Tuwalufumu-liba

Di womi di bi ta wooko da di mujëë könu u Etiopia bi dë kabakaba tuutuu u dopu ö? Di womi u Etiopia „bi go a Jelusalen go begi Masa Gadu te a kaba” (Tjab. 8:27). Wë a musu u dë sö taa di womi aki bi tei di Dju biibi. A bi ko sabi soni u Jehovah, u di a bi lesi dee Hebelejën Buku u di Wöutu u Gadu. Ma hii fa a bi dë sö, tökuseei di womi aki bi kë ko sabi möön soni u Gadu. Di Filipi bi miti ën a pasi, di womi aki bi ta lesi wan pisi u Gadu Buku, di di tjabukama u Gadu de kai Jesaaja bi sikifi (Tjab. 8:28). A bi kë sabi möön soni jeti. A bi kumutu a Etiopia go tee a di wosu u Gadu a Jelusalen u go dini Jehovah. Di Etiopia womi bi lei wantu fanöudu soni a Filipi. A bi ko sabi taa Jesosi da di Mësiasi (Tjab. 8:34, 35). A bi ko lobi Jehovah ku di Womi Mii fëën möön gaanfa. A buta taa a o dopu ko dë wan bakama u Jesosi Keesitu. Filipi bi si taa di womi bi dë kabakaba u dopu. Fëën mbei a dopu ën. w23.03 bld. 8-9 pal. 3-6

Jehovah an o ta wai ku u ee u ta mindi soni. A buuse di soni de kai mindi soni (Nöng. 6:16, 17). Hii fa sömëni sëmbë an ta si mindi soni u wan gaan soni, tökuseei u ta köni ku ën, u di Jehovah taki taa an bunu (Ps. 15:1, 2). An dë u taki taa wa musu mindi soni. Ma wa musu ganjan wotowan ku dee soni dee u ta taki tu. Wa musu taki sëmbë soni tu (Nöng. 25:23; 2 Tes. 3:11). Ee i ta da woto ku sëmbë, hën i si taa un bigi taki sëmbë soni, nöö bia di taki, nöö i taki u soni di ta da sëmbë taanga. U di u ta libi a wan goonliba ka sëmbë ta fan a wan fasi di an fiti, mbei u musu ta mbei taanga möiti fuu fan a wan fasi di ta kai ku Jehovah. A o mbei u feni gaan bunu te u ta mbei möiti u fan a wan fasi di ta tja gafa ko dëën te u dë a di peleikiwooko, te u dë a dee komakandi, söseei te u ta fan ku wotowan. Te Jehovah poi di hogi goonliba aki kaba a sösö, nöö an o ta taanga da u sö möön fuu gafa Jehovah ku di fasi fa u ta fan.​—Jud. 15. w22.04 bld. 8-9 pal. 18-20

Te u ta buta pakisei a di fasi fa Jehovah ku Jesosi lobi u tjika, nöö woo ko lobi de tu (1 Joh. 4:10). U ta ko möön lobi de te u ta biibi taa Jesosi dëdë da hiniwan fuu apaiti. Apösutu Paulosu bi lei taa a ta biibi di soni aki, di a bi sikifi di biifi manda da dee baaa ku dee sisa u Galasia. A bi taki taa: „Di Mii u Masa Gadu . . . lobi mi tee a tei di dëdë di mi bi o dëdë, dëdë da mi” (Gal. 2:20). U di Jesosi ko dëdë da u, mbei Jehovah hai i tja ko nëën fii ku ën sa dë mati (Joh. 6:44). An ta bigi da i taa Jehovah si i u sëmbë tjika, te a paka wan gaan paima, sö taa i ku ën bi sa ko dë mati ö? Di soni dë an ta mbei i ko möön lobi Jehovah ku Jesosi ö? A bunu fuu hakisi useei di soni aki: ’Andi di lobi di Jehovah ku Jesosi lobi mi musu da mi taanga u mi du?’ Di lobi di u lobi Gadu ku Keesitu ta da u taanga fuu lobi wotowan.​—2 Kol. 5:14, 15; 6:1, 2. w23.01 bld. 28 pal. 6-7

Di Bëibel da wan gaan fanöudu soni di Jehovah ta tei u heepi dee sëmbë fëën sö taa de „sa dini ën makandi” Jehovah mbei sömëni pisi u Bëibel sikifi a sö wan fasi taa dee sëmbë dee abi sakafasi nöö sa fusutan de (Luk. 10:21). A hii së u goonliba sëmbë ta lesi di Bëibel. Ma dee sëmbë dee abi sakafasi nöö ta fusutëën, söseei de nöö ta du dee soni dee a ta taki (2 Kol. 3:15, 16). U ta si a di Bëibel taa Jehovah köni tuutuu. Jehovah an ta tei di Bëibel u lei hii dee sëmbë fëën soni a kulupu nöö a kaba, ma a tei ën u lei hiniwan fuu soni apaiti, söseei u da hiniwan fuu kötöhati. Te u ta lesi di Wöutu u Jehovah, nöö u sa si taa a ta booko hën hedi ku hiniwan fuu apaiti (Jes. 30:21). A kan taa a pasa sömëni pasi kaa taa te i jabi di Bëibel lesi, nöö i ta feni wan vers lesi di ta mbei i fii kuma ju seei vö Jehovah sikifi ën da. Wë di Bëibel sikifi a sö wan fasi taa milionmilion sëmbë sa fusutëën. Ma unfa a du waka taa i sa ta feni di soifi soni di i abi fanöudu a di Bëibel, hii fa de sikifi ën dusudusu jaa pasa kaa? Wë a dë sö u di di möön köni Sëmbë u mundu hën sikifi ën.​—2 Tim. 3:16, 17. w23.02 bld. 4-5 pal. 8-10

U di u da tuutuu Keesitu sëmbë, mbei u lobi Jehovah gaanfa seei. U kë du hii soni di u sa du a di dini di u ta dini Jehovah. Ma fuu sa du di soni aki, nöö u musu buta maaka da useei a di dini di u ta dini Jehovah. U sa mbei möiti u ko abi dee fasi dee Keesitu sëmbë musu abi, u sa lei u du wan wooko u heepi di ölganisaasi, söseei u sa suku fasi u heepi wotowan. Faandi mbei u musu mbei möiti fuu ko dë möön bunu dinima u Jehovah? Di möön fanöudu soni, hën da u kë di Tata fuu a liba ala wai ku u. Jehovah ta wai te a ta si taa u ta wooko ku di köni di u abi u dini ën. Boiti di dë, u kë ko dë möön bunu dinima u Jehovah, u di u kë heepi dee baaa ku dee sisa fuu möön gaanfa (1 Tes. 4:9, 10). Aluwasi un longi u dë a di tuutuu lei, tökuseei hii u tuu sa mbei möiti u ko dë möön bunu dinima u Jehovah. w22.04 bld. 22 pal. 1-2

Abiti möön dee tiima u di goonliba aki o booko di Gaan Babilon. Hën da hii dee poipoi keiki. Te di soni aki pasa, nöö di gaan fuka o bigi. Ma di soni aki kë taki taa sömëni sëmbë o bigi dini Jehovah u? Wë nönö. Biga Akoalimbo kapitë 6 ta lei u taa a di ten dë, dee sëmbë dee an ta dini Jehovah o kule go suku tjubi a dee tiima ku dee seisonima u di goonliba aki, dee di Bëibel ta tei maaka ku kuun. U di dee sëmbë dë an o tei di së u di Könuköndë u Gadu, mbei Jehovah o si de kuma felantima fëën (Luk. 11:23; Ako. 6:15-17). A di pisiten u di gaan fuka, dee dinima u Jehovah dee ta dini ën ku hii de hati, o tooka ku dee sëmbë dee an ta dini ën. A di ten dë, de wanwan o dë sëmbë a hii di goonliba di ta dini Jehovah Gadu, söseei de an o tei di së u „di taku mbeti.”​—Ako. 13:14-17. w22.05 bld. 16 pal. 8-9

Na di bunu buka u di Könuköndë wanwan nöö dee sëmbë u Gadu musu paaja a di ten aki (Mat. 24:14). Ma de musu heepi dee ëngëli u du di wooko di Akoalimbo kapitë 8 te go miti kapitë 10 ta taki soni fëën. Dee ëngëli ta taki u dee gaan hogi dee o miti dee sëmbë dee an kë u di Könuköndë u Gadu tii de. Fëën mbei di bosikopu di dee Jehovah Kotoigi ta paaja, di ta kuutu di hogi goonliba u Saatan, dë kuma „ëisi logologo” ku „faja” (Ako. 8:7, 13). Sëmbë musu sabi taa di kaba u di goonliba aki dë zuntu, nöö de musu tooka soni a de libi, sö taa de an dëdë a di daka di Jehovah hati o boonu (Sef. 2:2, 3). Ma di bosikopu aki an dë wan bosikopu di sëmbë lobi. Fëën mbei u musu abi degihati te u ta paaja di bosikopu aki. A di pisiten u di gaan fuka, woo ta paaja wan lasiti kuutu bosikopu di o mbei sëmbë hati boonu ku u möön gaanfa.​—Ako. 16:21. w22.05 bld. 6-7 pal. 18-19

Luku unfa soni dë te wan womi ku wan mujëë di dë Keesitu sëmbë o pai miii. Kandë sömëni jaa longi de ta jei taki di nama ku di fasi fa sëmbë musu kiija miii. Ma fa de ko abi miii, nöö dee soni di de o jei a dee lö taki dë, o möön hai de pakisei. Wan gaan faantiwöutu wë de abi dë e! Wë u ta si taa te soni ta tooka a di libi fuu, nöö u ta si so Bëibel tëkisi woto fasi. De ta ko dë fanöudu tëkisi da u. Di soni aki mbei dee dinima u Jehovah ta lesi di Wöutu u Gadu, ta kai pakisei a dee soni di de ta lesi, leti kumafa dee könu u Isaëli bi ta du ën (Deto. 17:19). Un dee mama ku dee tata, un abi wan apaiti gaandi. Un abi di gaandi fuun lei dee mii fuunu soni u Jehovah. Ma na lei nöö un musu ta lei de soni u Gadu nöö a kaba. Ma un musu heepi de u de ko möön lobi ën. w22.05 bld. 26 pal. 2-3

Te wan sëmbë ta tjali u di zöndu di a du, a ta hati ën tuutuu taa a du soni di an bunu, söseei taa an du dee soni dee a bi musu du. Te wan sëmbë ta tjali tuutuu u di zöndu di a du, nöö a ta bia du soni woto fasi. U musu dë kabakaba fuu sa hopo du wan soni. Wan fanöudu soni di Jehovah ta luku te a o da wan sëmbë paadon, hën da ee di sëmbë bia ta du soni woto fasi. Di soni aki kë taki taa di sëmbë musu disa di fasi fa a bi ta libi, nöö a bia ko ta libi kumafa Jehovah kë faa libi (Jes. 55:7). Di sëmbë musu da Jehovah pasi faa tooka di pakisei fëën, be a ko ta pakisei kumafa Jehovah ta pakisei (Lom. 12:2; Ef. 4:23). A musu dë kabakaba u disa dee soni dee a bi ta pakisei, ku dee soni dee a bi ta du dee an bunu, nöö a bia ko ta du soni di ta kai ku Jehovah (Kol. 3:7-9). Di biibi di u ta biibi taa Jesosi paka paima da u, ta mbei taa Jehovah sa da u paadon u dee zöndu fuu. Te Jehovah si taa u ta mbei taanga möiti u tooka di fasi fa u ta tja useei, nöö a o da u paadon u di Jesosi paka paima da u.​—1 Joh. 1:7. w22.06 bld. 6 pal. 16-17

Sensi di Adam ku Eva hopo fia ku Gadu, hën libisëmbë ta du hogi ku wotowan (Peleik. 8:9). Sëmbë ta du hogi ku wotowan u di de abi taki a de liba, hogiduma ta du hogi ku wotowan, miii ta du hogihogi ku wotowan a siköö ta kosi dee wotowan u de, ta paamusi de taa de o du hogi ku de, söseei so sëmbë ta libi hogi ku dee famii u de. Fëën mbei an dë wan foombo soni taa libisëmbë ta fëëë woto libisëmbë! Unfa Saatan ta wooko ku di fëëë di u ta fëëë libisëmbë? Saatan ta mbei möiti fuu ta fëëë libisëmbë sö tee taa u tapa u peleiki, nasö taa wa ta du dee woto soni dee Jehovah ta piki u fuu du möön. U di dee tiima dë a Saatan maun, mbei de ta du ku u, söseei de ta tapa di wooko fuu (Luk. 21:12). Dee sëmbë dee dë a di tii u Saatan basu ta mindi soni da dee Jehovah Kotoigi. Nöö dee sëmbë dee ta biibi dee soni dë sa mbei u fa, kandë de sa fon u seei (Mat. 10:36). A musu foondo u taa Saatan ta du dee soni aki ku u ö? Wë nönö. Guwentiguwenti soni fëën di a bi naa du kaa sënsi di pisiten u dee fesiten Keesitu sëmbë!​—Tjab. 5:27, 28, 40. w22.06 bld. 16 pal. 10-11

Ambë da dee „te a hia sëmbë” di de o heepi u de ko dë sëmbë di ta du soni a wan leti fasi? Dee sëmbë aki da dee sëmbë dee o weki ko a libi baka, dee sëmbë dee o pasa Amagedon libilibi, ku kandë dee mii di de o pai a di njunjun goonliba. Te dee 1000 jaa dou, nöö na wan sëmbë u goonliba o abi zöndu möön. U musu hoi a pakisei taa na te wan sëmbë an abi zöndu möön, nöö di soni dë wanwan tjika kaa faa feni di libi u teego. Pakisei Adam ku Eva. De an bi abi zöndu, ma tökuseei de bi musu piki Jehovah Gadu buka, sö taa de bi sa libi u teego. Ma a tjali taa de an piki hën buka (Lom. 5:12). U di na wan sëmbë o abi zöndu möön te dee 1000 jaa dou, nöö hii sëmbë o saka deseei a di tii u Jehovah basu u nöömö u? Naa so sëmbë o lei taa de dë kuma Adam ku Eva, di an bi hoi deseei a Gadu, hii fa de an bi abi zöndu? A dë fanöudu fuu ko sabi dee soni aki. w22.09 bld. 22-23 pal. 12-14

Te i ta luku di fasi fa soni dë a di goonliba nöunöu, nöö a ta taanga da i fii biibi taa soni o sa ko bunu ö? Sëmbë u wan wosudendu an ta lobi deseei möön kuma fosu. Möönmöön sëmbë ta ko hogi, söseei möönmöön de ta pakisei deseei nöö. A ta taanga da sömëni sëmbë u de futoou dee tiima. Ma tökuseei dee soni aki ta mbei u dë seiki taa soni o waka möön bunu a di ten di ta ko. Faandi mbei u taki sö? Wë biga sëmbë ta libi leti kumafa di tjabukama woto u Bëibel bi taki taa sëmbë bi o ta libi a „dee lasiti daka u di goonliba aki” (2 Tim. 3:1-5). Na wan limbohati sëmbë sa fia taa di tjabukama woto aki an ta pasa nöunöu, nöö di soni aki ta lei taa Jesosi Keesitu toon Könu u di Könuköndë u Gadu. Ma sömëni tjabukama woto dë jeti di ta taki soni u di Könuköndë. Hii dee tjabukama woto aki ta kai ku deseei, nöö de ta lei u gbelingbelin na un pisiten u ta libi, u di Jehovah buta wan ten kaa ka a o du so soni. w22.07 bld. 2 pal. 1-2

A di pisiten u di kolona siki de bi piki u limbolimbo unfa u musu hoi dee komakandi fuu, söseei unfa u bi musu du di peleikiwooko. An bi tei longi seei ufö u ko guwenti di go di u nango a dee komakandi, dee gaan komakandi, ku dee könklësi fuu a Internet. U bi ta bëli sëmbë, söseei u bi ta sikifi biifi u peleiki da de. Jehovah bi mbei u feni gaan bunu u di möiti di u bi mbei u peleiki da sëmbë. Sömëni bëikantoo bi taki taa dee peleikima bi ko möön hia. Sömëni baaa ku sisa bi feni gaan bunu a di pisiten dë. Kandë so sëmbë bi ta si kuma di ölganisaasi u Jehovah bi ta mbei ën poi a di së u di kolona siki. Ma sömëni pasi a bi dë u si taa dee soni di di ölganisaasi bi ta piki u fuu du bi dë bumbuu soni (Mat. 11:19). Te u ta pakisei di fasi fa Jesosi ta tja dee sëmbë fëën a wan lobihati fasi, nöö u ta dë seiki taa aluwasi andi o pasa a di ten di ta ko, Jehovah ku di lobi Womi Mii fëën o ta dë ku u.​—Heb. 13:5, 6. w22.07 bld. 13 pal. 15-16

Boiti di gafa di u musu gafa Jehovah a dee begi fuu, u musu ta dëën tangi tu u dee waitiwaiti soni dee a da u. U sa dëën tangi u dee waiti folo, dee peipei sutisuti soni u njan, söseei u sa dëën tangi u dee bunu mati dee u abi. Di lobihati Tata fuu aki da u dee soni aki, ku sömëni woto soni jeti fuu sa ta dë waiwai (Ps. 104:12-15, 24). Ma di möön fanöudu soni di u sa ta da Jehovah tangi fëën, da hii dee lei dee a ta da u sö taa di biibi fuu sa ko möön taanga, söseei u sa dëën tangi da dee soni dee a paamusi u da di ten di ta ko. A sa pasa taa u ta fëëkëtë u da Jehovah tangi da hii dee soni dee a ta du da u. Ma andi sa heepi i fu ja ta fëëkëtë? I sa sikifi hii dee soni dee i begi Jehovah u de, nöö i sa toona luku de bakaten u si unfa a piki dee begi fii. Nöö begi ën, nöö i dëën tangi u di fasi fa a heepi i.​—Kol. 3:15. w22.07 bld. 22-23 pal. 8-9

U sabi taa di lei di u ta lei soni u di tuutuu lei wanwan an tjika. Ee u kë feni wini fëën bumbuu seei, nöö u musu ta du dee soni dee u ta lei. Sö nöö di tuutuu lei sa mbei u ko dë waiwai tuutuu (Jak. 1:25). Unfa u sa mbei möiti u libi ku dee soni dee u ta lei? Wan baaa bi taki taa a bunu fuu öndösuku di fasi fa u ta libi, nöö u luku ee u ta du dee soni dee u ta lei. Nöö ee u si taa wa ta du so soni, nöö u musu mbei möiti u du de. Apösutu Paulosu bi taki taa: „Ma nöö di soni di u ko abi fusutan fëën kaa, nöö ku ën fuu libi e” (Fil. 3:16). Pakisei un wini woo feni te u ta mbei möiti u „ta piki di lei u Masa Gadu”! Na waka nöö di libi fuu o ta waka bunu nöö a kaba, ma woo mbei Jehovah wai ku u, söseei dee baaa ku dee sisa fuu o ta dë ku wai tu (Nöng. 27:11; 3 Joh. 4). Awa, dee soni aki hën ta mbei u lobi di tuutuu lei, söseei de ta mbei u ta du dee soni dee u ta lei. w22.08 bld. 19 pal. 16-18

Unfa dee gaanwomi sa lei taa de lobi Jehovah ku Jesosi? Wan fasi fa de sa du ën, hën da te de ta luku dee sikapu u Jesosi (1 Pet. 5:1, 2). Jesosi bi heepi apösutu Petuisi faa ko fusutan di soni aki gbelingbelin. A kan taa u di Petuisi bi taki dii pasi taa an bi sabi Jesosi, mbei a bi kë lei Jesosi taa a lobi ën tuutuu. Di Gadu bi weki Jesosi ko a libi baka, hën Jesosi bi hakisi Petuisi taa: „Simon, ju di mii u Jonasi aki, i lobi mi nö?” U sa dë seiki taa Petuisi bi o kë du hii soni u lei unfa a lobi di Masa fëën tjika. Jesosi bi piki Petuisi taa: „I musu sölugu dee sikapu u mi da mi e” (Joh. 21:15-17). Petuisi bi lei hii hën libi longi taa a bi mbei möiti u luku dee sikapu u di Masa fëën, nöö a sö wan fasi a bi lei taa a lobi Jesosi. Un dee gaanwomi, unfa un sa lei taa un ta si di soni di Jesosi bi piki Petuisi kuma wan fanöudu soni? Wë un sa lei unfa un lobi Jehovah ku Jesosi tjika, te un nango ta luku dee baaa ku dee sisa fuunu u da de taanga, söseei te un ta mbei hii möiti u heepi dee baaa ku dee sisa de an ta peleiki möön u de toona ko a Jehovah baka.​—Eze. 34:11, 12. w23.01 bld. 29 pal. 10-11

Ja musu ta pakisei taa na wan sëmbë sa fusutan un tesi ta miti i, söseei unfa a ta taanga da i tjika. Ee i ta pakisei sö, nöö a sa mbei i si kuma soni an o tooka möönsö, söseei taa ja o sa finga futu da dee taku fii dë. Ma di Bëibel an taki sö. A ta taki taa: „ A o mbei wan baaku da i nöömö fii pasa be ja kai” (1 Kol. 10:13b). Fëën mbei aluwasi ee u ta fii gaanfa seei fuu du wan soni di an bunu, tökuseei u sa hoi useei a Jehovah go dou. Jehovah sa heepi u fu wa du soni di an bunu. Hii juu i musu ta hoi di soni aki a pakisei: U di u da zöndu libisëmbë, mbei joo ta fii u du soni di an bunu, aluwasi i ta mbei möiti. Ma te i ta fii u du wan soni di an bunu, nöö i musu mbei möiti u puu di soni dë a i pakisei wantewante, leti kumafa Josëfu bi kule wantewante go di di mujëë u Potifali bi kë duwengi faa duumi ku ën (Ken. 39:12). Ja musu u du dee soni dee an bunu, di di hati fii ta manda i fii du! w23.01 bld. 12-13 pal. 16-17

Di du di Jehovah ta du soni a wan leti fasi da wan u dee fasi dee a abi möön gaanfa (Deto. 32:4). Wan sëmbë di ta du soni a wan leti fasi an ta lobi wan nasiön sëmbë möön wan wotowan (Tjab. 10:34, 35). Di mbei di Jehovah mbei sëmbë sikifi di Bëibel a di töngö di gaansë sëmbë bi ta fan a di ten dë, ta lei taa a lobi hii pei köndë sëmbë. Jehovah paamusi u taa sëmbë o „ko sabi di tuutuu lei gaanfa” a dee lasiti daka. Sömëni sëmbë bi o ko sabi di tuutuu lei aki (Dan. 12:4). Sëmbë ko sabi di tuutuu lei, u di u ta puu di Bëibel ku woto buku di ta taki soni u Bëibel ko a woto töngö, söseei u di u ta doloki de ta paati da sëmbë. Ma dee sëmbë u Jehovah puu hii di Bëibel, nasö pisipisi fëën a möön leki 240 töngö, nöö hiniwan sëmbë sa feni wan Bëibel söndö u paka. Di soni aki mbei taa hii nasiön sëmbë sa ko sabi soni u di „bunu buka u di Könuköndë” ufö di kaba dou (Mat. 24:14). Di Gadu fuu di ta du soni a wan leti fasi kë taa hii sëmbë feni di okasi u de ko sabi ën, te de ta lesi di Wöutu fëën. A ta du di soni aki, u di a lobi hii u tuu gaanfa seei. w23.02 bld. 5 pal. 11-12

I lobi letilibi ö? Wë u dë seiki taa i lobi ën. Ma u di u da zöndu libisëmbë, mbei ee wa ta köni, nöö a sa pasa taa u ko ta si letilibi kumafa dee sëmbë u di goonliba aki ta si ën (Jes. 5:20). Te u ta taki u wan sëmbë di ta libi a wan leti fasi, nöö kandë sömëni sëmbë ta pakisei taa di sëmbë dë abi gaanfasi, a lo’ u kuutu wotowan, nasö a ta mëni taa a bunu möön wotowan. Ma Gadu an lobi dee lö fasi dë seepiseepi. Di Jesosi bi dë a goonliba aki, a bi kuutu dee fesima u keiki u di ten fëën, u di de bi ta buta u deseei wëti u taki da deseei andi da letilibi (Peleik. 7:16; Luk. 16:15). Wan sëmbë di ta libi a wan leti fasi tuutuu, an o ta pakisei taa a bunu möön wotowan. Te wan sëmbë ta libi a wan leti fasi, nöö hën da a ta du soni di bunu a Jehovah Gadu wojo. Te di Bëibel ta taki u letilibi, nöö di dë kë taki taa wan sëmbë ta libi ku dee wëti u Jehovah. w22.08 bld. 27 pal. 3-5

Jesosi bi ta futoou dee bakama fëën, hii fa de bi ta mbei föutu (Joh. 15:16). Di Jakobosi ku Johanisi bi hakisi Jesosi faa da de wan apaiti kamian a di Könuköndë, nöö Jesosi an bi taki taa de ta dini Jehovah u di de bi kë feni wan apaiti soni, söseei an bi taki taa de an o dë apösutu möön (Maik. 10:35-40). Bakaten, a di ndeti di de bi ko kisi Jesosi, hën hii dee bakama fëën kule go disëën (Mat. 26:56). Ma tökuseei Jesosi an bi lasi biibi a de. A bi sabi taa de da zöndu libisëmbë, ma tökuseei a bi lei taa „a bi lobi de te a di kaba” (Joh. 13:1). Baka di Gadu bi weki Jesosi ko a libi baka, hën a bi da dee 11 apösutu fëën dee bi hoi deseei nëën, wan gaan faantiwöutu. A bi piki de u de tei fesi a di peleikiwooko, söseei u de luku dee sikapu fëën (Mat. 28:19, 20; Joh. 21:15-17). Soni hën bi mbei a bi ta futoou dee womi aki go dou, hii fa de bi dë zöndu libisëmbë. Hii de tuu bi hoi deseei a Gadu hii de libi longi. A dë gbelingbelin u si taa Jesosi da wan sëmbë di u sa waka nëën baka a di fasi fa a bi ta futoou wotowan. w22.09 bld. 6 pal. 12

Te u dë seiki taa Jehovah lobi u, söseei taa a o heepi u hii juu, nöö wa o fëëë Saatan. Sömëni soni bi miti di sikifima u Psalöm 118. A bi abi sömëni felantima, nöö so u de bi dë heihei sëmbë (vers 9, 10). So juu soni bi ta taanga dëën seei (vers 13). Jehovah bi sitaafu ën tu (vers 18). Ma tökuseei di psalöm sikifima aki bi kanda taa: „Ma o fëëë.” Hii fa a bi sabi taa Jehovah bi sitaafu ën, tökuseei a bi sabi taa Jehovah lobi ën. Di Psalöm sikifima bi dë seiki taa aan toobi andi bi o miti ën, di lobihati Gadu fëën bi o dë kabakaba u heepi ën hiniwan juu (Ps. 118:29). U musu biibi taa Jehovah lobi u. Te u dë seiki taa a lobi u, nöö di soni dë o heepi u fu wa ta fëëë dee dii soni aki möön. Dee dii soni aki da: (1) te u ta fëëë taa wa o sa sölugu dee sëmbë fuu wosudendu, (2) te u ta fëëë libisëmbë, ku (3) te u ta fëëë taa u sa lasi u libi. w22.06 bld. 15 pal. 3-4

Be di dini u Jehovah dë a di fosu kamian a di libi fuu. Jehovah da di Gadu di mbei u. Fëën mbei u musu dini ën (Ako. 4:11; 14:6, 7). Di möön fanöudu soni a u libi musu dë di dini di u ta dini Jehovah a di fasi di ta kai ku ën. Hën da u musu dini ën „a wan tuutuu fasi ku di santa jeje fëën” (Joh 4:23, 24). U kë taa di santa jeje musu tii u sö taa u sa ta dini Jehovah kumafa di Wöutu fëën ta lei u. Aluwasi ee u ta libi a wan köndë ka de tapa di wooko fuu, tökuseei di dini di u ta dini Jehovah musu dë a di fosu kamian a di libi fuu. A di ten aki, möön leki 100 baaa ku sisa fuu dë a dunguwosu, u di de dë Jehovah Kotoigi hedi. Tökuseei de ta dë waiwai ta begi, ta lei soni u Bëibel, söseei de ta konda soni u di Gadu fuu ku di Könuköndë fëën da sëmbë. Te sëmbë ta du ku u, nasö te de ta kuutu u, nöö u ta wai u di u sabi taa Jehovah dë ku u, söseei taa a o paka u.​—1 Pet. 4:14. w22.10 bld. 9 pal. 13

Jehovah ta da u köni lai a di buku Nöngö di sa heepi u a di libi fuu, ee u ta wooko ku de. Luku tu u dee lai aki. Di fosu wan da, dë tifeedi ku dee soni dee i abi. Nöngö 23:4, 5 ta piki u taa: „Na wooko taanga ku di pakisei fii ko gudu. . . . Ufö i mëni, nöö a ta kisi hanza kuma wan gabian, nöö a ta buwa go a liba” . Ma tökuseei pooti sëmbë ku gudu sëmbë tuu ta biinga a gudu baka. A lo’ u pasa taa de ta du soni a wan fasi di ta poi de në, di ta mbei de ku woto sëmbë poi, söseei di ta kaba di gösöntu u de a sösö (Nöng. 28:20; 1 Tim. 6:9, 10). Di u tu da, pakisei ufö i fan. Ee wa köni, nöö a kan taa u taki soni di o hati sëmbë. Nöng. 12:18 ta taki taa: „Te sëmbë ta taki soni söndö u pakisei, nöö a dë kuma tjökö de ta tjökö wotowan ku wan feti ufangi, ma dee soni di köni sëmbë ta taki, ta kula wotowan”. U sa ta libi fiifii ku useei, te wa ta tei dee föutu u sëmbë ta konda da wotowan.​—Nöng. 20:19. w22.10 bld. 21 pal. 14; bld. 22 pal. 16-17

Ezekiëli bi musu fusutan di bosikopu di a musu paaja bumbuu. A bi musu biibi di bosikopu, sö taa a bi sa dë kabakaba u paajëën da sëmbë. Baka di dë, hën wan foombo soni ko pasa. Ezekiëli bi ko si taa di pampia lolu „bi suti kuma höniwata” (Eze. 3:3). Unfa sö? Wë di wooko di a bi sa wooko da Jehovah bi dë wan gaan suti soni dëën (Ps. 19:8-11). A bi tei ën u bigi seei taa Jehovah bi tei ën faa du tjabukama wooko dëën. Bakaten, Jehovah bi piki Ezekiëli taa: „Haika dee soni dee mi o konda da i, nöö i tjubi hii de tuu a i hati” (Eze. 3:10). Wë Jehovah bi kë piki Ezekiëli fu an fëëkëtë dee soni dee bi dë sikifisikifi a di pampia lolu, söseei taa a bi musu kai pakisei a de. Di Ezekiëli bi du dee soni aki, hën di biibi fëën bi ko möön taanga. Boiti di dë, a bi ko abi wan apaiti bosikopu u konda da dee sëmbë (Eze. 3:11). U di Ezekiëli bi fusutan di bosikopu u Gadu bunu, söseei u di a bi ta biibi ën ku hii hën hati, mbei a bi dë kabakaba u bigi du di peleikiwooko, söseei u du ën te dou a di kaba. w22.11 bld. 6 pal. 12-14

Andi i sa du ee a ta taanga da i fii hoi iseei a Jehovah u di soni ko tooka a di ölganisaasi fëën? Di dee Isaëli sëmbë bi dë a di sabana, nöö so u dee bakamii u Kohati bi ta tja di Këdë u di Buka (Nöb. 3:29, 31; 10:33; Jos. 3:2-4). Wan gaandi seei de bi feni dë! Ma soni bi ko tooka di dee Isaëli sëmbë bi dou a di Paamusi Köndë. An bi dë fanöudu u sëmbë ta tja di Këdë möön. Fëën mbei dee bakamii u Kohati bi ko abi oto wooko u du (1 Klon. 6:31-33; 26:1, 24). Soni an dë di ta lei taa dee bakamii u Kohati bi ta kaagi, nasö taa de bi hakisi u de da de wan woto wooko u di de bi ta du wan apaiti wooko fosu. Andi u ta lei a di soni aki? Wë u ta lei taa u musu ta wooko makandi ku di ölganisaasi u Jehovah te wan soni tooka nëën, aluwasi ee de da u wan woto wooko fuu du. U musu wai ku hiniwan wooko di de da u fuu du. Hoi a pakisei taa na di wooko di i ta du hën ta mbei taa Jehovah kai i gaan soni. Jehovah ta kai di piki di u ta piki hën buka gaan soni möön di wooko di u ta du dëën. w22.11 bld. 23 pal. 10-11

Onësifolu bi suku baka u di apösutu Paulosu, hën di a ko feni ën, hën a bi mbei möiti u heepi ën faa feni dee soni dee a bi abi fanöudu. Onësifolu bi du di soni aki, hii fa a bi sa lasi hën libi. Andi u ta lei a di soni aki? Wa musu mbei fëëë tapa u fuu heepi dee baaa fuu te sëmbë ta du ku de. Ma boo mbei hii möiti u heepi de (Nöng. 17:17). A dë fanöudu seei fuu lei de taa u lobi de, söseei taa u kë heepi de. Buta pakisei a di fasi fa dee baaa ku dee sisa fuu a Losiaköndë ta heepi de na de, te lanti söötö so u de a dunguwosu. Te de ta tja de go a kuutu, nöö sömëni baaa ku sisa nango luku de, u da de taanga. Andi u ta lei a di soni aki? Te sëmbë ta mindi soni da dee baaa dee ta tei fesi, ta kisi de ta söötö, nöö wa musu fëëë. Ma u musu ta begi da de, u musu ta heepi dee sëmbë u de, söseei u musu ta luku unfa u sa heepi de ku dee soni di de abi fanöudu.​—Tjab. 12:5; 2 Kol. 1:10, 11. w22.11 bld. 17 pal. 11-12

Dee gaanwomi abi di faantiwöutu u da dee baaa ku dee sisa u de taanga tu (1 Pet. 5:2). Te wan gaan hogi pasa, nöö dee gaanwomi musu mbei möiti u sabi ee soni an du dee baaa ku dee sisa u de, söseei de musu mbei möiti u de sa feni soni u njan, soni u bisi, ku wan kamian u de dë. Ma aluwasi sömëni liba pasa, tökuseei dee baaa ku dee sisa aki o sa abi taanga fanöudu jeti (Joh. 21:15). Wan baaa de kai Harold, di dë a wan Bëikantoo Komite, bi taki taa: „A ta tei ten u dee lö sëmbë aki ko kisi deseei baka. De sa bigi kisi deseei, ma de o sa ta mëni so soni jeti. Kandë de sa ta mëni wan sëmbë u de di lasi libi, wan soni u de di poi kaba a sösö, söseei de sa ta mëni wan gaan soni di bi miti de. Nöö dee soni aki sa mbei de toona ko ta fii tjali baka. Di soni aki an kë taki taa de an abi wan taanga biibi, ma a ta lei taa sö libisëmbë dë kaa”. Dee gaanwomi ta mbei möiti u „këë ku dee sëmbë dee ta këë”.​—Lom. 12:15. w22.12 bld. 22 pal. 1; bld. 24-25 pal. 10-11

Jehovah ta da u di santa jeje fëën u heepi u fuu du soni di bunu. Te u ta lei soni u Bëibel, nöö u ta da di jeje fëën pasi faa heepi u. A ta da u di santa jeje tu te u nango a dee komakandi. A dee komakandi aki u sa ta dë makandi ku dee baaa ku dee sisa fuu dee ta mbei taanga möiti u du soni a wan bunu fasi, nöö di soni aki ta da u taanga seei (Heb. 10:24, 25; 13:7). Te u ta begi Jehovah, ta hakisi ën faa heepi u ku dee suwakifasi fuu, nöö a o da u di santa jeje fëën sö taa u sa abi kaakiti u du bunu soni go dou. A kan taa hii fa woo du dee soni aki, tökuseei so juu woo ta fii jeti u du soni di an bunu, ma dee soni aki o heepi u fuu duwengi useei. w23.01 bld. 11 pal. 13-14

Hii fa di Bëibel an dë wan buku di ta lei sëmbë unfa de sa du u de dë gösöntu nasö unfa de musu ta njan, tökuseei a ta lei u unfa Jehovah ta si dee soni aki. A ta piki u taa u musu ta köni ku dee soni dee sa poi di sinkii fuu (Peleik. 11:10). Di Bëibel ta piki u taa wa musu ta njan pasa maaka, söseei wa musu ta bebe pasa maaka, u di dee soni aki sa mbei u ko dë ku suwaki nasö de sa kii u (Nöng. 23:20). Jehovah kë fuu ta duwengi useei fu wa njan soni di an bunu, fu wa njan pasa maaka, söseei fu wa bebe pasa maaka (1 Kol. 9:25). Te u ta kai pakisei ufö u du wan soni, nöö a sö wan fasi u sa lei taa u ta kai di libi di Gadu da u gaan soni (Ps. 119:99, 100; Nöng. 2:11). U ta du di soni dë, te u ta buta mëni a dee soni dee u ta njan. Ee u lobi wan soni, ma u sabi taa te u njan mën a ta mbei u ko suwaki, nöö u ta köni fu wa njan mën möön. U ta lei tu taa u ta buta mëni a useei te u ta duumi bunu, te u ta sport, te u ta seeka sinkii, söseei te u ta seeka di wosu fuu fa sa ta dë limbolimbo. w23.02 bld. 21 pal. 6-7

Unfa i sa feni gudu a di Wöutu u Gadu te i ta lesi ën? Luku andi 2 Timoteo 3:16, 17 ta taki. Hoi a pakisei taa „hii dee soni dee dë a Gadu Buku . . . bunu” u lei u soni, u bai u a soni, u leti u buta a pasi, u gandji da u sö taa u sa libi tololoo. I sa feni hii dee wini dë, aluwasi i ta lesi dee buku u Bëibel dee ja ta lesi hesihesi. Buta mëni a di woto di i ta lesi fii sa ko fusutan andi a ta lei i u Jehovah, u di soni di a abi a pakisei u du, nasö u dee mama wëti u Bëibel. Luku unfa a sa bai sëmbë a soni. I sa du di soni aki te i ta mbei möiti u ko fusutan unfa dee vers ta heepi i fii si un pei fasi u libi an bunu, nöö i mbei möiti u du soni a wan fasi di ta kai ku Gadu. Pakisei luku unfa di pisi di i lesi dë sa leti sëmbë buta a pasi, nasö unfa a sa heepi wan sëmbë di i bi miti a di peleikiwooko faa ko ta si soni a wan soifi fasi. Boiti di dë, luku unfa dee vers sa gandji da i sö taa i ko ta si soni kumafa Jehovah ta si soni. Te i ta hoi dee soni aki a pakisei, nöö joo sa feni gudu a di Wöutu u Gadu te i ta lesi ën. w23.02 bld. 11 pal. 11

Wan tjabukama woto di sikifi a di buku Daniëli ta taki taa Jesosi o bigi tii di Könuköndë a di kaba u wan pisiten de ta kai seibi ten. I si kuma u sa sabi na un ten Jesosi toon Könu ö? (Dan. 4:10-17) Dee „seibi ten” da 2520 jaa. Dee 2520 jaa dë bigi a di jaa 607 bifö Keesitu, di dee sëmbë u Babilon bi puu di lasiti könu di Jehovah bi buta u tii, a Jelusalen. Nöö dee 2520 jaa aki kaba di Jehovah mbei Jesosi toon Könu u di Könuköndë fëën. Hën da „di sëmbë di abi di leti” u tii (Eze. 21:25-27). Un wini di tjabukama woto aki ta tja ko da u? Ee u fusutan di tjabukama woto u dee „seibi ten”, nöö woo dë seiki taa Jehovah ta du dee soni dee a ta paamusi u a di soifi ten. Jehovah bi mbei Jesosi toon Könu a di ten di a bi buta faa toon Könu. Nöö fëën mbei u sa dë seiki taa a o mbei dee woto tjabukama woto pasa tuutuu a di ten di a buta. Awa, di daka u Jehovah „an o ko lati”!​—Hab. 2:3. w22.07 bld. 3 pal. 3-5