Ti kushtojmë vëmendje interesit të gjetur
1 Kur shpërndajmë revistat tona dhe botime të tjera teokratike, ne përhapim mesazhin që Jezu Krishti shpalli. Prandaj duhet të përpiqemi shumë për të rivizituar çdo njeri që shfaq interes.
2 Në qoftë se ke prezantuar një artikull të veçantë të Kullës së Rojës, që i intereson të zotit të shtëpisë, kur të kthehesh trajto pika të tjera nga artikulli, duke e përqëndruar bisedën mbi një shkrim kryesor ose mbi një apo dy paragrafë. Në qoftë se ai vazhdon të tregojë interes, trego se Kulla e Rojës është e dobishme për tërë familjen. Çdo botim, ka një shumëllojshmëri subjektesh mbi përballimin e problemeve të sotme, pyetjet që i shqetësojnë të rinjtë etj. Kur i zoti i shtëpisë shfaq interes të vërtetë, thuaj se mund t’i bëhet një pajtim në Kullën e Rojës dhe se mund të marrë 12 numra në 6 muaj.
3 Po në qoftë se të zotit të shtëpisë nuk i intereson asnjë artikull i Kullës së Rojës? Në vend se t’i japësh fund bisedimit ti mund të shfrytëzosh rastin për t’i mësuar të zotit të shtëpisë më shumë mbi veprën e Dëshmitarëve të Jehovait, duke përdorur informacionet e marra nga broshura Dëshmitarët e Jehovait të bashkuar.
4 Në qoftë se më parë i ke lënë një numër të «Kullës së Rojës», duke përdorur 2. Timoteut 3:1-5 dhe duke nxjerrë në pah informacionet e faqes 2 të revistës, kur të kthehesh mund të thuash kështu:
◼ «Në bashkëbisedimin tonë herën që kaloi diskutuam për domethënien e gjërave që ndodhin rreth nesh sot në botë. Shumë njerëz duket se e kanë humbur interesin për Perëndinë dhe për mënyrën e jetesës që kërkon Ai, e cila na jepet në Bibël. Kjo ka ndikuar shumë në sjelljen e njerëzve ndaj njëri-tjetrit, siç është përshkruar në 2. Timoteut 3:1-5. Mendoni se ka ndonjë arsye të fortë, për të pritur kushte më të mira për të ardhmen?» Pasi ta lini që të komentojë, mund t’ia drejtosh vëmendjen në 2. Pjetrit 3:13. Në këtë rast nxirr në pah se çfarë do të bëjë Mbretëria e Perëndisë me njerëzimin.
5 Në vizitën tjetër, ndoshta mund të dallosh se i zoti i shtëpisë dëshiron të diskutojë për fenë e tij, duke e parë si një gjë mjaft personale. Ti mund të thuash diçka të tillë:
◼ «Me kaq shumë fe që ka sot në një botë që bëhet gjithnjë e më e vogël, falë shpejtësisë së sistemit të komunikacionit dhe transportit, njerëzimi ndeshet me shumë fe të ndryshme, i pëlqejnë atij apo jo. Prandaj, duke kuptuar pikëpamjet e njëri-tjetrit, mund të drejtojmë një komunikim më kuptimplotë ndërmjet njerëzve me fe të ndryshme. Mund të zhduken disa nga urrejtjet që e kanë bazën në besimet fetare. Si mendoni ju?» Pasi ta lësh të komentojë, tërhiqi vëmendjen të zotit të shtëpisë në përmbajtjen e librit Të jetosh përgjithmonë.
6 Le të bëjmë çdo përpjekje që të rivizitojmë të gjithë ata që shfaqin interes për të vërtetën dhe t’i ndihmojmë ata drejt rrugës që të udhëheq në jetën e përhershme.—1. Gjon. 4:23, 24.