Ngoshi ya mu Ukraine ibatuele mu kipua kia kabidi: Lukulupilo kinyi alutusha Bible?

Mu dia katano, muifuku dia 24 dia mueshi wa Kabidi 2023, ngoshi ya mu Ukraine ayilombasha kipua kishima. Muyile angi ma rapore, basalayi ba mu Ukraine na ba mu Russie bafikie ku 300 000 mbafue sunga kutapika, na bantu bafikie ku 30 000 mbafue mu ino ngoshi. Anka, bungi bua bantu bafue mbulombene kuikala bukile bungi.

Muanda wa malua, takui kintu akilesha’shi ino ngoshi ayipu binobino.

• “Kipua takidi akilombana kasha basalayi ba mu Russie batuuka Ukraine ngoshi, anka takui kitunduilo akilesha’shi ino ngoshi ayipu binobino. Ku mpese yoso ibidi, takui luinyi alumueka bu alutshimuna, na abimueka’shi mpese yoso ibidi tayipushena bua kupua ngoshi.”—NPR (National Public Radio), muifuku dia 19, mueshi wa Kabidi 2023.

Bantu be bungi mbakalakashue na abakiengie pa muanda wa ino ngoshi na angi ma ngoshi akuete kukiengiesha bantu bashi basoole mu nsenga ishima. Lukulupilo kinyi alutusha Bible? Kui efuku adikapu ngoshi su?

Ngoshi ayikapu ngoshi yoso

Bible akuila ngoshi ayikapaasha bantu, kushi kuibabutula. Ino ngoshi ayiukibua bu ya Armagedone, na abeyilesha bu “ngoshi y’efuku dikata dy’Efile Mukulu sha bukome booso.” (Kibafumbwilwe 16:14, 16) Ku bukuashi bua ino ngoshi, Efile Mukulu akafudiisha mbulamatadi ya bantu, ikuete kutusha ma ngoshi aepayishena. Bua kuuka abituesha Armagedone butaale bua loso, badika ino miisambo ayilondo:

• “Qu’est-ce que la bataille d’Armaguédon?”

• “Armagedone nyi mukandu wibuwa!”