Bena politike abadimusha’shi Armagedone afiki binobino—Bible akula kinyi?

Mudimune muifuku dia 10/10/2022 ku nakashika, Russie ayikalanga mukupile misile mu bibundi bi pepi na Ukraine bua kualuuka ku ma bombe abekele bakupile mafuku abidi kumpala aekalanga aluishe ngofu kitala ki na muulo ukata kilunguie Russie na Crimée. Ino mianda ngikitshikie mafuku abidi kunyima kua bena politike kudimusha’shi, Armagedone mmulombene kufika binobino.

“Kasha tatuekele ki pepi na Armagedone bino kubanga mu mafuku a [Prezida a mu États-Unis John F.] Kennedy na ngoshi ya misile ya mu Cuba. . . . Ntampuandikisha’shi mbibofule kufubisha ma mputu a nucléaire kadi kushi kufuisha Armagedone.”— Joe Biden Prezida a mu États-Unis, 6/10/2022.
“Nashinkamisha’shi uno nyi Armagedone taadi pepi, nyi mmasaku akata bua planete mushima.”—Volodymyr Zelensky prezida a mu Ukraine, nsaa yabekele bamuipushe ku, BBC News pabitale masaku aatukila mu kufubisha ma mputu a nucléaire, muifuku dia 8/10/2022.

Kufubisha kua ma mputu a nucléaire akukafuisha ku Armagedone su? Bible akula kinyi?

**Ma mputu a nuclear aakafuisha Armagedone su?**

Nya. Muaku “Armagedone” ausanganyibua penda musango umune mu Bible mu Kibafumbwilwe 16:16. Tawisambila ngoshi i pankatshi pa bisamba nya kadi awisambila ngoshi i pankatshi pa Efile Mukulu na “ba nfumu ba pa nsenga ishima.” (Kibafumbwilwe 16:14) Efile Mukulu akafubu na ngoshi ya Armagedone bua kufudiisha bukunkushi bua bana ba bantu.—Ndanyele 2:44.

Bua kulonga bibungi pabitale abikala nsenga mu nsaa ya Armagedone, badika muisambo awamba’shi: Qu’est-ce que la bataille d’Armaguédon?

Nsenga na bantu be panka abakabutudibua ku ngoshi ya nucléaire?

Nya. Sunga biekala’shi bakunkushi ba bana ba bantu mbalombene kufubisha ma mputu a nucléaire mu mafuku aafiki, Efile Mukulu t’atadiila’shi nsenga ibutudibue nya. Bible amba’shi:

“Nsenga naamu ayikala panka looso.”—Mulungudi 1:4.
“Balulame abapete nsenga, abemushala looso.”—Misambo 37:29.

Biabia, matemuki a mu Bible na mianda ikuete kukitshika abilesha’shi mu mafuku apeela’mu akukiebe kumueka kushintuluka kukata pa nsenga. (Mateo 24:3-7; 2 Timote 3:1-5) Longa akiamba Bible pabitale mafuku e kumpala ku bukuashi bua kulonga Bible netu buntu na muntu akukuasha.