A do të përfitosh nga rasti?
Përkujtimi që po afron na jep mundësi të tregojmë mirënjohje
1. Ç’mundësi të veçantë na jep Përkujtimi?
1 Përkujtimi që do të mbahet më 14 prill na jep një mundësi unike të zhvillojmë e të shfaqim mirënjohje për mirësinë e Jehovait. Tregimi te Luka 17:11-18 shpjegon si e konsiderojnë mirënjohjen Jehovai dhe Jezui. Mjerisht, vetëm një nga dhjetë të lebrosurit e shëruar përfitoi nga rasti për të falënderuar. Në të ardhmen, falë dhuratës së shpërblesës do të shërohen plotësisht të gjitha sëmundjet e do të bëhet realitet jeta e përhershme. Sigurisht, në atë kohë do ta falënderojmë çdo ditë Jehovain për ato bekime. Por, si mund ta tregojmë mirënjohjen gjatë javëve në vijim?
2. Si mund të zhvillojmë mirënjohje për shpërblesën?
2 Zhvilloni mirënjohje: Ndjenjat e mirënjohjes burojnë nga mendimet. Që të zhvillojmë çmueshmëri për shpërblesën, në disa botime, për shembull te kalendari dhe te broshura Të shqyrtojmë Shkrimet çdo ditë, do të gjejmë programin për leximin e Biblës për Përkujtimin. Pse të mos e shqyrtoni si familje këtë material? Në këtë mënyrë do të na thellohet çmueshmëria për shpërblesën. Kjo nga ana tjetër do të ndikojë për mirë në sjelljen tonë.—2 Kor. 5:14, 15; 1 Gjon. 4:11.
3. Në ç’mënyra mund ta tregojmë mirënjohjen gjatë periudhës së Përkujtimit?
3 Tregoni mirënjohje: Mirënjohja shfaqet me anë të veprave. (Kolos. 3:15) I lebrosuri mirënjohës bëri përpjekje për të gjetur Jezuin e për ta falënderuar. Pa dyshim, edhe u foli me entuziazëm të tjerëve për shërimin e tij të mrekullueshëm. (Luka 6:45) A do të na shtyjë mirënjohja për shpërblesën të marrim pjesë me zell në fushatën për të lajmëruar Përkujtimin? Një tjetër mënyrë e shkëlqyer për të treguar çmueshmërinë tonë është duke shërbyer si pionierë ndihmës ose duke shtuar pjesëmarrjen në shërbim gjatë periudhës së Përkujtimit. Mbrëmjen e Përkujtimit, zemra plot mirënjohje do të na nxitë të mirëpresim vizitorët e të tregohemi të gatshëm t’u përgjigjemi pyetjeve të tyre.
4. Si mund ta kalojmë këtë Përkujtim pa u bërë pishman?
4 A do të jetë ky Përkujtimi i fundit? (1 Kor. 11:26) Nuk e dimë. Ajo që dimë është se njëherë që ikën ky rast, ikën edhe një mundësi unike për të treguar mirënjohje. A do të përfitosh nga ky rast? Urojmë që fjalët e çmueshmërisë në buzët tona dhe meditimi i zemrës sonë t’i sjellë kënaqësi Jehovait, atij që me bujari ka siguruar shpërblesën.—Psal. 19:14.