Nkinyi akikyebe kufwila bipwilo?

1. Bipwilo byooso bibuwa su?

Eyendo, kwi bantu be na mashimba ebuwa mu bipwilo byooso. Mukandu wibuwa ngwa kumona shi Efile Mukulu kwete kumona baba bantu na etatshishaa bwabo. Bi malwa mwanda, myanda ibubi ikwete kukitshika mwishina dya bipwilo. (2 Beena-Kodinto 4:3, 4; 11:13-15) Muyiile mikandu yatukwete kupusha, bingi bipwilo bikwete kutwela mu myanda ya terorisme, kutuuta kwa bantu ba bingi bisamba, ngoshi, kulwisha kwa baana. Bino bikwete kulwisha mashimba a balangwidi b’Efile Mukulu ngofu!​—Badika Mateo 24:3-5, 11, 12.

Kipwilo kya binyibinyi kikwete kutumbisha Efile Mukulu, kadi bipwilo bi bubi bikwete kukita myanda ishikwete kumusankisha. Bikwete kulongyesha myanda ishi mu Bible, abilongyesha myanda ya madimi pabitale Efile Mukulu na pabitale bafwe. Kadi Yehowa akumina shi bantu bamwiukye kalolo.​—Badika Mulungudi 9:5, 10; 1 Timotee 2:3-5.

2. Nkinyi akikyebe kufwila bipwilo?

Twi na muloo, mwanda Efile Mukulu te kudimbibwa na bipwilo bikwete kwamba shi mbimufule aku namu mbifule ndumbulwilo a Satana. (Jaake 4:4) Eyi dy’Efile Mukulu aditanyina bipwilo bya madimi bu “Babilone Mukata.” Babilone nyi eshina dibabadi abetamina lupata lukata lwa kala mubaadi mubangye bipwilo bya madimi kunyima kwa Mpeshi a kabutu banokyele mu mafuku a Nowa. Kubashala mafuku apela bwashi Efile Mukulu afudiishe bipwilo byooso bikwete kudimba na kukyengyesha bantu.​—Badika Bifumbulwe 17:1, 2, 5, 16, 17; 18:8.

Sunga mbyabya, Yehowa tamulube bantu be na mashimba ebuwa bapalakane mu bipwilo bya madimi bi pa nsenga ishima nya. Kwete kubunga baba bantu na kwibalongyeshanga bya binyibinyi.​—Badika Mika 4:2, 5.

3. Abitungu bantu basha mashimba ebuwa bakite kinyi?

Yehowa etatshisha bwa myanda ya bantu bafule bya binyibinyi na myanda ibuwa. Kwete kwibadimusha bwashi batuukye mu bipwilo bya madimi. Bantu bafule Efile Mukulu be na kya kushintuluka na kukita myanda ayimusankisha.​—Badika Bifumbulwe 18:4.

Mu mafuku a batumibwa, pabaadi bantu basha mashimba ebuwa bapushe mukandu wibuwa ubabadi bebatwadile kwi batumibwa, abaadi beutambule na muloo ooso. Yehowa bebalongyeshe nshalelo mupya, nshalelo a muloo, e na lukulupilo. Abo be bu kileshesho kibuwa kwatudi lelo mwanda abaadi batambule mukandu wibuwa na kutuula Yehowa pa mbalo ya kumpala mu muwa wabo.​—Badika 1 Beena-Tesalonika 1:8, 9; 2:13.

Yehowa kwete kutambula bantu booso bakwete kutuuka mu bipwilo bya madimi mu kifuko kya balangwidi baaye. Su bokumina lwitamino lwa Yehowa, okyebe kudya bukuuku n’aaye, wekala munkatshi mwa kifuko kipya na kibuwa kya balangwidi ba Yehowa, na okapete muwa wa looso.​—Badika Maako 10:29, 30; 2 Beena-Kodinto 6:17, 18.

4. Mushindo kinyi aukyebe Efile Mukulu kufwisha muloo mu nsenga ishima?

Kusambisha kwa bipwilo bya madimi nyi mmukandu wibuwa. Akukyebe kutuusha bantu ba nsenga ishima mu makyenga. Takwi efuku su ndimune adifiki bipwilo bya madimi mu kupambusha bantu na kwibaabuula. Bantu booso be pa nsenga abakebungu mu lulangwilo lwa Efile Mukulu umune a binyibinyi.​—Badika Bifumbulwe 18:20, 21; 21:3, 4.