Mikanda yatudi bafubishe mu Programe a bisangilo bya Bwina Kidishitu na mudimo wetu
LUBINGO LWA 1-7/4/2019
BUPETA BWA MWIYI DY’EFILE MUKULU | 1 BEENA-KODINDA 7-9
“Kya buntu kya kushala bukupi”
w11-F 15/1 17-18 ¶3
Uka bya kufubisha bukupi boobe kalolo
3 Muntu e bukupi akambaa kwikala na nsaa ibungi na bulungantu kukila muntu mwibakile. (1 Kod. 7:32-35) Bino abipa muntu e bukupi mushido ukile buwa wa kutamisha mudimo waye, kutamisha kifulo kyaye bwa bangi na kwifubwila peepi na Yehowa. Bena Kidishitu bebungi mbafikye mu kumona myabi ya kwikala bukupi na mbaate kitshibilo kya “kukumina” kushala bukupi munda mwa mafuku. Bangi taababadi na kitshibilo kya kushala bukupi, kadi p’afikye kushintuluka myanda mu nshalelo aabo, mbanangushene mu luteko bwa nshalelo aabo na kumona shi Yehowa mulombene kwibakwasha bwabadya kushala na kyakya kitshibilo mu mashimba abo. Nyi bwakinyi mbakumiine kwakwa kushintuluka kwa myanda mu nshalelo aabo, na kukumiina kushala bukupi.—1 Kod. 7:37, 38
w08-F 15/7 27 ¶1
Myanda ikata ya mu Mikanda ya Beena-Kodinda
7:33, 34—“Myanda kinyi ya pano” ayifumbakena muntu mwibakile? Mpoolo badi akwila bwa bintu bya mu nshalelo bilombene muntu mwibakile kufumbakena. Mu bino bintu mwi bidibwa, bilamba, mbalo ya kushala, kushi bintu bi bubi bya uno ndubulwilo byabadi bashikwe kwi bena Kidishitu.—1 Yowano 2:15-17.
w96-F 15/10 12-13 ¶14
Kushala bukupi—bwa kufuba kushii kapungakanyi
14 Mwina Kidishitu shi mwibakile afubisha bukupi bwaye bwa bipatshila abimusangasha pend’aye nabene t’akwete kukita “bibuwa” kukila mwina Kidishitu mwibakile nya. Mwanda t’amushale bukupi bwa “myanda itale Bufumu” nya, kadi bwa tubingilo twaye’ye nabeene. (Mat 19:12) Abitungu mwana mulume sunga mwana mukashi shi mwibakile ekale “afumbakeena myanda ya Mwanana,” sunga kwikalakasha bwa “kulongamina Mwanana,” bwashi ‘ekale mulamate Mwanana kushii kwialashena.’ Bino abilesha kwipana eese mu kufubila Yehowa na Yesu Kidishitu. Su mwina Kidishitu mulume sunga mukashi e bukupi akitshi bino, nyi p’akitshi “bibuwa” kukila mwina Kidishitu mwibakile.
Kukimbuula bwa kupeta mabwe a muulo a mu kikudi
lvs 251
Mayi a kunfudilo
Ingi nsaa, bangi bena Kidishitu mbate kitshibilo kya kwilekena na bena dibaka nabo sunga pakushii muntu mutambukye lusandji. (1 Beena-Kodinda 7:11) Myanda ikumbene kufwisha muntu mu kwilekena na mwina dibaka naye ngino.
• Kupela kulombasha nkalo ya ba mu nshibo pa bukopo: Mulume apele kupa ba mu kifuko kyaye bintu bya ku mbidi, mu kipaso kya shi, kifuko akishala kushi ekuta sunga bidibwa.—1 Timote 5:8.
• Kukyengyesha ku mbidi: Pe mwina dibaka akyengyesha mwina dibaka naaye ku mbidi mu mushindo autulu muwa waye mu masaku.—Beena-Ngalatea 5:19-21.
• Kulwisha kipwano kya mwina dibaka na Yehowa: Mulume sunga mukashi apele’shi mwina dibaka naye tafubilanga Yehowa.—Bikitshino 5:29.
w00-F 15/7 31 ¶2
We kushala selele mu ndumbulwilo e butete
T’abitungu’shi ba nsongwa bakimbe bya kutwela mu dibaka nsaa ikyayibanga lukalo lwabo lwa kusangisha mbidi nya. Bwa kutwela mu eyibakishi abitungu kwikala muntu t’adi munyingye bwa kutwala mashito a mu dibaka. (Kib 2:24) Bibuwa kutengyela bwa kukila “kipungo kya buwa bwa bu nsongwa,” kipungo akikalaa lukalo lwa kusangisha mbidi lukile bukopo na lulombene kulwisha mweneno e buwa bwa kwibakila. (1 Kod 7:36) Na dingi su muntu mukulu atambuka lusandji mwanda wa’shi nta mumone muntu a kwiyibakishena naye, nkukutwa kwa kinangu na mulwisho ukata!
LUBINGO LWA 8-14/4/2019
BUPETA BWA MWIYI DY’EFILE MUKULU | 1 BEENA-KODINDA 10-13
“Yehowa e na lulamato”
Nkonko ya bantu ababadikaa
Mpoolo mutumibwa bafundjile’shi Yehowa “taakumiina’shi nutompiibwe bikile pa makome eenu.” (1 Beena-Kodinda 10:13) Bino abilesha’shi Yehowa mmupwe kutshiba makyenga atudi balombeene kufumankana nao na kwianyingiila su?
▪ Su bibadya kwikala byabya, banda kunangushena uno mwanda bibaudya kwikala na bukitshishi mu muwa wetu. Bu kileshesho, mwana a ungi mukwetu mulume badi mwiyipee. Nshaye badi mutapikye kwishimba ngofu. Baadi eyipusha su Yehowa bapwile kumona na kutshiba’shi aye na mukashi’aye be na ngobesha ya kunyingiila uno mwanda. Mu uno ndumbulwilo, bebungi ba kwatudi bakwete kufumankana na nkalakashi ibungi. Byabya, twi kwamba’shi Yehowa kwete kukunkusha myanda yooso ayikitshika mu muwa wetu su?
Nsaa yatutalula mukanda wa 1 Beena-Kodinda 10:13, atumono’shi Bible takwatshishena binangu bya’shi Yehowa aukaa myanda yatudi balombeene kunyingila kumpala kwa nsaa, na kutshiba nkalakashi yatudya kufumankana nayo nya. Bwakinyi atwakula byabya? Tubandeyi kutalula tuno tubingilo tunanka.
Ka kumpala, Yehowa mmupe bantu bulungantu bwa kwisangwila, matalwa a kwiatshila bitshibilo. Akumina’shi twikale atwiatshila bitshibilo. (Miiya Ikituulwe 30:19, 20; Yooshwa 24:15) Su twata bitshibilo abimusankisha, twi kulonda bukunkushi bwaye. (Nkindji 16:9) Kadi nsaa yatwata bitshibilo bibubi, atukapete nka bipeta bibubi. (Beena-Ngalatea 6:7) Byabya su Yehowa asangulaa nkalakashi ilombene kwitukwata, twi kwikala na bulungantu bwa kwisangwila su?
Ka kabidi, Yehowa tetulamaa ku “[myanda ya kimpulunkamba NWT].” (Mulungudi 9:11) Muntu e kupeta masaku nka pa mwanda wa’shi e pa mbalo ibi mu nsaa ibi. Yesu bakwile bwa bantu 18 abafwile ku masaku a kimano kibadi kibaponene. Baadi muleshe patoka’shi ta Efile Mukulu badi bu nsulo ya lufu lwabo nya. (Luka 13:1-5) Ta bibuwa kunangushena’shi kumpala kwa’shi masaku akitshikye, Efile Mukulu atshibaa bantu balombene kupanda na balombene kufwa nya.
Ka kasatu, ooso a kwatudi e na kya kushala na lulamato kwi Yehowa. Satana bambile’shi bafubi ba Yehowa abamufubila pa mwanda wa bintu byebapa. Aye nkwamba dingi’shi ta twi balombene kushala na lulamato kwi Yehowa patudi kumpala kwa nkalakashi nya. (Yoobo 1:9-11; 2:4; Kibafumbwilwe 12:10) Su Yehowa etukalwila ku nkalakashi yooso ilombene kwitufikila, bi kwikala nka bu’shi Satana bakwile bya binyibinyi.
Ka kananka, Yehowa takimbaa bya kuuka myanda yooso ayitukitshikila kumpala kwa nsaa nya. Yehowa mmulombene kuuka myanda ayikakitshika mu mafuku aafiki su bakumina. (Yeeshaya 46:10) Anka Bible alesha’shi takimbaa bya kuuka myanda yoso ayikitshika kumpala nya. (Kibangilo 18:20, 21; 22:12) Yehowa e na kifulo na kululama, ngi bwakinyi takimbaa bya kushikila bulungantu bwetu bwa kwiatshila bitshibilo.—Miiya Ikituulwe 32:4; 2 Beena-Kodinda 3:17.
Byabya, Mpoolo baadi akyebe kwamba kinyi nsaa ibakwile’shi Yehowa “taakumiina’shi nutompiibwe bikile pa makome eenu”? Pa ino mbalo, Mpoolo badi esambila myanda ayikitaa Yehowa mu nsaa yatudi na nkalakashi, ta kumpala kwa kufumankana nayo nya. Su twi bakulupile mwi Yehowa, aketukwasha mu nkalakashi yooso yatufumankana nayo mu muwa wetu. (Misambo 55:22) Binobino, tubandeyi kutaluula tubingilo tubidi tubadi tutakule Mpoolo bwa kwakula bino.
Kabingilo ka kumpala nka’shi, nkalakashi yatufumankana nayo ‘ayifikilaa bantu booso.’ Mu mafuku ooso atukii mu uno ndumbulwilo a Satana, atufumankana nka na myanda ibukopo, pangi na myanda ya masaku. Anka su twekala bakulupile mwi Yehowa, twi kunyingiila ino nkalakashi yooso na kushala na lulamato. (1 Mpyeele 5:8, 9) Mu mukanda wa 1 Beena-Kodinda shapitre a 10, Mpoolo bafundjile pabitale bingi bitompwanga bibafumankeene na bena Isaleele mu kabaaka. (1 Beena-Kodinda 10:6-11) Booso abadi bakulupile mwi Yehowa abadi bakambile ino nkalakashi. Anka bangi bena Isaleele abaadi batombokyele Yehowa, abakutshilwe kumukookyela mwanda tababaadi bamukulupile nya.
Kabingilo ka kabidi nka’shi “Efile Mukulu . . . e na kishima.” Bino abipushisha kinyi? Nsaa yatutala kipaso kibadi Yehowa mupasukile bafubi baye ba kala, atumono’shi akwashaa na lulamato looso “baba abalama [miiya] yê.” (Miiya Ikituulwe 7:9, EEM) Bino abitulongyesha’shi Yehowa alombasha milayilo yaye yooso. (Yooshwa 23:14) Twi balombene kushinkamisha’shi (1) Yehowa takatadila’shi lukalakashi su ndumune lwitukambile byatushii balombeene kwilunyingiila, na (2) aketupa “kipaso kya kwimutuuka.”
Yehowa apeyaa bantu abakulupila mwadi ‘kipaso kya kutuuka’ mu nkalakashi naminyi? Mmulombeene kukatusha lukalakashi. Kadi tentekyesha’shi, Mpoolo bambile’shi Yehowa ‘etupa kipaso kya kwimutuuka na bukome bwa kwibyata na lwishinko (sunga kunyingiila yanka).’ Bino abilesha’shi misusa ibungi Yehowa etupeyaa kipaso kya kwimutuuka pa kwitupa bukome bwa’shi tumone bya kushala na lulamato kwadi. Tubandeyi kwisambila mishindo yakitaa bino.
▪ Yehowa ‘etusambaa mu malwa eetu ooso.’ (2 Beena-Kodinda 1:3, 4) Mmulombeene kutaadisha binangu na mashimba eetu ku bukwashi bwa Bible, kikudi kyaye, na mpika a kishima.—Mateo 24:45; Yowano 14:16; Beena-Looma 15:4.
▪ Yehowa mulombeene kwitukunkusha ku bukwashi bwa kikudi kyaye ki selele. (Yowano 14:26) Kikudi ki selele nkilombeene kwitukwasha bwa kutentekyesha myanda na mayi a kulonda a mu Bible bwatudya kwata bitshibilo bibuwa.
▪ Yehowa mulombene kwitukwasha ku bukwashi bwa ba mwikeyilu.—Beena-Ebelu 1:14.
▪ Yehowa mulombene kwitukwasha dingi ku bukwashi bwa bakwetu bakashi na balume. Abetunyingisha ku mayi na ku myanda yabetukitshina.—Beena-Kolose 4:11.
Byabya, mayi a Mpoolo e mu mukanda wa 1 Beena-Kodinda 10:13 aetulongyesha kinyi? Aetulongyesha’shi Yehowa tasangulaa makyenga atudi balombene kufumankana nao nya. Anka twikale bashinkamishe’shi su tubakulupila mwi Yehowa, twi balombene kukambila nkalakashi yooso. Tuukye’shi Yehowa aketupa kipaso kya kwimutuuka bwatudya kumona bya kushala na lulamato kwadi.
Kukimbuula bwa kupeta mabwe a muulo a mu kikudi
w04-F 1/4 29
Nkonko ya bantu ababadikaa
Bwakinyi uno verse amba shi bena Isalele 23 000 babafwile mwifuku dimune mwanda abatambukile lusandi, aku namu Mbadiko 25:9 amba shi mbantu 24 000 babafwile?
Kwi myanda ibungi ayilesha bwakinyi kwi kwilekena mu ino verse ibidi. Mu kipaso kipepele, mbilomene kwikala shi bungi bwa bantu boso bubadi pankatshi pa bantu 23 000 na 24 000, kwamba shi be kukumbasha sunga kukatusha.
Tutalule ungi mwanda. Mpoolo mutumibwa badi mwakule uno mwisambo wa bena Isaleele abadi ku Shitime bu kileshesho kya kudimusha bena Kidishitu ba mu Kodinda pa mwanda wa nshalelo aabo e bubi. Bafundjile shi: “Tatutwelakananga mu lukyebano kyebano bu bibaakitshine bangi ba munkatshi mwabo: mwanda mwifuku dimune kubaafwile binunu makumi abidi naa bisantu.” Mpoolo badi mutushe bungi bwa bantu 23 000 bwa kwakwila bano babadi Yehowa mwipee mwanda wa lusandji lubabatambukile.—1 Beena-Kodinda 10:8.
Mukanda wa Mbadiko 25 awamba’shi: “Bena Isaleele abepêne mu kulangwila efile a baala aa ku peore, pa wawa mwanda Yehowa bebakwatshîle nsungu.” Yehowa nkulungula Moyiise bwadja kwipaa “mba nfumu booso ba mwilo.” Moyiise namu, nkutuma ba nsushi bwabadya kwibayipaa. Nsaa ibafikile Pinase bukidi bukidi mu kwipaa mwina Isaleele bafikile na mukashi mwina Madyane ku lupese lwa bena Isaleele, “Malwa abaafwambushanga baana ba Isaleele abaapwile.” Mwisambo aufudila shi: “Baipayiibwe mu ano malwa babaadi bungi bwa binunu makumi abidi naa binanka.”—Mbadiko 25:1-9.
Abimweneka’shi, mu buno bungi mwi “mba nfumu ba mwilo” babaabadi baipee kwi ba nsushi, na bena Isaleele babaadi Yehowa mwipee aye nabene. Abimweka’shi kubadi kinunu kya ba nfumu bababadi baipee kwi ba nsushi, nyi akikafisha ku bungi bwa bantu 24 000 babaadi bayibwe. Byabikale’shi bano ba nfumu be ku mutwe babatambukile lusandji, kupetekyelwa ku misangelo sunga kukwatshishena bano abadi bakite ino myanda, abadi nka na kya kutshibilwa kibawe mwanda “abepêne mu kulangwila efile a baala aa ku peore.”
Pabitale kishima “abepêne” ungi mukanda aulesha’shi: “nkukelamata kwi muntu.” Bena Isaleele nyi mwilo ubadi wilambule kwi Yehowa, anka nsaa ibabadi ‘bepaane kwi efile a baala aa ku peore’ abadi batshibe kipwano kyabo n’Efile Mukulu. Bipwa pangi 700 kunyima, Yehowa bakwile pabitale Isaleele kukidila kwi mutemuki Osea’shi: “Abo, anka bakyaabafiki ku Baale-Peore, abakitshine mwanda wa buufu, abo nkùshaala bintu bya mikiiya, buu kyaakya kintu kibaabadi bafule.” (Osea 9:10) Bano bantu boso abadi balombene kutshibilwa kiimu kwi Efile Mukulu. Moyiise atentekyesha bena Isaleele’shi: “Nwi beemwene na meeso eenu bikite Yehowa Baale aa Peore; booso babadi balonde Baala aa Peore, Yehowa Efile Mukulu oobe mmwibatuute munkatshi mwobe.”—Miiya Ikituulwe 4:3.
w15-F 15/2 30
Nkonko ya bantu ababadikaa
Mulungudi mukashi mulombene kupuuta ku mutwe p’akunkusha kulonga kwa Bible aye e na mulungudi a bufumu mulume su?
▪ Mu “Nkonko ya bantu ababadikaa” i mu Kitenta kya Mulami kya mweshi wa 15/7 2002, kibadi akyakula’shi: abitungu Mulungudi mukashi apuute ku mutwe p’akunkusha kulonga kwa Bible, aye e na mulungudi a bufumu mulume mutambule, sunga shi mutambule. Kunyima kwa’twe kutaluula uno mwanda, tubamwene’shi abitungu tupushishe panka kalolo.
Su mulungudi mukashi akunkusha kulonga kwa Bible aye e na mulungudi mulume mupwe kutambula, abitungu mukwetu mukashi apute ku mutwe. Pa kukita byabya anemeka matalwa atule Yehowa mu kakongye ka bena Kidishitu, mwanda akitshi mudimo wa badi bapee bakwetu balume. (1 Kod. 11:5, 6, 10) Su ta mwipuute ku mutwe, mulombene kuteka mukwetu mulume bwa kukunkusha kulonga kwa Bible su e na ngobesha ya kwibikita.
Mu ungi mushindo, su mukwetu mukashi e na mulungudi mulume shabandjile kubatshishibwa shi mulume aye, te na kitungo kya mu Bifundwe akimutekye bwadya kwikala mupuute ku mutwe nya. Anka, tondo tw’eshimba twa bangi bakwetu bakashi twi kwibatakula bwa kupuuta ku mutwe sunga be na bano bakwetu bashi batambule bashi balume babo.
LUBINGO LWA 22-28/4/2019
BUPETA BWA MWIYI DY’EFILE MUKULU | 1 BEENA-KODINDA 14-16
“Efile Mukulu ‘akamunana loso pa nundu pa byoso’”
w98-F 1/7 21 ¶10
“Lufu t’alukekala kwanka dimo”
10 “Nfudilo” yabesambila pano nyi nfudilo ya Bipwa Kinunu bya Kumunana kwa Kidishitu, nsaa ayikalusha Yesu Bufumu kwi Efile Mukulu na Nshaye na kwiyisha koso. (Kibafumbwilwe 20:4) Mpàngo y’Efile Mukulu ya “kukonga bintu byoso ku matalwa a nfumu umunenka, Kidishitu” ayikakumbana. (Efeso 1:9, 10) Anka, kumpala kwa byabya Kidishitu akabutula “mafumu ooso, makata ooso na makome ooso” asha akwatshishenanga Bufumu bw’Efile Mukulu. Bino t’abilesha penda kabutu ka Armagedone nya. (Kibafumbwilwe 16:16; 19:11-21) Mpoolo mbambile shi: “[Kidishitu] ee na kya kudya bufumu, nyaa na paakatuudila beeshikwanyi nee booso muushi mwa ngwa yaaye. Mwishikwanyi a nfudiilo akabutulwa, ndufu.” (1 Beena-Kodinda 15:25, 26) Eyendo, akakatusha myanda yoso ifwishe mulwisho na lufu. Bino abimweneka shi kunyima, Efile Mukulu ekala na kya kubuusha booso bafwe mu “nyembo” bwabadya kwikala na muwa.—Yowano 5:28.
Bufumu abufwisha akikyeb’eshimba dy’Efile Mukulu pa nsenga
21 Twi kwamba naminyi pabitale mikumbo ikwate bantu booso mpa na lufu kintu kituukye ku mulwisho kyatushii balombeene kusuuka? Uno ndjo “mwishikwanyi [etu] a nfudiilo,” mwishikwanyi umune abashii balombeene kukambila kwi muntu su ngumune mukutwe kupwidika. (1 Kod. 15:26) Kadi lufu mwishikwanyi mulombeene kukambila Yehowa su? Pusha bibakwile Yeeshaya: “Ashimisha lufu bwa looso. Nfumu Efile Mukulu akumuna mpolo ibaadi ku meso a bantu booso.” (Yesh. 25:8) We mulombeene kupwandjikisha bu’be amono aa mafuku su? Takwikala dingi mashama, sunga mpolo ya kinyongwa! Mu kwilekena na byabya—akwikala mpolo ya muloo nsaa ayilombasha Yehowa mulayilo waye wibuwa wa kubuusha bafwe! (Badika Yeeshaya 26:19.) Ku nfudiilo, kinyongwa kibungi kyabadi bafwishe kwi lufu akipu.
w12-F 15/9 12 ¶17
Kufukama munda mwa bipwa kinunu—na bwa looso!
17 T’akwi kishima kikile buwa kyatudi balombene kwakula bwa kulesha butaale, abukekala mu bipwa kinunu apakekala Efile Mukulu na kya ‘kumunana loso pa nundu pa byoso.’ Bino abilesha kinyi? Banda kunangushena bibadi nshalelo mu Edene, Adame na Eeva babadi bapwidikye, na babadi mu butaale bwa Yehowa na mu kifuko ki mu buumune mu nsenga ishima. Yehowa Nfumu a eyilu na nsenga badi amunana kwi bipangwa byaye byoso, miikeyilu na bantu. Abadi na ngobesha ya kwisamba naye pa bupenka, kumulangwila na badi ebelela myabi. Yehowa badi “pa nundu pa byoso.”
Kukimbuula bwa kupeta mabwe a muulo a mu kikudi
w12-F 1/9 9, kashibo
Mpoolo mutumibwa baadi munkadikye bana bakashi bwa kwakula su?
Mpoolo mutumibwa bafundile shi: ‘bakashi baumiine mu kakongye.’ (1 Beena-Kodinda 14:34) Bino abikyebe kupatula kinyi? Mpoolo badi ebamono bu bashi na binangu su? Nya. Misango ibungi badi akula bwa kulongyesha kwa kalolo kwa bana bakashi. (2 Timote 1:5; Tite 2:3-5) Nka mu wawa mukanda umune wa bena Kodinda, Mpoolo tabadi penda mutoshe bana bakashi nya, badi mwakwile na bano boso abadi na kya buntu kya kwakula mu ndjimi na batemuki bwabadya “kumiina” apakula ungi mwina kulangwila. (1 Beena-Kodinda 14:26-30, 33) Abimweneka shi bangi bena Kidishitu bakashi abadi na kisukusuku pabitale myanda ipya bwa lukumiino lwabo, abadi abatshibi sha mwisambo bwa kwela nkonko bu bibadi kipikwa kya bena greke. Bwa kupela kano kafutakanyi, Mpoolo badi ebanyigisha bwabadya “nkayipusha balume babo ku mashibo.”—1 Beena-Kodinda 14:35.
it-1-F 1180-1181
Kukutwa kunyanga
P’abo kwibunga na Yesu muyile bibadi musangukye, bantu abakamunana naye abakasanguka kushi penda bwa kupeta muuwa wa ikalaika bu bipwangwa bya mu kikudi, anka bwa kwikala dingi na mbidi ishayifwiyaa na ishayinyangaa. Byabadi bapwe kwikala na muwa na kufubila Efile Mukulu na lulamato na kufwa na mbidi ya bu muntu ayinyangaa, binobino abapete mbidi ya mu kikudi ishayinyanga muyile abipatuula Mpoolo mu mukanda wa 1 Beena-Kodinda 15:42-54. Kishima kukutwa kufwa akilesha muuwa wabapete wa ikalaika na ushawulwilaa, na kishima kukutwa ku nyanga akilesha pangi mbidi ayibapa Efile Mukulu, ishi bya kulwila sunga kulwishibwa. Abimweka shi Efile Mukulu ebapa mushindo wa kwikala pa bwabo, kushi kukulupila bukome abutukila ku lungi lupese bu bi bingi bipangwa bya ku mbidi sunga bya mu kikudi. Efile Mukulu e na lukulupilo lushinkame lwi pa bwalo mwabadi. Anka kwikala kwa pabwabo na kukutwa kulwishibwa takwibalamuna ku bukunkushi bwa Efile Mukulu nya, Binobino abashala balamate kwi Mukunkushi abo Yesu Kidishitu , na abatungunuka na kukookyela na lulamato ku kikyebe ky’eshimba na ku bukunkushi bwa Nshabo.—1Kod 15:23-28; tala muwa; kukutwa kwa kufwa.
LUBINGO LWA 29/4–5/5/2019
BUPETA BWA MWIYI DY’EFILE MUKULU |2 BEENA-KODINDA 1-3
“Yehowa—‘Efile Mukulu sha kusambana mu byooso’’’
“Dilaayi na abadidi”
4 Na Yehowa namu mmufwishe bantu badi mufule, bu mufubi aaye Abrahame, Isaake, Yaakobo, Moyiise, na Nfumu Daavide. (Mbadiko 12:6-8; Mateo 22:31, 32; Bikitshino 13:22) Bible etuleesha’shi, Yehowa mmukulupile na meeso kwishinda bwa kumona efuku adikasanguka bano bantu basha lukumiino. (Yoobo 14:14, 15) Pabakasanguka, abakekala na muloo na mbidi ipwidikye. Na dingi, Yehowa badi mufwishe Mwan’aye mbedi. Bible akula’shi Yesu badi ‘asangasha’ Efile Mukulu efuku dyoso. (Nkindji 8:22, 30) Ta twi bya kupwandikisha bi bukata bwa kinyongwa kibapushishe Yehowa pabadi amono Mwan’aye afu lufu lwa makyenga nya.—Yowano 5:20; 10:17.
“Dilaayi na abadidi”
14 Bi kwikala bukopo bwatudya kuuka mayi atudi balombene kulungula muntu e na kinyongwa. Anka Bible akula’shi “ludimi lwa basha binangu nyi ndubuko lukata.” (Nkindji 12:18) Bantu bebungi mbapete mayi a kukankamika nao bangi mu broshire a Quand la mort frappe un être aimé. Misusa ibungi, kintu ki na muulo kyodi mulombene kukita nyi “nkudila na abadidi.” (Beena-Looma 12:15) Gaby, ungi mukashi mufwishe mulume, akula’shi ingi nsaa mushindo umune wadi mulombene kutusha bi mwishimba dyaye nkudila. Akula dingi’shi: “Ngi bwakinyi nsaa yabandidisha kwi bakwetu napusha eshimba adinyingi. Yaya nsaa, napusha’shi ntshikwete kudila maalo bupenka nya.”
Kukimbuula bwa kupeta mabwe a muulo a mu kikudi
w16-F 04 32
Nkonko ya bantu ababadikaa
“Kitundwilo” na “kitampi” akipeta mwedibwe mwimu oso kwi Efile Mukulu akilesha kinyi?—2 Kid. 1:21, 22.
▪ Kitundwilo: Muyile ungi mukanda wa kukimbula myanda, kishima kya mu kiina Greke kyabadi balule bu “kitundwilo” mu 2 Beena-Kodinda 1:22 kibadi kishima kya “ba nsushi na kya bansunga” kibadi akilesha “efuto dibedi, efuto dya bapeya muntu su mudimo ubapu sunga kyeeko, kipindji kya makuta abafutaa kumpala bwa kubiikisha kintu akikumina muntu kuula, sunga makuta alesha shi abepushena mwanda kapanda”. Pabitale mwanda wa bedibwe mwimu, efuto dilombane sunga bwedi, bwabadi baleshe mu 2 Beena-Kodinda 5:1-5 abulesha kufwala kwabo kwa mbidi ishayinyanga. Mw’efuto dyabo mwi dingi kyabuntu kya kukutwa kufwa.—1 Kod. 15:48-54.
Muyile Greke a kano kabidi, bakwete kufubisha kishima kifwanene kya kakano ka bulunda kwi mubandingi. Kino kishima kilombane bwa baaba abakafiki bu mukashi a mu kifwanyi a Kidishitu.—2 Kod. 11:2; Kibaf. 21:2, 9.
▪ Kitampi: Mu mafuku a kala, abadi abafubisha kitampi bwa kwela kyala, bwa kushinkamisha mwanda suga kulesha matalwa. Pabitale bedibwe mwimu, ‘mbediibwe kitampi’ sunga kupeta kitundwilo mu kifwanyi p’abo kwedibwa mwimu na kikudi ki selele bu bantu badi mwisangwile’ye nabeene. (Ef. 1:13, 14) T’abapetaa kino kitambi musango umune bwa looso nya, akifiki bwa looso nka kapindji kapeela kumpala kwa mwedibwe mwimu kufwa na lulamato sunga pa kapindji kapeela kumpala kwa mpombo ikata kubanga—Ef. 4:30; Kibaf. 7:2-4.
w10-F 1/8 23
Oukanaga su?
Nkinyi kibadi akikyebe kwakula mutumibwa Mpoolo p’abakwile bwa ‘kukunkushibwa mu kutshimuna’?
▪ Mpoolo bafundjile’shi: “Efile Mukulu etukunkushaa mafuku ooso mu kutshimuna mu Kidishitu, n’alesha kwatudi mapembwe a kiwukilo kiaye mu mbalo yoso. Mwanda atwe twi mapembwe e buwa a Kidishitu bw’Efile Mukulu, kwi baaba bapaashibwe na kwi baaba abashimina; kwi bamo mapembwe a lufu bwa lufu, na kwi bangi mapembwe a muwa bwa muwa.”—2 Kod. 2:14-16.
Mpoolo mutumibwa badi esambila kipikwa kya bena Looma kya kwenda mu mulongo wa kutshimuna bwa kupa mukata a basalayi batshimuna beshikwanyi b’Eumbo ntumbo. Mu kyakya kipikwa, abadi abatuulu bintu byoso byabadi banyengye na bena lukano ba ngoshi na abadi abakunkusha ngombe bwa nkeyilambula, mu yaaya nsaa, abadi abakupila bikashi bwa mukata a basalayi batshimuna na basalayi baaye kwi bantu booso. Ku nfundiilo kwa byabya byoso, abadi abalambula ngombe na abimweneka shi abadi abayipaa bena lukano bebungi.
Muyile ungi mukanda aupatuula myanda ya mu Bible, kwakula mu kinfwanyi kwa “mapembwe e buwa bwa Kidishitu” akulesha muwa bwa bangi na lufu bwa bamo, “akufiki pangi mu kipikwa kya beena Looma kya kushiika musengo wa kabanda bukunkula bw’eshinda p’ababadi abende mu wawa mulongo wa kutshimuna. Mapembwe abadi aalesha ntumbo ya kutshimuna na kutentekyesha bantu bakwashibwe lufu lubadi pangi alwibatengyela.”