Unfa Jehovah ta mbei u dë seiki taa a o mbei di goonliba ko toon wan paladëisi?

1. Andi Jesaaja bi kë lei dee woto Isaëli sëmbë?

DI TJABUKAMA Jesaaja bi taki taa Jehovah da „di tuutuu Gadu”. Di wöutu di de puu ko „tuutuu” kë taki „amen” (Jes. 65:16). „Amen” kë taki taa „a tan sö” nasö „sö a dë”. Te di Bëibel ta taki „amen” te a nama ku Jehovah ku Jesosi, nöö hën da a ta lei taa di soni di a taki dë da tuutuu soni. Hën da fuu taki ën, Jesaaja bi kë lei dee woto Isaëli sëmbë taa te Jehovah taki wan soni, nöö de sa dë seiki taa a o pasa tuutuu. Jehovah bi lei taa sö di soni dë dë tuu, u di a bi du hii dee soni dee a bi taki.

2. Faandi mbei u sa biibi taa Jehovah o du dee soni dee a paamusi u da di ten di ta ko, söseei un hakisi woo piki?

² U sa dë seiki taa Jehovah o du dee soni dee a paamusi u ö? Söwan 800 jaa baka di Jesaaja dëdë, hën apösutu Paulosu bi taki faandi mbei u sa dë seiki taa hii juu Jehovah o ta du dee soni dee a taki. Paulosu bi taki taa: „[Gadu] an sa ganjan u” (Heb. 6:18). Leti kumafa bunu wata ku satu wata an sa kule kumutu a di seei wata baaku, sö nöö mindimindi soni an sa kumutu a Jehovah buka, biga nëën tuutuu soni ta kumutu. Fëën mbei u sa biibi hii soni di Jehovah ta taki, te kisi dee soni dee a paamusi u taa a o du da u a di ten di ta ko. A di woto aki, woo piki dee hakisi aki: Andi Jehovah paamusi u taa a o da u a di ten di ta ko? Nöö unfa Jehovah mbei u dë seiki taa a o du dee soni dee a paamusi u?

ANDI JEHOVAH PAAMUSI U?

3. (a) Un soni di Gadu paamusi u, dee dinima fëën lobi seei? (Akoalimbo 21:3, 4) (b)  Andi so sëmbë ta du te u konda soni u di Paladëisi da de?

³ Woo taki u wan soni di Gadu paamusi u, di hii dee dinima fëën lobi seei. (Lesi Akoalimbo 21:3, 4.) Jehovah paamusi u taa wan ten o ko ka „dëdë an o dë möön. Na wan sëmbë o tjali nasö bai kai wolo, söseei pen an o de möön”. Sömëni fuu ta lesi di pisi u Bëibel aki da sëmbë te u ta peleiki da de. Andi so sëmbë ta du te u konda soni u di paladëisi da de? Wë kandë de ta taki taa: „Dee sëmbë! Ma da bunu hia sö u?”

4. (a) Andi Jehovah bi sabi taa bi o ta pasa a di ten fuu aki? (b) Andi Jehovah du, boiti di paamusi di a paamusi u soni da di ten di ta ko?

⁴ Di Jehovah bi mbei apösutu Johanisi sikifi fa di libi o dë a di Paladëisi, nöö a bi sabi taa u bi o ta konda di soni dë da sëmbë te u ta paaja di bosikopu u di Könuköndë. Jehovah bi sabi tu taa dee soni dee a paamusi u dë, bi o taanga da sömëni sëmbë u de biibi (Jes. 42:9; 60:2; 2 Kol. 4:3, 4). Wë nöö unfa u sa heepi wotowan u de ko dë seiki taa dee soni dee sikifi na Akoalimbo 21:3, 4 o pasa tuutuu? Nöö unfa useei sa ko möön dë seiki taa dee soni dë o pasa tuutuu? Na paamusi nöö Jehovah paamusi u dee soni dë, ma a du sömëni gaangaan soni u heepi u fuu sa dë seiki taa a o du de. Andi da dee soni dee a du?

JEHOVAH MBEI U DË SEIKI TAA A O DU DEE SONI DEE A PAAMUSI U

5. Un vers ta heepi u fuu biibi taa Jehovah o seti di Paladëisi, nöö andi dee vers dë ta taki?

⁵ Dee soni dee sikifi a di tëkisi a basu aki, ta heepi u fuu biibi taa Jehovah o seti di Paladëisi kumafa a paamusi u. A ta taki taa: „Di Sëmbë dë sindosindo a di könubangi naandë taki taa: ’Wan si ö? Mi ta mbei hii soni ko njunjun.’ A taki tu taa: ’Sikifi, biga dee soni mi ta taki aki da tuutuu soni, nöö sëmbë sa biibi de.’ Nöö hën a taki da mi taa: ’Dee soni aki pasa kaa! Mi da di Alufa ku di Omega, mi da di seti u hii soni ku di kaba fëën.’”​—Ako. 21:5, 6a.

6. Faandi mbei dee soni dee sikifi na Akoalimbo 21:5, 6 ta heepi u fuu dë seiki taa Gadu o du di soni di a taki?

⁶ Unfa di pisi u Bëibel aki ta heepi u fuu biibi dee soni dee Jehovah paamusi u? Di buku Openbaring ta taki wan soni u dee vers aki. A ta taki taa: „A dë kuma Jehovah seei bi ta naki sitampu a wan pampia da libisëmbë, u lei de taa a o du dee soni dee a paamusi de.”b Dee soni dee Gadu paamusi u sikifi na Akoalimbo 21:3, 4. Ma a vers 5 ku 6, a dë kuma Jehovah ta naki sitampu a wan pampia, u heepi u fuu sa dë seiki taa dee soni dee a paamusi u o pasa tuutuu. Boo buta pakisei a di fasi fa Jehovah ta heepi u fuu dë seiki taa a o du dee soni dee a taki.

7. Ambë ta fan a vers 5, nöö faandi mbei di soni aki dë fanöudu?

⁷ Vers 5 ta bigi ku dee wöutu aki: „Di Sëmbë dë sindosindo a di könubangi naandë taki taa” (Ako. 21:5a). Di soni di sikifi a di pisi aki dë fanöudu, u di dii pasi nöö Jehovah seei ta fan a di buku Akoalimbo, nöö disi da wan u de. Hën da na Jesosi nasö wan ëngëli hën taki dee soni aki, ma Jehovah seei hën taki de! Di soni aki ta lei u taa u sa biibi dee soni dee a taki. Faandi mbei u taki sö? Wë u di Jehovah „an ta lëgëdë” (Tit. 1:2). Di soni aki ta mbei u dë seiki taa dee soni dee sikifi na Akoalimbo 21:5, 6 da tuutuu soni.

„WAN SI Ö? MI TA MBEI HII SONI KO NJUNJUN”

8. Andi Jehovah taki u lei taa dee soni dee a paamusi u o pasa tuutuu? (Jesaaja 46:10)

⁸ Jehovah bi taki tu taa: „Wan si ö?” (Ako. 21:5) Di Giiki wöutu di de puu ko „wan si ö?”, sikifi sömëni pasi a di buku Akoalimbo. Wan buku ta taki taa de wooko ku di wöutu dë „u heepi di sëmbë di ta lesi di Bëibel faa sa buta pakisei a di soni di o ko baka di dë”. Wë andi Gadu bi taki baka di dë? A bi taki taa: „Mi ta mbei hii soni ko njunjun.” A dë sö tuu taa a di pisi aki Jehovah ta taki u soni di musu pasa jeti. Ma a ta taki u dee soni dë kuma de ta pasa a di pisiten di a ta fan dë, u di a dë seiki taa dee soni dë o pasa tuutuu.​—Lesi Jesaaja 46:10.

9. (a) Andi dee wöutu „mi ta mbei hii soni ko njunjun” ta lei u taa Jehovah o du? (b) Andi o pasa ku di „mundu” ku di „goonliba” di dë nöunöu aki?

⁹ Boo buta pakisei a wan woto pisi u Akoalimbo 21:5, ka sikifi taa: „Mi ta mbei hii soni ko njunjun.” Di pisi aki ta taki u tu soni di Jehovah o du: A o tooka soni, söseei a mbei soni ko njunjun. Ma andi a o tooka? Akoalimbo 21:1 ta taki taa: „Di fosu mundu ku di fosu goonliba an dë möön.” „Di fosu mundu” aki, da dee tii u di goonliba aki, di dë a Saatan ku dee taku jeje fëën basu (Mat. 4:8, 9; 1 Joh. 5:19). Nöö te di Bëibel ta taki u di wöutu „goonliba”, nöö a sa nama ku dee sëmbë dee ta dë a goonliba aki (Ken. 11:1; Ps. 96:1). Hën da fuu taki ën, dee wöutu „fosu goonliba”, nama ku dee hogihati sëmbë u di ten aki. Jehovah an o seeka di „mundu” ku di „goonliba” di dë nöunöu aki. Ma a o puu de seei a pasi, nöö a o buta wotowan a de kamian. A o buta „wan njunjun mundu ku wan njunjun goonliba” a de kamian. Hën da a o buta wan njunjun tii ko, söseei a o buta sëmbë di o ta saka deseei a di tii dë basu.

10. Andi Jehovah o mbei ko njunjun?

¹⁰ Na un woto fasi Jehovah o mbei hii soni ko njunjun? (Ako. 21:5) Jehovah o seeka di goonliba ko bunu baka, söseei a o heepi libisëmbë u de ko dë söndö föutu. Jehovah o mbei hii di goonliba ko hanse kuma di djai u Eden. Söseei a o heepi hiniwan fuu, fuu ko dë söndö föutu. A sö wan fasi a o dë kuma a tooka hiniwan fuu buta ko njunjun. A o kula dee lanma, dee bookowojoma, ku dee bookojesima, söseei a o weki dee sëmbë dee bi dëdë ko a libi baka.​—Jes. 25:8; 35:1-7.

„DEE SONI MI TA TAKI AKI DA TUUTUU SONI, NÖÖ SËMBË SA BIIBI DE. . . . DEE SONI AKI PASA KAA!”

11. Andi Jehovah piki Johanisi faa du, nöö faandi mbei a piki ën faa du di soni dë?

¹¹ Un woto soni ta lei taa Gadu o du dee soni dee a paamusi u? Jehovah bi piki Johanisi taa: „Sikifi, biga dee soni mi ta taki aki da tuutuu soni, nöö sëmbë sa biibi de” (Ako. 21:5). Na piki nöö Jehovah bi piki Johanisi faa „sikifi” dee soni dee a bi taki, ma bi piki ën faandi mbei a bi musu sikifi de. A bi taki taa: „Biga dee soni mi ta taki aki da tuutuu soni, nöö sëmbë sa biibi de.” Hën da u sa a’ futoou a dee soni dee Gadu taki. U ta tei ën u bigi seei taa Johanisi bi „sikifi” dee soni dee Gadu piki ën faa sikifi. Di soni dë mbei taa u sa feni dee soni dee Gadu paamusi u lesi, söseei u sa kai pakisei a dee gaan bunu dee woo feni a di Paladëisi.

12. Faandi mbei Jehovah taki taa: „Dee soni aki pasa kaa!”

¹² Andi Jehovah bi taki baka di dë? A bi taki taa: „Dee soni aki pasa kaa!” (Ako. 21:6) A di pisi aki, Jehovah ta fan kuma hii dee soni dee a taki u di Paladëisi pasa kaa. Nöö a sa fan sö, u di soni an dë di sa tapëën faa du dee soni dee a abi a pakisei u du. Ma Jehovah bi taki wan woto soni tu, u heepi u fuu sa dë seiki taa a o du dee soni dee a paamusi u. Andi a bi taki?

„MI DA DI ALUFA KU DI OMEGA”

13. Faandi mbei Jehovah bi taki taa: „Mi da di Alufa ku di Omega”?

¹³ Kumafa u bi taki kaa, nöö Jehovah seei bi fan ku Johanisi dii pasi a di wojolimbo sunjan (Ako. 1:8; 21:5, 6; 22:13). Nöö hii dee dii pasi dë tuu Jehovah bi taki taa: „Mi da di Alufa ku di Omega.” Alufa da di fosu lëtë u di alfabet a Giikitöngö, nöö omega da di lasiti lëtë fëën. Jehovah bi taki taa hën da „di Alufa ku di Omega”, u di a bi kë heepi u fuu fusutan taa te a bigi wan soni, nöö u sa dë seiki taa a o kabëën tu.

14. (a) Konda na un ten u sa taki taa Jehovah bi taki „Alufa”, nöö na un ten a o taki „Omega”? (b) Andi Jehovah bi taki a Kenesesi 2:1-3, u lei taa di soni di a bi abi a pakisei bi o pasa tuutuu?

¹⁴ Baka di Jehovah mbei Adam ku Eva, hën a piki de andi a bi abi a pakisei da libisëmbë ku di goonliba. Di Bëibel ta taki taa: „Gadu wensi bunu da de. Hën Gadu piki de taa: ’Un pai miii be un ko hia, be un fuu di goonliba, nöö un musu dë basi fëën e’” (Ken. 1:28). Di Jehovah bi piki de u di fosu pasi andi a bi abi a pakisei u du, nöö a bi dë kuma a bi taki taa: „Alufa”. Wan ten o ko ka dee bakamii u Adam ku Eva dee ta piki Gadu buka an o abi zöndu möön, söseei de o mbei di goonliba aki ko toon wan paladëisi. A di ten dë, nöö a o dë kuma Jehovah taki taa: „Omega.” Di Jehovah kaba mbei „liba ala ku goonliba aki, ku hii dee soni dee dë a liba ala ku goonliba aki”, hën a taki wan soni u lei taa di soni di a bi abi a pakisei bi o pasa tuutuu. Di soni dë sikifi a Kenesesi 2:1-3. (Lesi ën.) Jehovah bi taki taa di u seibi daka bi dë wan santa daka dëën. Andi di soni dë kë taki? Jehovah bi lei taa a o du di soni di a bi abi a pakisei da libisëmbë ku di goonliba aki, söndö u soni tapëën. A kaba u di u seibi daka, nöö a o kaba u du hii dee soni dee a bi abi a pakisei.

15. Faandi mbei a bi sa djei kuma Saatan bi tapa Jehovah faa du di soni di a bi abi a pakisei da libisëmbë?

¹⁵ Di Adam ku Eva pasa Jehovah buka, hën de ko dë zöndu libisëmbë, söseei de tja zöndu ku dëdë ko da dee bakamii u de (Lom. 5:12). Di soni dë bi mbei a ko djei kuma Saatan bi tapa Jehovah faa du di soni di a bi abi a pakisei. Nöö a sö wan fasi di goonliba an bi o sa ko fuu ku sëmbë di an abi zöndu, söseei di ta piki Jehovah buka. Saatan bi sa tapa Jehovah faa du di soni di a bi paamusi libisëmbë u? Wë Saatan bi sa ta mëni sö. Wan soni di Jehovah bi sa du u mbei soni waka kumafa a kë, hën da a bi sa kii Adam ku Eva, nöö a toona mbei wan woto womi ku wan woto mujëë u du di soni di a bi abi a pakisei da libisëmbë. Ma ee a bi du sö, nöö Saatan bi o sa taki taa a dë wan mindisonima. Faandi mbei u taki sö? Wë u di Jehovah bi piki Adam ku Eva taa dee bakamii u de bi o fuu di goonliba, kumafa a sikifi a Kenesesi 1:28.

16. Faandi mbei Saatan bi sa mëni taa a bi o sa taki taa Jehovah an du di soni di a bi taki?

¹⁶ Na un woto fasi Saatan bi sa mëni taa Jehovah bi o kë du soni? A kan taa Saatan bi pakisei taa Jehovah bi o da Adam ku Eva pasi u de pai miii, ma kandë a bi ta pakisei taa dee mii u de an bi o sa ko dë sëmbë di an abi zöndu (Peleik. 7:20; Lom. 3:23). Ma ee soni bi waka sö, nöö a kan taa Didibi bi o taki taa Jehovah an bi du soni kumafa a bi taki. Faandi mbei u taki sö? Wë u di di soni dë an bi o mbei taa di goonliba ko fuu ku sëmbë di an abi zöndu, söseei di ta piki Jehovah buka, kumafa Jehovah bi kë.

17. Unfa Jehovah bi seeka soni baka di Saatan ku dee fosu libisëmbë bi hopo fia ku ën, nöö andi o pasa te u kaba fëën? (Luku di peentje tu.)

¹⁷ Jehovah bi du soni a wan fasi di Saatan an bi mëni baka di Saatan ku dee fosu libisëmbë hopo fia ku ën (Ps. 92:5). Jehovah bi lei taa an dë wan mindisonima, u di a bi da Adam ku Eva pasi u de pai miii. Jehovah bi lei tu taa te a taki taa a o du wan soni, nöö soni an sa tapëën fu an du ën. A bi seeka soni sö taa a bi sa du di soni di a bi abi a pakisei u du. A bi o mbei de pai wan mii, di bi o puu dee bakamii u Adam ku Eva a zöndu ku dëdë basu (Ken. 3:15; 22:18). A bi musu bigi da Saatan seei di a si fa Jehovah bi seeka soni u puu libisëmbë a zöndu ku dëdë basu! Faandi mbei u taki sö? Wë u di lobi hën mbei Jehovah du di soni dë (Mat. 20:28; Joh. 3:16). Saatan hën an saandi da lobi, hënseei nöö a ta pakisei. Wë nöö andi o pasa u di Jehovah paka di lusupaima da u? A kaba u di Dusu Jaa Tii, nöö dee bakamii u Adam ku Eva o dë söndö föutu, de o ta piki Jehovah buka, söseei de o dë a wan paladëisi a goonliba aki, leti kumafa Jehovah bi abi a pakisei bigibigi. A di ten dë, a o dë kuma Jehovah o taki taa: „Omega.”

U SA KO TA MÖÖN BIIBI TAA JEHOVAH O MBEI DI GOONLIBA KO TOON WAN PALADËISI

18. Andi da dii soni di Gadu du u mbei u dë seiki taa a o du di soni di a paamusi u? (Luku di pisi „Dii soni di mbei u sa dë seiki taa Gadu o du di soni di a paamusi u”.)

¹⁸ Te u luku dee soni dee u taki a di woto aki, nöö unfa u sa heepi wotowan u de sa biibi taa Gadu o mbei di goonliba ko toon wan paladëisi tuutuu? Wë di fosu soni, hën da Jehovah seei hën paamusi u di soni dë. Di buku Akoalimbo ta taki taa: „Di Sëmbë dë sindosindo a di könubangi naandë taki taa: ’Wan si ö? Mi ta mbei hii soni ko njunjun.’” Jehovah abi di köni ku di makiti u du di soni di a paamusi, söseei a kë du ën tu. Di u tu soni, hën da Jehovah ta si kuma di soni di a taki pasa kaa, u di a dë seiki taa soni o pasa kumafa a taki. Fëën mbei a bi taki taa: „Dee soni mi ta taki aki da tuutuu soni, nöö sëmbë sa biibi de. . . . Dee soni aki pasa kaa!” Di u dii soni, hën da te Jehovah bigi wan soni, nöö a ta du ën u te a kabëën. Fëën mbei a bi taki taa: „Mi da di Alufa ku di Omega.” Jehovah o lei taa Saatan da wan mindisonima, di an sa tapëën faa du di soni di a abi a pakisei u du.

19. Andi i sa du te a ta taanga da sëmbë u de biibi taa Jehovah o mbei di goonliba ko toon wan paladëisi, kumafa a paamusi u?

¹⁹ Hoi a pakisei taa te i ta konda da sëmbë andi Jehovah du u heepi u fuu dë seiki taa a o mbei di goonliba ko toon wan paladëisi, nöö iseei ta ko möön dë seiki fëën tu. Wë nöö andi i sa du ee a toona ko pasa taa i lesi Akoalimbo 21:4 da wan sëmbë, u lei ën taa di Paladëisi o ko, hën a taki taa: „Dee sëmbë! Ma da bunu hia sö u?” Wë kandë i sa lesi vers 5 ku 6 dëën, nöö i booko de dëën a piki möni. Heepi ën be a si taa a dë seei kuma Jehovah naki sitampu a wan pampia liba gbai, u mbei u dë seiki taa a o du di soni di a paamusi u.​—Jes. 65:16.