Tinimu-liba

Hii u tuu sa mbei soni waka bunu a dee komakandi te u ta kanda, söseei te u ta seeka useei bunu fuu da piki. A ta taanga da so sëmbë u de da piki nasö u de kanda a komakandi. A ta taanga da i tu ö? Ee sö a dë, luku andi bi heepi wotowan fu an ko ta taanga da de sö möön. So sëmbë bi ko si taa te de ta kanda ku hii de hati nöö a ta heepi de. Di möön fanöudu soni mbei u ta kanda a dee komakandi, hën da fuu gafa Jehovah. Te i ta seeka da dee komakandi, nöö i sa kanda dee kanda tu, nöö luku unfa dee kanda nama ku dee soni dee woo lei a di komakandi. Da piki sa dë wan taanga soni da so sëmbë. Andi o sa heepi i? Pooba u lo’ u da piki. A dë wan bunu soni te dee piki an ta langa poi, te de dë soifi, söseei te de an taanga u fusutan. Jehovah ta wai ku u te u ta dë kabakaba u da piki a dee komakandi. w22.04 bld. 7-8 pal. 12-15

Di wöutu „heepima” kë taki wan sëmbë di ta kule go heepi wan wotowan di ta kai wolo ta suku heepi. Pakisei unfa Jehovah ta biinga u go heepi wan sëmbë di dë a fuka. Di soni aki ta lei u taa Jehovah dë seei kabakaba u heepi u. Te Jehovah dë ku u, nöö woo sa hoi dou ku wai, te fuka ta miti u. Andi da wantu fasi fa Jehovah ta heepi u? Fuu sa piki di hakisi aki, nöö boo lesi wantu pisi u di buku Jesaaja. Faandi mbei? Wë u di sömëni u dee tjabukama woto di Jehovah bi mbei Jesaaja sikifi, nama ku dee dinima u Gadu u di ten aki. Boiti di dë, Jesaaja ta konda soni u Jehovah a wan fasi di an taanga u fusutan. U sa si di soni aki a Jesaaja kapitë 30. A di kapitë dë, Jesaaja ta konda woto di ta lei di fasi fa Jehovah ta heepi dee sëmbë fëën. A bi sikifi taa Jehovah ta heepi u (1) te a ta haika dee begi fuu, söseei te a ta piki de, (2) te a ta lei u unfa u musu ta du soni, söseei (3) te a ta mbei u feni bunu nöunöu kaa, söseei a di ten di ta ko. w22.11 bld. 8 pal. 2-3

Boo buta pakisei a dee bosikopu di Jesosi bi manda da dee kemeente u Similina ku Filadelifia. A bi piki dee Keesitu sëmbë fu ala taa de an musu fëëë di du di sëmbë o du ku de, u di Jehovah o paka de ee de hoi deseei nëën go dou (Ako. 3:10). U musu hoi a pakisei taa sëmbë o du ku u, nöö u musu dë kabakaba u hoi dou (Mat. 24:9, 13; 2 Kol. 12:10). Di buku Akoalimbo ta konda da u taa sëmbë o ta du ku dee sëmbë u Gadu „a di daka u Masa”. A di ten dë u ta libi nöunöu. Akoalimbo kapitë 12 ta taki taa wan gaan feti bi feti a liba ala baka di Jesosi toon könu. Mikaëli, nasö Jesosi Keesitu ku dee ëngëli fëën bi feti ku Saatan ku dee taku jeje (Ako. 12:7, 8). Saatan ku dee taku jeje lasi di feti, hën de vinde de ko a goonliba aki, nöö de ta mbei sëmbë ta tja sömëni sitaafu.​—Ako. 12:9, 12. w22.05 bld. 5 pal. 12-13

Hii juu Jehovah ta kuutu soni a wan leti fasi. A ta si hii sëmbë di wan fasi. Jehovah an ta da wan sëmbë paadon u di a hanse, u di a gudu, u di a dë wan nëbai sëmbë, nasö u di a sa’ u du soni (1 Sam. 16:7; Jak. 2:1-4). Na wan sëmbë sa duwengi Jehovah faa du wan soni, söseei na wan sëmbë sa pakëën faa du wan soni da de. Nöiti Jehovah ta hopo du soni a wan föutu fasi u di hati fëën boonu nasö u di tjali u wan sëmbë kisi ën (Ëki. 34:7). A dë gbelingbelin u si taa Jehovah da di möön bunu kuutuma, u di a ta fusutan hii soni finifini (Det 32:4). Dee sëmbë dee bi sikifi dee Hebelejën Buku u Bëibel, bi ko fusutan taa Jehovah ta da sëmbë paadon a wan apaiti fasi. So juu de ta wooko ku wan Hebelejën wöutu di ta lei „di fasi fa Gadu ta da sëmbë paadon te de du zöndu. Ma di wöutu dë an kë taki u di fasi fa wan libisëmbë ta da wan wotowan paadon”. Jehovah wanwan tö sa da wan sëmbë paadon te dou. w22.06 bld. 4 pal. 10-11

Ee i ta kiija dee mii fii ju wanwan, nasö ee i manu an ta dini Jehovah, tökuseei i sa dë seiki taa dee soni dee i ta du ta da wotowan taanga. Andi i sa du, ee i si kuma di mii fii an ta si di möiti di i ta mbei u heepi ën? Hoi a pakisei taa a ta tei ten u lei wan mii soni. Te i paandi wan sii, nöö i sa hakisi iseei ee a o nasi ko toon wan pau di ta pai njanjan. Hii fa ja dë seiki ee a o pai njanjan, tökuseei i ta dëën wata go dou faa sa göö bumbuu (Maik. 4:26-29). Sö nöö a sa pasa taa wan mujëë sa ta hakisi hënseei ee dee soni dee a ta du ta heepi dee mii fëën u de lobi Jehovah. Ja sa tapa di mii fii faa du soni kumafa a buta taa a o du. Ma ee i ta mbei möiti nöömö u du hii soni di i sa du u heepi ën, nöö hën ku Gadu sa ko dë mati. w22.04 bld. 19-20 pal. 16-17

Di Salumon bi ta hoi hënseei a Jehovah, a bi ta si hënseei kumafa a fiti. Di a bi dë wan njönku kijoo, nöö a bi ta tei taa na hii soni a sa du, nöö a bi ta hakisi Jehovah faa heepi ën (1 Kön. 3:7-9). Di Salumon bi bigi tii, nöö a bi ta köni tu fu an ko abi gaanfasi. Ma a tjali taa bakaten, Salumon seei an bi ko ta hoi di soni dë a pakisei möön. Di a tii dou wan pisiten, hën a ko abi gaanfasi, hën a bigi ta pasa Gadu buka. Wan u dee wëti bi ta taki taa wan könu di bi dë Hebelejën sëmbë, an bi musu „tei hia mujëë, biga dee mujëë fëën sa mbei a bia baka da Gadu” (Deto. 17:17). Salumon bi pasa di wëti dë, hën a tööu ku 700 mujëë. Söseei a bi tei 300 woto mujëë tu! (1 Kön. 11:1-3) Kandë Salumon bi ta si kuma soni an bi o miti ën. Bakaten soni bi miti Salumon u di a bi pasa Jehovah buka.​—1 Kön. 11:9-13. w22.05 bld. 23 pal. 12

Wan fanöudu soni dë di hii sëmbë musu du a di ten aki. De musu taki ee de o tei di së u Jehovah Gadu di abi leti u tii u, nasö ee de o tei di së u di hogihati felantima fëën de kai Saatan Didibi. Wë woto fasi an dë, wan së nöö de sa tei. Ma nöö di së di de o tei, sa mbei de libi u teego, nasö a sa mbei de lasi de libi (Mat. 25:31-33, 46). A di pisiten u „di gaan fuka” de o kisi wan maaka di o lei ee de o tan a libi, nasö ee de o dëdë (Ako. 7:14; 14:9-11; Eze. 9:4, 6). Ee i tei di së u di tii u Jehovah, nöö hën da i du wan bunu soni seei. Nöö fëën mbei i kë heepi wotowan u de du di seei soni aki tu. Dee sëmbë dee ta tei di së u di tii u Jehovah o feni wini. A bunu fuu lei soni u dee woto aki. Ee u du di soni aki, nöö a o heepi u fuu dë kabakaba u dini Jehovah go dou. Boiti di dë, woo sa heepi wotowan u de tei di së u Jehovah, söseei u de dini ën go dou. w22.05 bld. 15 pal. 1-2

Jehovah u musu ta haika, na dee felantima fuu. Jöpu bi haika bunu di Jehovah bi ta fan ku ën. Jehovah Gadu bi heepi Jöpu faa ko fusutan soni möön bunu. A bi hakisi ën taa: ’Mi si hii dee soni dee ta miti i. Nöö i si kuma ma sa heepi i ö?’ Jöpu bi piki Jehovah ku sakafasi, söseei a bi lei taa a ta tei ën u bigi taa Jehovah dë wan Gadu di abi bunuhati. A bi piki ën taa: „Mi bi jei soni fii. Ma nöunöu mi ta si i ku miseei wojo” (Jöpu 42:5). Di Jöpu bi taki dee soni aki, nöö a kan taa a bi dë sindosindo a sindja liba jeti, nöö boi bi kisi ën hii hën sinkii. Ma Jehovah bi lei Jöpu taa a lobi ën, söseei taa a ta feni ën u bunu (Jöpu 42:7, 8). A di ten aki, sëmbë sa ta si u kuma u dë sösö sëmbë tu. A kan taa de o ta mbei möiti u poi u në nasö u da di ölganisaasi u Jehovah poi në. Di woto u Jöpu ta lei u taa Jehovah ta biibi taa woo hoi useei nëën, aluwasi tesi ta miti u. w22.06 bld. 23-24 pal. 15-16

A di ten dë, dee sëmbë o piizii pasa maaka! Hii fa de o wai seei a liba ala te di Gaan Babilon o kisi poi, tökuseei wan woto soni o pasa di o mbei de möön wai (Ako. 19:1-3). Di „Sikafu Mii musu toou ku di mujëë fëën”. Di soni aki da di möön fanöudu soni di di buku Akoalimbo ta taki fëën. Hii dee 144.000 salufuwan o dë a liba ala ufö di feti u Amagedon bigi. Ma di Sikapu Mii an o tööu a di pisiten dë (Ako. 21 :1, 2). Di Sikapu Mii o tööu baka te de feti di feti fu Amagedon, söseei baka te hii dee felantima u Gadu poi kaba a sösö (Ps. 45:3, 4, 13-17). Andi o pasa te di Sikapu Mii tööu? Wë leti kumafa wan tööu ta tja wan womi ku wan mujëë ko makandi, sö nöö di tööu u Könu Jesosi Keesitu ku dee 144.000 salufuwan o tja de ko makandi tu. Hii dee 144.000 salufuwan aki, da di mujëë u Jesosi. Di tööu aki o mbei taa wan njunjun tii ko dë, di o tii di goonliba 1000 jaa longi.​—Ako. 20:6. w22.05 bld. 17 pal. 11-13

Jesosi bi taki taa a di pisiten u di kaba u di goonliba aki, a bi o buta wan „köni saafu di dë u futoou” a wooko, sö taa a sa lei u soni u di Wöutu u Gadu. Nöö sö a ta pasa tuu. Di fesima fuu buta wantu womi di dë salufuwan, u de da dee sëmbë u Gadu ku woto sëmbë di kë ko sabi soni u Gadu, „njanjan a di soifi ten”. Dee womi aki an ta pëë basi a u liba, söseei de an ta taki da u andi u musu biibi (2 Kol. 1:24). Ma de ta fusutan taa Jesosi Keesitu da di „fesima ku di hedima” u dee sëmbë fëën (Jes. 55:4). Sensi di jaa 1919, di saafu di dë u futoou ta seeka peipei buku di ta heepi sëmbë u de ko sabi soni u di Wöutu u Gadu. A di jaa 1921, di saafu tja wan buku de kai De Harp Gods ko a döö. Di buku aki bi heepi sëmbë u de ko sabi wantu fanöudu soni u Bëibel. Möön di ten bi ta pasa, möön de bi ta tja woto buku ko a döö. w22.07 bld. 10-11 pal. 9-10.

Jehovah da di Sëmbë di möön lo’ u da sëmbë soni. Aluwasi andi i dëën, tökuseei hii juu te a o paka i, a ta da i gaanfa möön fa i bi dëën (Maik. 10:29, 30). Ee i buta taa joo dini Jehovah, nöö a o da i di möön bunu libi, söseei di möön suti libi di i sa abi nöunöu kaa a di hogi goonliba aki. Nöö na tuu fëën di dë jeti, bigi a bigi. I sa dini di lobi Tata fii go dou u teego. Di lobi di i ku di Tata fii abi da unuseei o ta ko möön taanga daka fu daka, nöö joo dë a libi solanga a dë a libi. Awa, joo ta libi u nöömö. Te i buta i libi a Gadu maun nöö i dopu, nöö i ta abi di gaandi u da di Tata fii wan gaan dii soni. A da i hii dee möön bumbuu soni ku hii dee möön suti soni dee ja bi o sa feni wan daka. U lei taa i ta tei dee soni dë u bigi, nöö i sa da di Sëmbë di abi mundu ku goonliba, wan soni di an abi jeti. Di soni dë da di dë di joo dë wan dinima fëën u nöömö (Jöpu 1:8; 41:11; Nöng. 27:11). Di soni aki da di möön bunu soni di i sa du a di libi fii! w23.03 bld. 6 pal. 16-17

Te i ta ko bigi, nöö dee manu ku mujëë fii fii sa ko möön taanga, nöö so juu sëmbë sa duwengi i fii libi fanafiti a di së u manu ku mujëë soni. Di soni aki Saatan kë fii du tu. Ma andi sa heepi i fii finga futu da fanafiti libi? (1 Tes. 4:3, 4) Konda da Jehovah unfa i ta fii, söseei hakisi ën faa da i taanga (Mat. 6:13). Hoi a pakisei taa Jehovah kë heepi i. Na kuutu a kë kuutu i (Ps. 103:13, 14). Na suku u du soni iseei. Piki dee gaansëmbë fii andi da dee fuka fii. An ta dë wan kösökösö soni u du, ma a dë fanöudu fii du ën. Te i ta lesi di Bëibel, söseei te i ta pakisei fundu u dee mama wëti, nöö an o ta taanga da i fii du soni di ta kai ku Jehovah. Joo ko si taa ja abi wëti fanöudu da hii pikipiki soni, u di i sabi unfa Jehovah ta si soni. w22.08 bld. 5 pal. 10-12

Wan hedima u wosudendu, di dë wan Keesitu sëmbë, ta si di sölugu di a musu sölugu dee sëmbë fëën wosudendu kuma wan gaan fanöudu soni. Ee i da wan hedima u wosudendu, a kan taa i bi ta booko i hedi taa ja bi o sa feni soni u njan da dee sëmbë fii möön, nasö taa ja bi o sa feni wan kamian u de libi. A kan taa i bi ta booko i hedi tu taa ee i bi lasi di wooko fii, nöö ja bi o sa feni wan wotowan möön. Kandë i ta si kuma ja o sa libi ku möön biti möni. Wë u di so sëmbë bi ta fii sö, mbei Saatan feni di okasi u tapa de u de an dini Jehovah möön. Saatan kë fuu biibi taa Jehovah an ta booko hën hedi ku u, söseei taa an o heepi u fuu sölugu dee sëmbë fuu. Te u kaba fëën, nöö u sa si kuma u musu du hii soni di u sa du, fu wa lasi di wooko fuu, aluwasi ee de taki taa u musu du wan soni di sa mbei taa u ku Jehovah an dë mati möön. w22.06 bld. 15 pal. 5-6

U sabi taa di Gadu fuu „abi tjalihati u sëmbë, nöö a lobi sëmbë tu. Hati fëën an ta boonu hesi, a abi bunuhati pasa maaka, nöö hii juu a ta du dee soni dee a ta taki” (Ëki. 34:6). Jehovah lobi letilibi (Jes. 61:8). A ta hati ën te a ta si fa u ta pena. Fëën mbei a ta wakiti di ten ka a o puu hii dee soni dee ta mbei u ta pena (Jel. 29:11). Useei ta wakiti u di ten dë dou tu! Di soni aki da wan u dee soni di ta mbei taa u lobi Jehovah gaanfa seei. Andi da wan woto soni di ta mbei u lobi di tuutuu lei? Wë di tuutuu lei ta mbei u feni gaan bunu. Dee tuutuu lei dee dë a Bëibel ta lei u taa soni o waka bunu da u a di ten di ta ko. Leti kumafa wan hanka ta heepi wan boto faa hoi gingin a wan kamian, sö nöö dee soni di di Bëibel ta paamusi u ta heepi u fuu taapu gingin te fuka ta miti u. A di tëkisi u tide, di apösutu Paulosu bi ta taki u di soni aki, nöö a bi ta taki u di libi di dee salufuwan o go libi a liba ala. Ma dee sëmbë dee o libi a di Paladëisi a goonliba aki seei, sa feni wini u di soni di a bi taki tu (Joh. 3:16). Di sabi di u sabi taa woo sa libi u teego, ta mbei taa u ta si di libi fuu kuma wan gaan fanöudu soni. w22.08 bld. 14-15 pal. 3-5

Lobi hën ta mbei u ta futoou wotowan. Wan Kolenti kapitë 13 ta lei u dee peipei fasi di lobi ta mbei sëmbë ko abi, di sa heepi u fuu ko ta futoou wotowan, nasö fuu ko ta futoou wan sëmbë baka (1 Kol. 13:4-8). Vers 4 ta taki taa ’ee i lobi wan sëmbë, joo ta hoi pasensi dëën. Joo ta fii ku ën’. Jehovah ta hoi pasensi da u, hii fa u ta du zöndu. Fëën mbei useei musu abi pasensi ku dee baaa ku dee sisa fuu te de du wan soni di hati u. Vers 5 ta taki taa: „Ee i lobi wan sëmbë, hati fii an o ta boonu ku ën hesihesi, nöö ja o ta hoi ën a bëë tu.” Wa bi o kë ta hoi dee baaa ku dee sisa fuu a bëë, u di de du wan soni di hati u. Peleikima 7:9 ta taki taa „ja musu dë wan sëmbë di hati fii ta boonu hesi”. Pooba u si dee baaa ku dee sisa fii kumafa Jehovah ta si de. Gadu lobi de, nöö an ta buta pakisei a dee föutu u de. Nöö fëën mbei u seei an musu ta du sö tu (Ps. 130:3). Ka fii ta buta pakisei a dee föutu u de, si dee bunu fasi u de.​—Mat. 7:1-5. w22.09 bld. 3-4 pal. 6-7

Di buku u Daniëli ta lei u unfa soni o waka a di pisiten u di kaba. Daniëli 12:1 ta taki taa Mikaëli, nasö Jesosi Keesitu, „ta hopo du soni u heepi dee sëmbë [u Gadu]”. Di pisi u di tjabukama woto aki bigi pasa tuutuu a di jaa 1914, di Jesosi toon Könu u di Könuköndë u Gadu di dë a liba ala. Ma de bi piki Daniëli tu taa Jesosi bi o „hopo du soni” a „wan taanga ten” di bi o ko. Nöö „sensi di ten di di fosu nasiön sëmbë bi ko dë, te dou di ten dë, nöiti sö wan fuka bi ko jeti”. Di „taanga ten” dë da di „gaan fuka” di Mateosi 24:21 ta taki soni fëën. Jesosi ta hopo du soni u heepi dee sëmbë u Gadu a kaba pisi u di taanga ten dë, hën da na Amagedon. Di buku Akoalimbo ta taki taa dee sëmbë aki dë wan gaan kulupu sëmbë di „pasa di gaan hogi sitaafu”.​—Ako. 7:9, 14. w22.09 bld. 21 pal. 4-5

Dee në dee sikifi a di buku u libi nöunöu sa feki puu nëën baka. A dë kuma Jehovah sikifi dee në aki ku wan pötuloutu (Ako. 3:5). U musu mbei hii möiti u di në fuu an feki puu a di buku dë, u te di ten dou taa di në fuu sikifi ku pëni nëën u teego. Dee sëmbë dee në sikifi a di buku u libi da dee sëmbë dee Gadu tei u go tii makandi ku Jesosi a liba ala. Dee soni dee Paulosu bi piki „dee wotowan” dee hën ku de bi ta wooko makandi a Filipi, ta lei u taa dee në u dee salufuwan dee o tii makandi ku Jesosi a liba ala dë sikifisikifi a di Buku u Libi kaa (Fil. 4:3). Ma ee de kë taa në u de musu fika a di buku dë, nöö de musu hoi deseei a Jehovah go dou. Nöö baka te de feni di lasiti sitampu, ufö në u de o sikifi a di buku dë u teego. Di soni aki o pasa ufö de lasi libi, nasö ufö di gaan fuka bigi.​—Ako. 7:3. w22.09 bld. 14-15 pal. 3; bld. 15 pal. 5-6

Te i ta lesi di Wöutu u Gadu, nöö a bunu fii buta pakisei a dee soni dee i ta lesi. A bi pasa ku i kaa taa wan sëmbë bi boi wan soni di i lobi gaanfa seei, hën i biinga njan mën hesihesi söndö fii fii suti fëën u? Wë a kan taa a bi pasa sö, u di ja bi abi hia ten, nasö u di i bi ta pakisei woto soni. Ma baka di i kaba njan, hën i bi ko fusutan taa i bi njan di soni hesi poi, nöö a hati i taa ja bi tei i ten u njan di soni bumbuu. Wë sö nöö a sa pasa te u ta lesi di Bëibel. So juu u ta lesi ën hesi poi, nöö wa ta feni pasi u buta pakisei a di soni di u ta lesi. Tei i ten te i ta lesi di Wöutu u Gadu. Pakisei unfa soni bi sa dë, pakisei unfa dee sëmbë bi ta fan, söseei kai pakisei a dee soni dee i lesi. Te i ta du dee soni aki, nöö möönmöön joo ta dë waiwai. Jesosi buta „di köni saafu di dë u futoou” u da u soni u njan a di së u di biibi, nöö de ta du di wooko u de bunu seei (Mat. 24:45). De ta wooko ku di Bëibel u lei u soni u Jehovah.​—1 Tes. 2:13. w22.10 bld. 7-8 pal. 6-8

Di Bëibel bi piki u taa a dee lasiti daka gaan hia mbeisëmbëfama bi o dë (2 Pet. 3:3, 4). De ta du di soni aki, u di de ta waka „a dee taku kë u de hati” baka (Jud. 7, 17, 18). Unfa u sa mbei möiti fu wa ko dë kuma dee mbeisëmbëfama? Wan fasi fa u sa du di soni aki, hën da te wa ta nama ku sëmbë di ta kuutu u hiniwan pikipiki soni hedi (Ps. 1:1). Di soni aki kë taki taa wa o ta haika nasö lesi soni u dee sëmbë dee bia baka da di biibi. U musu köni taa wa ta bigi ta kuutu hiniwan soni, u di a sa mbei wa ta futoou Jehovah möön ku dee soni di di ölganisaasi fëën ta piki u fuu du. Fëën mbei u musu hakisi useei taa: ’Mi ta kuutu hiniwan juu te de hakisi u fuu du soni wan woto fasi ö? Mi ta suku föutu a dee baaa dee ta tei fesi ö?’ Ee u ta dë kabakaba u tapa wantewante ku dee soni aki, nöö Jehovah o feni u u bunu.​—Nöng. 3:34, 35. w22.10 bld. 20 pal. 9-10

Di jeje u Gadu bi da Ezekiëli di taanga di a bi abi fanöudu. A bi dëën taanga faa peleiki da dee sëmbë u di pisiwata ka a bi dë, dee bi abi „taanga jesi” (Eze. 3:7). Jehovah bi piki Ezekiëli taa: „Mi mbei di fesi fii ko taanga kuma di u de, söseei mi mbei mindifesi fii ko taanga kuma di u de. Mi mbei mindifesi fii ko kuma djamati sitonu. Awa, mi mbei a ko möön taanga möön di möön taanga sitonu di dë. Ja musu fëëë de, söseei ja musu tëëmë te i si de fesi” (Eze. 3:8, 9). A bi dë kuma Jehovah bi ta piki Ezekiëli taa: ’Na mbei di abi di dee sëmbë aki abi taanga jesi, mbei i fii bookosaka e. Mi o da i taanga. Baka di dë, di jeje u Gadu bi heepi Ezekiëli go dou ku di peleikiwooko. A bi taki taa: „Jehovah bi dë ku mi.” A bi tei wan wiki u di tjabukama aki fusutan di buka di Jehovah bi dëën faa paaja (Eze. 3:14, 15). Te u kaba fëën, hën Jehovah piki ën faa go a wan lagi kamian, nöö ala di jeje u Gadu bi ko nëën liba (Eze. 3:23, 24). Ezekiëli bi sa bigi du diniwooko fëën awaa! w22.11 bld. 4 pal. 8-9

Sömëni soni bi miti di tjabukama de kai Habaki. A wan pisiten, a bi djei kuma an bi dë seiki möön ee Jehovah bi ta booko hën hedi ku ën. Fëën mbei a bi begi Jehovah, hën a bi konda hii soni di bi dë nëën hati dëën. Jehovah bi piki di begi u di futuboi fëën (Hab. 2:2, 3). Di Habaki bi pakisei unfa Jehovah bi heepi dee sëmbë fëën, hën a bi ko ta dë waiwai baka. A bi ko dë seiki taa Jehovah ta booko hën hedi ku ën, söseei taa a bi o heepi ën faa hoi dou aluwasi un tesi ta miti ën (Hab. 3:17-19). Andi u sa lei a di soni aki? Wë te tesi ta miti i, nöö begi Jehovah, nöö i konda dëën unfa i ta fii. Baka di dë, nöö i dëën pasi faa heepi i. Te i du sö, nöö i sa dë seiki taa Jehovah o da i di kaakiti di i abi fanöudu fii sa hoi dou. Te i ko si taa a dë ku i tuutuu, nöö di biibi fii o ko möön taanga. Ee ja disa u du dee soni dee i musu ta du a di biibi go dou, nöö dee tesi dee ta miti i an o sa paati i ku Jehovah.​—1 Tim. 6:6-8. w22.11 bld. 15 pal. 6-7

Jesosi ku dee tu hogiduma dee bi dë nëën bandja bi ta fii pen seei di de bi dë ta dëdë a dee posu (Luk. 23:32, 33). Dee tu hogiduma tuu bi ta mbei Jesosi fa (Mat. 27:44; Maik. 15:32). Ma wan u de bi tooka pakisei. A bi taki taa: „Jesosi o, mëni mi te i dë a di könuköndë fii e”. Hën Jesosi piki ën dee soni dee sikifi a di tëkisi u tide (Luk. 23:39-42). Dee soni dee Jesosi bi piki di hogiduma, musu mbei u pakisei unfa di libi o dë a di Paladëisi. U sa fusutan unfa di Paladëisi o dë, te u buta pakisei a di pisiten di Salumon bi dë Könu ta tii. Di Bëibel ta taki taa Jesosi hei möön Salumon. Nöö u sa dë ku di mëni taa a o wooko makandi ku dee woto sëmbë dee o tii makandi ku ën, u mbei di goonliba ko toon wan waiti paladëisi (Mat. 12:42). Dee „woto sikapu” musu kë sabi andi de musu du sö taa de sa libi u teego a di Paladëisi.​—Joh. 10: 16. w22.12 bld. 8 pal. 1; bld. 9 pal. 4

Jesaaja ta piki u taa Jehovah o haika bunu te u ta bai ta kai ën, söseei taa a o piki dee begi fuu wantewante. Jesaaja bi taki tu taa: „Te a jei di wolo fëën, nöö a o piki ën.” Di soni aki ta lei u gbelingbelin taa di Tata fuu dë kabakaba u heepi dee sëmbë dee ta suku heepi nëën. Di soni aki ta da u taanga fuu hoi dou ku wai. Wë u ta lei taa Jehovah ta haika dee begi u hiniwan fuu apaiti. Faandi mbei u sa taki sö? Hii fa Jehovah bi ta fan ku hii dee Isaëli sëmbë di a bi taki dee soni dee sikifi a Jesaaja kapitë 30, tökuseei a vers 19 a bi ta fan ku wan kodo sëmbë nöö. Jesaaja bi taki taa: „Ja o këë seepiseepi”, „a o du wan bunu da i nöömö”, „a o piki i.” U di Jehovah da wan Tata di lobi dee mii fëën, mbei a lobi hiniwan fuu, nöö a ta haika hiniwan fuu apaiti te u ta begi.​—Ps. 116:1; Jes. 57:15. w22.11 bld. 9 pal. 5-6

Te u ta du di peleikiwooko ta lei sëmbë soni u Bëibel hii fa sëmbë ta du ku u, nöö woo ta dë waiwai, söseei woo ta dë bööböö. A di ten u dee fesiten Keesitu sëmbë, dee heiheima u dee Dju bi piki dee apösutu u de disa u peleiki, ma dee apösutu bi buta taa de o piki Gadu buka. De bi peleiki go dou, nöö di soni dë bi mbei de bi ta dë waiwai (Tjab. 5:27-29, 41, 42). An dë u taki taa u musu ta du soni a wan köni fasi te de tapa di wooko fuu. Ma ee u ta mbei möiti u du andi u sa du, nöö woo ta dë bööböö u di u ta du soni di ta kai ku Jehovah, söseei u di u ta paaja wan buka di ta tjubi sëmbë libi. U sa dë seiki taa aluwasi gaan hogi soni ta miti u, tökuseei u sa ta dë bööböö. A dee pisiten dë u musu hoi a pakisei taa Jehovah seei hën ta da u di kötöhati dë. Suku heepi nëën te wan siki ko di ta paaja a di köndë ka i ta libi, te wan gaan hogi pasa, nasö te sëmbë ta du ku i. Wooko makandi ku di ölganisaasi fëën. Boiti di dë, kai pakisei a di suti libi di woo feni a di ten di ta ko. Te i ta du dee soni aki, nöö di Gadu di „ta kötö sëmbë hati o dë ku” i.​—Fil. 4:9. w22.12 bld. 21 pal. 17-18

U musu mbei taanga möiti fuu sa du di soni dë. U musu mbei möiti tu u hati fuu an ta boonu gaanfa poi, söseei fu wa ta hopo ligei te wan soni pasa (Ef. 4:31, 32). Faandi mbei dee soni aki sa dë wan taanga soni u du? Wë u di an ta dë wan kösökösö soni u tooka so u dee fasi dee u abi dee an bunu. Di Bëibel ta taki taa so sëmbë „hati ta boonu hesi” (Nöng. 29:22). Baka te u dopu seei u musu ta mbei möiti go dou u tooka dee fasi fuu dee an bunu (Lom.7:21-23). Begi Jehovah faa heepi i tooka dee fasi dee i abi dee an bunu, dee ta taanga da i fii disa. Nöö i musu dë seiki taa a o haika i, söseei taa a o heepi i (1 Joh. 5:14, 15). Hii fa Jehovah an o du wan foombo soni u puu dee fasi dë da i, tökuseei a sa da i di kaakiti di i abi fanöudu fii duwengi iseei (1 Pet. 5:10). Ma i musu ta mbei möiti tu fu ja du soni di sa mbei i bia ko ta du soni kuma fosu. Boiti di dë, mbei möiti fu ja pakisei soni di an fiti.​—Fil. 4:8; Kol. 3:2. w23.01 bld. 10 pal. 7, 9-10

Wan fasi fa u sa lei taa u lobi wotowan, hën da te u ta du di peleikiwooko fajafaja. U ta peleiki da hiniwan sëmbë di u ta miti. Wa ta luku ee de dë u wan woto köndë, nasö u wan woto föluku. Söseei wa ta luku ee de gudu, ee de pooti, ee de go a siköö nasö ee de an go a siköö. A di lö fasi aki u ta wooko makandi ku Jehovah, u di a kë taa „hii sëmbë u goonliba tuu musu feni tjubi, söseei u de ko sabi di tuutuu lei finifini” (1 Tim. 2:4). U ta lei tu taa u lobi Gadu ku Keesitu te u ta lei taa u lobi dee baaa ku dee sisa fuu. U ta booko u hedi ku de tuutuu, söseei u ta heepi de te tesi ta miti de. U ta da de kötöhati te wan sëmbë u de lasi libi, u nango luku de te de dë ku suwaki, söseei u ta mbei hii möiti u da de taanga te de ta fii bookosaka (2 Kol. 1:3-7; 1 Tes. 5:11, 14). U ta begi da de, u di u sabi taa ’te wan sëmbë ta libi bunu kumafa Gadu kë, nöö di begi fëën a ta begi Masa Gadu ta wooko gaan wooko’.​—Jak. 5:16. w23.01 bld. 28-29 pal. 7-8

Leti kumafa wan sëmbë di ta mbei wosu sa ko sa’ u du di wooko fëën möön bunu, sö nöö useei sa ko sa’ u da wotowan taanga möön bunu tu. U sa da wotowan taanga u de hoi dou te fuka ta miti de, te u ta konda woto u sëmbë di bi hoi dou da de (Heb. 11:32-35; 12:1). U sa libi fiifii ku wotowan te u ta buta pakisei a dee bunu fasi di de abi, te u ta seeka soni te wan toobi ko dë, söseei u sa ta libi fiifii ku wotowan aluwasi u ku de an ta si soni a di seei fasi (Ef. 4:3). U sa mbei di biibi u dee baaa ku dee sisa fuu ko möön taanga, te u ta konda soni u Bëibel da de, te u ta heepi de ku dee soni di de abi fanöudu, söseei te u ta heepi de te di biibi u de ko suwaki. Useei sa dë waiwai tu te u ta heepi dee baaa ku dee sisa fuu u di biibi u de ko möön taanga. Dee wosu dee u ta mbei ta booko baka wan pisiten, ma di heepi di u ta heepi wotowan, o ta tja wini ko da de u nöömö! w22.08 bld. 22 pal. 6; bld. 25 pal. 17-18

Jesosi bi taki taa u musu sa’ u wegi soni luku, fuu sa fusutan di Bëibel bumbuu (Mat. 24:15). Wan sëmbë di sa’ u wegi soni luku, sa fusutan unfa wan vers nama ku wan wotowan. A sa fusutan tu unfa dee soni dee a lesi nama ku dee soni dee a ta si ta pasa. Boiti di dë, Jesosi bi taki tu taa sö wan sëmbë sa fusutan te wan tjabukama woto u Bëibel ta pasa tuutuu. A dë fanöudu fuu ko sa’ u wegi soni luku, sö taa u sa feni wini tuutuu u hii dee soni dee u ta lesi a di Bëibel. Jehovah ta heepi dee dinima fëën u de ko sa’ u wegi soni luku. Fëën mbei a bunu fii begi ën, nöö i hakisi ën faa heepi i fii ko sa’ u du di soni aki. Unfa i sa lei taa i kë u Jehovah heepi i tuutuu? Wë i sa buta mëni a dee soni dee i ta lesi, nöö i luku unfa de nama ku dee soni dee i sabi kaa. Luku andi wan pisi u Bëibel kë taki, söseei luku unfa a sa heepi i fii sabi unfa i sa du di soni di i ko fusutan dë (Heb. 5:14). Te i ta wegi dee soni dee i ta lesi luku, nöö joo ko ta fusutan di Wöutu u Gadu möön bunu. w23.02 bld. 10 pal. 7-8

Boo taa wan mati fii da i wan wosu, nöö kulölu fëën puu a so kamian, söseei a ta kule a so kamian. Hii fa a dë sö, tökuseei di wosu aki dii sömëni milion Amëëkandala. Wë a musu u dë taa i bi o tei ën u bigi seei taa i abi sö wan soni, söseei i bi o mbei möiti fu an kaba a sösö. Sö nöö a dë ku di libi di Jehovah da u. A dë kuma wan gaan dii kado. Fuu taki ën kumafa a dë, nöö Jehovah lei unfa a kai di libi di a da u gaan soni tjika, u di a manda di Womi Mii fëën ko dëdë da u (Joh. 3:16). Jehovah hën da di Sëmbë di ta da libi (Ps. 36:9). Apösutu Paulosu seei bi ta biibi di soni dë, nöö fëën mbei a bi taki taa: „Hën ta da u libi, mbei u ta dë ta buli” (Tjab. 17:25, 28). Fëën mbei u sa taki taa di libi fuu da wan kado di Jehovah Gadu da u. A ta da u dee soni dee u abi fanöudu fuu sa dë a libi (Tjab. 14:15-17). Jehovah an ta du foombo soni u tjubi di libi fuu. Ma a kë taa u musu du soni fuu sa abi wan bunu gösöntu, söseei fuu sa dini ën go dou.​—2 Kol. 7:1. w23.02 bld. 20 pal. 1-2

U ta wai seei taa Jehovah Gadu da u di Bëibel! A di Bëibel Jehovah ta da u köni lai di ta heepi u ku dee bookohedi dee u abi a di ten aki. A paamusi u tu taa soni o waka bunu da u a di ten di ta ko. Ma di möön fanöudu soni, hën da Jehovah ta wooko ku di Bëibel u lei u unfa a dë tuutuu. Te u ta kai pakisei a dee fasi fëën, nöö woo ko ta möön lobi ën, söseei woo kë ko dë gaan mati fëën (Ps. 25:14). Jehovah kë taa sëmbë musu ko sabi ën. A di ten di pasa, a bi ta mbei sëmbë sunjan, a bi ta mbei de si wojolimbo sunjan, söseei a bi ta manda ëngëli u mbei sëmbë ko sabi soni fëën (Nöb. 12:6; Tjab. 10:3, 4). Ma wa bi o sa ko sabi soni u dee sunjan, dee wojolimbo sunjan, ku dee bosikopu di dee ëngëli bi tja ko, ee sëmbë an bi sikifi de buta a soni. Fëën mbei Jehovah mbei sëmbë „sikifi” dee soni dee a bi kë fuu ko sabi buta a buku. U di „di pasi u di tuutuu Gadu bunu te dou”, mbei u sa dë seiki taa di fasi fa a ta fan ku u bunu seei, söseei taa woo feni wini fëën.​—Ps. 18:30. w23.02 bld. 2 pal. 1-2

Buta maaka di sa tja wini ko da i. Buta maaka di sa heepi i fii ko abi wan möön taanga biibi, söseei di sa heepi i fii ko dë gaangaan sëmbë a di biibi (Ef. 3:16). Kandë i sa buta taa joo ta möön lesi di Bëibel, söseei taa joo ta möön öndösuku soni fëën (Ps. 1:2, 3). Nasö kandë i sa buta taa joo ta begi möön fa i bi guwenti, nöö joo ta du ën ku hii i hati. Kandë i musu ta köni ku dee soni dee i ta du u mbei piizii, söseei ku di fasi fa i ta wooko ku di ten fii (Ef. 5:15, 16). Joo ko dë gaangaan sëmbë a di biibi, te i ta heepi sëmbë a soni. Kandë i sa buta taa joo ta heepi dee gaan sëmbë, nasö dee sëmbë dee dë ku suwaki a di kemeente. Kandë i sa heepi de bai soni, nasö i sa heepi de ku dee tëlëfön nasö ku dee tablet u de. I ta lei taa i lobi dee sëmbë dee an dë a di kemeente jeti, te i ta paaja di bunu buka u di könuköndë da de (Mat. 9:36, 37). Ee a sa, nöö i sa mbei möiti fii du di hii-ten diniwooko. w22.08 bld. 6-7 pal. 16-17