Kwi ba mwikeyilu be bubi su?

Oolo, kwi ba mwikeyilu be bubi. Mbafikye kunyi? Abitungu tuukye’shi Efile Mukulu bapangile ba mwikeyilu na bulungantu bwa kwisangwila. Mafuku apela kunyima kwa kupanga mulume na mukashi ba kumpala, Adame na Eeva, kingi kipangwa kya mu kikudi kibafubile bibubi na bulungantu bwa kwisangwila, ngi akyo nkutwesha bu ntomboshi pa nsenga. Kibadi kitakule mpa na Adame na Eeva mu kutombokyela Efile Mukulu. (Kibangilo 3:1-7; Kibafumbwilwe 12:9) Bible ta mutemune eshina dya uno mwikeyilu nya, sunga’shi badi mu mulongo kinyi wa ba mwikeyilu pabaadi mwiyilu kumpala kwa kutomboka nya. Anka kunyima kwaye kutomboka, Bible bamwitanyine’shi Satana, apushisha’shi: “Mwishikwanyi,” na bu Diabulu, apushisha’shi: “Nsha-madimi.”​—Mateo 4:8-11.

Mwanda wa malwa, kwakwa kutombokyela kw’Efile Mukulu, tankwimene nka paapa nya. Mu mafuku a Nowa ba mwikeyilu bebungi bwatusha tuuku “abalekyele kishikamino kyabo” mwiyilu mu kifuko ky’Efile Mukulu. Abo nkufika pano pa nsenga na nkufwala mbidi ya bu bantu na kubanga kutambuka masandji, na kukita myanda ikutwene na kibabadi bebapangile.​—Yunda 6; Kibangilo 6:1-4; 1 Mpyeele 3:19, 20.

Nkinyi kibadi kifikile ba mwikeyilu be bubi? Nsaa ibabanokyeshe mpeshi a kabutu bwa kubutula bantu babi, ba mwikeyilu babafuudile mbidi ya bu bantu bwa kwaluka mu mbidi ya mukikudi. Sunga mbyabya, Efile Mukulu ta mupe dingi bano ba mwikeyilu batombokye matalwa a kwaluka pa ‘mbalo yabo’ ya ku kibangilo nya. Anka, bebatudile mu “mbalo [ya mu kikudi] i mufito” yabetanyina bu Tartare. (Yunda 6; 2 Mpyeele 2:4) Bano ba demo babadi bakile ku lupese lwa Satana Diabulu abo banabene. Satana ngi “nfumu a bikudi bibi” winyi “elengulaa bu mwikeyilu w’etaata.”​—Mateo 12:24; 2 Beena-Kodinda 11:14.

Bible etulongyesha’shi Mesiya Nfumu a Bufumu bw’Efile Mukulu mbulamatadi a mwiyilu, badi mutudibwe mu kipwa kya 1914.a Kunyima kwa uno mwanda wi na kinemo kikata, Satana na ba demo baye babadi bebakatushe mwiyilu abo kwibasumbula ku bukunkula bwa nsenga. Bu ntomboshi na kutambuka kwa masandi biwule mu nsenga abilesha bukitshishi bwi na yawa ntomboshi.​—Kibafumbwilwe 12:9-12.

Kunundu kwa byabya, kufima kwa myanda i bubi na bu ntomboshi abilesha’shi nfudilo a kumunana kwabo befwibwila peepi. Mu kapindi kapela, bino bipangwa bya mu kikudi abakebyele mu lukano. Kunyima kwa Bufumu bw’Efile Mukulu kumunana munda mwa bipwa 1 000 pano pa nsenga mu Mpaladiso, abakafungula bino bikudi bibi bwabidya kutompa mbantu bwa kapindi kapeela. Kubapu bebibutule bwa looso.​—Mateo 25:41; Kibafumbwilwe 20:1-3, 7-10.