Ëlufumu-liba

Keesitu sëmbë an musu ta kosi wotowan. Ma u musu ta köni ku woto soni tu. U musu ta köni fu wa taki soni u mbei sëmbë u wan woto lö, nasö u wan woto köndë fa. Söseei wa musu taki soni di sa hati wotowan. Taki soni di sa da wotowan taanga. I musu dë kabakaba u gafa wotowan, ma ja musu ta guunjan. Dee Isaëli sëmbë bi sa ta da Gadu tangi da hii dee soni di a bi ta du da de, ma ka u de du sö, nöö de bi ta guunjan hii juu. Te u ta guunjan hii juu, nöö a sa mbei wotowan seei ko ta guunjan tu. Di teni u dee womi dee bi go tjubi luku wan köndë bi konda hogi soni da dee Isaëli sëmbë, hën hii de tuu bi bigi ta kuutu Mosesi (Nöb. 13:31–14:4). Ma te u ta gafa wotowan, nöö a sa mbei hii sëmbë ta möön dë waiwai. Fëën mbei a bunu fii ta suku fasi, fii sa gafa dee baaa ku dee sisa fii. w22.04 bld. 8 pal. 16-17

Sensi na awooten, Jehovah heepi sömëni njönkuwan u de ko toon mati fëën. A sa heepi dee mii fii u de ko abi wan taanga biibi, ee de kë (1 Kol. 3:6, 7). Aluwasi ee dee mii fii an ta dini Jehovah ku hii de hati, tökuseei a ta lobi de go dou (Ps. 11:4). Ee de lei taa de „ta si soni a di soifi fasi”, nöö Jehovah o dë kabakaba u heepi de u de ku ën ko dë mati (Tjab. 13:48; 2 Klon. 16:9). A sa heepi i fii taki wan soni a di ten di dee mii fii abi ën fanöudu seei (Nöng. 15:23). Ee nasö a sa mbei wan baaa nasö wan sisa di ta booko hën hedi ku wotowan a di kemeente, buta pakisei a de. Aluwasi dee mi fii ko gaan sëmbë, tökuseei Jehovah sa mbei de mëni dee soni dee i bi lei de a di ten di pasa (Joh. 14:26). Te i ta heepi dee mii fii ku dee soni dee i ta taki, söseei ku dee soni dee i ta du, nöö Jehovah o mbei i feni gaan bunu. w22.04 bld. 21 pal. 18

U di Saatan an sa toona go a liba ala möön, mbei a ta du ku dee salufuwan u Gadu dee dë a goonliba aki jeti. Dee salufuwan aki ta wooko da di Könuköndë u Gadu, söseei de „da dee sëmbë dee ta piki Gadu buka ta hoi a dee lei u Jesosi dee a bi konda da de” (2 Kol. 5:20; Ef. 6:19, 20). A di jaa 1918, de mindi soni da aiti u dee baaa dee ta tei fesi, hën de lesi sömëni jaa sitaafu da de. A bi sa djei kuma di wooko u dee salufuwan aki bi tapa (Ako. 11:3, 7-11). Ma a gaanliba u di jaa 1919, hën de puu dee salufu baaa aki a dunguwosu, söseei bakaten lanti an bi kuutu de u dee soni sëmbë bi mindi da de möön. Di de puu de a dunguwosu, hën wantewante de bigi tei fesi baka a di peleikiwooko ku di lei di de ta lei sëmbë soni u Bëibel. Ma hii fa a bi dë sö, tökuseei an tapa Saatan fu an du ku dee sëmbë u Gadu möön. Sensi di ten dë, hën Saatan ta du ku dee sëmbë u Gadu nöömö (Ako. 12:15). Awa, hii u tuu musu „abi taihati ku gaan futoou a Masa Gadu liba”.​—Ako. 13:10. w22.05 bld. 5-6 pal. 14-16

Apösutu Johanisi bi si tu kulupu di bi dë a di së u di tii u Jehovah a wan wojolimbo sunjan, söseei a bi si taa de bi feni di libi u teego. Di fosu kulupu bi abi 144.000 sëmbë. De tei de puu a goonliba aki u de go tii makandi ku Jesosi a di Könuköndë a liba ala. Nöö hën ku de o tii di goonliba makandi (Ako. 5:9, 10; 14:3, 4). A di wojolimbo sunjan aki Johanisi si fa de ku Jesosi dë taanputaanpu a liba ala a di kuun de kai Sion (Ako. 14:1). Sensi di ten u dee apösutu te ko miti di ten aki, Gadu ta tei dusudusu sëmbë u de ko dë sëmbë u di kulupu u 144.000 sëmbë (Luk. 12:32; Lom. 8:17). Johanisi bi ko fusutan taa wantu u dee sëmbë u di kulupu aki nöö bi o dë a libi jeti a goonliba aki a dee lasiti daka. Nöö a wan pisiten baka te di gaan fuka bigi, nöö Jehovah o tei dee salufuwan dee dë a goonliba aki jeti, sö taa de sa go miti dee wotowan dee a bi weki baka u go dë a liba ala. Nöö de ku Jesosi o tii makandi a di Könuköndë u Gadu.​—Mat. 24:31; Ako. 5:9, 10. w22.05 bld. 16 pal. 4-5

Jesosi bi lei dee bakama fëën taa de musu ta si deseei a wan fasi di fiti. Wan daka, Jesosi bi piki de taa: „Masa Gaangadu sabi hii soni fuunu finifini, te dou ku un mëni niën uwii dë a unu hedi” (Mat. 10:30). Di soni dë ta da u kötöhati tuutuu, möönmöön ee a dë taa u ta si kuma wa bunu tjika. A ta lei u taa di Tata fuu a liba ala ta kë sabi fa fuu, söseei taa u dii nëën wojo. Ee Jehovah ta da u pasi fuu sa dini ën, söseei ee a ta si kuma u fiti u libi u teego a di njunjun goonliba fëën, nöö wa musu kuutu di fasi fa a ta si soni. Söwan 15 jaa pasa, Di Hei Wakitimawosu bi taki taa u musu ta si useei a wan fasi di fiti. A bi taki taa: „Wa musu ta si useei hei, te nöö u ko abi gaanfasi. Söseei wa musu ta si useei kuma u lagi sö tee, te nöö u ko lasi hati. Ma u musu mbei möiti fuu ko ta si useei a wan fasi di fiti, taa u abi bunu fasi ku suwakifasi tuu.” w22.05 bld. 24-25 pal. 14-16

Andi hiniwan fuu sa du fuu sa ta libi fiifii makandi a di kemeente? Wë u musu ta mbei möiti fuu dë sëmbë di ta suku u libi fiifii ku wotowan (Mat. 5:9; Lom. 12:18). Hiniwan juu te u ta mbei möiti fuu libi fiifii ku wotowan a di kemeente, nöö a dë kuma u ta mbei di paladëisi aki ko möön waiti. Wa ta fëëkëtë taa Jehovah hën hai hiniwan sëmbë di dë a di paladëisi aki ko a di tuutuu lei (Joh. 6:44). Pakisei fa Jehovah ta piizii te a ta si dee möiti dee u ta mbei, sö taa u sa ta libi fiifii ku dee woto dinima fëën! (Jes. 26:3; Hag. 2:7) Jehovah ta da dee dinima fëën sömëni bunu soni. Ma unfa u sa möön feni wini u dee soni aki? Wë te u ta kai pakisei a dee soni dee u ta lei a di Wöutu u Gadu. Te u ta du dee soni aki, nöö de o heepi u fuu ko abi dee fasi dee Keesitu sëmbë musu abi, söseei woo sa ta lobi useei a di kemeente.​—Lom. 12:10. w22.11 bld. 12-13 pal. 16-18

Te u ta biibi taa Jehovah da u paadon tuutuu, nöö u ta dë bööböö, söseei u ta abi wan limbo háti. Woo sa ta fii bööböö tuutuu te Jehovah seei da u paadon (Tjab. 3:19). Te Jehovah da u paadon, nöö a ta da u pasi fuu ku ën ko dë gaan mati baka. A ta dë dëën kuma wa du na wan zöndu seei. Te Jehovah da u paadon kaa, nöö an o taki soni u di föutu di u bi mbei nöiti möön, söseei an o sitaafu u fëën hedi möön (Jes. 43:25). „Leti kumafa sonu kumutu longi ku sonu go”, sö nöö Jehovah buta dee zöndu fuu tee a longi ala (Ps. 103:12). Te u ta pakisei unfa Jehovah ta da sëmbë paadon tjika, nöö u ta ko abi gaan lesipeki dëën (Ps. 130:4). U bi lei taa te Jehovah ta da sëmbë paadon, nöö an ta luku ee wan gaan zöndu di sëmbë du, nasö ee di zöndu fëën an bigi te poi. Jehovah da di Sëmbë di mbei u, hën da di Sëmbë di ta da u wëti, söseei hën da di Kuutuma fuu, nöö a ta wooko ku di köni fëën te a o da sëmbë paadon. w22.06 bld. 5 pal. 12-14

Jehovah paamusi dee sëmbë dee lobi ën taa de o feni bunu a di ten di ta ko. Abiti möön a o puu siki, tjali ku dëdë (Ako. 21:3, 4). A o heepi dee „sakafasi sëmbë” dee ta futoou ën u de mbei di goonliba toon wan paladëisi (Ps. 37:9-11). Söseei a o heepi hiniwan fuu fuu ku ën ko dë mati a wan apaiti fasi. Di soni aki dë wan gaan soni seei! Ma andi ta mbei u ta biibi taa dee soni di Gadu paamusi u aki o pasa tuutuu? Hii juu Jehovah ta du dee soni dee a paamusi u. Nöö fëën mbei u sa „futoou Jehovah” (Ps. 27:14). U ta lei taa u ta futoou Jehovah te u ta wakiti ën ku pasensi, söseei te u ta wakiti ën ku wai faa du dee soni dee a paamusi u (Jes. 55:10, 11). Boo hoi useei a Jehovah tu, söseei boo dë seiki taa Jehovah ta paka „dee sëmbë dee ta suku ën ku wan hati”. w22.06 bld. 20 pal. 1; bld. 25 pal. 18

Jehovah hën da wan hedima u wosudendu, nöö fëën mbei u sa dë seiki taa a o du di seei soni di a ta piki dee hedima u wosudendu u de du, di sikifi a 1 Timoteo 5:8. Te u dë seiki taa Jehovah lobi u, söseei taa a lobi di wosudendu fuu tu, nöö wa o booko u hedi taa wa o feni dee soni dee u abi fanöudu (Mat. 6:31-33). Jehovah kë da u dee soni dee u abi fanöudu, u di a lobi sëmbë, söseei u di a lo’ u da sëmbë soni! Di a mbei di goonliba an da u dee soni dee u abi fanöudu u dë a libi nöö a kaba, ma a da u möön leki dee soni dë seei. A wan lobihati fasi a mbei te a hia soni buta a goonliba da u, di sa mbei u ta dë waiwai (Ken. 2:9). Aluwasi ee wan daka u feni dee soni dee u abi fanöudu u pasa di daka dë wanwan nöö, tökuseei a bunu fuu hoi a pakisei taa Jehovah hën bi da u dee soni dee u bi abi fanöudu u pasa di daka dë. An fëëkëtë u sölugu u (Mat. 6:11). A bunu fuu hoi a pakisei taa dee soni dee Jehovah o da u bunu gaanfa möön dee soni dee u disa sö taa u sa dini ën. Söseei a o da u teego libi a di ten di ta ko.​—Jes. 65:21, 22. w22.06 bld. 15 pal. 7-8

Na dee sëmbë dee ta bigi lei soni u Bëibel wanwan musu ko sabi soni u Jehovah ku di Bëibel finifini. Hii u tuu musu ko sabi dee soni aki. Apösutu Paulosu bi taki taa te u ta du dee soni dee u ta lei a di Bëibel, nöö de o heepi u fuu „ko ta sabi andi da hogi ku andi da bunu”. A sa dë wan taanga soni da u fuu piki Jehovah buka a di ten aki, u di sömëni sëmbë an ta libi a wan fasi di fiti. Ma Jesosi ta sölugu taa u feni dee soni dee u abi fanöudu, sö taa u sa ta abi wan taanga biibi go dou. U ta feni dee soni dee u abi fanöudu a Bëibel, di Wöutu u Gadu. Kuma Jesosi u ta hei Gadu në (Joh. 17:6, 26). A di jaa 1931 u bigi ta tja di në Jehovah Kotoigi. A sö wan fasi u ta lei unfa di në u Gadu dë fanöudu da u, söseei taa u kë dë zuntu ku Gadu (Jes. 43:10-12). Boiti di dë, a di Bijbel Nyun-Grontapuvertaling de buta di në Jehovah baka a dee kamian ka a bi musu dë. w22.07 bld. 11-12 pal. 11-12

Di bunu buka u di Könuköndë u Gadu seei dë wan pisi u dee tuutuu lei u Bëibel tu. Jesosi bi tei di tuutuu lei u di Könuköndë maaka ku wan gaan gudu di dë tjubitjubi. A Mateosi 13:44 Jesosi bi taki taa di Könuköndë u Gadu „dë leti kuma wan gaan gudu bi dë tjubitjubi a wan pisi goon. Nöö hën wan sëmbë go si ën. Nöö fa a si ën dë, hën a toona tjubi ën te a kaba. Nöö hën a kule go ku gaan wai nëën hati, hën a go sei hii dee soni fëën dee a bi abi tuu fiaa. Nöö hën a tei di möni go bai di goon naandë gbom tei”. Wë di womi aki an bi go a di goon u go suku gudu. Ma di a feni ën kaa, hën a du hii soni faa bi sa ko abi ën. Fuu taki ën kumafa a dë, a sei hii soni di a bi abi. Ma faandi mbei? Wë u di di womi aki bi sabi taa di gudu aki bi dë wan gaan dii soni seei. U di u sabi taa wa sa tei na wan soni u di goonliba aki maaka ku di piizii di u ta piizii te u ta dini Jehovah, söseei ku di sabi di u sabi taa woo libi u teego te di Könuköndë u Gadu o tii. Di gaandi di u abi u dë wan mati u Jehovah, bigi gaanfa seei möön hiniwan soni di u musu disa fuu sa dini ën. Di soni di ta mbei u ta wai gaanfa seei, hën da di libi di u ta „libi bunu nëën wojo”.​—Kol. 1:10. w22.08 bld. 15-17 pal. 8-9; bld. 17 pal. 12

Unfa Josëfu bi du sabi taa di Gadu fëën bi ta si di duumi di sëmbë ta duumi ko woto sëmbë mujëë kuma wan „gaan hogi”? Baka tu höndö jaa ufö Gadu bi mbei Mosesi da dee Isaëli sëmbë di Wëti, di ta taki gbelingbelin taa: „Ja musu duumi ku wan mujëë di na dë mujëë fii, nasö ku wan womi di na dë manu fii” (Ëki. 20:14). Tökuseei Josëfu bi sabi Jehovah tjika u fusutan taa Jehovah an lobi fanafiti libi a di së u manu ku mujëë soni. Josëfu bi sabi taa Jehovah seti di tööu libi da wan womi ku wan mujëë. Nöö a bi musu u jei fa Jehovah bi ko heepi hën gaan avo Sala tu pasi, sö taa wan woto womi an duumi ku ën ku taanga (Ken. 2:24; 12:14-20; 20:2-7). U di Josëfu bi kai pakisei a dee soni aki, mbei a bi ko sabi andi bunu ku andi hogi a Gadu wojo. U di Josëfu bi lobi Jehovah, mbei a bi dë kabakaba u du di soni di Jehovah bi o kë faa du. w22.08 bld. 26 pal. 1-2

Fosu u bi ta mëni taa Daniëli 12:2 bi ta taki u sëmbë di bi o weki ko a libi baka u go a liba ala, nasö taa a bi ta taki u di fasi fa di wooko fuu bi go a fesi, baka di dee sëmbë dee bi ta du ku u bi suku u tapa di peleikiwooko a di jaa 1918. Ma nöunöu u ko fusutan taa a ta taki u di weki di dee sëmbë dee dëdë o weki ko a libi baka a di njunjun goonliba. Faandi mbei u taki sö? Di wöutu „goonbasu” sikifi a Jöpu 17:16 tu, nöö a kë taki „Geebi”. Fëën mbei u sa taki taa Daniëli 12:2 ta taki u di weki di sëmbë o weki ko a libi baka te dee lasiti daka kaba, söseei baka di feti u Amagedon. Andi Daniëli 12:2 kë taki te a ta taki taa so sëmbë o weki ko a libi baka „u libi u teego”? Di soni aki kë taki taa dee sëmbë dee o weki ko a libi baka a di ten u di 1000 jaa, o lei soni u Jehovah ku Jesosi, nöö ee dee sëmbë aki ta lei soni u de go dou, ta piki de buka, nöö de o feni di libi u teego te u kaba fëën.​—Joh. 17:3. w22.09 bld. 21 pal. 6-7

Di soni aki an kë taki taa Jehovah kë fuu ta futoou hiniwan sëmbë, ma a kë fuu ta futoou wotowan di ta lei taa de dë u futoou. Leti kumafa sëmbë musu du soni u wotowan sa lesipeki de, sö nöö sëmbë musu du soni u wotowan sa futoou de. Di soni aki ta tei ten. Unfa i sa ko ta futoou dee baaa ku dee sisa fii? Wë i musu mbei möiti fii ko sabi de bumbuu. I sa ta da woto ku de te i go a dee komakandi. I sa ta wooko makandi ku de a di peleikiwooko. Hoi pasensi ku de, sö taa de sa lei i taa de dë u futoou. Kandë bigibigi ja o tei hii soni fii konda da wan baaa nasö wan sisa di ja sabi sö bunu jeti. Ma möön joo ta ko sabi ën, möön joo ta kë konda soni fii dëën (Luk. 16:10). Ma unfa i musu du ee wan baaa nasö wan sisa du wan soni di mbei taa ja kë futoou ën möön? Wë na biinga buta di sëmbë a wan së, ma mbei wantu ten pasa. Nöö na mbei soni di wantu baaa ku sisa du, tapa i fu ja futoou dee wotowan möön. w22.09 bld. 4 pal. 7-8

Wan gaanwomi u kemeente de kai Miqueas, ta mëni jeti taa wanlö baaa di bi abi faantiwöutu a di ölganisaasi u Jehovah, bi du wan soni ku ën di bi hati ën gaanfa seei. Hii fa soni bi dë sö, tökuseei a bi dë ku limbo pakisei, söseei a bi mbei hii möiti u hoi hënseei. A bi ta begi Jehovah sömëni pasi, ta hakisi ën faa dëën di santa jeje fëën, söseei faa dëën taanga faa sa hoi dou. A bi öndösuku soni a dee buku fuu tu di bi o sa heepi ën. Andi u ta lei a di soni aki? Ee wan baaa nasö wan sisa du wan soni di hati i, nöö na hopo ligei, söseei mbei möiti fu ja pakisei soni di an bunu. Kandë wan soni pasa di mbei di sëmbë taki di soni di a taki, nasö di mbei a du di soni di a du. Fëën mbei i musu begi Jehovah, nöö i hakisi ën faa heepi i fii si di soni kumafa di sëmbë ta si ën. Na si kuma ku sabi di sëmbë du di soni ku i, söseei pooba u dëën paadon (Nöng. 19:11). Hoi a pakisei taa Jehovah ta si andi ta miti i, nöö a o da i taanga fii sa hoi dou.​—Peleik. 5:8. w22.11 bld. 21 pal. 5

Ko abi mati di lobi Jehovah. Dee mati dee i abi sa heepi i fii ko dë gaangaan sëmbë a di biibi (Nöng. 13:20). Nöunöu wan baaa de kai Julien dë wan gaanwomi u kemeente, nöö a bi taki taa: „Di mi bi möön njönku, mi bi ko abi bunu mati u di mi bi ta peleiki makandi ku de. Dee mati u mi aki bi ta du di peleikiwooko fajafaja, nöö de bi heepi mi u mi ko abi möön piizii a di peleikiwooko. . . . Mi bi ko fusutan taa di soni mbei ma bi abi bunu mati hia, hën da u di mi bi ta suku mati di mi ku de bi dë pei. Andi i musu du ee i ko si taa wan sëmbë di i ta hulu a di kemeente sa mbei taa i ku Jehovah poi? Paulosu bi sabi taa so sëmbë u di kemeente an bi ta tja deseei kuma Keesitu sëmbë. Fëën mbei a bi piki Timoteo taa an musu nama ku de (2 Tim. 2:20-22). U ta tei di dë di u ku Jehovah dë mati u bigi. U bi mbei taanga möiti seei fuu ku Jehovah ko dë mati, nöö wa musu mbei dee sëmbë dee u ta hulu poi u ku Jehovah. w22.08 bld. 5-6 pal. 13-15

Wa dë kuma dee sëmbë dee ta buuse dee wëti u Gadu. Ma u da sëmbë di lei u lobi di fasi fa Gadu ta si soni, söseei u lobi hii dee wëti fëën tu. U sa mbei di lobi aki ko möön taanga, te u ta tei di fasi fa soni ta waka da dee sëmbë dee ta piki Gadu buka, maaka ku di fasi fa soni ta waka da dee sëmbë dee an ta piki ën buka. Buta pakisei a di fasi fa soni ta miti sëmbë u di de an kë libi ku dee köni lai dee Jehovah ta da u. Nöö pakisei luku unfa di libi fii ta waka bunu, u di i ta piki Gadu buka (Ps. 32:8, 10). Jehovah ta da hii sëmbë di köni fëën, ma an ta duwengi na wan sëmbë u de tei ën. Ma a ta piki u unfa soni o waka da dee sëmbë dee an ta kë tei di köni di a ta da u (Nöng. 1:29-32). Dee „o paka u dee soni di de du”. Te u kaba fëën, di fasi fa de ta libi o mbei de ko abi bookohedi, a o mbei de fii pen, söseei Jehovah o poi de kaba a sösö. Ma Jehovah ta paamusi dee sëmbë dee ta tei di köni di a ta da sëmbë, söseei dee ta libi ku ën wan soni. A taki taa: „Soni o waka bunu da di sëmbë di ta piki mi buka a soni, nöö an o dë fa fëëë ta hogi o miti ën.”​—Nöng. 1:33. w22.10 bld. 21 pal. 11-13

U ta lei taa u ta lesipeki Jehovah, te wa ta du soni di an ta kai ku ën (Nöng. 16:6). Fëën mbei u ta mbei möiti u hoi dee wëti u Gadu, dee ta taki andi da bunu ku andi da hogi. U sa feni dee wëti aki a di Bëibel (2 Kol. 7:1). Woo ta dë waiwai, te u ta du dee soni dee Jehovah lobi, söseei te u ta bia baka da dee soni dee a ta buuse (Ps. 37:27; 97:10; Lom. 12:9). Wan sëmbë sa sabi taa Jehovah abi di leti u piki u andi da bunu ku andi da hogi, ma di dë an tjika (Lom. 12:2). Di fasi fa u ta tja useei ta lei ee u ta biibi tuutuu taa te u ta hoi dee wëti u Jehovah, nöö woo ta dë waiwai tuutuu (Nöng. 12:28). Dafiti bi ta fii sö, u di a bi taki taa: „I ta lei mi fa mi musu libi. Mi ta wai te mi si taa i feni mi u bunu. Te mi dë a di letisë maun fii, nöö mi ta dë waiwai hii juu.”​—Ps. 16:11. w22.10 bld. 8-9 pal. 9-10

Hii juu Jesosi bi ta mbei möiti faa ta si hënseei a wan fasi di fiti. Ufö Jesosi ko a goonliba aki, a bi du sömëni gaangaan soni a di dini di a bi ta dini Jehovah. Gadu bi tei Jesosi „u mbei hii soni di dë a liba ala ku goonliba aki” (Kol. 1:16). Di Jesosi dopu, nöö a musu u dë sö taa a bi sa toona mëni dee soni dee a bi du di a bi dë ku hën Tata (Mat. 3:16; Joh. 17:5). Ma Jesosi an bi mbei dee soni dë mbei a ko abi gaanfasi. Nöiti a bi du soni di bi ta lei taa a bi ta si kuma a bunu möön wotowan. A bi piki dee bakama fëën taa ’an ko a goonliba u sëmbë musu dini ën, ma a ko u dini sëmbë, söseei faa lasi hën libi paka paima fu sömëni hia sëmbë sa ko bunu ku Gadu’ (Mat. 20:28). A bi taki tu taa an sa du na wan soni hën wanwan söndö hën Tata. Na piki sakafasi Jesosi bi abi! Di bunu fasi fa a bi du soni, ta lei u unfa useei sa du soni tu. w22.05 bld. 24 pal. 13

Te Jehovah ta luku ee a o da wan sëmbë paadon, nöö a ta luku ee di sëmbë di du wan zöndu bi sabi taa di soni di a bi ta du an bunu. Jesosi bi taki u di soni aki a Lukasi 12:47, 48. Te wan sëmbë buta taa a o du wan soni di a sabi taa Gadu an lobi, hën a du ën tökuseei, nöö hën da a du wan gaan zöndu. Kandë Jehovah sa buta taa an o da sö wan sëmbë paadon (Maik. 3:29; Joh. 9:41). Ee sö a dë, Jehovah da u paadon u? Wë aai! Wan woto soni di Jehovah ta luku te a o da wan sëmbë paadon, hën da ee di sëmbë ta tjali tuutuu u di zöndu di a du. Wë di soni aki kë taki taa di sëmbë ta „tooka di fasi fa a ta si soni, di fasi fa a ta tja hënseei, nasö so soni di a ta pakisei fundu nëën hati”. A kë taki tu taa a ta hati wan sëmbë taa a du wan soni di an bunu, nasö taa an du soni kumafa a bi musu du ën. Wan sëmbë di ta tjali tuutuu, ta tjali u di a du soni di an bunu. Ma a ta tjali tu u di an du dee soni dee a bi musu du sö taa di biibi fëën an ko suwaki. w22.06 bld. 5-6 pal. 15-17

Dee felantima fuu ta wooko ku soni kuma ladio, teefei, ku Internet u paaja mindimindi soni u dee baaa dee ta tei fesi a di ölganisaasi u Jehovah (Ps. 31:13). De bi kisi so baaa, hën de lesi sitaafu da de taa de da hogiduma. Dee soni aki bi miti dee fesiten Keesitu sëmbë tu. Sëmbë bi mindi soni da apösutu Paulosu, hën de kisi ën tja go söötö. So u de an bi ta heepi apösutu Paulosu möön di de bi kisi ën tja go söötö a Loomë (2 Tim. 1:8, 15; 2:8, 9). Pakisei luku unfa Paulosu bi sa fii. Sömëni soni bi miti ën, söseei piki fika a bi lasi ën libi u de hedi (Tjab. 20:18-21; 2 Kol. 1:8). Nöiti u musu ko dë kuma dee sëmbë dee an bi heepi Paulosu! Fëën mbei an musu bigi da u taa Saatan ta möön kë du ku dee baaa dee ta tei fesi. A kë taa dee baaa aki musu bia baka da Jehovah, söseei a kë fuu fëëë (1 Pet. 5:8). I musu ta heepi dee baaa fii hii juu, söseei ja musu disa de.​—2 Tim. 1:16-18. w22.11 bld. 16-17 pal. 8-11

A musu u dë sö taa di hogiduma di bi dë a Jesosi bandja ufö a dëdë bi dë wan Dju. Dee Dju bi ta dini wan kodo Gadu nöö, ma dee woto nasiön sëmbë bi ta dini sömëni gadu (Ëki. 20:2, 3; 1 Kol. 8:5, 6). Ee di hogiduma dë bi dë woto nasiön sëmbë, nöö di tëkisi u tide bi o dë taa: „Ja ta fëëë dee gadu nö?” Boiti di dë, Gadu an bi manda Jesosi go a dee woto nasiön sëmbë, ma a bi mandëën go a dee Isaëli sëmbë dee bi „dë kuma wanlö hia lasilasi sikafu” (Mat. 15:24). Gadu bi lei dee Isaëli sëmbë taa a o weki dee sëmbë dee bi dëdë ko a libi baka. A kan taa di hogiduma di tooka pakisei bi sabi di soni aki, nöö dee soni dee a bi taki ta lei taa a bi sabi taa Jehovah bi o weki Jesosi ko a libi baka faa sa tii a di Könuköndë fëën. Kandë di womi bi ta biibi taa Gadu bi o weki ën ko a libi baka tu. Kuma wan Dju di hogiduma bi musu u jei u Adam ku Eva. U di a kan taa di hogiduma di bi tooka pakisei bi dë wan Dju, mbei a bi sa sabi soni u Adam ku Eva ku di Paladëisi ka Jehovah bi buta de. Fëën mbei u sa taki taa a kan taa di hogiduma aki bi fusutan taa di Paladëisi di Jesosi bi taki soni fëën, bi o dë wan gaan waiti djai a goonliba aki.​—Ken. 2:15. w22.12 bld. 8-9 pal. 2-3

U sa ta du di peleikiwooko u di di jeje u Gadu ta heepi u. Faandi mbei u taki sö? Wë u di Saatan ta feti ku u fuu sa tapa ku di peleikiwooko (Ako. 12:17). Sömëni sëmbë ta si kuma Saatan taanga sö tee taa libisëmbë an o sa feti wini ën. Ma u ta wini ën ku di peleiki di u ta peleiki! (Ako. 12:9-11) Unfa sö? Te u ta du di peleikiwooko, nöö u ta lei taa wa ta fëëë Saatan. Hiniwan pasi te u peleiki da wan sëmbë, nöö Saatan ta lasi wan feti. Wë a ta dë gbelingbelin u si taa Jehovah ta heepi u ku di santa jeje fëën, söseei taa a ta wai ku u (Mat. 5:10-12; 1 Pet. 4:14). U ta lei taa di jeje u Gadu sa da u di kaakiti di u abi fanöudu fuu sa pasa hiniwan tesi di sa miti u a di peleikiwooko (2 Kol. 4:7-9). Andi u sa du ee u kë dë seiki taa Gadu o ta da u di jeje fëën go dou? Wë u musu ta begi ta hakisi Gadu di jeje fëën nöömö, nöö u musu dë seiki taa a o haika dee begi fuu. w22.11 bld. 5 pal. 10-11

U ta lei taa u lobi dee baaa ku dee sisa fuu, te u ta mbei möiti fuu ku de ta libi fiifii ku useei. U ta mbei möiti u djeesi Jehovah a di da di a ta da sëmbë paadon. Ee Jehovah bi dë kabakaba u manda di Womi Mii fëën ko dëdë paka zöndu da u, nöö ja si kuma a bi o bunu fuu ta dë kabakaba u da dee baaa ku dee sisa fuu paadon te de du wan soni ku u ö? Wa kë du soni kuma di saafu di bi abi hogihati, di Jesosi bi taki soni fëën a wan woto di a bi konda. Hii fa di masa u di saafu aki bi piki ën taa an bi dë faa pakëën wan gaan paima di a bi abi u pakëën möön, tökuseei di saafu aki an bi kë da wan woto saafu paadon, di bi abi wan möön biti möni u dëën (Mat. 18:23-35). Ee i ku wan sëmbë u di kemeente an kaba fusutan unuseei a wan soni, nöö a bi o bunu fii go nëën go seeka di taki ufö i go mëni di dëdë u Jesosi (Mat. 5:23, 24). Ee i du di soni dë, nöö joo lei taa i lobi Jehovah ku Jesosi gaanfa seei. w23.01 bld. 29 pal. 8-9

Wan fasi fa i sa ko sabi andi dee baaa ku dee sisa fii abi fanöudu, hën da te i ta hakisi de soni söndö fii mbei de fii wan fasi (Nöng. 20:5). De abi soni u njan u? De abi deesi nasö woto soni fanöudu ö? A kan taa de o lasi di wooko u de u? De o abi möni tjika u paka wosu ö? De abi sëmbë fanöudu u heepi de suku heepi a lanti ö? Jehovah ta da hii u tuu taanga fuu ta heepi u na u (Gal. 6:10). Wan sëmbë sa feni taanga seei, aluwasi ee wan piki soni seei u du u lei taa u lobi ën. Wan piki mii sa sikifi wan soni manda da wan baaa nasö a sa teeken wan soni dëën. Wan njönku baaa nasö wan njönku sisa sa go bai soni da wan sisa, nasö a sa go du wan woto soni dëën. U sa boi wan soni tja go da wan baaa nasö wan sisa di dë ku suwaki. So baaa ku sisa bi manda wan kaita da dee gaanwomi u da de tangi, u di de ta abi te a hia soni ta du seei te wan siki ko di ta paaja. A ta suti seei te hiniwan fuu ta du andi u sa du, u ’da useei degihati ta heepi u na u fuu nango a fesi nöömö’!​—1 Tes. 5:11. w22.12 bld. 22 pal. 2; bld. 23 pal. 5-6

Dee Saduseima bi sabi dee feifi fosu buku u Bëibel bumbuu, ma de an bi ta kai so’ u dee fanöudu lei dee bi dë a dee buku dë gaan soni. Luku andi Jesosi bi piki dee Saduseima di de bi hakisi ën soni u di weki di Gadu o weki sëmbë ko a libi baka. A bi hakisi de taa: „Wan jei fa Mosesi bi sikifi buta a di Buku nö? Di ten a bi si di faja ta kisi a di uwii ma di uwii an ta tjuma, nöö hën Gadu fan ku ën. A taa: ’Mi da di Gadu di dee gaan sëmbë fii ta begi: de Abahamu, Isaki, Jakopu sö.’ Na sö a taki nö?” (Maik. 12:18, 26) A musu u dë sö taa dee Saduseima bi lesi di woto dë sömëni pasi. Ma tökuseei de an bi buta pakisei a wan fanöudu soni. Di soni di Jesosi bi hakisi de bi lei taa de an bi buta pakisei a di taki di di Wöutu u Gadu ta taki taa sëmbë bi o weki ko a libi baka (Luk. 20:38). Andi u sa lei a di soni dë? Te u ta lesi, nöö u kë buta pakisei a hii dee soni dee u sa lei a wan vers nasö a wan woto u Bëibel. Wa kë fusutan dee soni dee an taanga u fusutan wanwan nöö, ma u kë fusutan dee mama wëti ku dee woto soni dee dë pikisö möön taanga u fusutan tu. Dee soni aki dë kuma gudu di dë tjubitjubi. w23.02 bld. 11 pal. 9-10

Gaan tesi bi miti hii dee kotoigi di de kai a di tëkisi u tide aki, ma tökuseei de bi hoi deseei a Jehovah hii de libi longi (Heb. 11:36-40). U sösö de bi hoi dou, söseei u sösö de bi mbei möiti ö? Na seei! De an bi si fa Gadu bi du hii dee soni dee a bi paamusi de taa a bi o du, ma tökuseei de bi biibi ën go dou. Nöö u di de bi dë seiki taa Jehovah bi ta feni de u bunu, mbei de bi dë seiki taa de bi o si fa dee soni dë bi o pasa tuutuu (Heb. 11:4, 5). Di fasi fa de bi du soni sa da u taanga fuu futoou Jehovah go dou. U ta libi a wan goonliba di ta hogi nango möönmöön (2 Tim. 3:13). Saatan o ta pooba dee sëmbë u Gadu go dou. Ma hii fa a dë sö, boo ta wooko da Jehovah go dou ku hii u hati, söseei boo dë seiki taa ’u ta buta di mëni fuu a di libilibi Gadu liba faa tja u’.​—1 Tim. 4:10. w22.06 bld. 25 pal. 17-18

Wan u dee soni di ta mbei taa u musu mbei möiti fuu ta dë gösöntu, hën da u di woo sa dini Jehovah möön bunu (Maik. 12:30). Kuma wan libilibi paima apaiti wan di u ta tuwë dëën’, mbei wa ta du soni di sa mbei u ko dë ku suwaki (Lom. 12:1). A dë sö taa aluwasi andi u ta du, wa sa dë seiki taa wa o ko dë ku suwaki. Ma u ta du andi u sa du fuu dë gösöntu, u di u kë lei di Tata fuu di dë a liba ala taa u kai di libi di a da u gaan soni. Te u dë ku suwaki, söseei te u ko gaandi, nöö kandë wa o sa du sömëni u dee soni dee u bi ta du möön. Di soni aki sa mbei taa u fii bookosaka. Ma tökuseei u musu ta mbei möiti go dou fuu sa dë gösöntu. Faandi mbei? U di aluwasi ee u ko gaandi, nasö u dë ku suwaki, tökuseei woo sa gafa Jehovah go dou kuma Könu Dafiti. Di sabi di u sabi taa di Gadu fuu ta kai u gaan soni aluwasi u dë ku suwaki nasö u ko gaandi kaa, ta da u kötöhati (Mat. 10:29-31). Aluwasi ee u ko lasi libi, a o weki u ko a libi baka (Jöpu 14:14, 15). A dë fanöudu fuu du andi u sa du fuu dë gösöntu, söseei fuu tjubi di libi fuu. w23.02 bld. 20-21 pal. 3-5

Di në u dee woto sikapu o dë sikifisikifi a di buku u Libi jeti baka te de pasa Amagedon libilibi ö? Aai (Ako. 7:14). Jesosi bi taki taa dee woto sikapu bi „o feni di libi u teego” (Mat. 25:46). Ma dee sëmbë dee o pasa Amagedon libilibi an o feni di libi u teego wantewante. A di pisiten u di Dusu Jaa Tii, Jesosi „o kiija de ta tja de kumafa wan bumbuu sëmbë ta kiija sikafu. Nöö a o ta tja de go ka de sa bebe di wata di ta da libi u teego”. Dee sëmbë dee në u de o dë sikifisikifi a di Buku u libi, da dee sëmbë dee ta piki Keesitu buka ku dee sëmbë dee Jehovah o feni bunu (Ako. 7:16, 17). Ma dee kaabita o poi kaba a sösö na Amagedon. Jesosi bi taki taa de „o feni gaan sitaafu fu teego” (Mat. 25:46). Jehovah bi mbei di apösutu Paulosu taki taa ’di sitaafu di dee sëmbë dë o feni, o dë fu teego’.​—2 Tes. 1:9; 2 Pet. 2:9. w22.09 bld. 16 pal. 7-8

Te sëmbë u wan wosudendu dë makandi ta buta pakisei a dee soni dee Jehovah mbei, nöö de o fii bunu, söseei de o ko möön lobi deseei. Jehovah mbei waitiwaiti kamian buta a goonliba aki da u, ka u sa du dee soni dee u lobi. Sömëni sëmbë lo’ u go ku dee sëmbë u de wosudendu a kamian ka de sa si dee soni dee Jehovah mbei. De lo’ u go a boiti kamian, a kuun kamian, nasö a bandja wata. A di njunjun goonliba u Gadu, mama ku tata ku miii tuu o feni wini te dou, u dee soni dee Jehovah mbei. Wa o ta fëëë dee mbeti möön, nöö deseei an o ta fëëë u möön tu (Jes. 11:6-9). U nöömö seei woo sa feni wini u dee soni dee Jehovah mbei (Ps. 22:26). Ma un dee mama ku dee tata, wan wakiti u di ten dë dou ufö un heepi dee mii fuunu u de sa feni wini u dee soni dee Jehovah mbei. Te un ta tei dee soni dee Jehovah mbei u lei dee mii fuunu soni fëën, nöö a kan taa deseei o piki ku di soni di Könu Dafiti bi taki. A bi taki taa: ’Jehovah o, na wan sëmbë sa du dee soni dee i ta du e.’​—Ps. 86:8. w23.03 bld. 25 pal. 16-17