Lukulupilo lua binyibinyi bua nshalelo ebuwa mu mafuku e kumpala

Opuandikisha’shi, mianda ayikalumbuluka mu mafuku e kumpala su? Bantu bebungi abapuandikisha’shi mianda ayilongama mu mafuku ekumpala sunga mbiabakuete kufumankana na makienga lelo uno. Anka tui balombene kukumina’shi mianda ayikalumbuluka mu mafuku e kumpala su? Olo! Bible etupa lukulupilo lua binyibinyi bua nshalelo ebuwa mu mafuku e kumpala.

Bible etupa lukulupilo kinyi?

Bible alesha’shi bantu bakuete kupeta nkalakashi ikile bungi. Anka, mmulee’shi ino nkalakashi ayipu. Tubande kutala bingi bileshesho.

Lukalakashi: Kukutua nshibo

Bible amba bino: “Abakebaka mashibo bemushaale.”—Yeeshaya 65:21.

Kiabilesha bua mafuku e kumpala: Muntu oso ekala na yaaye nshibo.
Lukalakashi: Kukutua kua mudimo na bulanda

Bible amba bino: “Basangulue bande abakapete buedi bua mudimo wa ku masa aabo.”—Yeeshaya 65:22.

Kiabilesha bua mafuku e kumpala: Bantu boso abekala na mudimo wibuwa, abakasangala na mudimo waabo na kuiupetala buedi.
Lukalakashi: Kukutua kua kululama

Bible amba bino: “Bakunkushi abakamunu mu kululama.”—Yeeshaya 32:1.

Kiabilesha bua mafuku e kumpala: Kukutua kua kululama pa muanda wa ntondo y‘ekoba, bupeta na bulanda t’abikala dimo kuanka. Muntu ooso abakamukitshina mianda ya kululama
Lukalakashi: Kukutua kua kudia kalolo na nsala

Bible amba bino: “Akuikala ntete ibungi pa nsenga; ku nsongo ya miengie akuulu bintu.”—Misambo 72:16.

Kiabilesha bua mafuku e kumpala: Muntu ooso ekala na mushindo wa kupeta bidibua bibuwa. Takui muntu akakienge muanda wa nsala sunga kukutua kua kudia kalolo.
Lukalakashi: Kuipayishena n’etombo

Bible amba bino: “Abashaala muntu ooso muushy’a mfinyo aaye, a figiyee aaye, dingi muntu su ngumune t’ebakalakasha.”—Mika 4:4.

Kiabilesha bua mafuku e kumpala: Muntu ooso ekale mu butaale na kuipusha mu bulami muanda baasha mikumbo t’abekala dingi nkuanka na “balulame abakashaala pa nsenga bua looso.”—Misambo 37:10, 29.
Lukalakashi: Ngoshi

Bible amba bino: “Takwi kisamba dimo akitombwela kingi kisamba mwele, taabayiyi dimo bya kulwa ngoshi.”—Yeeshaya 2:4.

Kiabilesha bua mafuku e kumpala: Kufukama akuikala mu nsenga ishima. (Misambo 72:7) Takui muntu atuulu maalo muanda wa’shi abayipaa mukuabo ku ngoshi sunga kukimba mbalo ya kusuukila ngoshi nya.
Lukalakashi: Mikumbo na maladi

Bible amba bino: “Muntu su ngumune muimushaale tamba’shi: ‘Ne na mukumbo.’”—Yeeshaya 33:24.

Kiabilesha bua mafuku e kumpala: Bantu t’abakienge dingi muanda wa maladi sunga kukumba nya. (Yeeshaya 35:5, 6) Bible mmulee’shi “lufu taluikala dingi kuanka.”—Kibafumbwilwe 21:4.
Lukalakashi: Kuluisha kua mema na mitamba

Bible amba bino: “Kabaaka na nsenga yuume biikale na muloo, mapya asangale, amene bilongo.”—Yeeshaya 35:1.

Kiabilesha bua mafuku e kumpala: Nsenga ishima ayikala mpaladiso bua’shi bantu bemushaale, nka bibaadi mpango y’Efile Mukulu ku kibangilo.—Kibangilo 2:15; Yeeshaya 45:18.

Bina muulo bua kukulupila’shi lukulupilo luabetupa kui Bible alukalombana su?

Pangi opuandikisha’shi, talukalombana, kuikala na uno mueneno takui bubi nya. Anka atukunyingisha bua’shi otaluule ingi mianda yabadi baleshe mu Bible pabitale mafuku e kumpala. Buakinyi? Muanda milayilo i mu Bible ngilekene na milayilo na matemuki a bantu. Efile Mukulu nyi mutuushe ino milayilo i mu Bible. Tala mianda ayilesha kuilekena pankatshi pa milayilo y’Efile Mukulu na ya bantu:

Efile Mukulu nga kukulupila. Bible amba’shi Efile Mukulu “tadimbaa.” (Tite 1:2) Dingi, anka penda Efile Mukulu nyi mukumbene kuakula mianda ayifiki kumpala. (Yeeshaya 46:10) Mu Bible mui bileshesho bibungi abishinkamisha’shi matemuki a Efile Mukulu aalombanaa. Bua kuuka mianda ibungi, tala video amba’shi Twi kushinkamisha naminyi shi Bible mmukanda wa binyibinyi?
Efile Mukulu e na bukome bua kupudisha nkalakashi yatudi nayo. Bible amba’shi Efile Mukulu e na bukome bua kukita “kioso kiakumina kukita.” (Misambo 135:5, 6) Mu ungi ngakuilo, takui kintu su nkimune kikumbene kukumutshishua kulombasha mpango yaye. Dingi Efile Mukulu akumina kuitukuasha muanda mmuitufule.—Yowano 3:16.

Ingi nsaa we kuiyipusha’shi: ‘Su Efile Mukulu akumina kuitukuasha na e na bukome bua kuitukuasha, buakinyi tukuete nka kupeta nkalakashi ibungi bino?’ Bua kualuula luno lukonko, tala video amba’shi: Bwakinyi Efile Mukulu mmutadiile makyenga?

Luno lukulupilo alukalombana naminyi?

Efile Mukulu akafubisha Bufumu buaye, buikale mbulamatadi a muiyilu bua kulombasha milayilo yaaye. Mmutuule Yesu Kidishitu bu Mfumu a buabua Bufumu na mmumupe matalua a kulama nsenga na bantu be muanka. Yesu pabaadi pa nsenga, baadi mupaashe baasha mikumbo, muimikie kipapi, asangula mpa na bafue. (Mako 4:39; 6:41-44; Luka 4:40; Yowano 11:43, 44) Paapa, baadi muleshe biakakitshi bu Mfumu a Bufumu bu’Efile Mukulu.

Tala video amba’shi: Bufumu bw’Efile Mukulu nkinyi? Bua kuuka bibungi pabitale bukuashi bokapete mu Bufumu bu’Efile Mukulu.

Luno lukulupilo alukalombana nsaa kinyi?

Binobino! Nkinyi akitushinkamisha bianka? Bible baadi mutemukie mianda ayikalesha’shi Bufumu bu’Efile Mukulu tabudi pa kubanga kumunana pa nsenga ishima. (Luka 21:10, 11) Mianda ayikitshika mu nsenga yatukuete kumona ngipushene na bibaadi Bible mutemukie.

Bua kuuka bibungi, badika muisambo awamba’shi: “Bufumu bw’Efile Mukulu abukamunu pa nsenga nsaa kinyi?”

Mushindo kinyi ulombene kuitukuasha lukulupilo luabetupa kui Bible lelo uno?

Mungi mufundji a Bible baadi mupuandikishe lukulupilo luabetupa mu Bible na “nyindo bua muwa.” (Bena-Ebelu 6:19) Anka abikalaa nyindo ayimika buato bua’shi tabebuyishanga kula kui kipapi, lukulupilo lua binyibinyi lui mu Bible bua mafuku e kumpala aluitukuasha sunga tuafukamana na nkalakashi i naminyi lelo uno. Lukulupilo luetu ndulombene kuitukaluila muishimba na mu binangu, mpa na kuitukuasha bua kuikala biya ku mbidi.—1 Bena-Tesalonika 5:8.