Efile Mukulu e mbalo yooso, nsaa yooso su?
Lwaluulo lwa Bible
Efile Mukulu mmulombeene kumona mbalo yooso sunga kukita kyooso kyakumiina mbalo yooso yakumiina. (Nkindji 15:3; Bena-Ebelu 4:13) Sunga mbyabya, Bible talongyesha shi Efile Mukulu e mbalo yooso sunga mu bintu byoso, nsaa yooso nya. Anka, alesha shi nyi muntu a binyibinyi e na mbalo yaaye yaadi mushaale.
Bu muntu bw’Efile: Efile Mukulu nyi nkikudi. (Yowano 4:24) Bantu ta mbalombeene kumumona nya. (Yowano 1:18) Bimonwa by’Efile Mukulu byabadi bafunde mu Bible abilesha shi e na mbalo yaaye yaadi mushaale. Ta mbaleshe shi e mbalo yooso nya.—Yeeshaya 6:1, 2; Kibafumbwilwe 4:2, 3, 8.
Mbalo ishale Efile Mukulu: Efile Mukulu mushaale mbalo ya mu kikudi, ilekene na mbalo kampanda ayimweneka. Mu ino mbalo ishayimweneka, Efile Mukulu e na mbalo “mwiyilu mwadi mubombêle.” (1 Banfumu 8:30, EEM) Bible atemuna musango umune ubaadi bipangwa bya mu kikudi “bitwele bwa kwimana kumpala kwa Yehowa,”a na bino abilesha shi, Efile Mukulu e na mbalo kampanda yaadi mushale.—Yoobo 1:6.
Su Efile Mukulu te mbalo yooso, mmulombeene kwitatshisha bwande’mi?
Oolo. Efile Mukulu etatshisha ngofu bwa muntu na muntu. Sunga mbyaadi mushaale mwiyilu, Efile Mukulu amonaa pa nsenga bano booso abakumiina kumusankisha, na ebakwasha. (1 Banfumu 8:39; 2 Myanda 16:9) Tala mushindo aulesha Yehowa shi etatshisha bwa balangwidi baaye balulame:
Nsaa yokwete kwela nteko: Yehowa mmulombeene kutemesha nteko yoobe nsaa yotekye.—2 Myanda 18:31.
Nsaa yoodi mukalakashwe mu binangu: “Yehowa e pepi na basha mashimba atapikye; apasha bano bakalakashibwe ku mashimba.”—Misambo 34:18.
Nsaa yoodi na lukalo lwa bukunkushi: Yehowa akyebe ‘nkulambukisha na nkulesha eshinda’ ku bukwabashi bwa Bible, Eyi dyaaye.—Misambo 32:8.
Madimi pabitale kwikala kw’Efile Mukulu mbalo yooso
Madimi: Efile Mukulu e mbalo yooso mu bipangwa.
Eyendo: Efile Mukulu ta mmushale mbalo kampanda muno mu nsenga sunga mu bingi bintu abimweneka mwiyilu nya. (1 Banfumu 8:27) Eyendo shi nyenyenyi na bingi bipangwa ‘abilungula ntumbo y’Efile Mukulu.’ (Misambo 19:1) Kadi, Efile Mukulu ta mushale mu bipangwa byaaye, anka bi muntu asolaa tashalaa mu kintu kyaadi musole nya. Eyendo shi kintu kyabadi basole nkilombeene kwitulesha bi yawa mwikisole. Bi mumune, bintu abimweneka pa nsenga abitulesha bi “ngikashi ishayimweneka” ya Mupangi, bu kileshesho bukome, binangu, na kifulo kyaaye.—Bena-Loma 1:20.
Madimi: Efile Mukulu e na kya kwikala mbalo yooso bwa kuuka myanda yooso bwashi ekale na bukome booso.
Eyendo: Kikudi kiselele ky’Efile Mukulu, nyi mbukome bwaaye bwatumaa bwa kukita midimo. Ku bukwashi bwa kikudi kyaaye kiselele, Efile Mukulu mmukumbeene kumona na kukita kyooso kyakumiina, mbalo yooso na nsaa yooso yakumiina kushi aye nabeene kwikala yaaya mbalo.—Misambo 139:7.
Madimi: Mukanda wa Misambo 139:8 aulongyesha shi Efile Mukulu e mbalo yooso paukwete kwamba shi: “Su nakâmina mwiyilu, we mwanka sunga nâlâla mu kalunga nyembo anka byodi mwanka’bi.”
Eyendo: Uno verse takwete kwisambila mbalo ishale Efile Mukulu nya. Nyi mmusambo aulesha shi takwi mbalo su ngimune ikile kula bwashi Efile Mukulu akutwe kobesha kwitukwasha nya.
a Yehowa nyi eshina dy’Efile Mukulu dyabadi baleshe mu Bible.