Paayi Yehowa ntumbo

1. Bantu be bungi bakuete kukita kinyi lelo uno?

BANTU be bungi lelo uno bakuete kuipasukila nkabo banabene. Bu kileshesho, bangi bantu bakuete kufubisha ma site a kuisamba na bantu bua kuitumbisha bua mianda yabadi bakite. Anka penda bantu bapeela nyi bakuete kutumbisha Yehowa Efile Mukulu. Mu uno muisambo, atulongo akipushisha kutumbisha Yehowa na buakinyi atuibikitshi. Atulongo dingi kiatudia kukita bua kupa Efile Mukulu ntumbo imulombene, na mushindo w’akatumbisha dingi eshina diaye mu mafuku aafiki.

KUTUMBISHA YEHOWA AKUPUSHISHA KINYI?

2. Mushindo kinyi ubaadi Yehowa muleshe ntumbo yaye ku Muengie wa Sinayi? (Tala dingi kia ku kipusu.)

² Ntumbo nkinyi? Mu Bible kishima “ntumbo” mbalombene kuikifubisha bua kuakuila kintu kioso kiakia akikanyisha muntu. Yehowa baadi muleshe ntumbo yaye mafuku apeela kunyima kua muilo wa Isalele kutuuka mu bupika mu Ejipitu. Banda kunangushena: Midiyo ya bena Isalele ngibuungie kuushi kua Muengie wa Sinayi, bua kuteemesha akibalungula Efile Mukulu. Ekumbi dikata difiita dibabuikile muengie. Musango umune, nsenga ibabanga kutshinkatshika, tupandapanda tubabanga, mipenyo, mpa n’eyi di bukopo dia mpungi. (Efi. 19:16-18; 24:17; Mis. 68:8) Nangushena bibaadi bena Isalele bakaanye nsaa ibaadi Yehowa muleshe bukome bua ntumbo yaye.

3. Mushindo kinyi watudi balombene kutumbisha Yehowa?

³ Tui kuamba kinyi pabitale bantu? Tui balombene kutumbisha Yehowa su? Oolo. Tui kutumbisha Yehowa pa kulungula bangi pabitale bukome buaye na nyikashi yaye i buwa. Atumutumbisha dingi, nsaa yatumualuisha ntumbo bua bintu biatukuete kukita ku bukuashi bua bukome buaye. (Yesh. 26:12) Nfumu Davide nyi nkileshesho ki buwa kia muntu baadi atumbisha Yehowa. Mu luteko lubaadi mukite kumpala kua muilo wa Isalele, Davide bakuile’shi: “Obe Yehowa, we mukata, sha-bukome, nkumo, kineemo, na ntumbo, mwanda byoso bii muiyilu na pa nsenga mbyoobe.” Kunyima kua Davide kupudisha luteko, “kakongie kashima kabatumbiishe Yehowa.”​—1 Mya. 29:11, 20.

4. Mushindo kinyi ubaadi Yesu mutumbishe Yehowa?

⁴ Pabaadi Yesu pa nsenga, baadi mutumbishe Nshaye pa kulungula bangi’shi, aye nyi baadi amupa bukome bua kukita bilengieleshi. (Mak. 5:18-20) Yesu baadi dingi mutumbishe Nshaye Yehowa, mu mushindo ubaadi akula pabimutale na mu mushindo ubaadi akitshina bangi mianda. Ungi musango, Yesu baadi alongiesha mu kitumbuilo. Mu bantu abaadi abamuteemesha, mu baadi ungi muana mukashi baadi mukuatshikie na demo munda mua bipua 18. Uno demo baadi mumubofushe mbidi ngofu mu mushindo ushibaadi uno muana mukashi na bukome bua kuibuaa. Bi malua! Bu bibaadi Yesu mumupushe lusa, baadi muifubuile pepi naye na aye nkumulungula na kalolo koso’shi: “Muana mukashi, bopaashibua ku mukumbo oobe.” Akupu baadi mumutentekie maasa, na musango umune, yawa muana mukashi nkuibua na “nkubanga kutumbisha Efile Mukulu.” Baadi na lutumbu bu bibaadi mupetuule bukome! (Luk. 13:10-13) Uno muana mukashi baadi na kabingilo ke buwa ka kutumbisha Yehowa, mpa n’atue namu.

BUAKINYI ATUTUMBISHAA YEHOWA?

5. Tubingilo kinyi atuitutakula bua kunemeka Yehowa?

⁵ Atutumbishaa Yehowa muanda atumunemekaa ngofu. Tui na tubingilo tui bungi tua kumunemeka. Yehowa Sha-bukome boso; na bukome buaye ta bui na mpuilo. (Mis. 96:4-7) Binangu biaye bia kukaanya abimueka patooka mu bintu biadi mupangie. Naye nsulo ya muwa na naye etupeyaa bintu bioso biatudi nabio lukalo bua’shi tuikale na muwa. (Kbf. 4:11) E na lulamato. (Kbf. 15:4) Kioso ki’akitshi oobesha, na alombashaa milayilo yaye. (Yos. 23:14) Nyi buakinyi mutemuki Yelemiya bakuile pabitale Yehowa’shi: “Munkatshi mwa ba sha-kinangu ba bisamba na mu mafumu oso, ta kwi muntu bu’be”! (Yel. 10:6, 7) Kushi mpaka, tui na tubingilo tui buwa tua kunemeka Nshetu e muiyilu. Anka t’atuimeena penda pa kunemeka Yehowa nya, mulombene dingi kifulo kietu.

6. Buakinyi tuibafule Yehowa?

⁶ Atutumbishaa Yehowa muanda tuibamufule ngofu. Tala nyikashi ilekene ya Yehowa ayitutakulaa mu kumufula. E na lusa. (Mis. 103:13; Yesh. 49:15) Etuulaa pa mbalo yetu. (Sek. 2:8) Mmuitukuashe bua’shi tumuukie na tuikale ba kuuku baye. (Mis. 25:14; Bik. 17:27) Na mmuiyishe; “abandamaa mwanda wa kutala eyilu na nsenga, ebweshaa mufudiile pâshi padi.” (Mis. 113:6, 7) Nnanyi e kupela kutumbisha Efile eetu Mukata?​—Mis. 86:12.

7. Mushindo kinyi wi pabuao watudi nao?

⁷ Atutumbishaa Yehowa pa kulungula bangi pabimutale. Bantu be bungi t’abauku bia binyibinyi pabitale Yehowa. Buakinyi? Muanda Satana mubuikile binangu bia bantu pa kupalakasha mianda ya madimi pabitale Yehowa. (2 Ko. 4:4) Satana mmushinkamishe bantu’shi Yehowa e na kifita, t’apasukilaa bantu, na’shi naye nsulo ya makienga e pa nsenga. Anka atuuku bia binyibinyi pabitale Efile Mukulu eetu! Tui na mushindo wa kulungula bangi pabitale kalolo kaye na kuibakuasha bua kumutumbisha. (Yesh. 43:10) Misambo 96 ayikamba kuakuila kutumbisha Yehowa. P’atutaluula angi a ku ano mayi ayokielue, nangushena mushindo odi mulombene kupa Yehowa ntumbo imulombene.

TUIKUPA YEHOWA NTUMBO IMULOMBENE NAMINYI?

8. Mushindo kinyi watudia kutumbisha Yehowa? (Misambo 96:1-3)

⁸ Badika Misambo 96:1-3. Atutumbishaa Yehowa p’atuakula pabimutale. Mu ino verse, abatekie muilo buaudia ‘kuyimbila Yewowa, kutumbisha eshina diaye, kupalakasha mukandu wa kipandilo,’ na ‘kuukisha ntumbo yaye mu bisamba.’ Ino yoso nyi mishindo yatudia kutumbisha Nshetu e muiyilu. Bena Yunda ba sha lulamato na bena Nkidishitu ba mu siekele a kumpala, abaadi abalungula bangi pabitale mianda ibaadi Yehowa muibakitshine na kukaluila nkumo yaye. (Nda. 3:16-18; Bik. 4:29) Tui kuibambula mushindo kinyi?

9-10. Bolongiela kinyi ku muanda wa Angelena? (Tala dingi kifuatulo.)

⁹ Tala kileshesho kia Angelena,a mukuetu mukashi mushale mu États-Unis. Baadi mukaluile nkumo ya Yehowa n’eshimba dinyingie ku mudimo. Bu bibaadi ki muenyi, Angelena abaadi bamuitamine mu kisangilo ki’abakitaa na bantu boso baki benyi bua’shi belubule. Angelena baadi mulumbuule ma foto abaadi aalesha muloo wa kuikala Kamonyi ka Yehowa. Anka, kumpala kua’shi abangie kuakula, muina mudimo naye baadi muilubule kumpala kuaye, baadi muakule’shi abaadi bamukushe kui Tumonyi tua Yehowa. Na abanga kusaabuula Tumonyi tua Yehowa na mianda yatudi bakumiine. Angelena amba’shi: “Eshimba dibabangile kunkupila ngofu. Kadi nadi muiyipushe’shi: ‘Ntadiile muntu akule mianda ya madimi pabitale Yehowa? Su muakuile?’”

¹⁰ Pabapuile muina mudimo naye kuakula, Angelena belele luteko lua munda munda bukidibukidi. Akupu bamulunguile na kalolo koso’shi: “Nenka bu’be. Mbankushe kui Tumonyi tua Yehowa, mpa na lelo ne Kamonyi ka Yehowa.” Sunga biabidi’shi uno muanda taubadi ubofule, Angelena ta baadi mupampakane, anka baadi muleshe ma foto aaye na aadi na ba loole baye’shi, kufubila Yehowa akuibapaa muloo wi bungi. (1 Mp. 3:15) Bibatushishe kipeta kinyi? Kumpala kua’shi Angelena apudishe kuakula, nsungu ya yawa muina mudimo naye ibaadi ipue. Yawa muina mudimo naye baadi mpa na mulonde mianda i buwa ibaadi mumone pabaadi mukinga na pa baadi atuele mu bisangilo bia Tumonyi tua Yehowa. Angelena amba’shi: “Abitungu kukaluila Yehowa, muanda muibilombene. Nyi kinemo kikata.” Natue namu, tui na kinemo kia kutumbisha Yehowa nsaa yabash’abamunemeka kui bangi.

11. Kubanga kala mpa na lelo, mushindo kinyi wi bena Nkidishitu ba binyibinyi abakokielaa eyi dia kulonda di mu Misambo 96:8?

¹¹ Badika Misambo 96:8. Atutumbishaa Yehowa pa kufubisha bintu bietu. Balanguidi ba Yehowa ba binyibinyi abamutumbishaa misango yoso mu uno mushindo. (Nki. 3:9) Bu kileshesho, bena Isalele abaadi abatusha makuta na bintu biabo bua kukuasha mu luibako lua ntempelo na kumulumbuula. (2 Bf. 12:4, 5; 1 Mya. 29:3-9) Bangi balongi ba Nkidishitu abaadi abakuasha Yesu na batumibua baye pa kufubisha “bintu biabo.” (Luk. 8:1-3) Bena Nkidishitu ba mu siekele a kumpala abaadi batushe makuta bua kutumina bakuabo abaadi abakiengie na nsala. (Bik. 11:27-29) Natue namu lelo uno, atutumbishaa Yehowa pa kutusha bia buntu.

12. Mushindo kinyi wi bia buntu bietu abitumbisha Yehowa? (Tala dingi kifuatulo.)

¹² Tala penda kileshesho kimune a kilesha mushindo wi bia buntu bietu abitumbisha Yehowa. Mu 2020 abaadi batushe rapore ibaadi ayilesha bukitshi bui bubi bua eshipo dikite mafuku e bungi mu Zimbabwe. Midiyo ya bantu ibaadi mu masaku a lufu muanda wa kukutua bia kudia, mpa na mukuetu mukashi abetamina bu Prisca. Sunga biabibaadi bukopo, Prisca batungunukile na kiubishi kiaye kia kuenda mu bulungudi mu dia Kasatu dioso na dia Katano dioso, mpa na mu kipungo kia kudima. Ba nkungishanyi naye babaadi abamusengie pa muanda baadi ende mu bulungudi, bambanga’shi: “Ofu na nsala.” Prisca baadi aluula na kushinkamisha’shi: “Yehowa t’asumbushenaa bafubi baye nya.” Kunyima kua mafuku aapela, bapetele bukuashi abufiki kui ndumbuluilo eetu. Prisca baadi mupete bidibua na bingi bintu bibaadi nabio lukalo, muanda bakuetu abaadi abatuusha bia buntu. Ba nkungishayi ba Prisca abaadi bakaanye na bamulungula’shi: “Efile Mukulu kuete nka nkukuasha, biabia tui na lukalo lua kuuka bi bungi pabimutale.” Ba nkungishanyi naye musambobidi bakuete kutuela mu bisangilo.

13. Tui kutumbisha Yehowa mu bikitshino bietu naminyi? (Misambo 96:9)

¹³ Badika Misambo 96:9. Atutumbishaa Yehowa mu bikitshino bietu. Ba tshite muakuidi abaadi abafubu ku ntempelo a Yehowa, abaadi na lukalo lua kuikala batookane ku mbidi. (Efi. 40:30-32) Kadi, kintu ki na muulo ukata kukila kutookana ku mbidi nyi kuikala batookana mu muikeelo. (Mis. 24:3, 4; 1 Mp. 1:15, 16) Abitungu tuikitshishe ngofu bua kufuula “bumuntu bua kala” na bikitshino biabio, na tufuale “bumuntu bupia,” kuamba’shi mushindo wa kunangushena na wa kukita mianda aulesha’shi atuambula Yehowa na ngikashi yaye i buwa. (Kol. 3:9, 10) Anka ku bukuashi bua Yehowa, mpa na muntu e bubi bukile mulombene kushintuluka na kufuala bumuntu bupia.

14. Nkinyi kibolongiela ku kileshesho kia Jack? (Tala dingi kifuatulo.)

¹⁴ Tala kileshesho kia Jack, baadi ntomboshi, na pa muanda wa buno bu ntomboshi abaadi abamuitamina mpa na bu Demo. Pa muanda wa kukita bibeshi, abaadi bamutshibile kibawe kia lufu. Pa baadi atengiela lufu, na ungi mukuetu bayile mu mukulungula mukandu wi buwa mu lukano, batekiele Jack bua kulonga naye Bible, aye nkukumiina. Sunga bibaadi mukite bibeshi bi bungi, Jack baadi mufuule muntu a kala na muenda mafuku aye nkubatshishibua. Jack baadi mushintulukie ngofu, na pabalombene efuku dia kumuipaa, balami ba lukano abaadi badile pababaadi abamuladika. Ungi musalayi baadi afubu mu lukano bambile’shi: “Jack baadi muntu e bubi bukile mu luno lukano. Binobino nyi muntu e buwa bukile.” Lubingo lubalondele kuipayibua kua Jack, bakuetu abafikile mu lukano bua kutuesha bisangilo, abaadi bafumankane na ungi muina lukano bafikile mu kutuela mu bisangilo bua musango wa kumpala. Buakinyi batshile kitshibilo kia kufika mu kuimutuela? Baadi mukaanye pa kumona bibaadi muikeelo wa Jack ushintulukie, na baadi akumiina kuuka kia kukita bua kulanguila Yehowa. Kushi mpaka, muikeelo wetu wi kutumbisha Nshetu e muiyilu!​—1 Mp. 2:12.

MUSHINDO KINYI AUKATUMBISHA YEHOWA ESHINA DIAYE MU MAFUKU AAFIKI?

15. Mushindo kinyi aukatumbisha Yehowa eshina diaye bua loso mu mafuku aafiki? (Misambo 96:10-13)

¹⁵ Badika Misambo 96:10-13. Ino verse ya nfudiilo ya Misambo 96 ayilesha Yehowa bu Nsushi na bu Nfumu mululame. Mushindo kinyi aukatumbisha Yehowa eshina diaye mu mafuku aafiki? Pa kutuesha kululama. Binobino abutula Babilone mukata, muanda kuete kudimba mianda ya madimi pabimutale. (Kbf. 17:5, 16; 19:1, 2) Bangi bantu abakamono kabutu ka Babilone Mukata, mbalombene nkata kitshibilo kia kulanguila Yehowa. Nfudiilo a bioso, ku Armagedone, Yehowa akabutula ndumbuluilo oso a Satana, na boso bamushikue, na abasabuula eshina diaye, anka akapaasha boso bamufule, abamukookiela, na abamutumbisha. (Mak. 8:38; 2 Te. 1:6-10) Kunyima kua kutompibua kukata akukakitshika kunyima kua Bipua kinunu bia kumunana kua Nkidishitu, Yehowa ekala mupue kutumbisha eshina diaye. (Kbf. 20:7-10) Aa mafuku, “pa nsenga poso, mîlo ayikaûlu na kiûkilo kya ntumbo ya Yehowa anka bu biûle mema madindji [kalunga].”​—Aba. 2:14, EEM.

16. We na kitshibilo kia kukita kinyi? (Tala dingi kifuatulo.)

¹⁶ Abikekala muloo wi bungi nsaa y’abakatumbisha eshina dia Yehowa kui bantu boso! P’atukiatutengiela yaya nsaa, tui kutumbisha Yehowa mu mishindo i bungi. Bua kuitukuasha bua kutuula binangu ku uno muanda wi na muulo, Kasaka ka Bakunkushi-Bakulu nkasangule Misambo 96:8 bu kifundue kia kipua kia 2025: “Paayi Yehowa ntumbo ilombene eshina diaye.”