Mikanda yatudi bafubishe mu Programe a bisangilo bya Bwina Kidishitu na mudimo wetu
Lubingo lwa 1-7/7/2019
BUPETA BWA MWIYI DY’EFILE MUKULU | BEENA KOLOSE 1-4
“Fuulaayi muntu a kala na kufwala muntu mupya”
w11-F 15/3 10 ¶12-13
Ikala na kikudi ky’Efile Mukulu, kushii kya pa nsenga
12 Bu muntu bwande bukwete kulesha kikudi kinyi? (Badika Beena-Kolose 3:8-10, 13.) Kikudi kya pa nsenga akitakulaa bantu ku mifubo ya ku mbidi. (Nga. 5:19-21) Kutompibwa kukata kwa bumuntu bwetu t’akukamba kufika nsaa ayende myanda yooso kalolo, anka, akufikaa nsaa ishayende myanda kalolo bu nsaa ayitulwishisha mukwetu mwina Kidishitu, kwitufitshisha munda sunga kwitukitshina kilubilo. Kukatusha byabya, twi balombene kuuka bumuntu bwetu nsaa yatudi bupenka ku nshibo. Twi balombeene kwitaluula atwe banabene. Eyipushe shi, ‘Mu myeshi isamombo ibakidi, bu muntu bwande bubanyisha kunyinga mu kikudi su naluka kunyima mu ngakwilo e bubi na bikitshino bibubi?’
13 Kikudi kiselele ki kwitukwasha bwa ‘kufuula bu muntu bukulu’ na kufwala ‘bumuntu bupya’. Byabya abitukwasha bwa kwikala na kalolo na kifulo. Atwikala atwifwidishena lusa sunga twekala na kabingilo ka kufiita munda. T’atukekala dingi na mweneno e bubi a kukutwa kululama na ‘kinyongwa kya kwishimba, bukyelo na nsungu na kukaana mulomo na bipaso byoso bya mushikwa.’ Anka, atukekala ba kwitatshisha bwatudya kwikala na “kalolo ku muntu na muntu.”—Ef. 4:31, 32.
We mupwe kwaluluka su?
18 Bwashi Eyi dy’Efile Mukulu ditwaluule kalolo tabitungu nkapenda shi tubadikye na kulonga Bible nya. Bantu bebungi mbabadikye Bible munda mwa misusa ibungi na kwiubidishena na myanda i mwanka. Pangi we mupwe kufumankana na bantu be byabya mu mudimo wa bulungudi. Bangi abauku mpa na mushindo wa kwakula angi maverse mu binangu. Anka, bino ta mbilombeene kwibakwasha ngofu mu binangu na mu muwa wabo nya. Nkinyi kiibashaale? Bwashi Eyi dy’Efile Mukulu dikwashe muntu na kumwaluula, abitungu shi editweshe ngofu mwishimba dyaaye. Byabya twi na kya kwata nsaa ya kunangwila ku myanda ibatulongo. Twi balombeene kwiyipusha shi: ‘Nashinkamisha binyibinyi shi uno mwanda unalongo ngukile abilongyesha bingi bipwilo su? Neumono bu wa binyibinyi su? Na dingi, namono mbalo ibankumu dino elango mu muwa wande kushii kwidimona penda bu mwanda wa kulongyesha bangi bantu? Napusha binyibinyi shi, Yehowa ndjo kwete kwisamba naami?’ Su tubanangwila ku ino nkonko, atukyebe kwifubwila ngofu pepi na Yehowa. Atukyebe kutamisha kifulo kyetu bwaye. Myanda yatulongo payikumu mashimba etu, ayikyebe kwitutakula mu kushintuula ingi myanda mu muwa wetu bwa kusangasha eshimba dy’Efile Mukulu.—Mye. 4:23; Luk. 6:45.
19 Kubadika kw’Eyi dy’Efile Mukulu na kunangwila ku myanda yatubadika efuku dyooso akukyebe kwitutakula mu kutungunuka na kukita kyakya kyatatudi bapwe kukita: ‘Kwisopola muntu mukulu na bikitshino byaaye, twafwala muntu mupya, end’afikanga ku kyuukilo ky’eyendo.’ (Kol. 3:9, 10) Su tubapusha kalolo malongyesha a mu Bible na kutumikila byatulongo, aakyebe kwitukwasha bwa kufwala ngikashi ipya ya beena Kidishitu ilombeene kwitukalwila ku tuteo twa Satana.
Kukimbuula bwa kupeta mabwe a muulo a mu kikudi
it-2-F 833 ¶4-6
Bufumu bw’Efile Mukulu
“Bufumu bwa Mwan’aye a kifulo.” Kunyima kwa mafuku ekumi n’aye kukamina mwiyilu mwifuku dya Pantekote a kipwa kya 33 B.B., balongi baye abapetele kishinkamisho kya’shi badi “mubikale ku mboko ilume y’Efile Mukulu” pabadi Yesu mwibapongolwele kikudi kiselele. (Bik 1:8, 9; 2:1-4, 29-33) “Kilombeno kipya” kibabangile binobino kufuba mwabadi na abafikile kitako kya ‘kisamba [kipya] kiselele’ kya Isaleele a mu kikudi.—Eb 12:22-24; 1Mp 2:9, 10; Nga 6:16.
Kidishitu badi binobino mushale ku mboko ibalume ya Nshaye na badi Mutwe wa kakongye kaaye. (Ef 5:23; Eb 1:3; Fid 2:9-11) Bifundwe abilesha shi kubanga mu Pantekote a kipwa kya 33 B.B., bufumu bwa mu kikudi bubadi butudibwe kwi balongi baaye. Pabadi mufundjile bena Kidishitu ba mu siekele a kumpala ba mu Kolose, Mpoolo badi muleshe Yesu Kidishitu bu badi mupwe kwikala na bufumu p’aye kwakula shi: “[Efile Mukulu] mmwitukaashe ku matalwa a mufito, aye nkwitutwesha mu bufumu bwa Mwan’aye a kifulo.”—Kol 1:13; pwandjikisha na Bik 17:6, 7.
Bufumu bwa Kidishitu kubanga mu Pantekote a kipwa kya 33 B.B., mbufikye bwa mu kikudi na bukwete kumunana kwi Isaleele a mu kikudi sunga beena Kidishitu batandjikwe ku bukwashi bwa kikudi ky’Efile Mukulu bwa kufika bana ba mu kikudi b’Efile Mukulu. (Yo 3:3, 5, 6) Nsaa ayipete baba bena Kidishitu batandjikwe efuto dyabo dya mwiyilu, ta bakekala dingi bena bufumu bwa pa nsenga, mba bufumu bwa mu kikudi bwa Kidishitu, anka abakamunana na Kidishitu mwiyilu.—Kibaf 5:9, 10.
w08-F 15/8 28 ¶9
Myanda ikata ya mu mukanda wa Beena-Ngalatea, Beena-Efeso, Beena-Fidipe na Beena-Kolose
2:8—Bintu bishii kapu, na bya-bisumanga bya uno ndumbulwilo’ bibadi abidimusha Mpoolo nkinyi? Nyi mbitu bya ndumbulwilo a Satana sunga miiya ayimukunkusha, ayimuludika sunga kumufubisha. (1Yo 2:16) Mu byabya bintu mwi mpa na binangu bya bantu, lwabi lwa bintu bya ku mbidi na bipwilo bya madimi bya uno ndumbulwilo.
LUBINGO LWA 8-14/7/2019
BUPETA BWA MWIYI DY’EFILE MUKULU | 1 BEENA-TESALONIKA 1-5
“Ekankamisheneeyi ku muntu na muntu, nwikwashene”
w11-F 15/6 26 ¶12
‘Ikala na kaneemo kwi bano bakwete kufuba ngofu munkatshi mwenu’
12 “Kuludika” kakongye ta nkutale penda kulongyesha nya. Mbafubishe kishima ki mumune mu mukanda wa 1 Timote 3:4. Mpoolo bakwile shi abitungu mukulu “aukye kalolo bya kuludika ba mu nshibo yaaye aye nabeene na kulama bana baaye mu kukookyela na mu kwidingeena.” Kishima “kuludika” pano t’akilesha penda kulongyesha bana nya, akilesha dingi kwikala mutwe wa kifuko na “kulama bana mu kukookyela.” Eyendo, bakulu abaludika kakongye bakwete kukwasha booso bwa kukookyela Yehowa.—1 Tim. 3:5.
w11-F 15/6 28 ¶19
‘Ikala na kaneemo kwi bano bakwete kufuba ngofu munkatshi mwenu’
19 We kukita kinyi su opeta kya buntu kyabadi bakite penda boobe? Wekala na kya kulesha lutumbu pa kwikifubisha su? Yehowa mukupe “bantu bekale bya buntu” ku bukwashi bwa Kidishitu. Mushindo umune odya kulesha lutumbu bwa bino bya buntu nyi nkupusha kalolo miisambo yabakitshi kwi bakulu na kwitatshisha bwa kutumikila myanda yabakula. We mulombene dingi kulesha lutumbu loobe pa kutusha myalulo ibuwa mu bisangilo. Kwatshishena mudimo wabakwete kukunkusha kwi bakulu bu kisangilo kya bulungudi. Su we mupete bukwashi ku elango dikupe mukulu kampanda, bwakinyi kupela kumulungula? Kukatusha byabya, bwakinyi kupela kulesha lutumbu loobe kwi bifuko bya bakulu? Tentekyesha shi, kwi mukulu afubu ngofu mu kakongye, kifuko kyaye akikutwaa nsaa ya kushala naye pamune.
‘Twikaleyi na kifulo . . . mu bikitshino na mu binyibinyi’
13 Kwasha babofule. Mwiya wa mu Bible awamba shi: “Nyingishaayi babofule, ikalayi na lwishinko kwi booso” bino abilesha su twi na kifulo kya binyibinyi. (1Tes 5:14) Bakwetu bebungi abadi babofule, kunyima mbanyingye mu lukumino. Anka bangi be nka na lukalo lwa kwibalesha lwishinko na kwibakwasha na kifulo kyoso. Twi kwibakwasha naminyi? Twi kufuba na Bible bwa kwibanyingisha, twi kwibata bwa kwenda nabo mu bulungudi, sunga kwibatemesha. Dingi tatwi balombene kupwandikisha shi bakwetu balume na bakashi “mbanyingye” sunga shi “mbabofule.” Anka, abitungu tushingule shi oso a kwatudi e na padi munyingiile na padi mubofwile. Mpa na Mpoolo mutumbwa badi mukumine shi e na kwaye kubofula. (2Kod 12:9, 10) Boso bwetu twi na lukalo lwashi betunyingishe kwi bangi.
Twambuleyi kwiyisha na kalolo ka Yesu
16 Mayi etu a kalolo. Lusa na kalolo keetu bwa bangi abitutakula bwa ‘kukankamika babofule ku mashimba.’ (1Tes. 5:14) Mmayi kinyi atudi balombeene kwakula bwa kwibakankamika? Twi balombeene kwibakankamika pa’twe kwibalungula mushindo watwitatshisha pa mwanda wabo na kwituula pa mbalo yabo. Twi balombeene kwibatumbula n’eshimba dimune bwashi bamone ngikashi yaabo ibuwa na ngobesha yabo. Na dingi Twi kwibatentekyesha shi Yehowa mmwibate na muulo p’aye kwibakaka kwi Mwan’aye. (Yo. 6:44) Twibashinkamiishe shi Yehowa etatshishaa ngofu bwa bafubi baaye “be na mashimba enyongole” sunga “be mu mpombo.” (Mis. 34:19) Bishima byetu bya kalolo mbilombeene kwikala na bukwashi bukata kwi bantu be na lukalo na kunyingishibwa.—Mye. 16:24.
Kukimbuula bwa kupeta mabwe a muulo a mu kikudi
it-1-F 920-921
Lusandji
Kutambuka lusandji nyi mulwisho wabadi balombene kubinga muntu mu kakongye ka bena Kidishitu. (1Kod 5:9-13; Eb 12:15, 16) Mpoolo mutumbibwa badi mupatuule shi mwina Kidishitu atambuka lusandji akitshina mbidi yaye’ye nabeene mulwisho, mwanda afubisha bipindji bya mbidi bya kutandjisha mu kipaso kibubi. Elwishisha bikata mu kikudi na kwikakasha kakongye k’Efile Mukulu butete na kwituula mu masaku a maladi e bubi a lwambu aafiki mu kutambuka lusandji. (1Kod 6:18, 19) Kukatusha byabya, alwisha bulungantu bwa bakwabo bena Kidishitu (1Tes 4:3-7) pa; (1) kutwesha butete na butesha abulwisha nkumo ibuwa mu kakongye (Eb 12:15, 16), (2) kukutshishwa muntu aadi mutambukye naye bwiselele bwa mu binangu na su mmuntu shabandjile kwibakila sunga kwibakilwa amukutshisha kwikala kamame kumpala kwa kutwela mu bulunda. (3) kukutshishwa kifuko kyaye nkumo ya mwikelo wi buwa na (4) kulwishisha bamutande, mulume sunga mukashi a yawa adi mutambukye naye masandi. Akupu abepuula mwiya kushii wa muntu autadiila ingi nsaa mwikeelo wa kutambuka lusandji, kadi wa Yehowa akafwisha dinyoka bwa mulwisho waye.—1Tes 4:8.
“Kipandjilo kyenu tákidi pêpi”!
14 Nkinyi akikakitshika kunyima kwa Goge a ku Magoge kubanga kulwisha bafubi b’Efile Mukulu? Bible akula shi Mwana a muntu, “akatumu miikeyilu ku mpese inanka ya nsenga, nyaa na kufudiile nsenga n’eyilu, bwa kubunga basangulwe baaye.” (Mak 13:27; Mat 24:31) Uno mudimo wa kubunga t’auleesha nsaa ibaabadi basangule beena Kidishitu bashingwe mwimu nya. T’auleesha kwediibwa kwa kitampi kya nfudiilo bwa bashingwe mwimu bakii pa nsenga nya. (Mat 13:37, 38) Kwakwa kwediibwa kwa kitampi akukakitshika kumpala kwashi mpombo ikata ibangye. (Bif 7:1-4) Kadi mudimo wa kubunga auleesha kinyi? Nyi nsaa ayikapete bashingwe mwimu bakii pa nsenga efuto dyabo bwa kwenda mwiyilu. (1Tes 4:15-17; Bif 14:1) Uno mwanda aukakitshika pamune kunyima kwa bulwishi bwa Goge a ku Magoge kubanga. (Ez 38:11) Akupu, nka bu bibambile Yesu, “balulame abakapenyapenya bu nguba mu Bufumu bwa Nshabo.”—Mateo 13:43, Kilombeno kipya 2014.
15 Bantu bebungi ba mu bipwilo bya madimi abakumiina shi beena Kidishitu abakende mwiyilu na mbidi ya bumuntu. Abanangusheenaa dingi’shi abakamono Yesu p’aluka mu kumunana nsenga. Kadi Bible aleesha patooka’shi Yesu t’akamweneka na meeso p’akalukiila, nsaa ayamba Bible shi: “Kitundwilo kia Mwana a muntu akikamweka mwiyilu.” Na Yesu, akafiki “pa makumbi.” (Mateo 24:30) Bible akula dingi shi “mbidi i na mwita na mase bu yatudi nayo tangilombeene nkekala mu Bufumu bw’Efile Mukulu .” Kadi bwa baaba abende mwiyilu ‘abakalûlwa mu kapindji n’aka anka bu kukopola kw’eyiso, paapa apakelwa mpungi a nfudîlo.’ (Badika 1 Beena-Kodinto 15:50-53.) Bashingwe mwimu bakii pa nsenga abakebabungu pamune musango umune.
LUBINGO LWA 15-21/7/2019
BUPETA BWA MWIYI DY’EFILE MUKULU | 1 BEENA-TESALONIKA 1-3
“Kwileesha kwa muntu mubi”
it-1-F 220-221
Kwipaana mwi Efile Mukulu
Kwi ungi mwanda pano wa kukaanya wilekeene bikata na “bifwame [biselele]” bya Yehowa. Nyi ‘mwanda ufwame wa [muntu] mubi.’ Uno ubadi mwanda ufwame kwi bena Kidishitu ba binyibinyi, mwanda mu mafuku a Mpoolo mutumibwa, ‘muntu mubi’ tabadi mubande kwikala na bishinkamisho abimulesha bu kisaka na kumulesha patooka. Sunga byekala shi uno “muntu” bafikile kumweneka kunyima, kuukibwa kwaye kubashadile nka kufwame kwi bantu bebungi mwanda badi akitshi myanda i bubi na kulesha mpala ya muntu mulamate kwi Efile Mukulu mu bwabwa bubi bwaye. Bibaadi kusumbula kwa lukumiino pa kupwandjikisha na lulamato lwa binyibinyi kwi Efile Mukulu. Mpoolo bambile shi: ‘mwanda ufwame wa [muntu] mubi’ ubadi upwe kwikala kwanka mu mafuku aaye mwanda kubadi bukitshishi bwa muntu mubi mu kakongye ka beena Kidishitu bubadi na kya kufisha mu kutusha tusaka twa bantu basumbule lukumiino. Ku nfudiilo a byoso, Yesu badi na kya kukatusha uno muntu mubi pa kwilesha kwa kwikala kwaye. Uno “muntu” musumbule lukumiino afubishwa na Satana badi na kya kwimana bwa ‘kutombokyela kyoso kyabetamina bu ‘efile’ kyabalangwilaa’ (Gr., seʹba·sma). Byabya, uno mwishikwanyi mukata a Efile Mukulu, bu byadi kiina mudimo kya Satana, badi na kya kudimba bantu ngofu na kufwishisha kabutu kwi baba abalondo bikitshino byaye. Kwikala kwanka kwa ‘muntu mubi’ kubadi kushale kuputshiibwe ku lulamato lwaye lwa bu nsensa kwi Efile Mukulu.—2Tes 2:3-12; pwandjikisha na Mat 7:15, 21-23.
it-2-F 255 ¶7
Madimi
Yehowa Efile Mukulu akatadiila “bukome bwa kulubishwa” kwi baaba abakumiina kulubishibwa bwa shi “bakumiine madimi” pamutwe pa kukumiina mukandu wibuwa pabitale Yesu. (2Tes 2:9-12) Uno mwanda auleshibwa kwi bibadi bifikile Nfumu Akabe a mu Isaleele mu siekele a kumpala. Mutemuki a madimi badi mushinkamishe Akabe bwa nkatshokola ngoshi ku Ramote a mu Galaade aku namu mutemuki a Yehowa Mikaya badi mutemukye kututshibwa. Nka bu bibalesheshe Mikaya mu kimonwa, Yehowa badi mutadiile kipangwa kya mu kikudi bwakidya kufika “kikudi kya madimi” mukanwa mwa mutemuki a Akabe. Mu ungi ngakwilo, kyakya kipangwa kya mu kikudi kibafubishe bukome bwakyo kwabadi bwashi bakutwe kwakula bya binyibinyi anka bakule myanda ayibasangasha kupusha na ibadi ayikumiina Akabe kupusha kwabadi. Sunga byekala shi abadi bamudimushe, Akabe badi mukumine kudimbibwa ku madimi aabo na abyo kumushimishisha muwa waye.—1Baf 22:1-38; 2Mya 18.
Kukimbuula bwa kupeta mabwe a muulo a mu kikudi
it-1-F 890 ¶6
Kaalo
Mpyeele bafundjile shi “mayilu na nsenga mbilamiibwe kwiyi dyaye bwa kaalo.” Muyile byabipushika na abilesha bingi bifundwe, kwi bishinkamisho abilesha shi nta nkaalo ka binyibinyi nya, anka akalesha kubutudibwa kwa looso. Mpeshi a mu mafuku a Nowa, tabadi mubutule mayilu na nsenga inabene nya, badi mubutule penda bantu babi. Mu kipaso kimune, kwilesha kwa Yesu Kidishitu na ba miikeyilu baye be bukome mu kaalo akatembe akukafwisha kabutu ka ikalaika kwi bantu babi na kwi ndumbulwilo e bubi a Satana mwabadi.—2Mp 3:5-7, 10-13; 2Tes 1:6-10; pwandjikisha na Yesh 66:15, 16, 22, 24.
it-1-F 1188 ¶1
Kuyokyelwa na kikudi
‘Mayi ayokyelwe’—a binyibinyi na a madimi. Kishima kya mu kiina Greke pneuʹma (kikudi) ki na mpushisho nkapanda mu bingi bifundwe bya batumibwa. Bu kileshesho mu mukanda wa 2 Tesalonika 2:2, Mpoolo mutumibwa anyingisha bakwabo bena Tesalonika bwa kupela kulubishibwa sunga kudimbibwa na “kutemuka kampanda [kwamba shi: kwa “kikudi”] kwa bishima sunga mukanda byabalesha bu abifiki kwatudi, bwa kwinuwukisha shi efuku dya Yehowa dibalombana.” Abipushika kalolo shi Mpoolo badi mufubishe kishima pneuʹma (kikudi) mu kwipushena na kwilungushena myanda ku bukwashi bwa “bishima” sunga “mukanda”. Nyi bwakinyi atubadika pa mwanda wa uno verse mu komantere ya ungi Bible (Theologisch-homiletisches Bibelwerk, Die beiden Briefe Pauli an die Thessalonicher, par J. P. Lange, 1864, p. 110) shi: Mpoolo mutumibwa badi alesha pano mwanda wabadi bakule kwi kikudi, kwi muntu eamba bu e kwakula myanda i kufika kumpala sunga mayi a mutemuki. Atubadika mu Mikanda ibidi ya kala ya saint Paul kwi beena Tesalonika yabadi balule kwi C. Masson, (Neuchâtel, 1957, p. 93, 94), shi: “Ku bukwashi bwa kikudi, abimweneka shi akulesha eyi diyokyelwe sunga kifumbulwe [. . .], bu bibadi abyakula batemuki mu tukongye twa bipwilo bya kumpala.” Byabya, sunga byekala shi bangi baludi abemeene penda pa kishima pneuʹma bu “kikudi” mu uno verse na mu angi efwaneene, atupete mu angi ma Bible ngakwilo bu “bifumbulwe kwi kikudi kya kwishina” (PV), “kufumbula kwa butemuki” (TOB), “kuyokyelwa” (Od ; Sg), sunga “mayi ayokyelwe”.— MN.
LUBINGO LWA 22-28/7/2019
BUPETA BWA MWIYI DY’EFILE MUKULU | 1 TIMOTE 1-3
“Epaane bwa kukimba kulombasha mufubo wibuwa”
Omono’shi we na lukalo lwa kwenda kumpala mu kikudi su?
3 Badika 1 Timote 3:1. Mpoolo mutumiibwa baadi mukaanyishe bakwetu balume babaadi “abakimbi kwikala” bakulu mu kakongye. Su muntu e na lukalo lwa kupeta kintu ki kula, abitungu’shi akite bukopo na koolola mboko bwa’shi ekipete. Binobino banda kunangusheena bilombeene kukita mukwetu mulume akimbi bya kulombasha myanda itekibwe bwa kwikala mufubi a midimo. Ashinguula’shi e na lukalo lwa kwikitshisha bwa kulumbuula ngikashi ya bwina Kidishitu. Kunyima, pakabanga kufuba bu mufubi a midimo, atungunuka na kwikitshisha ngofu bwa’shi alombashe myanda itekibwe bwa kufika mukulu.
km-F 12/78 4 ¶7
Baba “abakatuulwa ku mulongo wa kineemo”
7 Mbipelepele bwa kupusha bwakinyi Mpoolo akula bwa baaba bantu shi “abakatuulwa ku mulongo wa kineemo”. Ta mu kipaso akibimono bangi shi mu kukamina kwa myaso ya mu kipwilo nya. Bafubi ba midimo “abakitshi kalolo mufubo” abashinkamisha shi abediibwa myabi kwi Yehowa na Yesu. Abapete kineemo na bukwashi bwa kakongye. Mwanda abekala na “kishima kikata mu lukumiino mwi Kidishitu Yesu”. Abalombasha kalolo mufubo wabo na abanemekiibwa bwa byabakwete kwiukita kalolo; lukumiino lwabo alunyingi na abelulesha kwi bangi na katshintshi kushii moo.
Kukimbuula bwa kupeta mabwe a muulo a mu kikudi
it-1-F 980
Milongo ya butandwa
Kwipaana mu kulonga na mu ino miisambo takubadi na muulo nya, abadi abepaana mu yanka bikile mu mafuku abadi Mpoolo mufundjile Timote. Tabibadi dingi na muulo kukimba mulongo wa butandwa bwa kushinkamisha mulongo wa bufumu, mwanda Efile Mukulu t’abadi akumiina dingi kwiabulushena pankatshi pa beena Yuuda na bantu ba bingi bisamba mu kakongye ka beena Kidishitu nya. (Nga 3:28) Na milongo ya butandwa ibapwile kushinkamisha bufumu bwa Kidishitu mu kifuko kya Daavide. Kukatusha byabya, Yelusaleeme badi na kya kubutulwa mafuku apeela kunyima na mikanda yoso ya kisamba kya bena Yuuda pabadi Mpoolo mufundjile Timote. Nyi bwakinyi Mpoolo badi akumina shi Timote na beena kakongye balekye myanda i na muulo pa kukisha nsaa mu kukimbuula na kwikutwena pabitale milongo ya butandwa ishibadya kutwala kantu su nkapeela ku lukumino lwa bena Kidishitu. Mulongo wa butandwa wabadi bakule kwi Bible ubadi ulombane bwa kushinkamisha shi Yesu nnaye Mesiya, mwanda ubadi na muulo kwi beena Kidishitu. Ingi milongo ya butandwa i mu bifundwe ayishinkamisha byabadi bafunde mu Bible na kutusha bishinkamisho abilesha shi mmwanda wa binyibinyi ubadi ukitshikye kala.
‘Uno ngi Efile Mukulu etu’
15 Ungi mwasu wa Yehowa mbu “Nfumu a ikalaika.” (1Tim 1:17, EEM) Bino abilesha kinyi? Bi bukopo bwashi atwe bantu be na binangu bipeela tupushe uno mwanda kalolo, anka Yehowa nga ikalaika mwanda baadi kwanka kubanga kala na ekala kwanka bwa looso. Mukanda wa Misambo 90:2 awamba shi: “Obe tobòòdi Efile Mukulu a-looso naa bwa-looso.” Byabya, Yehowa te na mbangilo, e kwanka bwa looso. Abamwitamina bu “Mukulu a mafuku” mwanda baadi kwanka kubanga kala kumpala kwashi muntu su ngumune ekale na muwa mwiyilu na paashi! (Dan 7:9, 13, 22, EEM) Nanyi mulombeene kwela mpaka pabitale matalwa aaye a kwikala bu Nfumu sha kwiyilu kula?
LUBINGO LWA 29/7/2019–4/8/2019
BUPETA BWA MWIYI DY’EFILE MUKULU | 1 TIMOTE 4-6
“Kwipaana mwi Efile Mukulu na mapeta”
w03-F 1/6 9 ¶1-2
Uuka byodya kusanka na byodi nabyo
Mwanda ukata ubadi aukwasha Mpoolo bwashi ekale na muloo ubadi wa kusangala na byadi nabyo. Kadi nkinyi akilesha kusangala na byatudi nabyo? Mu ngakwilo mupelepele, akulesha kusangala kwikala na bintu bi na muulo. Tala bibadi Mpoolo mulungule Timote badi amushindikila mu mudimo shi: “Bwin’Efile nyi nsulo a myabi bwa yaawa asepeele na penda kintu kyaadi nakyo. Mwanda tatwi batwale kintu su nkimune pano pa nsenga, byabya dimo tatwi balombeene kwipatuuka na kintu su nkimune. Byabya su twi na bidiibwa na bilamba, biikale biitulombeene.”—1 Timote 6:6-8.
Lamiina shi Mpoolo asanga kusangala na penda byatudi nabyo na bwin’Efile. Badi auku shi muloo wa binyibinyi aufiki mu kwipaana kwi Efile Mukulu, kwamba shi, kutuula mudimo wetu w’Efile Mukulu pa mbalo ya kumpala kushii ku bintu bya ku mbidi sunga ku mapeta. “Bidiibwa na bilamba” bibadi abimukwasha penda bwadya kutuula lulamato kwi Efile Mukulu pa mbalo ya kumpala. Muyile Mpoolo, bwa kasangala na byatudi nabyo, abitungu kwituula mu maasa mwa Yehowa sunga mu mwanda wi bukopo bwi naminyi.
g-F 6/07 6 ¶2
Masaku a kwipana mu kukimba bupeta—Byaadi alombene nkufikila
Eyendo shi, bantu booso abepanaa mu kukimba mapeta t’abafwiyaa nya. Anka, mu kwipana kwabo, be kutuula muwa mu masaku bwa kukimba mapeta. Kukatusha byabya, mbalombene kukyenga mu nshalelo aabo na twinyongoshi twa kufuba, mutwe kutanya ushaupu sunga maladi a kifu e kutuula muwa waye mu masaku. Na sunga muntu eela kinangu kya kushintuula nshalelo aaye, e kwikala mupwe kushala na aa ma maladi. Mwina dibaka naaye e kukutwa dingi kumukulupila, bana baaye be kwikala abekalakasha mu binangu, na mbidi yaaye ngilombene kulwila. Pangi mulombeene kulumbuula ingi myanda, kadi abikamutungu kwitatshisha bikata. Yawa muntu e byabya mulombene “kwitapa kwishimba na nkalakashi ibungi.”—1 Tim 6:10.
g-F 11/08 6 ¶4-6
Myanda isambombo bwa koobesha nshalelo
Nka bu byatwibimonanga ku mbangilo kwa ino miisambo, bantu bakwete kwipaana mu kukimba mapeta bwa koobesha nshalelo, bakwete kwipaana penda mu myanda i bu bilootwa. Kukatusha kukutwa kulombana kwa myanda yabatengyela, abetwadila twinyongoshi twibungi. Bu kileshesho, pabakwete kwipaana mu kukimba kwa ma peta, bantu bebungi bakwete kushimisha kipwano kyabo na bifuko na bakuuku. Bangi pa mwanda wa kukimba midimo sunga wa twinyongoshi tukile na kwidila, bakwete kukutwa tulo. Mukanda wa Mulungudi 5:11, EEM awamba shi: “Mufubi kwete kudya bipêla sunga bibungi, alâlâ tulo twibuwa. Anka, bupeta bukata t’abulâdishishâ sha n’abó tulo, ooo.”
Makuta t’aapaa penda bantu etomboo nya, kadi aadimbishenaa. Yesu badi mwibitamine bu “kudimbibwa kwa mapeta.” (Mak 4:19, Kilombeno kipya 2014) Mu ungi ngakwilo, bupeta abudimbaa bantu’shi abekala na muloo, aku namu mmadimi. Akupeshenaa penda lwabi lwa kupeta bikile bungi. Mukanda wa Mulungudi 5:9, awamba shi: “Mufule nfwalanga, t’ayikutaa nfwalanga.”
Mu kikoso, kifulo kya nfwalanga t’akipushenaa na abikimbi muntu kupeta nya, akitwalaa mu kukutwa kwa muloo, mu kufiita munda pangi mpa na mu kwipayishena. (Nki 28:20) Aku namu bwa kwikala na muloo na kwiyikeela, abitungu kwikala na kalolo, kufwidishena lusa, bwiselele bwa mu binangu na kwikala mwin’Efile.
Kukimbuula bwa kupeta mabwe a muulo a mu kikudi
Ikala na kondo k’eshimba ke buwa n’Efile Mukulu
17 Mpyeele mutumibwa bafundjile shi: ‘Ikalayi n’eshimba di buwa.’ (1Mp 3:16) Bi malwa, mwanda nsaa i bantu abalenguula miiya ya Yehowa, kondo kabo k’eshimba t’akebatopeka dingi nya. Mpoolo bambile shi, kaaka kondo k’eshimba ‘nkedibwe kitampi na kyaamo.’ (1Tim 4:2, Kilombeeno kipya 2014) Kasha tobopile kaalo? Pobopiile kaalo, kikoba kyobe kibaadi kishaale na mukofu, mu mushindo oshokupusha kintu. Su muntu atungunuka na kukita bubi, kondo kaye k’eshimba ‘akapapa’ kunyima, akalekye kufuba.
it-2-F 122 ¶1-2
Kubadika kumpala kwa mwilo
Mu kakongye ka bena Kidishitu. Mu siekele a kumpala, kubadi penda mifungofungo ipeela ya Bible, nyi bwakinyi bibadi abitungu kubadika kumpala kwa mwilo. Mpoolo mutumiibwa badi mutekye bwabadya kubadika kumpala kwa mwilo mikanda yaye mu bisangilo bya beena Kidishitu na kwibateka bwabadya kwishintushena mikanda yaye mu tungi tukongye bwashi beyibadikye. (Kol 4:16; 1Tes 5:27) Mpoolo badi mulangye Timote nsongwalume mwina Kidishitu bwadya kwipaana mu “kubala kwa bifundwe, mu kulanga bantu na mu kwibalambukisha.”—1Tim 4:13.
Bibadi abitungu kubadika kumpala kwa mwilo kalolo. (Aba 2:2) Bu bibadi shi kubadika kumpala kwa mwilo kubadi bwa kulongyesha bangi, bibadi abitungu shi yawa abadika ashinguule kalolo na kupusha byabadi bafunde na kyabadi bebifundjile, na kwitatshisha bwa kupela kutusha mpushisho a madimi sunga shi mulombane. Muyile mukanda wa Kibafumbwilwe 1:3, baba ababadika bwabwa butemuki n’eyi dibukopo, na baaba abapusha na kutumikila byabapusha abekala na muloo.