Yehowa?
17 Atulesha kanemo bu’eshina dia Yehowa. (Nki. 30:9; Yel. 7:8-11) Pa muanda bantu abauku’shi tui Tumonyi tua Yehowa, bioso biatukitshi bi kumutumbisha sunga kumutukulusha. (Badika 1 Mpiele 2:12.) Biabia, tukite muetu moso bua’shi ngakuilo na bikitshino bietu, bitumbishe Yehowa. Su tubakitshi bino, sunga biatushi bapuidikie, atutumbisha eshina dia Yehowa.
18. Ungi mushindo kinyi watudi balombene kulesha’shi eshina dia Yehowa di na muulo kuatudi? (Tala dingi mayi e kuushi ku’esaki.)
18 Atuikalakasha pabitale nkumo y’eshina dia Yehowa kukila nkumo yetu. (Mis. 138:2) Buakinyi bino bi na muulo? Muanda nsaa y’atukitshi mianda ayisankisha Yehowa, ke bungi bantu betuifunyishe abetuakulaa mianda i bubi.a Yesu baadi mukumiine kufua lufu lui buufu bu ntomboshi bua kutumbisha eshina dia Yehowa. Baadi ‘mubepuule buufu’ p’aye kupela kuikalakasha bua abiakula bangi. (Eb. 12:2-4) Binangu biaye bi baadi mu kukita kikiebe ki’eshimba di’Efile Mukulu.—Mat. 26:39.
19. Opusha naminyi pabitale eshina dia Yehowa, na buakinyi?
19 Tui na nfiedi bu’eshina dia Yehowa na tui na kinemo kia kuitaminyibua bu Tumonyi tua Yehowa. Pa muanda eshina dia Yehowa di na muulo kuatudi, atutungunuka na kuiditumbisha sunga bangi betumona ku bisumanga. Eshina dia Yehowa di na muulo ngofu kuatudi kukila mpa na nkumo yetu’tue banabene. Biabia tuikaleyi na kitshibilo kia kutungunuka na kutumbisha eshina dia Yehowa sunga Satana atompa kuitubofusha. Su tubakitshi bino, atulesha’shi eshina dia Yehowa di na muulo ngofu kuatudi, nka bu bibabidi bua Yesu Nkidishitu.
LOONO 10 Tutumbisheyi Yehowa Efile Mukulu eetu!
a Mpa na Yobo muntu sha lulamato baadi muikalakashe muanda wa nkumo yaye pabadi ba kuuku baye basatu ba madimi bamulungule’shi mukite muluisho. Kumpala pabaadi mufuishe bana baye na kushimisha bintu biaye bioso, “Yobo tabakitshine muluisho [sunga] kutopeka Efile Mukulu mu muanda su ngumune.” (Yob. 1:22; 2:10) Kunyima pababadi bamuambe’shi mukite muluisho, Yobo babangile kuakula “bwakulakule.” Baadi muipaane mu kukaluila nkumo yaye pamutue pa kuikasha eshina dia Yehowa dia kishila, sunga nkumo yaye.—Yob. 6:3; 13:4, 5; 32:2; 34:5.