Nnanyi akapasha bantu bashi basalayi?​—Bible akula kinyi?

Rapore ya Nations unies ayilesha’shi:

• Kubanga muifuku dia 7 na ku dia 23/10/2023, ngoshi yabalu kui bena Isalele na bena Gaza ngipee bantu bakile pa 6 400, na bantu bakile pa 15 200 mbatapikie, be bungi ba ku bano bantu ta mbasalayi nya. Bantu midiyo ibungi mbasukie ino ngoshi.

• Muifuku dia 24/9/2023, ngoshi ya bena Russie na bena Ukraine ayikalanga ipue kuipaa bantu bashi basalayi bakile pa 9 701, na bantu 17 748 mbatapikie mu Ukraine.

Bible etupa lukulupilo kinyi pabitale bantu abakiengie pa muanda wa ngoshi?

Kabingilo aketukuasha bua kuikala na lukulupilo

Bible badi mupue kulesha’shi Efile Mukulu ‘akaimika ngoshi nyaa na kufudiile nsenga.’ (Misambo 46:9) Akafubisha mbulamatadi aye a muiyilu sunga Bufumu buaye, buabudia kupiana mbulamatadi yoso ya bana ba bantu. (Ndanyele 2:44) Bufumu bu’Efile Mukulu abukatuadila bantu butale.

Tala biabakakitshi kui Yesu Nkidishitu, Nfumu a Bufumu bu’Efile Mukulu:

• ‘Apasha mulanda eele musaase kuadi, na be mu mpombo bashii na pa kuimena. Apushiisha mulanda na mubofule lusa; apashe muwa wa balanda: Eebakaluila kui baba abebakiengiesha na ku kifita kia bantu.’​—Misambo 72:12-14.

Ku bukuashi bua Bufumu buaye, Efile Mukulu akapudisha bua loso makienga na nkalakashi abituukila ku ngoshi na buntomboshi.

• “Akakumuna mpolo yoso ku meso kuabo na lufu t’alukekala kuanka dingi, t’akukekala dingi sunga mmaalo sunga nkudila sunga mmitanyo. Mianda ya kala ibashimina.”​—Kibafumbuilue 21:4.

Mu mafuku apela mu, Bufumu bu’Efile Mukulu abukatuesha kushintuluka kukata pa nsenga. Bible badi mupue kulesha’shi akukekala “ngoshi, na nkumo ya ngoshi” bi kuanka lelo uno. (Mateo 24:6) Ino mianda mpa na ingi ayilesha’shi tui mu kipungo kia “mafuku a ku nfudiilo” a bukunkusha bua bana ba bantu.​—2 Timote 3:1.