Wan tjubitjubi woto di u wai u ko sabi

A pasa wan daka kaa taa wan sëmbë konda wan woto da i di woto sëmbë an bi musu sabi ö?—a Di Bëibel ta taki u wan apaiti woto di de ta kai „di santa tjubitjubi woto”. De ta kai ën sö, u di di woto aki kumutu a Gadu. U di sëmbë an bi sabi soni fëën, mbei a bi dë wan tjubitjubi woto. Dee ëngëli seei bi kë ko sabi möön soni u di woto aki. I bi o kë ko sabi soni u di tjubitjubi woto aki ö?—

Gaanduwe kaa Gadu bi mbei di fosu womi de kai Adam ku di fosu mujëë de kai Eva. Gadu bi da de wan hanse kamian u de libi, nöö de bi ta kai ën di djai u Eden. Ee Adam ku Eva bi haika Gadu, nöö de ku dee bakamii u de bi o sa mbei hii di goonliba ko toon wan paladëisi kumafa di djai u Eden bi dë. Nöö de bi o sa libi u teego a di Paladëisi. Ma i sa mëni jeti andi Adam ku Eva bi du ö?—

Adam ku Eva bi pasa Gadu buka, nöö fëën mbei nöunöu wa ta libi a wan paladëisi. Ma Gadu bi taki taa a o mbei hii di goonliba ko dë wan hanse kamian ka hii sëmbë sa dë waiwai, nöö de o sa libi u teego. Unfa a o du di soni aki? Wë wan hii pisiten sëmbë an bi sabi unfa a bi o du ën. A bi dë wan tjubitjubi woto.

Di Jesosi bi ko a goonliba a bi lei sëmbë möön soni u di tjubitjubi woto aki. A bi taki taa di soni aki nama ku di Könuköndë u Gadu. Jesosi bi ta piki sëmbë u de begi be di Könuköndë aki ko. Di Könuköndë aki hën o mbei di goonliba ko toon wan hanse paladëisi.

I ta wai u di i ko sabi di tjubitjubi woto aki ö?— Hoi a pakisei taa dee sëmbë dee ta piki Jehovah buka nöö o libi a di Paladëisi. A di Bëibel, u ta feni woto u womi ku mujëë di bi ta haika Jehovah. I bi o kë ko sabi ambë da de u?— Boo buta pakisei a di libi u so u dee womi ku dee mujëë aki, nöö boo luku unfa u sa waka a de baka.