Buakinyi eshina dia Yehowa di baadi na muulo ngofu kui Yesu?

1-2. (a) Nkinyi kibakitshine Yesu bufuku kumpala kuashi bamuipee? (b) Nkonko kinyi y’atualuula mu uno muisambo?

TUI MU dia kananka ku kiolua, mu 14 Nisane, 33 B.B., Yesu baadi mukite kidibua kia Muanana na batumibua baye ba sha lulamato. Baadi auku’shi binobino, Yundasa amupaana, bamutshibile kiimu, bamukiengieshe na bamuipee. Kunyima kua kiakia kidibua, Yesu baadi munyingishe batumibua baye. Kunyima kua’shi bakatukie mu kaka kadimbo kababadi, Yesu baadi muele luteko lui na muulo ngofu. Yowano mutumibua baadi mufunde lualua luteko; lui mu Yowano shapitre 17.

² Mu uno muisambo, atumono akitulongiesha luteko lua Yesu. Nkinyi kibaadi akimuinyongosha kumpala kua lufu luaye? Nkinyi kibaadi na muulo mu muwa waye pa nsenga? Tualuuleyi ku ino nkonko.

“NE MUIBAUKISHE ESHINA DIOBE”

3. Yesu baadi muakule kinyi pabitale eshina dia Yehowa, na baadi akiebe kuakula kinyi? (Yowano 17:6, 26)

³ Mu luteko luaye, Yesu bambile’shi: “Ne muibaukishe eshina diobe.” Misuusa ibidi, amba’shi muukishe balongi baye eshina dia Yehowa. (Badika Yowano 17:6, 26.) Yesu baadi akiebe kuakula kinyi? Baadi muibaukishe eshina di’Efile Mukulu diabashibaadi abauku su? Balongi ba Yesu abaadi bena Yunda, biabia abaadi abauku eshina di’Efile Mukulu Yehowa. Dino eshina di misango binunu mu Bifundue bia mu kina Ebelu. Abipushika kalolo’shi Yesu ta baadi akuila eshina di’Efile Mukulu; anka baadi akuila ki’adilesha. Yesu baadi mukuashe balongi baye bua kuuka Yehowa kalolo, kuamba’shi kuuka mpango yaye pabitale nsenga na bantu, mianda yadi mukite, biakakitshi mu mafuku aafiki, na nyikashi yaye. Nka penda Yesu nyi auku Yehowa kalolo.

4-5. (a) Tuusha kileshesho akilesha akipushisha kuuka eshina dia muntu? (b) Mu mushindo kinyi mubaadi balongi ba Yesu baukie eshina dia Yehowa?

⁴ Bu kileshesho, puandikisha’shi kui mukulu mu kakongie kenu abetamina bu David, muikale dingi doktere. Omuuku takudi bipua bi bungi. Anka dingi efuku bokumbu na we na lukalo lua doktere. Na buende lubilo ku lupitalo ku’afubilaa na bakubuku, bopanda. Binobino bonyisha kumuata na muulo ngofu, na nsaa y’opusha eshina diaye, onangushena ku biadi mukukitshine! Koodi, David ta mpenda mukulu ouku nya; doktere mukupaashe.

⁵ Mu mushindo umune, balongi ba Yesu abaadi bapue kuuka eshina dia Yehowa. Anka dino eshina dibafikile na muulo ngofu kuabadi muanda Yesu baadi muibakuashe bua kuuka Yehowa kalolo. Buakinyi atuakula biabia? Muanda Yesu baadi muambule Nshaye mu mianda yoso ibaadi akula na kukita. Biabia batumibua abaadi “bauukie” Yehowa kalolo pa kuteemesha malongiesha a Yesu na pa kumona mushindo ubaadi akitshina bangi mianda.​—Yo. 14:9; 17:3.

“ESHINA DIOBE, DIODI MUMPE”

6. Mu mushindo kinyi mubaadi Yehowa mupe Yesu eshina diaye? (Yowano 17:11, 12)

⁶ Mu luteko luaye, Yesu baadi mutekiele balongi baye, amba’shi: “ebalame pa muanda w’eshina diobe, diodi mumpe.” (Badika Yowano 17:11, 12.) Bino abipushisha’shi bibaadi abitungu’shi babangie kuitamina Yesu bu Yehowa? Nya. Lamiina’shi mu luteko luaye, Yesu akuila eshina dia Yehowa’shi “eshina diobe.” Biabia eshina dia Yehowa ta dibaadi difikie eshina dia Yesu nya. Biabia Yesu baadi akiebe kuakula kinyi pabambile’shi eshina di’Efile Mukulu dibaadi dimupebue? Kia kumpala, Yehowa baadi mutume Yesu bu muntu alesha mpala yaye. (Yo. 5:43; 10:25) Kia kabidi, eshina dia Yesu adipushisha’shi “Yehowa nyi nkipandilo.” Biabia, mu kipatuluilo ki’eshina dia Yesu, mui eshina dia Yehowa.

7. Buakinyi Yesu baadi akula muishina dia Yehowa? Tuusha kileshesho.

⁷ Tuateyi kileshesho, pa muanda ambasadere aleshaa mpala ya nfumu a eumbo, mmulombene kuakula muishina dia nfumu a eumbo. Biabia, bishima bia ambasadere bi na muulo nka bu bia nfumu a eumbo. Mu mushindo umune, Yesu baadi alesha mpala ya Yehowa na baadi akula muishina diaye.​—Mat. 21:9; Luk. 13:35.

8. Mu mushindo kinyi mu baadi eshina dia Yehowa “mui” Yesu mpa na kumpala kua kufika pa nsenga? (Efilu 23:20, 21)

⁸ Bible etamina Yesu bu “Eyi” muanda Yehowa baadi amufubisha bua kulungula ba mikeyilu na bantu mayi a kulonda a Yehowa. (Yo. 1:1-3) Yesu nyi baadi pangi muikeyilu ababadi abatumu kui Yehowa bua kupasukila bena Isalele mu kabaaka. Nsaa ibaadi Yehowa mulungule bena Isalele bua kukookiela uno muikeyilu, bambile’shi: “Muanda eshina diande di muadi.”a (Badika Efilu 23:20, 21.) Eshina dia Yehowa dibaadi “mui” Yesu muanda baadi alesha mpala ya Yehowa na baadi amba’shi bioso abikitaa Yehowa mbilulame na’shi a kishila.

“YAYA, TUMBISHA ESHINA DIOBE”

9. Mu mushindo kinyi mubaadi eshinda dia Yehowa na muulo kui Yesu? Patuula.

⁹ Nka bu bibatukatuka mu kuibimona, mpa na kumpala kua’shi afikie pa nsenga, eshina dia Yehowa dibaadi na muulo ngofu kui Yesu. Pabaadi pa nsenga, Yesu baadi dingi muleshe mu bioso bibaadi akitshi’shi, eshina dia Yehowa di na muulo ngofu kuadi! Mpa na ku nfudiilo kua mudimo waye wa bulungudi, Yesu batekiele Yehowa’shi: “Yaya, tumbisha eshina diobe.” Musango umune, Nshaye baadi mumualule n’eyi di bukopo kukatukila muiyilu, amba’shi: “Ne muiditumbishe na nakeditumbisha dingi.”​—Yo. 12:28.

10-11. (a) Mushindo kinyi ubaadi Yesu mutumbishe eshina dia Yehowa? (Tala dingi kifuatulo.) (b) Buakinyi abitungu kuikasha eshina dia Yehowa dia kishila na kulesha’shi Yehowa akitaa nka mianda ilulame?

¹⁰ Na Yesu namu baadi mutumbishe eshina dia Nshaye. Mu mushindo kinyi? Baadi mulungule bangi pabitale nyikashi i buwa ya Yehowa na mianda ya kukaanya yadi mukite. Anka, baadi muiditumbishe mu ingi mishindo. Yesu baadi na kia kulesha’shi bioso bikite Yehowa mbilulame na’shi eshina diaye ndia kishila.b Yesu baadi muleshe’shi uno muanda wi na muulo nsaa i baadi mulongieshe balongi baye mushindo wa kuteka. Bambile’shi: “Yaya etu e muiyilu, eshina diobe dikashue dia kishila.”​—Mat. 6:9.

¹¹ Buakinyi bi na muulo kuikasha eshina dia Yehowa dia kishila na kulesha’shi bioso abikitaa Yehowa mbilulame? Muanda kubanga mu efuba dia Edene, Satana Diabulu baadi mukutue kanemo na adimbiila Yehowa mianda ya madimi. Satana baadi muambe’shi Yehowa nsha madimi na’shi mmufie Adama na Eve bintu bi buwa. (Kib. 3:1-5) Satana baadi dingi akiebe kuamba’shi, mushindo aukitaa Yehowa mianda ta ngululame nya. Madimi a Satana abaadi akume mpa na nkumo ya Yehowa. Akupu, mu mafuku a Yobo, Satana baadi muambe’shi boso abafubila Yehowa abebikitaa penda pa muanda wa bintu bi’ebapaa. Baadi mudimbe’shi bantu abalekie kufubila Yehowa nsaa yabadi mu nkalakashi, muanda ta mbamufule binyibinyi. (Yob. 1:9-11; 2:4) Bibaadi abitungu kuleka kipungo bua kulesha’shi sha madimi nanyi, Yehowa su Satana?

“NATUUSHA MUWA WANDE”

12. Kinyi kibaadi Yesu mukumiine kukita pa muanda wa kifulo kiaye bu’eshina dia Yehowa?

¹² Pa muanda Yesu baadi mufule Yehowa, baadi akumiina kukita kioso akitungu bua kuikasha eshina dia Yehowa dia kishila, na kulesha’shi bioso abikitaa Yehowa mbilulame. Yesu bambile’shi: “Natuusha muwa wande.” (Yo. 10:17, 18) Oolo, baadi mukumiine kufua pa muanda w’eshina dia Yehowa.c Adama na Eva abaadi bantu bapuidikie, abaadi bakutue kukookiela Yehowa na abo nkukila ku lupese lua Satana. Mu kuilekena nabo, Yesu baadi mukumiine kufika pa nsenga bua kulesha kifulo kiaye bua Yehowa. Yesu baadi muibileshe pa kukookiela Yehowa mu bioso bibaadi akula na kukita. (Eb. 4:15; 5:7-10) Baadi mulame lulamato mpa na ku lufu ku mutshi wa makienga. (Eb. 12:2) Mu uno mushindo baadi muleshe’shi mmufule Yehowa n’eshina diaye.

13. Buakinyi Yesu nyi baadi mulombene kulesha’shi Satana sha madimi? (Tala dingi kifuatulo.)

¹³ Mu nshalelo aaye, Yesu baadi muleshe patooka’shi, Satana sha madimi, kushi Yehowa! (Yo. 8:44) Yesu auku Yehowa kalolo kukila bantu boso. Su kubaadi muanda su ngumune wa binyi ubaadi Satana muakule, Yesu baadia kuiuka. Anka Yesu baadi na kitshibilo kia kukaluila nkumo ya Yehowa. Sunga nsaa ibabidi bimuenekie’shi Yehowa bamusumbushena, Yesu baadi akumiina kufua na kushala na lulamato pamutue pa kukutua kumukookiela.​—Mat. 27:46.d

“NAPUDISHA MUFUBO UBOODI MUMPE BUA KUKITA”

14. Mushindo kinyi ubaadi Yehowa mufute Yesu bua lulamato luaye?

¹⁴ Mu luteko lubaadi mukite bufuku kumpala kua’shi afue, Yesu bambile’shi: “Napudisha mufubo uboodi mumpe bua kukita.” Baadi mukulupile’shi Yehowa amufutu bua lulamato luaye. (Yo. 17:4, 5) Yesu baadi na kabingilo ka kukulupila Nshaye. Yehowa ta baadi mutadiile’shi Yesu ashadidiile mu mashama. (Bik. 2:23, 24) Baadi musangule Yesu na aye nkumutuula kunuundu kua bintu bioso muiyilu. (Fid. 2:8, 9) Muenda mafuku, Yesu nkubanga kumunana bu Nfumu mu Bufumu bu’Efile Mukulu. Nkinyi akikitshi buabua Bufumu? Yesu Atuusha lualuulo mu kipindi kia kabidi kia luteko lubaadi mulongieshe balongi baye, amba’shi: “Bufumu bobe bufikie. Kikiebe ki’eshimba diobe [Yehowa] kikitshikie pa nsenga mumune na muiyilu.”​—Mat. 6:10.

15. Yesu akakitshi dingi kinyi?

¹⁵ Mu mafuku aafiki, Yesu alu na beshikuanyi b’Efile Mukulu, na kubutula mubi ku Armagedone. (Kbf. 16:14, 16; 19:11-16) Kunyima kua paapa, akeele Satana mu “buina bula,” mbalo y’akekala mu lukano, y’ashakakitshi kintu. (Kbf. 20:1-3) Yesu akaluiisha bantu butaale na kupuidika munda mua Bipua Kinunu bia Kumunana kuaye. Akasangula bafue. Akekasha nsenga ishima mpaladiso. Kikiebe ki’eshimba dia Yehowa akikakumbana!​—Kbf. 21:1-4.

16. Mianda kinyi ayikakitshika ku nfudiilo kua Bipua Kinunu bia Kumunana kua Yesu?

¹⁶ Nshalelo akekala naminyi kunyima kua Bipua Kinunu bia Kumunana kua Yesu? Muluisho na kukutua kupuidika t’abikekala dingi kuanka. Bantu t’abakatekie dingi lusa bua miluisho yabo ku bukuashi bua nkuulo nya; sunga kuikala na lukalo lua bantu 144 000 bua’shi bekala batshite muakuidi, sunga lua Yesu bu tshite muakuidi mukata bua’shi bantu bekala mu kipuano ki buwa na Yehowa nya. Na “muishikuanyi a nfudiilo abakabutula, ndufu [alutuukila kui Adama].” Mu mashama a mukekala bisumanga. Bantu boso bafue abakebasangula. Bantu boso be pa nsenga abakekala bapuidikie.​—1 Ko. 15:25, 26.

17-18. (a) Nkinyi akikakitshika ku nfudiilo kua Bipua Kinunu bia Kumunana kua Yesu? (b) Yesu akakitshi kinyi apakafudiila Bufumu buaye? (1 Bena Kodinda 15:24, 28) (Tala dingi kifuatulo.)

¹⁷ Ungi muanda kinyi aukakitshika ku nfudiilo kua Bipua Kinunu bia Kumunana kua Yesu? Akukakitshika muanda wi pabuao. T’akukekala dingi muntu su ngumune ele dingi mpaka’shi Yehowa t’eselele na’shi t’Efile sha kululame. Mushindo kinyi? Muifuba dia Edene, Satana baadi muambe’shi Yehowa sha madimi, na’shi t’akunkushaa bantu na kifulo. Kubanga nka paapa, bafubi ba Yehowa abalesha misango na misango’shi mashinda aaye nyi e buwa. Biabia, ku nfudiilo kua Bipua Kinunu bia Kumunana kua Yesu, nkumo ya Yehowa ayikekala ikaluilue bua loso. Akalesha patooka’shi nyi Nshe-bana sha kifulo.

¹⁸ Ku nfudiilo kua Bipua Kinunu bia Kumunana kua Yesu, muntu oso akauku’shi, mianda yoso ibaadi yakule Satana pabitale Yehowa ngia madimi. Yesu akakitshi kinyi apakafudiila Bufumu buaye? Akalondo kileshesho kia Satana na kutombokiela Yehowa su? Nya! (Badika 1 Bena Kodinda 15:24, 28.) Yesu akaaluisha Nshaye Bufumu. Aketuulu ku bunkunkushi bua Yehowa. Oolo, mu kuilekena na Satana, Yesu akakumiina kuleka kintu kioso kiakia muanda mmufule Yehowa.

19. Eshina dia Yehowa di na muulo kinyi kui Yesu?

¹⁹ Kushi mpaka, Yehowa baadi akumiina kupa Yesu eshina diaye! Yesu baadi muleshe mpala ya Yehowa mu mushindo upuidikie. Biabia, eshina dia Yehowa di na muulo kinyi kui Yesu? Di na muulo kukila bintu bioso. Baadi mukumiine kufua bua diadia eshina, na akakumiina kualuiisha Yehowa bintu bioso ku nfudiilo kua Bipua Kinunu bia Kumunana kuaye. Mbikunyi biatudia kuambula Yesu? Atukaluula luno lukonko mu muisambo aulondo.