Watchtower MIKANDA I MU INTERNETE
Watchtower
MIKANDA I MU INTERNETE
Kisongye
  • BIBLE
  • MIKANDA
  • BISANGILO
  • mwbr19 Mweshi wa 2 esak. 1-5
  • Mikanda yatudi bafubishe mu Programe a bisangilo bya Bwina Kidishitu na mudimo wetu (2/2019)

Tatui bapete video.

Etufuile namu lusa, kui kintu kibakutshishua kukafika kui video.

  • Mikanda yatudi bafubishe mu Programe a bisangilo bya Bwina Kidishitu na mudimo wetu (2/2019)
  • Mikanda yatudi bafubishe mu Bwina Kidishitu na mudimo wetu Programe a bisangilo—2019
  • Tu mitue twa mianda
  • LUBINGO LWA 4-10/2
  • LUBINGO LWA 11-17/2
  • LUBINGO LWA 18-24/2
  • Otentekyesha Su?
  • LUBINGO LWA 25/2–3/3
  • w11-F 15/5 23 ¶13
  • Binangu by’Efile Mukulu mbikata!’
Mikanda yatudi bafubishe mu Bwina Kidishitu na mudimo wetu Programe a bisangilo—2019
mwbr19 Mweshi wa 2 esak. 1-5

Mikanda yatudi bafubishe mu Programe a bisangilo bya Bwina Kidishitu na mudimo wetu

LUBINGO LWA 4-10/2

BUPETA BWA MWIYI DY’EFILE MUKULU | BEENA-LOOMA 1-3

“Tungunuka na kulongyesha kondo kobe k’eshimba”

lvs 18 ¶6

Ikala na kondo k’eshimba ke buwa n’Efile Mukulu

6 Mpa na bantu bashi’abauku Yehowa, abauku shi kwi myanda i buwa na i bubi. Bible amba shi: “Nnangunangu yabo ayibatopeka . . . mu imo myanda na kwibabingisha mu ingi.” (Beena-Looma 2:14,15) Bu kileshesho, bantu be bungi abauku shi kwipaa sunga kwiba kwi bubi. Sunga shi t’abebitundulaa, bakwe kupushiisha kondo kabo k’eshimba, bukome bwa kuuka ki buwa na ki bubi bwabadi bebele munda kwi Yehowa. Bakwete dingi kulonda mayi a Efile Mukulu, sunga bya binyibinyi bya kitako bitupe Yehowa bwa shi tumone bya kwata bitshibilo bi buwa.

lvs 19-20 ¶8-9

Ikala na kondo k’eshimba ke buwa n’Efile Mukulu

8 Bangi bantu abapwandikishaa shi, kutemesha kondo kaabo k’eshimba nkulonda mweneno aabo. Abamono shi be kukita kyoso kyabakumiina kyabamono bu ki buwa. Kadi mweneno etu ta mmupwidikye nya, na e kwitudimba. Binangu byetu bi kwikala na bukome bwa kulwisha kondo ketu k’eshimba. Bible amba shi: “Ta kwi kikile eshimba dya muntu bulamalama, ta kwi muntu ashingûla byadidi.” (Yeelemiya 17:9) Nyi bwakinyi twi kubanga kumona shi, kintu kampanda ki buwa sunga kyekala bubi. Kileshesho, kumpala kwashi Mpoolo afikye mwina Kidishitu, baadi akyengyesha bafubi b’Efile Mukulu ngofu na baadi amono shi bibaadi akitshi bi buwa. Mu mweneno aaye, baadi na kondo k’eshimba ke buwa. Kadi kunyima bakwile shi: “Yehowa nyi antshibila kiimu.” (1 Beena-Kodinda 4:4; Bikitshino 23:1; 2 Timote 1:3) Pabalongyele Mpoolo abipushaa Yehowa pabitale bibaadi akitshi, bamwene shi abitungu ashitulukye. Eyendo, kumpala kwa kwata kitshibilo, abitungu twiyipushe shi, ‘Yehowa akumiina shi nkite kinyi?’

9 Patudi bafule muntu t’atukuminaa kumwinyongosha. Twi bafule Yehowa, nyi bwakinyi t’atukuminaa kukita kintu akimwinyongosha. Abitungu twikale na moo ukata wa kupela kumwinyongosha. Neemiya nkileshesho kikata kwatudi. Bapelele kufubisha mwasu waye wa bu guvernere bwa kukimba bupeta. Bwakinyi? Bambile shi, mwanda baadi ‘atshinyi Efile Mukulu.’ (Neemiya 5:15) Neemiya tabaadi akumiina kukita kintu kilombene kwinyongosha Yehowa. Anka bu Neemiya, atwe namu atutshinaa kukita kintu ki bubi bwa kupela kwinyongosha Yehowa. Twi kulonga akisankisha Yehowa p’atubadika Bible.—Tala Mayi a ku nfudiilo 6.

Kukimbuula bwa kupeta mabwe a muulo a mu kikudi

w08-F 15/6 30 ¶5

Myanda ikata ya mu Mukanda wa Beena-Looma

3:4. Su muntu aakula bikutwene na abyakula Eyi dy’Efile Mukulu, atwe atulekaa Efile Mukulu bwa “kuwukibwa bu sha binyibinyi” patukuminaa akyakula Bible na pa kukita kyakya akituteky’Efile Mukulu. P’atulungula mukandu wi buwa wa Bufumu na kisumi na kwikasha bantu bu balongi, twi kukwasha bangi bwa kumona Efile Mukulu bu sha binyibinyi.

w08-F 15/6 29 ¶6

Myanda ikata ya mu mukanda wa Beena-Looma

3:24, 25—‘Nkuulo ituushe Yesu Kidishitu’ ayibwikila “milwisho ibakitshinwe kwibedi” naminyi? Butemuki bwa kumpala abwakwila Mesiya bwi mu Kibangilo 3:15, bubadi bukumbane mu kipwa kya 33 B.B. pababadi bayipee Yesu ku mutshi. (Nga 3:13, 16) Pabadi Yehowa mwakule bwabwa butemuki, muulo wa nkuulo ubadi nka bu upwe kufutshiibwa ku meeso kwaye, mwanda takubadi kintu sunga nkimune kya kukutshisha Efile Mukulu kulombasha mpàngo yaaye. Byabya ku bukwashi bwa mulambu wa Yesu Kidishitu ubadi na kya kutushibwa, Yehowa badi na kya kubwikiila milwisho ya beekulu ba Adame abalesha lukumiino mu wawa mulayilo. Dingi nkuulo ngitushe mushindo wa kusangusha bano abadi na muwa kumpala kwa Yesu.—Bik 24:15.

LUBINGO LWA 11-17/2

BUPETA BWA MWIYI DY’EFILE MUKULU | BEENA-LOOMA 4-6

“Yehowa mmwituleshe kifulo kyaye”

w11-F 15/6 12 ¶5

Yehowa mmwituleshe kifulo kyaye

5 Mpoolo badi mwakule uno mwanda mu kikoso, babangile shi: “Bu bibatwelele milwisho pano pa nsenga kwi muntu umune, na bibabapetele lufu ku milwisho, bu bibabekeele balwishe booso.” (Lom. 5:12) Twi na ngobesha ya kwibipusha mwanda Efile Mukulu badi mufundjishe bibabangile nshalelo a bantu. Yehowa bapangile bantu babidi, ba Adame na Eeva. Nka bu bibadi Mupangi mupwidikye, bano bantu ba kumpala ba nkabwa beetu abadi namu bapwidikye. Efile Mukulu badi mwibelele penda mwiya umune na kwibalungula shi su bakutwa kwiukookyela abibafwishila lufu. (Kib. 2:17) Anka, babalwisheshe myanda yooso, abo nkukutwa kukookyela buludiki bwa kinangu bw’Efile Mukulu na kumusumbushena bu Muntu ebapa miiya na bu Mukunkushi.—Miy. 32:4, 5.

w11-F 15/6 12 ¶6

Yehowa mmwituleshe kifulo kyaye

6 Adame batandjile bana nka penda kunyima kwa’ye kukita mulwisho, aye nkwibapyanyika mulwisho na bukitshishi bwao. Byabya, tababadi bakutwe kukookyela mwiya w’Efile Mukulu bu bibakitshine Adame nya, nyi bwakinyi tababadi bebatweshe mu wawa mulwisho nya; na takubadi ingi miiya itushibwe bwabo nya. (Kib. 2:17) Sunga mbyabya, bekulu ba Adame abadi bapyane mulwisho. Nyi bwakinyi mulwisho na lufu bibadi bimunane mpa na pabadi Efile Mukulu mupe beena Isaleele miiya ibadi ayilesha patooka shi abadi bankitshish’abubi. (Badika Beena-Looma 5:13, 14.) Twi kupwandjikisha bukitshishi bwa kupyana mulwisho na maladi a ba nambutwile aambukilaa bana babo, bu mukumbo wa anémie méditerranéenne na hémophilie. Pangi t’obopushishe shi, Alexis mwana batandjile Nfumu Nicolas II na Alexandra badi mutandjikwe na mukumbo wa hémophilie. Anka, sunga byekala shi kwi bana ba mu kyakya kifuko kimune bashii bakumbe wawa mukumbo, be kwiwambukisha bangi. Ta bi byabya bwa mulwisho nya. Bibadi bukopo bwa kupanda ku bukitshishi bwa mulwisho wa Adame. Bantu booso be nka ku bupika bwao. Awikalaa nka na masaku. Mbewambukishe kwi bana booso. Abadi na kya kukatusha luno lukalakashi su?

w11-F 15/6 13 ¶9-10

Yehowa mmwituleshe kifulo kyaye

9 Kishima kya mu Kina Greke kyabadi baleshe bu kubingishibwa bwa muwa akilesha kinyi? Ungi mufundji a Bible bambile shi: “Nyi ngakwilo a miiya alesha mwanda kampanda utale miiya. Abilesha kushintuluka kutale kipaso akimono Efile Mukulu, kushii kushintuluka kwa muntu nabeene nya . . . Yawa ngakwilo alesha Efile Mukulu bu nsushi batshile kitshibilo kya kubingisha muntu ekeele mufundjibwe, mu ngakwilo a mu kifwanyi, yawa muntu ekeele mutwadibwe ku tumilaadi tw’Efile Mukulu mwanda bamufundjile shi bakutwa kululama. Anka Efile Mukulu bakula shi te na mwanda nya.”

10 Mu kipaso kinyi mubadya kwikala “Nsushi a miilo” na kya kubingishisha muntu musoole mwanda? (Kib. 18:25) Kya kumpala mu kifulo kyaye, Efile Mukulu batumine Mwan’aye umune eeleka bwa kufika pa nsenga. Yesu bakitshine kikyebe ky’eshimba dya Nshaye kalolo sunga mu bitompwanga, kwishibwa milongo na kukayibwa. Badi mulame kululama kwaye sunga kumpala kwa kufwa ku mutshi wa makyenga. (Eb. 2:10) P’aye kutusha muwa waye upwidikye, Yesu batushishe nkuulo ibadya kupaasha sunga kukuula lutandwa lwa Adame ku mulwisho na ku lufu.—Mat. 20:28; Lom. 5:6-8.

Kukimbuula bwa kupeta mabwe a muulo a mu kikudi

w08-F 15/6 29 ¶7

Myanda ikata ya mu mukanda wa Beena-Looma

6:3-5—Lubatshisho mwi Yesu Kidishitu na lubatshisho mu lufu lwaye abilesha kinyi? Nsaa ayipongolwela Yehowa balongi ba Kidishitu kikudi kiselele, abebungu pamune na Kidishitu na kufika bena kakongye kekale mbidi ya Kidishitu aye mwikale Mutwe. (1 Kod. 12:12, 13, 27; Kol. 1:18) Luno nyi ndubatshisho mwi Yesu Kidishitu. Beena Kidishitu bedibwe mwimu ‘ababatshishibwa dingi [mu lufu lwa] Kidishitu, nkwamba shi be na nshalelo a kwisumina ingi miloo na kupela kwela binangu ku lukulupilo looso lwa muwa wa ikalaika pa nsenga. Byabya, lufu lwabo ndwikale lwa mulambu nka bu bibadi lwa Yesu, sunga byekala shi lwabo lufu talwi na muulo wa nkuulo nya. Luno lubatshisho mu lufu lwa Kidishitu alulombana nsaa yabafu na kusanguka na muwa mwiyilu.

w14 1/6 31 ¶1

Ndukulupilo kinyi lwandi nalo pabitale Bankambwa bapwe kufwa?

Nsaa yabakasangusha bantu bashi balulame, abakyebe kwibatshibila kiimu muyiile myanda ibabadi bakite kala? Nya. Beena-Looma 6:7 alesha shi: “Mwanda yawa mufwe mmupandukye ku milwisho.” Bantu bashi balulame abakyebe kufuta milwisho yabo pa’bo kufwa. Byabya, abakebatshibila kiimu muyiile myanda yabakitshi kunyima kwa kusanguka, kushi muyiile myanda ibabadi bakite pabashibaadi abauku Efile Mukulu kumpala kwa kufwa. Mushindo kinyi wabakyebe kwibakwasha?

LUBINGO LWA 18-24/2

BUPETA BWA MWIYI DY’EFILE MUKULU | BEENA-LOOMA 7-8

“Okwete ‘kutengyela n’eshimba kwiyilu’ su?”

w12-F 15/7 11 ¶17

Lekyela Yehowa akukunkushe mu bulungantu bw’eyendo

17 Pabitale bulungantu bwabakapa bafubi ba Yehowa be pa nsenga, Mpoolo bafundile shi: “Mwanda bipangwa byooso abitengyela na kwabilaa, kufumbuka, kwa baana b’Efile Mukulu.” Akupu badi mukumbashe shi: “Mwanda abyo namu abikaposolwa ku bupika kwa bintu abilwilaa, bwa kutambula bulungantu na ntumbo ya baana b’Efile Mukulu.” (Lom. 8:19-21) “Bipangwa” abilesha bantu be na lukupilo lwa kushala pa nsenga, bano abakapetela myabi mu “kufumbuka” kwa baana b’Efile Mukulu bapongolwe mwimu wa kikudi kiselele. Kwakwa kufumbuka akukabanga nsaa ayikala bano “baana” na kya kusanguka bwa kwenda mwiyilu, pa kwibunga na Kidishitu mu kubutula uno ndumbulwilo mubi a Satana na kukunkusha “kibumbu kikata” mu ndumbulwilo mupya.—Kibaf. 7:9, 14.

w12-F 15/3 23 ¶11

Twikaleyi na muloo mu lukulupilo lwetu

11 Yehowa bapeele bantu “lukulupilo” pabadi mulee bwa kuposoosha bantu kwi “Nyoka a kala” Satana Dyabulu, ku bukwashi bwa “lutando” lubadi lulayibwe. (Kibaf. 12:9; Kib. 3:15) Kipindi kya kumpala kya lwalwa “lutando” kibadi Yesu Kidishitu. (Nga. 3:16) Ku bukwashi bwa Lufu na lusangukilo lwaye, Yesu badi mutushe lukulupilo lunyingye lwa kupososhibwa ku bupika bwa mulwisho na lufu. Kukumbana kwa luno lukulupilo nkwipushene na “kufumbuka kwa baana b’Efile Mukulu.” Kipindi kya kabidi kya “lutando” nyi bedibwe mwimu. ‘Abakafumbuka’ nsaa ya bakakwatshishena Kidishitu mu kubutula uno ndumbulwilo mubi a Satana. (Kibaf. 2:26, 27) Bino abikafwisha kipandjilo kwi ingi mikooko ayikatukila mu mpombo ikata.—Kibaf. 7:9, 10, 14.

w12-F 15/3 23 ¶12

Twikaleyi na muloo mu lukulupilo lwetu

12 Banda kupwandjikisha muloo aukapusha “bipangwa” mu Bipwa Kinunu bya Kumunana kwa Kidishitu! Mu yaya nsaa “baana b’Efile” be na ntumbo ‘abakafumbuka’ bwa kufuba bu ba tshite bakwidi na Kidishitu, na kufwisha myabi ya nkuulo ya Yesu kwi bantu. Bu byabekala ku bukunkushi bwa bwa Bufumu bwa mwiyilu, “bipangwa” bya bantu abikekala na muloo wa kuposodiibwa ku bukitshishi bwa mulwisho na lufu. Bantu basha kukokyela ‘abakapososhwa ku bupika bwa kulwishibwa’ mwenda mafuku. Booso abakekala na lulamato kwi Yehowa munda a bipwa kinunu, mu nsaa ya kutompibwa kukata mpa na kufudilo, abakekala na mashina afundwe ‘mu mukanda wa muwa’. Abakatwele mu “ntubo ya baana b’Efile Mukulu.” (Kibaf. 20:7, 8, 11, 12) Nyi ndukulupilo lukile buwa!

Kukimbuula bwa kupeta mabwe a muulo a mu kikudi

w17.06 3

Otentekyesha Su?

Nkwilekena kinyi kwi pankatshi pa “kwelanga binangu ku mbidi” na “kwelanga binangu ku kikudi”? (Beena-Looma 8:6)

Muntu elaa binangu ku mbidi, ngyawa mwipaane mu kusangasha malaka aaye a mbidi ikutwe kupwidika, nsaa yoso esambaa na kutumbisha bintu bya ku mbidi. Muntu eele binangu ku kikudi namu mmutuule myanda y’Efile Mukulu pa mbalo ya kumpala mu muwa waye na anangushenaa ku yanka; mwina Kidishitu akitaa bino kwete kukunkushibwa na kikudi kiselele. Kwelanga binangu ku mbidi akutwalaa ku lufu, anka kwelanga binangu ku kikudi namu akutwalaa ku muwa na kufukama.—w16.12, esk. 15-17.

w09-F 15/11 7 ¶20

Nteko yobe ayileshaa kinyi?

20 Ingi nsaa, t’atukaa kyatukwete kwakula mu nteko ya pa bupenka nya. Mpoolo bafundjile shi: “Mwanda t’atuwuku kuteka bu byaabikebiibwa nya. Anka kikudi kinabeene akitwakwila na kwinyenga mu kipaso kishiii kubweela. N’Efile awuku bi mu mashimba eetu, awuku akikyebe kikudi.” (Lom. 8:26, 27) Yehowa badi mufundjishe nteko i bungi mu Bifundwe. Akumiina ino nteko iyokyelwe na kwiyilombasha nka bu’twe abamutekye yanka. Efile Mukulu etwiuku na na kuuka bintu bibadi mufundjishe ku bukwashi bwa kikudi kyaye kiselele mu Bible. Yehowa alulaa kwitenda kwetu nsaa ‘ayitwakwila’ kikudi kiselele. Kadi bu byatudi bakambe kwiubidishena n’Eyi dy’Efile Mukulu, abitungu twikale atwele nteko ibungi ayikatukila mwishimba.

LUBINGO LWA 25/2–3/3

BUPETA BWA MWIYI DY’EFILE MUKULU | BEENA-LOOMA 9-11

“Kileshesho kya mutshi wa Oliive”

w11-F 15/5 23 ¶13

‘Binangu by’Efile Mukulu mbikata!’

13 Mu mukanda waye, Mpoolo mutumibwa a pwandikisha baba abafiki ku lutando lwa Abrahame na ntambi ya mutshi wa oliive wa mu kifwanyi. (Lom. 11:21) Uno mutshi udimibwe wa oliive auleesha kulombana kwa mpango y’Efile Mukulu pabitale kipwano kyaye na Abrahame. Mishi ya mutshi i selele, na ayilesha Yehowa bu penda muntu umune kwete kupa Isaleele a mu kikudi muwa. (Yesh. 10:20; Lom. 11:16) Kishina akilesha Yesu bu kipindji kya kumpala kya lutando lwa Abrahame. Ntabi mu bungi bwayo ayilesha “bungi bulombane” bwa baaba be mu kipindji kya kabidi kya lutando lwa Abrahame.

w11-F 15/5 24 ¶15

‘Binangu by’Efile Mukulu mbikata!’

Yehowa bakitshine kinyi bwa kulombasha mpàngo yaye? Mpoolo apatula shi ntabi ya ku mutshi wa oliive a mmapya abadi beyilamikye ku mutshi wa oliive udimibwe bwa kupyana yaya ibabadi itshibibwe. (Badika Beena-Looma 11:17, 18.) Byabya, bena Kidishitu bediibwe mwimu ba mu kikudi ba bingi bisamba, bu bangi ba mu kakongye ka Looma, abadi balamikwe mu kinfwanyi ku mutshi wa oliive wa mu kinfwanyi. Mu kyakya kipaso, abafikile bena lutando lwa Abrahame. Ku mbangilo, abadi bu ntabi ya mutshi wa oliive a mmapya kushii mushindo wa kwikala bena kino kipwano kya pa bwakyo nya. Anka Yehowa badi mwibafungwile eshinda bwabadya kufika Isaleele a mu kikudi.—Lom. 2:28, 29.

w11-F 15/5 25 ¶19

Binangu by’Efile Mukulu mbikata!’

19 Mpàngo ya Yehowa pabitale “Isaleele’eEfile Mukulu” ikwete kulombana mu kipaso kikile buwa. (Nga. 6:16) Nka bu bibambile Mpoolo, “Isaleele mushima akapanda.” (Lom. 11:26) Mu nsaa ayilombasha Yehowa, “Isaleele mushima” aye mwikale bungi bushima bwa Isaleele a mu kikudi, abakafubu bu ba nfumu na ba tshiite mwakwidi mwiyilu. Takwi kintu ki kukutshishwa ino mpàngo ya Yehowa kulombana nya!

Kukimbuula bwa kupeta mabwe a muulo a mu kikudi

w13 1/6 24 ¶5

Leka dinyoka dya Yehowa dikulumbuule

5 Kadi su muntu akoma eshimba apela shi bamulumbuule kwi Mubumbi Mukata a mabuka? Byabya, mushindo kinyi w’atumikaa na bukome bwaye? Banda kutala byakitaa n’ema su tadikii dingi buuwa bwa kukita nadyo kintu kampanda ki na muulo. Kushi mpaka, muntu abumbaa mabuka mmulombeene kubumba nadyo kingi kintu sunga kwidisumbula! Byabya su ema di bubi, misusa ibungi adilwilaa su muntu abumbu ta mwidifunte kalolo. Mubumbi etu tekalaa byabya nya. (Miy. 32:4) Su muntu takumiina shi Yehowa amulumbuule, bubi mbwa yawa muntu. Yehowa atumikaa na matalwa aaye, bu abikitaa muntu abumbu mabuka, nsaa y’ashintuula mushindo wakwete kukitshina bantu myanda muyile mushindo wabakumina bukunkushi bwaye. Baaba abakumiina shi ebalumbuule abekala bantu bebuwa. Bu kileshesho, beena Kidishitu bashingwe mwimu “mbipulu bya kufwilwa lusa,” byabadi babumbe bu ‘bipulu bimune bya kineemo.’ Ku lungi lupese, baaba abakomo mashimba na kupela kukokyela Efile Muklu abekala bu “bipulu bya nsungu byoso bilumbuulwe bwa kulwishiibwa.”—Lom. 9:19-23, Kilombeeno kipya 2009.

it-1-F 1234 ¶6

Mukao, kukwatshila bangi mukao

Katshintshi ke bubi. Muntu e kwikala na katshintshi sunga mukao, kadi bwa kabingilo kampandaa, e kukutwa binangu bibuwa na kukutwa kusangasha Efile Mukulu. Nyi bibadi bena Yuuda bebungi mu bipwa lukama bya kumpala. Abadi abakimbi kumweneka balulame ku bukwashi bwa bikitshino byabo bya Mwiya wa Moyiise. Anka Mpoolo balesheshe shi katshintshi kaabo kabadi kebubi mwanda wa kukutwa kyukilo kya bya binyibinyi. Byabya, tababadi bapete kululama kwa binyibinyi akufiki kwi Efile Mukulu nya. Abaadi na kya kutundula kilubilo kyabo na kwaluka kwi Efile Mukulu ku bukwashi bwa Kidishitu bwa kupeta kululama na bulungantu bwa kupishiibwa ku Mwiya. (Lom 10: 1-10) Soolo a ku Tarse badi umune a ku baba bena Yuuda, badi na katshintshi katabukile ka bwina Yuuda pa ‘kukyengyesha na kulwisha kipwilo ky’Efile Mukulu. Badi alongo kantu pa kantu ka mu Mwiya nka bu muntu “shii kutopekwa.” (Nga 1: 13, 14; Fid 3:6) Anka, mukao waye wa bwina Yuuda ubadi aumuludika bibubi. Bu bibadi n’eshimba dya kwiyisha, nyi bwakinyi Yehowa badi mufubishe kalolo kaye ku bukwashi bwa Kidishitu bwa kumukunkusha mwishinda dya lulangwilo lwa binyibinyi.—1Tim 1: 12, 13.

    Mikanda ya mu Kisongye (2011-2025)
    Tuuka
    Tuela
    • Kisongye
    • Tumina muntu
    • Byokumina
    • Copyright © 2025 Watch Tower Bible and Tract Society of Pennsylvania
    • Pabitale bya kufubisha
    • Bya kufubisha
    • Bya kufuamisha yobe
    • JW.ORG
    • Tuela
    Tumina muntu