I musu nango a fesi nöömö a di biibi

I lei sömëni soni u Jehovah, sensi di i bigi lei soni u Bëibel. Dee soni dee i lei mbei i ko lobi ën seei, nöö a kan taa i buta i libi nëën maun hën i dopu. Ee ja du ën jeti, nöö kandë i ta pakisei u du ën a di ten di ta ko. Baka te i dopu, nöö a dë fanöudu jeti fii nango a fesi a di biibi. I sa ta ko möön zuntu ku Jehovah hiniwan daka. Andi i musu du?

1. Faandi mbei i musu mbei möiti go dou fii ku Jehovah ko dë möön gaan mati?

U musu ta mbei möiti go dou fuu ku Jehovah ko dë möön gaan mati. Faandi mbei? A sö wan fasi, nöö „wa o bia baka kumutu disa di libilibi Gadu’’ (Hebelejën 3:12). Andi sa heepi u fuu dini Jehovah ku hii u hati go dou? U musu ta du di peleikiwooko fajafaja, söseei u musu suku woto fasi fuu sa du möön soni a di dini u Jehovah. (Lesi Filipi 3:16.) Di dini di u ta dini Jehovah da di möön bunu soni di u sa du ku u libi!​—Psalöm 84:10.

2. Andi da dee woto soni dee u musu ta du nöömö?

Hii fa ja o lei soni u Bëibel ku di buku aki möön, ma di libi fii kuma wan Keesitu sëmbë nango dou jeti. Di Bëibel ta piki u taa: „u musu ko dë njunjun sëmbë di abi njunjun fasi” (Efeise 4:23, 24). Te i ta öndösuku soni a di Wöutu u Gadu, söseei te i nango a dee komakandi, nöö joo ko lei sömëni njunjun soni u Jehovah ku dee fasi fëën. Luku andi ku andi i sa du fii sa möön djeesi Jehovah a dee fasi fëën. Nöö tooka soni a i libi di dë fanöudu u Jehovah sa ta wai ku i.

3. Unfa Jehovah o heepi i fii nango a fesi nöömö a di biibi?

Di Bëibel ta taki taa: „Gadu . . . o lei unu soni. A o mbei un ko taanga gingin a di biibi, kuma wan sitonu posu di an sa hön kai” (1 Petuisi 5:10). Hii u tuu ta kisi di fii so juu u du soni di an bunu. Ma Jehovah ta da u dee soni dee u abi fanöudu u heepi u fu wa du soni di an bunu (Psalöm 139:23, 24). Jehovah paamusi u taa a o da u di taanga ku di kaakiti di u abi fanöudu fuu sa dini ën ku hii u hati.​—Lesi Filipi 2:13.

WOTO SONI DI I SA LEI

4. I musu ta fan ku di möön gaan mati fii

Di begi di i bi ta begi ku di lei di i bi ta lei soni u Bëibel heepi i fii ku Jehovah ko dë mati. Unfa dee soni aki sa heepi i fii ku ën ko dë möön gaan mati?

Lesi Psalöm 62:8, nöö piki di hakisi aki:

• Ee i kë ko dë möön gaan mati ku Jehovah, nöö andi i sa du fii sa ta begi ën möön bunu?

Lesi Psalöm 119:97, nöö piki di hakisi aki:

• Ee i kë ko dë möön gaan mati ku Jehovah, nöö andi i sa du fii ta möön feni wini u di lesi di i ta lesi Bëibel?

Andi i sa du fii ta möön feni wini te i ta lei soni u Bëibel? Luku di fëlön aki fii si andi da wantu soni di i sa du. Pëë di FËLÖN, nöö piki dee hakisi aki.

FËLÖN: Lei soni u Bëibel möön bunu (5:22)

• Undi u dee soni di de taki a di fëlön i kë du?

• Un woto i bi o kë öndösuku soni fëën finifini?

5. Luku unfa i sa du möön soni da Jehovah

Dee soni dee i abi a pakisei u du a di dini u Jehovah sa heepi i fii nango a fesi a di biibi. Pëë di FËLÖN, nöö piki di hakisi aki.

FËLÖN: Di möön bunu libi di dë (3:31)

• Un wini Cameron bi feni u di a bi kë du möön hia soni a di dini u Jehovah?

Na hii sëmbë sa foloisi go a wan woto köndë u go peleiki. Ma hii u tuu sa du soni di u si taa u sa du da Jehovah. Lesi Lukasi 14:28, nöö luku unfa i sa du möön hia soni a . . .

• di kemeente.

• di peleikiwooko.

Unfa di mama wëti di sikifi a di tëkisi aki sa heepi i fii du dee soni dee i kë du?

Wantu soni di i sa du

• Te i ta begi, nöö konda hii soni di dë a i hati da Jehovah.

• Lesi hii di Bëibel.

• Ko sabi hii dee sëmbë a di kemeente.

• Suku sëmbë di i sa ta lei soni u Bëibel.

• Du di heepi pioniliwooko nasö di kowoonu pioniliwooko.

• Ee i da wan baaa, nöö mbei möiti u toon wan dinai.

ANDI I LEI?

I musu mbei möiti go dou fii ku Jehovah ko dë möön gaan mati, söseei fii du möön soni a di dini fëën. Nöö joo sa ta dë waiwai u teego!

Andi i bi o piki?

• Faandi mbei i sa dë seiki taa Jehovah o heepi i fii sa dini ën ku hii i hati?

• Andi i sa du fii ku Jehovah sa ko dë möön gaan mati?

• Unfa di mbei di joo ta mbei möiti u du möön hia soni a di dini u Jehovah o heepi i fii ku ën ko dë möön gaan mati?

WOTO SONI DI I SA LUKU

Luku di fëlön aki fii si andi Jehovah ta möön tei u bigi. Te u du wan gaan soni wan pasi nöö u lei taa u ta dini ën, naa te u ta dini ën ku hii u hati hiniwan daka?

Hoi iseei a Jehovah leti kuma Abahamu (9:20)

Luku di fëlön aki fii si taa so juu sëmbë di taanga a di biibi seei sa lasi di piizii u de a di dini u Jehovah. Ee sö wan soni ta miti i, nöö luku andi i sa du fii sa dini Jehovah ku piizii baka.

Ko dë ku piizii baka u di i ta lei iseei soni u Bëibel, söseei u di i ta pakisei fundu u dee soni dee i ta lei (5:25)

Lesi di woto aki fii si un soni i sa du a di dini u Gadu, nöö luku andi sa heepi i fii sa du de.

„Poti yeye marki fu man gi glori na yu Mekiman” (A Waktitoren, 15 u baimatu-liba 2004)

Lesi di woto aki fii si faandi mbei a dë fanöudu u abi wan taanga biibi, nöö luku andi i sa du fii ko abi ën.

„Du muiti fu tron lepi sma, fu di ’a bigi dei fu Yehovah de krosibei’” (A Waktitoren, 15 u sebitaa-liba 2009)