Lukonko lulombene muntu oso kuipusha

Mary na mulume aaye John,a mbashale muiumbo amufikaa bantu ba mu Philippines bua kukimba midimo na kushala, na abekaala na muloo wa kuibalungula mukandu wi buwa. Mu kipungo kia kipupa kia COVID-19, Mary baadi mubangie kulonga Bible na bantu be bungi kushi penda muiumbo diadi, kadi mpa na mu angi ma mbalo pa nsenga. Muibikite naminyi?

Mary baadi epusha balongi baye ba Bible’shi, “Ouku namu ungi muntu akumiina kulonga Bible? Su baluula’shi, oolo, Mary amutekie bua’shi akamuleshe aanka. Kuipusha luno lukonko nkutuushe bipeta bi buwa. Buakinyi? Muanda ke bungi, bantu bafule Eyi di’Efile Mukulu abakumina kulungula kifuko na ba kuuku babo mianda ibabalongo. Mbipeta kinyi bituukie mu kuela luno lukonko?

Jasmin mulongi a Bibe a Mary baadi mumuleshe bantu bananka abaadi bakumiine kulonga Bible. Umune a kuabadi Kristine, baadi mufule ngofu bibaadi alongo, aye nkuteka Mary buabadia kuikala abalongo misuusa ibidi ku lubingo. Nsaa ibaadi Mary mumuipushe su auku ungi muntu akumiina kulonga, Kristine bakuile’shi, “oolo, nakulesha bangi ba lole bande.“ Munda mua mbingo ipela, Kristine baadi muleshe Mary ba lole baye bananka abaadi abakumina kulonga. Kunyima, Kristine baadi mumuleshe bangi ba lole baye, bangi ba ku ba lole baye abaadi nabo bakite nka bino.

Kristine baadi dingi akumiina’shi kifuko kiaye ki mu Philippines kilongie Bible. Biabia aye nkuisamba na nsonguakashi aaye Andrea. Ku mbangilo, Andrea baadi amba’shi: ‘Tumonyi tua Yehowa nyi nkipuilo kishi buwa, muanda tabakumiina mui Yesu, na abafubishaa nka penda kilombeno kia kala.’ Anka kunyima kua kulonga musango umune, bapetele mpushisho e buwa. Nsaa yoso ibabaadi abalongo, baadi akula’shi: “bioso abiakula Bible mbia binyibinyi!”

Kunyima kua mafuku, Andrea baadi muleshe Mary ba lole baye babidi, na ungi muina mudimo naye babangile kulonga Bible. Na dingi, Mary ta baadi auku’shi Andrea baadi na nyinaye mukinga mpofu, Angela, baadi ebateemesha nsaa ibabaadi abalongo. Dingi efuku, Angela baadi mulungule Andrea buadia kulungula Mary su alongo naye Bible. Angela baadi mufule mianda ibaadi alongo. Penda mu mueshi umune, baadi mulamine bifundue bi bungi na baadi akumiina kulonga misango inanka ku lubingo! Ku bukuashi bua Andrea, Angela babangile kutuela mu bisangilo ku bukuashi bua video.

Nsaa ibaadi Mary muukie’shi mulume a Kristine Joshua baadi alongo mu bufiefie, Mary bamuipuishe su akumiina kulonga. Joshua bamualuluile’shi: “Ami nateemesha nka bisumanga, su bongiele lukonko nakatuka.” Munda mua minite penda itano, Joshua baadi muele nkonko kukila Kristine na baadi akumiina kutungunuka na kulonga.

Lukonko lua Mary ndukuashe bantu be bungi bua kulonga Bible. Baadi mutekie tungi Tumonyi bua kulonga na be bungi ba kuabadi. Mary mubangie kulonga Bible na bantu 28 mu maumbo ananka.

Jasmin mulongi a kumpala atutemuine ku mbangilo, mubatshishibue mu mueshi wa Kananka 2021. Kristine mubatshishibue mu mueshi wa Katano 2022 na mualukie mu Philippines bua kuikala na kifuko kiaye. Bangi ba lole babidi babaadi Kristine muleshe Mary mbabatshishibue nabo. Angela baadi mubatshishibue kunyima kua mieshi ipela na lelo uno mbala-mashinda a mieshi yoso. Joshua mulume a Kristine na nsonguakashi aabo Andrea na bangi balongi be bungi bakuete kuenda kumpala mu kikudi.

Mu siekele a kumpala, mukandu wi buwa ubaadi upalakane bukidi bukidi mu bifuko na munkatshi mua ba kuuku. (Yo. 1:41,42a; Bik 10:24, 27, 48; 16:25-33) Buakinyi tue kuipusha balongi bobe ba Bible na bangi bantu abakumiina kulonga’shi: “Ouku namu ungi muntu akumiina kulonga Bible su?” Nnanyi auku bungi bua bantu balombene kukumiina kulonga Bible penda pa kuibepusha luno lukonko?